CIIYO 26
Nkaambo Nzi Ncokuli Bubi Akupenga?
Ciindi nokwacitika cintu cibyaabi, bantu balabuzya kuti: “Nkaambo nzi?” Eelo kaka cilakkomanisya kuti Bbaibbele lilawiingula kabotu-kabotu mubuzyo ooyu!
1. Mbuti Saatani mbwaakatalisya bubi munyika?
Saatani Diabolosi wakamuzangila Leza. Wakali kuyanda kweendelezya bamwi, aboobo wakoongelezya bantu bakusaanguna ba Adamu a Eva kuti bamusangane mubuzangi bwakwe. Saatani wakacita oobo kwiinda mukwaambila Eva makani aakubeja. (Matalikilo 3:1-5) Wakapa Eva kuyeeya kuti Jehova wakali kumwiima cintu cimwi cibotu. Wakali kwaamba kuti bantu balakonzya kukkomana kapati kuti kabatamumvwidi Leza. Saatani wakaamba makani aakubeja aakusaanguna kwiinda mukwaambila Eva kuti takonzyi kufwa. Nkakaambo kaako, Bbaibbele ncolyaamba Saatani kuti “mubeji alimwi ngousyi wabubeji.”—Johane 8:44.
2. Ncinzi ba Adamu a Eva ncobakasala kucita?
Jehova wakatondezya kuti mwaabi kapati kuli ba Adamu a Eva. Wakabaambila kuti bakali kukonzya kulya kuzisamu zyoonse izyakali mumuunda wa Edeni kunze buyo lyacisamu comwe. (Matalikilo 2:15-17) Pele bakasala kulya kucisamu eeco acaali. Eva “wakacela micelo kulincico akulya.” Kumane, Adamu “awalo wakalya.” (Matalikilo 3:6) Boonse bobilo tiibakamumvwida Leza. Akaambo kakuti ba Adamu a Eva bakalilondokede, cakali cuuba-uba kulimbabo kucita ciluzi. Pele kwiinda mukutamumvwida Leza acaali, bakabisya alimwi akukazya bweendelezi bwakwe. Ncobakasala kucita cakabaletela mapenzi.—Matalikilo 3:16-19.
3. Ino kusala kwaba Adamu a Eva kwakatujatikizya buti swebo?
Ciindi ba Adamu a Eva nobakabisya, bakaba bantu batalondokede alimwi kutalondoka ooko kwakabayambukila bana babo boonse. Kujatikizya Adamu, Bbaibbele lyaamba kuti: “Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.”—Baroma 5:12.
Tulapenga akaambo katwaambo twiindene-indene. Zimwi ziindi tulapenga akaambo kakusala kwesu kutaluzi. Zimwi ziindi tulapenga akaambo kakusala kwabamwi kutaluzi. Alimwi zimwi ziindi tulapenga akaambo kakuba abusena buteelede aciindi citeelede.—Amubale Mukambausi 9:11.
AMWIIYE ZINJI
Amubone kaambo Leza ncatali nguwe uupa kuti kakuli bubi akupenga munyika mazuba aano alimwi ambwalimvwa ciindi notupenga.
4. Uupa kuti katupenga
Bantu banji basyoma kuti Leza nguweendelezya nyika. Sena aayo masimpe? Atweebelele VIDIYO.
Amubale Jakobo 1:13 alimwi a 1 Johane 5:19, akubandika mubuzyo ooyu:
Sena Leza nguupa kuti kakuli bubi akupenga?
5. Amubone zintu izyacitika akaambo kabweendelezi bwa Saatani
Amubale Matalikilo 3:1-6, akubandika mibuzyo eeyi:
Makani nzi aakubeja ngaakaamba Saatani?—Amubone kapango 4 a 5.
Mbuti Saatani mbwaakatondezya mbuli kuti Jehova wakali kubaima cintu cimwi cibotu bantu?
Kweelana ancaakaamba Saatani, sena bantu bayandika kusololelwa a Jehova kutegwa bakkomane?
Amubale Mukambausi 8:9, akubandika mubuzyo ooyu:
Muciindi eeci Jehova ncaatali Mweendelezi wanyika, ncinzi cacitika?
Ba Adamu a Eva bakalilondokede alimwi bakali kukkala mu Paradaiso. Pele bakamvwida Saatani akuzangila Jehova
Nobakamana kuzanga, munyika kwakavwula bubi, kupenga alimwi alufwu
Jehova uyoobumana bubi, kupenga alimwi alufwu. Mpoonya bantu bayoolondoka alimwi akukkala mu Paradaiso
6. Jehova ulaabikkila maano mapenzi eesu
Sena Leza kuli mbwalimvwa kumapenzi eesu? Amubone Mwami Davida alimwi amwaapostolo Petro nzyobakalemba. Amubale Intembauzyo 31:7 alimwi a 1 Petro 5:7, akubandika mubuzyo ooyu:
Mbuti mbomulimvwa ikuzyiba kuti Jehova ulaabona mapenzi eesu alimwi akuti kuli mbwalimvwa kujatikizya ngawo?
7. Leza uyakwaamana mapenzi aabantu oonse
Amubale Isaya 65:17 alimwi a Ciyubunuzyo 21:3, 4, akubandika mubuzyo ooyu:
Nkaambo nzi ncocuumbulizya kuzyiba kuti Jehova uyoozigwisya zintu zyoonse zibyaabi izipenzya bantu mazuba aano?
Sena Mulizyi?
Ciindi Saatani naakaamba makani aakubeja aakusaanguna, wakabejekezya Jehova. Kwiinda mukucita boobu, wakanyonganya mpuwo ya Jehova yakuti Mweendelezi mubotu alimwi siluyando. Ciindi Jehova aakumanizya mapenzi aabantu ino-ino, uyoolisalazya zina lyakwe. Munzila imwi, uyootondezya kuti bweendelezi bwakwe mbobwiinda kubota. Kusalazyigwa kwazina lya Jehova ngamakani mapati aayandika mububumbo boonse.—Matayo 6:9, 10.
BAMWI BAAMBA KUTI: “Kupenga nkuyanda kwa Leza.”
Ino nywebo mwaamba buti?
MUBUFWAAFWI
Saatani Diabolosi alimwi abantu bobilo bakusaanguna mbebakapa kuti kakuli bubi akupenga munyika. Jehova ulaabikkila kapati maano mapenzi eesu alimwi lino-lino uyakwaamana.
Ncinzi Ncomwaiya?
Makani nzi aakubeja Saatani Diabolosi ngaakaambila Eva?
Mbuti buzangi bwaba Adamu a Eva mbobwakatujatikizya?
Ino tuzyi buti kuti Jehova ulaabikkila maano mapenzi eesu?
AMUZYIBE ZINJI
Amubone Bbaibbele mbolicipandulula cibi.
Amwiiye zinji kujatikizya kaambo Saatani Diabolosi nkaakatalisya mumuunda wa Edeni.
“Nkaambo Nzi Leza Ncalekelede Kupenga?” (Ngazi Yamulindizi, January 1, 2014)
Amubone bwiinguzi buumbulizya bwamubuzyo uukatazya kapati.
“Nkaambo Nzi Holocaust Ncoyakacitikila? Nkaambo Nzi Leza Ncaatakailesya?” (Cibalo caaintaneti)
Amubone mwaalumi umwi ncaakaiya kujatikizya mapenzi ngaakali kubona.