• Amuumvwisye Akuulemeka Mulimo Wa Jesu Uulibedelede Mumakanze Aa Leza
    Ngazi Yamulindizi—2008 | December 15

    • “Lunyungu” Lwakasinsimwa

      18. Ino mbusinsimi nzi bwakaambwa ciindi Adamu naakabisya, alimwi ino ncinzi cakazoozubululwa kujatikizya businsimi oobu?

      18 Mumuunda wa Edeni, nocakalibonya kuti bantu basweekelwa zyintu zyoonse—cilongwe cibotu a Leza, buumi butamani, lukkomano alimwi a Paradaiso—Jehova Leza wakasinsima kuti kuyooba Mufwutuli. Ooyu wakaambwa kuti “lunyungu.” (Matl. 3:15) Ilunyungu oolu lwatakazyibidwe lwakazooba mutwe wamakani wabusinsimi bunji bwamu Bbaibbele kwamyaka minji. Wakali kuzooba waluzubo lwa Abrahamu, Izaka alimwi a Jakobo. Alimwi, wakali kuyoozwa muzyalani lya Davida.—Matl. 21:12; 22:16-18; 28:14; 2 Sam. 7:12-16.

      19, 20. (a) Ino nguni uuli Ndolunyungu lwakasyomezyegwa? (b) Ino nkaambo nzi ncokukonzya kwaambwa kuti lunyungu lwakasinsimwa lulabikkilizya abantu bambi kunze lya Jesu?

      19 Ino nguni wakali Lunyungu oolu lwakasyomezyegwa? Bwiinguzi kumubuzyo ooyu bulakonzya kujanika kulugwalo lwa Ba-Galatiya 3:16. (Amubale.) Nokuba boobo, kumbele mucaandano ncicona eeci, mwaapostolo Paulo ulazumanana kwaambila Banakristo bananike kuti: “Nkabela mbuli mbumuli bakwe Kristo, muli inyungu zya-Abrahamu, aboobo muli baswaana mbubonya mbucaamba cisyomezyo.” (Gal. 3:29) Ino nkaambo nzi ncocaambwa kuti Kristo Ndolunyungu lwakasyomezyegwa kakuli kuli bantu bambi babikkilizyidwe?

      20 Tuulunzuma twabantu balyaamba kuti mbaluzubo lwa Abrahamu, bamwi akati kabo mane balipa mulimo wabusinsimi. Zikombelo zimwi zibikkila kapati maano kukulyaamba kuti basinsimi banzizyo mbaluzubo lwa Abrahamu. Pele sena boonse aaba Ndolunyungu lwakasyomezyegwa? Peepe. Kweelana ambwaakaamba mwaapostolo Paulo kwiinda mukusololelwa amuuya, tabali boonse baluzubo lwa Abrahamu ibakonzya kulyaamba kuti Ndunyungu lwakasyomezyegwa. Ibana babana ba Abrahamu bamwi taakwe nobakabelesyegwa kulongezya bantu pe. Lunyungu lwazilongezyo lwakali kuyoozwa muli Izaka alikke. (Heb. 11:18) Kumamanino, muntu omwe buyo, Jesu Kristo, walo zyalani lyakwe kuzwa kuli Abrahamu lilaambwa mu Bbaibbele, ngonguwe cibeela cakusaanguna calunyungu lwakasinsimwa.b Boonse bantu ibakazooba cibeela cabili calunyungu lwa Abrahamu bali boobu nkaambo kakuti “[mbi]bakwe Kristo.” Masimpe, mulimo wa Jesu mukuzuzikizya businsimi oobu ulilibedelede ncobeni.