Nkaambo nzi Ncotufwa?
“Atalaa malundu oonse kwaumuna lino, atalaa masamu oonse kunyina kuyoya kulimvwisya; ibayuni bawona mumasamu: lindila; lino-lino ayebo mboyoolyookezya mbuli zeezi.”—JOHANN WOLFGANG VON GOETHE, SIKWEEMA MUNA GERMAN.
1, 2. (a) Nkulombozya nzi nkobakalengwaa nkuko bantu? (b) Mbuumi bwamusyobo nzi mbubakajisi banabukwetene bakusaanguna?
LEZA wakalenga bantu kabalaa luyandisisyo lwakubaa buumi butamani. Inzya Ibbaibbele lyaamba kuti wakabikka “bulangizi bwabuumi buteeli mumyoyo yabo.” (Mukambausi 3:11) Pele kunze lyakubapa buyo kulombozya oku kwakupona kusikila kutamani, Leza wakabapa acimbi cintu. Wakabapa coolwe cakucita boobo.
2 Ibazyali besu bakusaanguna ba Adamu a Eva bakalengwa kabalondokede, kabatajisi bulema buli boonse pe mumizeezo akumubili. (Deuteronomo 32:4) Amuyeeye buyo—kakunyina macise aazumanana, kakunyina buyoofwu naa kulibilika! Kunze lyaboobo, Leza wakababikka mumunzi mubotu waparadaiso. Imakanze aa Leza akali aakuti muntu akapone kusikila kutamani akuti muciindi, inyika ikazule bana bakwe balondokede. (Matalikilo 1:31; 2:15) Ino ono nkaambo nzi ncotufwa?
Ikutamvwa Kwaleta Lufwu
3. Ino bwakayeeme anzi buumi butamani bwaba Adamu a Eva?
3 Leza wakalailila Adamu kuti: “Misamu yoonse yamumuunda ncobeni uyooilya, cita musamu wakuziba bubotu abubi. Toelede kulya kuliguwo pe, nkaambo mubuzuba obo mboyoolya kulinguwo ncobeni uyoofwa.” (Matalikilo 2:16, 17) Aboobo ibuumi butamani bwaba Adamu a Eva bwakayeeme akuvwida Leza.
4. Nobakabisya ba Adamu a Eva, nkaambo nzi ncobakasowa bulangizi bwabo bwakupona kusikila kutamani mu Paradaiso?
4 Nokuba boobo, mukubula coolwe ba Adamu a Eva bakatyola mulawo wa Leza. (Matalikilo 3:1-6) Nobakacita boobo, bakaba basizibi nkaambo “zibi [nkoku]sotoka mulao.” (1 Johane 3:4) Akaambo kaboobo, teebakacijisi bulangizi bwabuumi butamani ba Adamu a Eva. Nkaambo nzi? Nkaambo kakuti “cakuvola cazibi ndufu.” (Ba-Roma 6:23) Aboobo Leza naakali kusinganya ba Adamu a Eva wakati: “Uli bulongo buyo, akooko kubulongo nkoelede kupiluka.” Mpoonya bazyali besu bakusaanguna bakatandwa kuzwa mumunzi wabo wa Paradaiso. Mubuzuba obo ba Adamu a Eva nobakabisya, bakatalika kuyaabufwa kabotu-kabotu.—Matalikilo 3:19, 23, 24.
“Lufu Mbulwakazida Bantu Boonse”
5. Ino lufwu lwakazulila buti kubantu boonse?
5 Lino cibi caba Adamu a Eva cakasimbwa muluzyalo lwabo. Aboobo teebakacili kukonzya kuzyala bana balondokede, kayi cikombole citalondokede tacikonzyi kupanga zitina zilondokede. (Jobu 14:4) Masimpe, ikuzyalwa kwamuntu amuntu kulasinizya kuti bazyali besu bakusaanguna bakasowa buumi bwabo bulondokede alimwi buteeli antoomwe abwabana babo. Imwaapostolo Munakristo Paulo wakalemba kuti: “Cibi mbucakanjila munyika kumaanza aamuntu omwe buyo, alwalo lufu nkaambo kacibi, nkabela mbubonya obo lufu mbulwakazida bantu boonse, nkaambo kakuti boonse babisya.”—Ba-Roma 5:12; amweezyanisye Intembauzyo 51:5.
6. Nkaambo nzi ncotufwa?
6 Sunu, ibasaayansi tabacizi cini-cini bantu ncobacembaalila akufwa. Nokuba boobo, Ibbaibbele lipandulula kuti tulafwa akaambo kakuti tulazyalwa mucibi nkaambo twakakona ciimo eci kubazyali besu bakusaanguna. Pele ino ncinzi cicitika twafwa?