Ino Buumi Bwakatalika Buti?

Leza ‘ngokasensa kabuumi.’ (Intembauzyo 36:9) Sena mulasyoma oobo? Bantu bamwi baamba kuti buumi tiibwakalengwa buya. Kuti aaya kaali masimpe, nkokuti buumi bwakalitalikila buya. Pele ikuti Jehova Leza nguwakalenga buumi, nkokuti wakali amakanze, tee kayi?a Mpoonya atulange-lange makani aamu Bbaibbele aamba mbobwakatalika buumi alimwi atwaambo tutupa kusyoma kuti makani aaya ngamasimpe.

1. Ino julu anyika zyakatalika buti?

Bbaibbele lyaamba kuti: “Kumatalikilo, Leza wakalenga julu anyika.” (Matalikilo 1:1) Basayaansi banji balazuminizya kuti julu anyika zilijisi matalikilo. Ino Leza wakazilenga buti? Wakabelesya “nguzu zyakwe,” nkokuti muuya uusalala, ikulenga zintu zyoonse zili kujulu aanyika kubikkilizya amilalabungu, nyenyezi alimwi amapulaneti.—Matalikilo 1:2.

2. Ino Leza wakailengela nzi nyika?

Jehova ‘tanaakalenga nyika kakunyina kaambo pe, pele wakaibumba kutegwa kaikkalwa bantu.’ (Isaya 45:18) Wakapanga nyika kuti kabuli busena bubotu kukkala alimwi wakapa bantu zintu zyoonse nzyobayandika kutegwa kabapona mane kukabe kutamani. (Amubale Isaya 40:28; 42:5.) Basayaansi baamba kuti nyika ililibedelede kapati, alimwi iliindene amapulaneti aambi. Nepulaneti ilikke iijisi zintu zikonzya kupa kuti bantu kabacikonzya kupona.

3. Ncinzi cipa kuti bantu kabaindene abanyama?

Naakamana kulenga nyika, Jehova wakalenga zintu zipona. Cakusaanguna, wakalenga zisyango alimwi abanyama. Kumane, “Leza wakalenga muntu mucinkozya cakwe.” (Amubale Matalikilo 1:27.) Ncinzi cipa kuti bantu kabaindene abanyama? Mbwaanga twakalengwa mucinkonzya ca Leza, tulakonzya kutondezya bube mbwajisi walo, mbuli luyando alimwi abululami. Wakatulenga munzila yakuti katucikonzya kwiiya myaambo, kukkomanina zintu zibotu alimwi anyimbo. Kwiindana abanyama, swebo tulakonzya kumukomba Mulengi.

AMWIIYE ZINJI

Atulange-lange bumboni butondezya kuti buumi bwakalengwa buya akuti makani aamu Bbaibbele aamba zyakulenga ngamasimpe. Atubone bube mbobajisi bantu ncobutuyiisya kujatikizya Leza.

4. Buumi bwakalengwa buya

Bantu balalumbaizyigwa kapati akaambo kazintu nzyobapanga kwiinda mukukkopela kuzwa kuzilenge. Aboobo ino nguni weelede kulumbaizyigwa, basikukkopela naa ooyo wakalenga zintu nzyobakkopela? Atweebelele VIDIYO, akubandika mubuzyo uutobela.

VIDIYO: Kusyoma Muli Leza (2:43)

• Ino zinzi basikupanga zintu nzyobakkopela kuzwa kuzilenge?

Ŋanda iili yoonse kuli wakaipulana akwiiyaka. Pele ino nguni wakapulana akulenga zintu zyoonse? Amubale Bahebrayo 3:4, akubandika mibuzyo eeyi:

• Ino nzilenge nzi izimukkomanisya?

• Nkaambo nzi ncocili camaano kusyoma kuti julu anyika alimwi azyoonse zili mumo zyakalengwa buya?

Sena Mulizyi?

Mulakonzya kujana zibalo alimwi amavidiyo zijatikizya makani aaya, a jw.org mumulongo wazibalo zyakuti “Sena Cakalengwa Buya?” alimwi awakuti “Nzyobaamba Bamwi Kujatikizya Mbobwakatalika Buumi.”

“Ncobeni, iŋanda iili yoonse kuli wakaiyaka, pele ooyo wakapanga zintu zyoonse ngu Leza”

5. Makani aamu Bbaibbele aamba zyakulenga ngamasimpe

VIDIYO: Sena Bubumbo Bwakalengwa Buya?​—Kabeela Buyo (3:51)

• Sena Bbaibbele lyaamba kuti nyika alimwi azintu zipona zyakalengwa mumazuba aali cisambomwe aajisi mawoola aali 24 aakulenga?

• Nkaambo nzi ncomusyoma kuti makani aamu Bbaibbele aamba zyakulenga ngamasimpe?

Amubale Matalikilo 1:1, akubandika mubuzyo ooyu:

• Basayaansi baamba kuti julu anyika zilijisi matalikilo. Mbuti ncobaamba mboceendelana ancomwabala mu Bbaibbele?

Bamwi balalibuzya kuti naa Leza wakabelesya zintu zyakasanduka buya kulenga zintu zipona. Amubale Matalikilo 1:21, 25, 27, akubandika mibuzyo eeyi:

• Sena Bbaibbele liyiisya kuti Leza wakapanga cintu cimwi cipona akulekela kuti cisanduke kuba nswi, banyama alimwi abantu? Naa sena ngowakalenga “misyobo” yoonse yazintu zipona?b

6. Bantu nzilenge zya Leza zilibedelede

Tuliindene abanyama Jehova mbaakalenga. Amubale Matalikilo 1:26, akubandika mubuzyo ooyu:

• Mbwaanga twakalengwa mucinkonzya ca Leza, ino kuba aluyando alimwi alweetelelo kutondezya nzi kujatikizya bube bwa Leza?

MUBUFWAAFWI

Jehova wakalenga julu anyika alimwi azintu zyoonse zipona.

Ncinzi Ncomwaiya?

• Ncinzi Bbaibbele ncoliyiisya kujatikizya matalikilo aajulu anyika?

• Sena Leza wakapa cintu cimwi cipona kuti cisanduke akuba zintu zipona ziindene-indene, naa zyoonse wakazilenga buya?

• Ncinzi cipa kuti bantu kabaindene abanyama?

AMUZYIBE ZINJI

Atubone zikozyanyo izitondezya kuti kuli Mulengi.

“Ino Zilenge Zituyiisya Nzi?” (Sinsimuka!, September 2006)

Atubone bausyi mbobakonzya kumupandulwida mwanaabo makani aamu Bbaibbele aamba zyakulenga.

“Jehova . . . Nguwakalenga Zintu Zyoonse” (2:37)

Atubone naa makani aakusanduka aleendelana a Bbaibbele.

“Sena Zintu Zipona Ziliko Zyakasanduka Buya?” (Cibalo caaintaneti)