CIIYO 58
Amuzumanane Kusyomeka Kuli Jehova
Banakristo bakasimpe balikanzide kutalekela cintu cili coonse naa muntu uuli woonse kunyonganya bukombi bwabo kuli Jehova. Tacidoonekwi buya kuti oobu mbomulimvwa. Jehova ulakubikkila maano kusyomeka kwanu. (Amubale 1 Makani 28:9.) Ino mbukkale nzi bukonzya kusunka lusyomo lwanu kulinguwe alimwi mbuti mbomukonzya kubuzunda?
1. Mbuti bamwi mbobakonzya kusunka lusyomo lwesu kuli Jehova?
Bantu bamwi balakonzya kusoleka kutulesya kubelekela Jehova. Ino mbaani ibakonzya kucita cintu cibyaabi cili boobo? Bamwi ibakazwa mukasimpe baamba zintu zyakubeja kujatikizya mbunga ya Leza kutegwa banyonganye lusyomo lwesu. Baitwa kuti basiluleyo. Kuyungizya waawo, basololi bazikombelo bamwi bamwaya makani aakubeja kujatikizya ndiswe kutegwa boongelezye baabo ibatacenjede kuzwa mukasimpe. Aboobo inga catubikka muntenda ikuti twatalika kukazyanya abasikutukazya, kubala mabbuku aabo naa nzyobalemba aa intaneti, kuswaya mawebbusaiti aabo naa kweebelela mavidiyo aabo. Kujatikizya baabo ibasola kutyompya bamwi kuti bacileke kubelekela Jehova, Jesu wakati: “Amubaleke buyo. Mbasololi boofwu. Ikuti moofwu keenzya moofwunyina, boonse bobilo bayoowida mumulindi.”—Matayo 15:14.
2. Nzintu nzi nzyotusala izikonzya kusunka lusyomo lwesu kuli Jehova?
Luyando ndotujisi kuli Jehova lutukulwaizya kutayanzana munzila iili yoonse abukombi bwakubeja. Mulimo ngotubeleka, mbunga nkotuzulilwa alimwi azintu nzyotucita tazyeelede kuswaangana abukombi bwakubeja. Jehova utucenjezya kuti: “Amuzwe [muli Babuloni Mupati], nobantu bangu.”—Ciyubunuzyo 18:2, 4.
AMWIIYE ZINJI
Atwiiye mbotukonzya kutazumizya muntu uuli woonse kunyonganya lusyomo lwesu kuli Jehova. Alimwi atubone mbotukonzya kutondezya kusyomeka kwiinda mukuzwa muli Babuloni Mupati.
3. Amubacenjelele bamayi bakubeja
Ncinzi ncotweelede kucita ciindi notwamvwa zintu zibyaabi kujatikizya mbunga ya Jehova? Amubale Tusimpi 14:15, akubandika mubuzyo ooyu:
Nkaambo nzi ncotweelede kucenjela kutegwa tutasyomi zintu zyoonse nzyotumvwa?
Amubale 2 Johane 9-11, akubandika mibuzyo eeyi:
Ino tweelede kubabona buti basiluleyo?
Nokuba kuti tatubandiki cacigaminina abasiluleyo, mbuti mbotukonzya kujatikizyigwa anjiisyo zyabo?
Ino muyeeya kuti Jehova inga walimvwa buti ikuti naa twatalika kuswiilila zintu zibyaabi zyaambwa kujatikizya nguwe alimwi ambunga yakwe?
4. Amuzumanane kusyomeka kuli Leza ciindi mukwesu naacita cibi
Ikuti naa twamvwa kuti muntu umwi mumbungano wakacita cibi cipati, mukuli nzi ngotujisi? Amubone njiisyo iili mu Mulawo wa Leza wakapedwe kubana Israyeli bansiku. Amubale Levitiko 5:1.
Kweelana amalailile aali mukapango aaka, ikuti naa twamvwa kuti muntu umwi wakacita cibi cipati, tweelede kubaambila baalu makani ngotuzyi. Pele katutanacita boobo, tulakonzya kutondezya luzyalo kwiinda mukukulwaizya sikubisya kuyoolyaambilila kubaalu cibi cakwe. Ikuti waalilwa kucita boobo, kusyomeka kwesu kuli Jehova kuyootukulwaizya kwaambila baalu makani ngotuzyi. Mbuti ntaamu eeyo mboitondezya luyando lutamani . . .
kuli Jehova Leza?
kumuntu iwakacita cibi?
kuli bamwi mumbungano?
Ikuti musyominyoko kali mumapenzi, amumugwasye!
5. Amuzumanane kumutantamuka Babuloni Mupati
Amubale Luka 4:8 alimwi a Ciyubunuzyo 18:4, 5, akwiingula mibuzyo iitobela:
Sena zina lyangu liciliko mubbuku lyabukombi bwakubeja?
Sena ndicizulilwa kumbunga iiswaangene abukombi bwakubeja?
Sena mulimo wangu ugwasyilizya bukombi bwakubeja munzila iili yoonse?
Sena kuli mbazu zimwi mubuumi bwangu mondiyandika kulyaandaanya kubukombi bwakubeja?
Ikuti naa ndaingula kuti inzya kuli umwi wamibuzyo eeyi, nkucinca kuli buti nkondeelede kucita?
Mubukkale boonse, amusale nzila iiyoomupa kuba amanjezyeezya aasalala alimwi iitondezya kusyomeka kwanu kuli Jehova.
Ncinzi ncomukonzya kucita kuti naa mwalombwa kusanga kukabunga kabukombi ikagwasyilizya bapengede?
BAMWI BAAMBA KUTI: “Ndeelede kuzyiba nzyobaamba basiluleyo kujatikizya Bakamboni ba Jehova kutegwa ndicikonzye kukaiminina kasimpe.”
Sena eeci ncabusongo? Nkaambo nzi?
MUBUFWAAFWI
Kutegwa tuzumanane kusyomeka kuli Jehova, tweelede kucileka kuyanzana abaabo ibatasyomeki kulinguwe.
Ncinzi Ncomwaiya?
Nkaambo nzi ncotuteelede kuswiilila mizeezo yabasiluleyo?
Kuti twazyiba kuti umwiwakacita cipati, ncinzincotweelede kucita?
Mbuti mbotukonzya kutobela kucenjezya kujatikizya kuzwa mubukombi bwakubeja?
AMUZYIBE ZINJI
Amwiiye ncomukonzya kucita ciindi bamwi nobamwaya malipooti aakubeja kujatikizya Bakamboni ba Jehova.
“Sena Mulijisi Makani Aamasimpe?” (Ngazi Yamulindizi, August 2018)
Mbuti mbomukonzya kuzizyiba mbunga naa milimo iigwasyilizya Babuloni Mupati?
Ncinzi basikukazya bamwi ncobacita kutegwa banyonganye lusyomo lwesu?
Mumakani aakuti “Ndakali Kulangaula Leza Kuzwa Kubwana,” amubale kujatikizya mupaizi wacikombelo ca Shinto mbwaakazwa mubukombi bwakubeja.
“Ibbaibbele Lilakonzya Kubacinca Bantu” (Ngazi Yamulindizi, October 1, 2011)