MUBUZYO 6
Ncinzi Bbaibbele ncolyakasinsima kujatikizya Mesiya?
BUSINSIMI
“Yebo, O Betelehemu Efrata, . . . mulinduwe muyoozwa yooyo uuyoondibeda muleli mu Israyeli.”
KUZUZIKIZYIGWA
“Naakazyalwa Jesu mu Betelehemu waku Judaya kumazuba aa Mwami Heroda, basikupandulula bweende bwanyenyeezi ibazwa Kujwe bakaboola ku Jerusalemu.”
BUSINSIMI
“Baabana zisani zyangu, akucuumina cisolo cisani cangu.”
KUZUZIKIZYIGWA
“Lino basikalumamba nobakamana kumugagaila aacisamu Jesu, bakabweza zisani zyakwe zyaatala akuzizapaula muzibeela zyone . . . Pele cisani eeci kunyina mpocakaswaanganizyidwe amuluko wantali, mbwaanga cakali buyo comwe kuzwa mujulu kusikila ansi. Aboobo bakaambauzyanya kabati: ‘Tutacizapuli pe, pele atuume cisolo kutegwa tubone naa cilaba cani.’”
BUSINSIMI
“Ulalinda mafwuwa oonse aamuntu ooyu; kunyina noliba lyomwe lyatyolwa.”
KUZUZIKIZYIGWA
“Nobakasika aali Jesu, bakabona kuti ulifwide kale, aboobo kunyina nobakaatyola maulu aakwe.”
BUSINSIMI
“Wakayaswa akaambo kansotoko zyesu.”
KUZUZIKIZYIGWA
“Umwi wabasikalumamba wakamuyasa sumo mumabambo, eelyo mpoonya aawo kwakazwa bulowa amaanzi.”
BUSINSIMI
“Bakandipa zyakuvwola zyangu, imali aansiliva aali 30.”
KUZUZIKIZYIGWA
“Mpoonya umwi wabali Kkumi Ababili, uutegwa Judasi Isikariote, wakaunka kuli basilutwe babapaizi akwaamba kuti: ‘Ino mulandipa nzi ndamwaaba kulindinywe?’ Bakamusyomezya kumupa mali aansiliva aali 30.”