Lukono Ndomunga Mwasyoma

“IKUTI mwatambula kagwalo kuzwa kumuntu umwi kaamba kuti kuli mpasya imwi iinyina mukamwini njomwapegwa, amucenjele. Mulakonzya kamuswinwi amuntu mucenjezu silweeno.”

Ooko nkucenjezya iba United States Postal Inspection Service nkobakalemba akkeyala yabo yakkompyuta. Nkaambo nzi ncobakapeda kucenjezya ooku? Nkaambo zyuulu-zyuulu zyabantu bakatambula lugwalo lwaamba kuti, ‘Musazinyoko wafwa alimwi wamusiila lukono.’ Akaambo kaceeci, banji bakatumina mali asika naa aainda ku $30 kutegwa bapegwe ‘lipooti yampasya zyasikwaazwa’ iipandulula nkolwakabede lukono alimwi ambobakali kunga balubweza. Bakatyompwa kapati. Boonse bakaingula bakalembelwa bwiinguzi bomwe alimwi kukona cintu cili coonse tiikwakali kulangilwa naaceya kuli woonse akati kabo.

Nzila zyabucenjezu zili boobu zipa bantu kuyandisisya kutambula lukono. Pele Ibbaibbele lilaamba cakubazuminizya aabo bapa lukono noliti: “Muntu mubotu ulasiila bazukulu bakwe lukono.” (Tusimpi 13:22) Masimpe ngakuti, Jesu Kristo lwakwe wakaamba kaambo kazizilwe alimwi kalombozyegwa kapati mu Mulumbe wakwe waa Cilundu aaka kakuti: “Bali acoolwe abo balibombya, nkaambo bazoovuba nyika.”—Matayo 5:5.

Imajwi aa Jesu atuyeezya ceeco Mwami Davida wa Israyeli yansiku ncaakasololelwa kulemba munguzu zyamuuya myaanda yamyaka musyule naakati: “Babombemyoyo bayoovuba nyika, bayookondwa muluumuno lunji.”—Intembauzyo 37:11.

‘Kuvwuba nyika’—elo kaka bulakondelezya bulangizi oobo! Pele sena inga twaba masimpe kuti eeyi taili nzila imbi buyo yabumpelenge yakuyanda kunyanga bantu cintu cimwi? Inzya, inga twaba masimpe. Mbokunga nyika ncibeela cabubumbo bwa Jehova bugambya, walo mbwali ngo Mulengi alimwi Mukamwini ulijisi nguzu zyakwiipa kufumbwa ngwayanda. Kwiinda mu Mwami Davida, Jehova wakasyomezya Mwanaakwe uuyandwa Jesu Kristo cisyomezyo cabusinsimi cakuti: “Kumbila kulindime, elyo njookupa masi kuti abe lukono lwako, amagolelo aanyika ukaavube.” (Intembauzyo 2:8) Akaambo kaceeci, imwaapostolo Paulo wakapandulula Jesu kuba ooyo “[Leza] ngwaakasala kuti abe ngomukamwini wazintu zyoonse.” (Ba-Hebrayo 1:2) Aboobo tulijisi lusyomo luyumu lwakuti eelyo Jesu naakaamba kuti babombe myoyo “bazoovuba nyika” wakalisinizyide alimwi ulijisi nguzu zyeelede zyakuzuzikizya cisyomezyo cakwe.—Matayo 28:18.

Aboobo mubuzyo uuyandika ngwakuti, Ino mbuti cisyomezyo eeco mbociyoozuzikizyigwa? Munyika yoonse sunu, kulibonya kuti bantu balwani alimwi abasimakanze aakulisumpula mbabazwiindilila alimwi bali mukubweza kufwumbwa nzyobayanda. Ino ncinzi ciyoosyaala babombe myoyo ncobayookona? Kunze lyaboobo, inyika ili mumapenzi mapati aakusofwazigwa, alimwi lubono lwayo luli mukubelesyegwa munzila mbyaabi abasyaacivulemwangu abaabo batabikkili maanu kubukkale bwakumbele. Sena kuya kuba nyika yeelela kuba lukono? Twamulomba kuti mubale cibalo citobela kutegwa mujane bwiinguzi kumibuzyo eeyi aimbi iiyandika.

“Babombemyoyo Bayoovuba Nyika”—Munzila Nzi?

“AMBWENI mulaazyi kabotu majwi aa Jesu aakkazika moyo aakuti ‘balibombya bazoovwuba nyika.’ Pele kweelana azintu nzyobacitilana bantu alimwi anzyobacita kunyika, muyeeya kuti ncinzi ciya kusyaala kutegwa babombe myoyo bakavube?” Matayo 5:5; Intembauzyo 37:11.

Myriam, umwi wa Bakamboni ba Jehova, wakabelesya mubuzyo ooyu kutalisya mubandi wamu Bbaibbele. Mwaalumi ngwaakabandika anguwe wakaingula kuti, ikuti Jesu nguwakasyomezya ceeci, nkokuti nyika ileelela kwaambwa kuti ndukono ikutali buyo citantaala naa tongo litakonzyi kukkalwa bantu.

Oobo bwakali bwiinguzi buyeeme abulangizi. Pele sena tulijisi kaambo kali koonse katupa kuzilanga kabotu boobo zintu? Ncobeni tulijisi, nkaambo Ibbaibbele litupa twaambo tusyomeka kapati ncotweelede kusyoma kuti cisyomezyo eeco ciya kuzuzikizyigwa. Mubwini, ikuzuzikizyigwa kwacisyomezyo eeco kuliswaangene kapati amakanze aa Leza kubantu alimwi anyika. Alimwi tusyomezyegwa kuti makanze aa Leza ayoozuzikizyigwa. (Isaya 55:11) Aboobo mmakanze nzi aakusaanguna Leza ngaakajisi kubantu, alimwi ayoozuzikizyigwa buti?

Makanze aa Leza Aatamani Kujatikizya Nyika

Icakapa kuti Jehova Leza alenge nyika mmakanze amwi aagaminide ngaakajisi. “Mbuboobu mbwaamba Jehova iwakalenga ijulu. Ngonguwe Leza. Ngonguwe iwakabumba nyika akwiipanga akwiimika. Teewakailenga kuti ibe yalupilingano pe, wakaibumba kuti ikalwe bantu. Ndime Jehova. Taakwe umbi.” (Isaya 45:18) Aboobo cini nciyakalengelwa nyika nkuti kiikkalwa bantu. Ikuyungizya, mmakanze aa Leza kuti nyika kiili munzi wabantu kukabe kutamani. “Ngonguwe wakabika nyika antalisyo zyayo, kuti itabi niizungaana.”—Intembauzyo 104:5; 119:90.

Alimwi makanze aa Leza kujatikizya nyika alalibonya mumulimo ngwaakapa bantu bakusaanguna bobile. Kuli Adamu a Eva, Jehova wakati: “Amuzyalisye, muvule, muzuzye nyika akwiibombya. Amweendelezye inswi zyamulwizi abayuni bakujulu abanyama boonse baputauka ansi.” (Matalikilo 1:28) Inyika Leza njaakapa ba Adamu a Eva yakeelede kuba munzi wabo antoomwe abana babo lyoonse kukabe akutamani. Kakwiindide myaanda yamyaka minji, sintembauzyo wakati: “Majulu majulu aa-Jehova, pele nyika wakiiaba kubana ba-Adamu.”—Intembauzyo 115:16.

Ikutegwa bulangizi oobo bubotu buzuzikizyigwe kuli mbabo, ba Adamu a Eva abalunyungu lwabo, beelede kubona Jehova Leza, Mulengi alimwi Sikupa Buumi kuti Mmwami wabo akuyandisisya kutobela nzyaamba. Jehova wakacisalazya eeci naakalailila mwaalumi kuti: “Misamu yoonse yamumuunda ncobeni uyooilya, cita musamu wakuziba bubotu abubi. Toelede kulya kulinguwo pe, nkaambo mubuzuba obo mboyoolya kulinguwo ncobeni uyoofwa.” (Matalikilo 2:16, 17) Kutegwa ba Adamu a Eva bazumanane kupona mumuunda wa Edeni, bakeelede kutobela mulawo ooyo watakali kukatazya alimwi wakasalazyidwe. Kucita boobo nicakatondezya kulumba kwabo kuzintu zyoonse Taata wakujulu nzyaakabacitilide.

Ba Adamu a Eva nibakazangila Leza kwiinda mukutyola mulawo ngobakapedwe acaali, mubwini bakafwutatila ooyo wakabapede zyoonse nzyobakajisi. (Matalikilo 3:6) Mukucita boobo, bakasweekelwa munzi wabo mubotu wa Paradaiso balo alimwi abana babo boonse. (Ba-Roma 5:12) Sena ikuzanga kwabanabukwetene bakusaanguna kwakanyonganya makanze aa Leza ngaakalengela nyika?

Leza Uutanacincide

Kwiinda mumusinsimi wakwe Malaki, Leza wakati: “Ndime Jehova, nsisanduki pe.” (Malaki 3:6) Kapandulula kapango aaka, sikwiiya Bbaibbele umwi waku France wazina lya L. Fillion wakaamba kuti kaambo aaka kaliswaangene kapati akuzuzikizyigwa kwazisyomezyo zya Leza. Fillion wakalemba kuti: “Jehova naakabajaya bantu bakwe bazangi, pele mbokunga tacinci muzintu nzyasyomezya, unoosyomeka lyoonse ziyume zitete, kuzisyomezyo nzyaakaamba musyule.” Zisyomezyo zya Leza, kube kumuntu omwe, cisi naa bantu boonse, tazikoyoolubwa pele ziyoozuzikizigwa aciindi ceelede ncabikkide. “Wayeeya cizuminano cakwe lyoonse, ijwi ndyaakalailila kusikila kumazyalani aali cuulu.”—Intembauzyo 105:8.

Pele ino mbuti mbotunga twasinizya kuti Jehova tanaakacinca makanze aakwe aakusaanguna kujatikizya nyika? Tulakonzya kucisyoma eeci nkaambo mu Jwi lya Leza lyoonse, Ibbaibbele kwaambwa makanze aa Leza aakupa nyika eeyi kubantu bamuswiilila. (Intembauzyo 25:13; 37:9, 22, 29, 34) Kuyungizya waawo, Imagwalo aamba baabo ibalongezyedwe a Jehova kuti balikkede kabakwabilidwe “umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya.” (Mika 4:4; Ezekieli 34:28) Aabo basalidwe a Jehova “bayooyaka maanda akukala mulingao, bayoobyala myuunda yamisaansa akulya micelo yayo.” Alimwi mane banooli balongwe abanyama bamusokwe.—Isaya 11:6-9; 65:21, 25.

Ibbaibbele lilatutondezya ncociyoojatikizya cisyomezyo ca Leza munzila imbi. Mubweendelezi bwa Mwami Solomoni, musyobo wa Israyeli wakali mubukkale bwaluumuno abuvwubi. Mubulelo bwakwe, “ba-Juda aba-Israyeli bakali kukala cakuliiba, umwi aumwi ulikede munsi lyamusaansa wakwe alyamukuyu wakwe, kuzwa ku-Dani akusikila ku-Beeriseba, mazuba oonse ngaakapona Solomoni.” (1 Bami 4:25) Ibbaibbele lyaamba kuti Jesu ‘ulamwiinda Solomoni,’ alimwi kwaamba zyabulelo bwakwe, Sintembauzyo mubusinsimi wakati: “Mumazuba aakwe bululami bukomene, aluumuno luvule ciindi coonse mwezi nuuciliwo.” Kuciindi eeco, “maila avule ansi, atala lyazilundu. Ayoome mbuli lusaka lwaku-Lebano.”—Luka 11:31; Intembauzyo 72:7, 16.

Mbwaanga ulasyomeka kumajwi aakwe, Jehova Leza uya kubona kuti lukono ndwaakasyomezya nkoluli alimwi lulibukulusidwe mububotu bwalo boonse. Ku Ciyubunuzyo 21:4, Ijwi lya Leza litwaambila kuti munyika mpya yakasyomezyegwa, Leza “uyoosindula misozi yoonse kumeso [aabantu], takukooyooba limbi lufu, nikuba kuomoka nikuba kulila nikuba kuciswa.” Eeci cisyomezyegwa ngu Paradaiso.—Luka 23:43.

Mbomukonzya Kulujana Lukono Lwakasyomezyegwa

Kucinca kwanyika kuba Paradaiso kuya kucitwa amfwulumende yeendelezya kuzwa kujulu, Bwami bweendelezyegwa a Mwami Jesu Kristo. (Matayo 6:9, 10) Cakusaanguna, Bwami oobo ‘buyoonyonyoona baabo banyonyoona nyika.’ (Ciyubunuzyo 11:18; Daniele 2:44) Mpoonya kali “Mwami waluumuno,” Jesu Kristo uyoozuzikizya majwi aabusinsimi aaya aakuti: “Bwami bwakwe buyookomenesya, alwalo luumuno talukooyoomana.” (Isaya 9:6, 7) Mu Bwami oobo, tuulunzuma twabantu, kubikkilizya abaabo ibaya kubusigwa kuzwa kubafwu, bayooba acoolwe cakukona nyika.—Johane 5:28, 29; Incito 24:15.

Ino mbaani bayooyelela kupegwa lukono oolo lutaliboteli? Amulange-lange majwi aa Jesu aakuti: “Bali acoolwe abo balibombya, nkaambo bazoovuba nyika.” (Matayo 5:5) Ino kulibombya naa kubomba moyo caamba nzi? Imabbuku aapandulula mabala apandulula “kulibombya” naa “kubomba moyo” kuti nkuteta, kuba alubomba abutontozi. Nokuba boobo, Ijwi lya Cigiliki lyakusaanguna lyabelesyegwa lipandulula zinji. Ibbuku lya William Barclay litegwa New Testament Wordbook, lyaamba kuti mubbala eelyo “kuli kuteteeta, pele ibube oobu . . . mbuyumu mbuli bbwe luuma.” Lyaamba nguzu zyakuyeeya zipa muntu kuliyumya mumapenzi kakunyina kucimwa naa kuba amuzeezo wakuyanda kujokezya cibi, akaambo kakuba acilongwe cibotu a Leza icimupa nguzu.—Isaya 12:2; Ba-Filipi 4:13.

Muntu mubombe moyo ulalicesya akutobela zyeelelo zya Leza mubuumi bwakwe boonse; tazumanani kucita ncayanda mwini naa kutobela nzyobayanda bamwi. Alimwi ulayiisyika, ulilisungwide kuyiisyigwa a Jehova. Sintembauzyo Davida wakalemba kuti: “[Jehova] uleenzya babombemyoyo mubululami, ulaiisya babombemyoyo inzila yakwe.”—Intembauzyo 25:9; Tusimpi 3:5, 6.

Sena muyooba umwi wabaabo “babombemyoyo” ibayoovwuba nyika? Kwiinda mukumuziba Jehova alimwi akuyanda kwakwe akwiinda mukwiiya Jwi lyakwe cabusungu alimwi akuzicita nzyomwiiya, anywebo mulakonzya kulangila kuyoovwuba nyika yaparadaiso akukkala mulinjiyo kukabe kutamani.—Johane 17:3.