Amugwasyilizye Mumbungano Yanu

Munyika yoonse, mamiliyoni aabantu balamukomba calukkomano Jehova mumbungano zinji. Balalumba kumalailile alimwi abusolozi mbobatambula, aboobo caluyandisisyo balagwasyilizya mumbungano munzila zinji. Sena oobo mbomulimvwa kujatikizya mbungano yanu?

1. Muunzila nzi momukonzya kubelesya ciindi anguzu zyanu kutegwa mugwasyilizye mumbungano?

Toonse tulakonzya kugwasyilizya mumbungano. Mucikozyanyo, sena kuli bacembeede naa baciswa mumbungano yanu? Sena inga mwabagwasyilizya kutegwa kabajanika kumiswaangano? Sena inga mwabagwasya munzila zimwi, mucikozyanyo kwiinda mukubaulila nzyobayandika naa kubagwasyilizya milimo yaaŋanda? (Amubale Jakobo 1:27.) Kuyungizya waawo, tulakonzya kulyaaba kusalazya alimwi akubambulula Ŋanda ya Bwami. Kunyina uutusinikizya kucita zintu eezyi. Luyando ndotujisi kuli Leza alimwi akubakwesu lulatukulwaizya ‘kulyaaba cakuliyandila.’​—Intembauzyo 110:3.

Bakamboni babbapatizyidwe balakonzya kugwasyilizya mumbungano munzila azimbi ziyungizyidwe. Bakwesu basimide kumuuya balakonzya kweelela kuba bakutausi, alimwi mukuya kwaciindi, balakonzya kweelela kuba baalu. Bakwesu abacizyi balakonzya kugwasyilizya kapati mumulimo wakukambauka kwiinda mukubeleka kabali bapainiya. Bakamboni bambi balakonzya kugwasyilizya mukuyaka masena aakukombela naa kulongela kubusena kuli mbungano iiyandika lugwasyo munzila zimwi.

2. Mbuti mbotukonzya kubelesya mali alimwi azintu zyesu zimwi kugwasyilizya mbungano?

Tulakonzya ‘kumulemeka Jehova azintu zyesu ziyandisi.’ (Tusimpi 3:9) Tulakkomana kusanga mali alimwi azintu zimwi kutegwa tugwasyilizye mumbungano yesu alimwi akumulimo wakukambauka nyika yoonse. (Amubale 2 Bakorinto 9:7.) Alimwi zyakusanga zyesu zilagwasyilizya nokwacitika ntenda. Banji basala ‘kubikka cimwi cintu ambali’ lyoonse kacili cakusanga. (Amubale 1 Bakorinto 16:2.) Tulakonzya kusanga kubelesya tubbokesi twakusangila ituli mumasena eesu aakukombela naa kubelesya intaneti aa donate.jw.org. Jehova ulatupa coolwe cakutondezya luyando ndotujisi kulinguwe kweelana ambotusala kubelesya zintu zyesu zyakumubili.

AMWIIYE ZINJI

3. Tulakonzya kubelesya zintu zyesu zyakumubili

Jehova uyanda muntu uupa kumwi kakkomene alimwi awalo Jesu mbwalimvwa oobo. Mucikozyanyo, Jesu wakamubikkila maano mukamufwu mucete alimwi akusolekesya nkwaakacita kutegwa asange. Amubale Luka 21:1-4, akubandika mibuzyo eeyi:

• Sena tweelede kusanga mali manji kutegwa tumukkomanisye Jehova?

• Mbuti Jehova a Jesu mbobalimvwa ciindi notusanga kuzwa ansi aamoyo?

Kutegwa tuzyibe mbozibelesyegwa zyakusanga zyesu, atweebelele VIDIYO. Mpoonya tulabandika mubuzyo uutobela.

VIDIYO: “Cipego Kuli Jehova” (4:47)

• Mbuti zyakusanga mbozibelesyegwa kugwasyilizya mbungano munyika yoonse?

4. Tulakonzya kulyaaba kutegwa tugwasye

Kaindi, bakombi ba Jehova bakali kubeleka cabusungu kutegwa babambulule masena aabo aakukombela. Pele eeci cakali kubikkilizya zintu zinji kunze buyo lyakusanga mali. Amubale 2 Makani 34:9-11, akubandika mubuzyo ooyu:

• Mbuti muna Israyeli umwi aumwi mbwaakali kugwasyilizya kulanganya ŋanda ya Jehova naa busena bwakukombela?

Kutegwa tubone Bakamboni ba Jehova mbobacitobela cikozyanyo eeci cansiku, atweebelele VIDIYO. Mpoonya tulabandika mibuzyo iitobela.

VIDIYO: Kwaabamba Kabotu Masena Eesu Aakukombela (3:31)

• Nkaambo nzi ncociyandika kapati kubona kuti Ŋanda ya Bwami ilasalala alimwi akuti ilibonya kabotu?

• Muunzila nzi zimwi momukonzya kugwasya?

5. Bakwesu balakonzya kubeleka canguzu kutegwa beelele kupegwa mikuli iiyungizyidwe

Magwalo akulwaizya baalumi Banakristo kubeleka canguzu kutegwa beelele kucita zyoonse nzyobakonzya kugwasyilizya mbungano. Kutegwa tubone cikozyanyo, atweebelele VIDIYO. Mpoonya tulabandika mubuzyo uutobela.

VIDIYO: Bakwesu—Kamubeleka Kutegwa Mweelele Kucita Mulimo Mubotu (5:19)

• Muvidiyo, mbuti ba Ryan mbobakabeleka canguzu kutegwa beelele kugwasyilizya kapati mumbungano?

Bbaibbele lilapandulula zyeelelo ziyandika kubakwesu kutegwa beelele kuba bakutausi naa baalu. Amubale 1 Timoteyo 3:1-13, akubandika mibuzyo eeyi:

• Ncinzi ncobeelede kucita bakwesu kutegwa beelela kuba bakutausi naa baalu?

• Ino mbuti kujatikizya mikwasyi yabo?—Amubone kapango 4 a 11.

• Ciindi bakwesu nobasolekesya kusika azyeelelo eezyi, mbuti umwi aumwi mumbungano mbwagwasyigwa?

MUBUFWAAFWI

Jehova ulalumba kapati kukusolekesya nkotucita kutegwa tugwasyilizye mbungano kwiinda mukwaaba ciindi, nguzu alimwi azintu zyesu zyakumubili.

Ncinzi Ncomwaiya?

• Mbuti mbotukonzya kubelesya ciindi anguzu zyesu kugwasyilizya mbungano?

• Mbuti mbotukonzya kubelesya zintu zyesu zyakumubili kugwasyilizya mbungano?

• Muunzila nzi momunga mwayanda kugwasyilizya mbungano?

AMUZYIBE ZINJI

Amubone kaambo Leza ncataciyandili kuti bakombi bakwe kabapa mulumbo.

“Ino Bbaibbele Lyaamba Nzi Kujatikizya Kupa Mulumbo?” (Cibalo caaintaneti)

Bbaibbele lilaamba mikuli imwi njobapedwe baalumi babbapatizyidwe. Pele mbuti kuti mukaintu uubbapatizyidwe kayandika kulanganya mikuli eeyi?

“Kumvwisya Busilutwe Mumbungano” (Ngazi Yamulindizi, February 2021)

Amubone Bakamboni basicamba ibalyaaba kapati kutegwa batolele bakombinyina mabbuku.

Kutola Mabbuku Aamba Zyamu Bbaibbele ku Congo (4:25)

Amubone mbotujana mali aakubelesya mumulimo wesu nzila iindene kapati ambozijana mali zikombelo zimbi.

“Ino Mwaajana Kuli Mali Ngomubelesya Mumulimo Wanu?” (Cibalo caaintaneti)