Ikuyiisigwa Kucita Kuyanda kwa Jehova

“Undiiyisye kucita luyando lwako, nkaambo nduwe Leza wangu.”—INTEMBAUZYO 143:10.

1, 2. (a) Ndilili notweelede kuyiisigwa alimwi katujisi muzeezo nzi uugwasya? (b) Nkaambo nzi ncokuyandikila kapati kuyiisigwa a Jehova?

IBUZUBA abuzuba muntu mbwapona akubeleka milimo, ulakonzya kuyiisigwa cimwi cintu cigwasya. Oobu mbocibede kuli ndinywe alimwi mbocibede kubantu bambi. Pele ino ncinzi cicitika notufwa? Tacikonzyeki pe kuyiisigwa cilicoonse naa kwiiya noli muciimo ciya. Ibbaibbele lilacisalazya kwaamba kuti bafwide “tabezi cintu niciba comwe.” Kunyina luzibo mu Sheol, namaumbwe yabantu boonse. (Mukambausi 9:5, 10) Sena eci caamba kuti kuyiisigwa kwesu naa kubaa luzibo nkwabuyo? Eci ciya buyo mbuli nzyotuyiisigwa alimwi ambotubelesya luzibo olo.

² Kuti naa tuyiisigwa buyo zyanyika, buumi bwesu tabukonzi kuzumanana kuya kumbele. Nokuba boobo icikkomanisya ncakuti mamiliyoni aabantu mumasi oonse balayiisigwa kuyanda kwa Leza, kabalangila buumi butamani. Matalikilo aalusyomo olu nkuyiisigwa aa Jehova, Intalisyo yaluzibo lupa buumi.—Intembauzyo 94:9-12.

3. (a) Nkaambo nzi ncocinga caambwa kuti Jesu wakali sicikolo wa Leza wakusaanguna? (b) Nkusyomezegwa nzi nkotujisi kwakuti bantu bayooyiisigwa a Jehova, alimwi ncinzi ciyootobela?

³ Imwanaa Leza wakusaanguna kuzyalwa, sicikolo Wakwe wakusaanguna, wakayiisigwa kucita kuyanda kwa Wisi. (Tusimpi 8:22-30; Johane 8:28) Awalo Jesu wakatondezya kuti kuya kuba zyuulu-zyuulu zyabantu bayooyiisigwa a Wisi. Ino tulangila nzi swebo notwiiya kuzwa kuli Leza? Jesu wakati: “Kulilembedwe mubasisimi kuti, Boonse bayooiisigwa Leza. Umwi umwi uwakamvwa kuli-Taata, akwiiya kulinguwe, uleza kulindime. . . . Ncobeni ndamwaambila kasimpe, Oyo uusyoma uli abuumi ubutamani.”—Johane 6:45-47.

4. Ino mamaliyoni aabantu ajatikizigwa buti akuyiisya kwa Leza, alimwi bajisi bulangizi nzi?

⁴ Jesu wakazubulula majwi aali ku Isaya 54:13, alo aakali kwaamba mukaintu wa Leza wacikonzyanyo, Zioni wakujulu. Obo businsimi bulabeleka kapati kubana bakwe ibali 144,000 basiciiya ba Jesu Kristo bakazyalululwa mumuuya. Ibasyeede akati kabana ba Leza munzila yakumuuya baluujisi sunu mbabali kumbele muprogilamu yakuyiisya yanyika yoonse mbwiizulwa. Nkakaambo kaako mamiliyoni aabamwi babamba “nkamu impati” abalo balagwasigwa akaambo kakuyiisigwa a Jehova. Balaa coolwe citakonzyanisigwi cakwiiya kakunyina kunyonganizigwa alufu. Munzila nzi? Mbabalangilwa kuyoofutuka “mapenzi mapati” aaswena afwaafwi akukkomana abuumi butamani anyika yaparadaiso.—Ciyubunuzyo 7:9,10, 13-17.

Ikwaambisya Makani aa Kucita Kuyanda kwa Leza

5. (a) Ndugwalo nzi lwamwaka wa 1997? (b) Tweelede kulimvwa buti kumakani aakujanika kumiswaangano ya Bunakristo?

⁵ Mukati kamwaka wa 1997 mumbungano ziinda ku 80,000 nyika yoonse mbwiizulwa, Bakamboni ba Jehova bayoobikkila kapati maanu kumajwi aamatalikilo aa Intembauzyo 143:10: “Undiiyisye kucita luyando lwako.” Olo ndoluyooba lugwalo lwamwaka wa 1997. Aayo majwi aanootondezyedwe cantangalala mu Maanda aa Bwami anooli ciyeezyo cakuti ibusena ikweelede kutambwidwa lwiiyo lwa Leza, nkuumiswaangano yambungano, nkotukonzya kutola lubazu muprogilamu iyaambele ya kulaililwa. Ciindi notuswaangana abakwesu kuti tuyiisigwe a Mwiiyi Mupati, tulakonzya kulimvwa bwakalimvwa sintembauzyo walo wakalemba kuti: “Ndakakondwa nibakandaambila kuti, katuya kuŋanda ya-Jehova.”—Intembauzyo 122:1; Isaya 30:20.

6. Kwiinda mumajwi aa Davida, ncinzi ncetuzumina?

⁶ Inzya, tulayanda kuyiisigwa kucita kuyanda kwa Leza kwiinda kuyanda kwa sinkondoma Diabolosi naa kuyanda kwabantu batalondokede. Eelyo mbubonya mbuli Davida tulamulumba Leza ngotukomba akubelekela: “Nkaambo nduwe Leza wangu. Muuya wako mubotu undeenzye munzila iiluleme.” (Intembauzyo 143:10) Muciindi cakuyanda kusangana abantu babuyo, Davida wakali kulombozya kuba kubusena kwakali kukombwa Jehova. (Intembauzyo 26:4-6) Kabelesya muuya wa Leza kusololela ntaamu zyakwe, Davida wakali kweenda mumikondo yabululami.—Intembauzyo 17:5; 23:3.

7. Ino muuya wa Leza wabeleka buti mumbungano zya Bunakristo?

⁷ Davida Mupati, Jesu Kristo wakasyomezya baapostolo kuti muuya uusalala uyoobayiisya zintu zyoonse akubayeezya zyoonse zyaakabaambilide. (Johane 14:26) Ikuzwa buyo ciindi ca Pentekoste kuya ambele Jehova walikuyubulula bucebuce “makani aamaseseke aa Leza” aali mu Jwi lyakwe lilembedwe. (1 Bakolinti 2:10-13, Ci) Eeci cacitwa kwiinda munzila iiboneka ameso yalo Jesu njakaita kuti “muzike musyomesi uucenjede.” Ilapa cakulya cakumuuya calo cilangwa-langwa muprogilamu yakuyiisya yambungano yabantu ba Leza nyika yoonse mbwiizulwa.—Matayo 24:45-47.

Ikuyiisigwa Kuyanda kwa Jehova Kumiswaangano Yesu

8. Nkaambo nzi ncokuyandikila kutola lubazu mu Ciiyo ca Ngazi Yamulindizi?

⁸ Imakani aali mu Ciiyo ca Ngazi Yamulindizi nsondo ansondo kumbungano kanjikanji ajatikizya mbokubelesyegwa njiisyo zya Bbaibbele. Masimpe, eeci cilatugwasya kukonzya kutalibilika mubuumi bwabuzuba abuzuba. Muziiyo zimwi, kasimpe kajatikizya zyakumuuya zini-zini naa businsimi bwa Bbaibbele kalalangwa-langwa. Nzinji nzyotwiiya kaka muziiyo zili boobu! Mumasena manji Maanda aa Bwami alazula bantu bajanika kumiswaangano njiyonya eeyi. Pele muzisi zili mbozibede bantu bajanika kumiswaangano bayaa buceya. Ino nywebo muyeeya kuti nkaambo nzi? Sena kuli bamwi balekela mulimo wanyika kunyonganya kuswaangana kwabo antoomwe lyoonse ‘kubusyanya-busyanya mukuyandana akucita mulimo mibotu’? Naa sena ciindi cipati cisowelwa buyo mumilimo yakulikkomanisya naa kulangilila televisyini calo cipa kuti bajate bubi akutakonzya kujanika kumiswaangano yoonse? Amuyeeye malailile aaya akalembwa kwiinda mumuuya ku Ba-Hebrayo 10:23-25. Sena kuswaangana antoomwe kuti tupegwe malailile aa Leza takugwasyi lino ‘mbotukubwene kuti buzuba bwa-Kristo buli afwaafwi’?

9. (a) Ino Muswaangano wa Mulimo inga watugwasya buti kulibambila mulimo? (b) Tweelede kulimvwa buti kujatikizya mulimo wabukambausi?

⁹ Imukuli wakusaanguna ngwakubeleka katuli bakambausi ba Leza. Imuswaangano wa Mulimo wakabambilwa kutuyiisya mbotunga twacita obo cakubusungu. Tulayiya mbotunga twasikila bantu, ncotweelede kwaamba, mbotweelede kucita kuti naa twatambulwa kabotu alimwi ancotweelede kucita ciindi bantu nobaukaka mulumbe wesu. (Luka 10:1-11) Inzila ezi zigwasya kapati nozibandikwa akutondezyegwa mbozibelesegwa mumuswaangano ooyu wansondo ansondo, tulalibambila kabotu kusikila bantu kutali buyo notuunka kuŋanda aŋanda pele anotukambauka mumigwagwa, musiigwa myoota, notuli muzyeendelo zyabuleya, kumabuwa aandeke, kumakwebo naa muzikolo. Ikweelena akulomba kwesu kwakuti, “Undiiyisye kucita luyando lwako,” tuyooyanda kubelesya ciindi coonse ncotujana kucita bwakaamba Simaleleesu kuti: “Mumuni wanu umunike kunembo lyabantu, kuti . . . balemeke Usowanu uuli kujulu.”—Matayo 5:16.

10. Mbuti mbotukonzya kubagwasya ncobeni abo ‘beelede’?

¹⁰ Kumiswaangano yambungano ili boobu tulayiisigwa akucita kuti bamwi babe basiciiya. Kufumbwa kuti muntu watondezya kuyanda kwiiya naa kwasiigwa bbuku, imakanze eesu twapilukila ngakutalisya ziiyo zya Bbaibbele zyaaŋanda. Munzila imwi eeci cilakonzyanya ambubakacita basiciiya ‘kukkala abantu beelede’ kutegwa babayiisye zintu zyaakabalailide Jesu. (Matayo 10:11; 28:19, 20) Akaambo kakuba alugwasyo lubotu kapati mbuli bbuku lya Luzibo Lutola Kubuumi Butamani, tulilibambilide ncobeni kubeleka kabotu mulimo wesu woonse. (2 Timoteo 4:5) Nsondo ansondo nomujanika ku Muswaangano wa Mulimo awa Cikolo ca Mulimo wa Teokrasi amukanze kuswiilila mpoonya mukabelesye twaambo tugwasya twalo ituyoomupa kubonwa kuti muli bamwi babakambausi ba Leza bazulide beelede kucita kuyanda kwakwe.—2 Ba-Korinto 3:3, 5; 4:1, 2.

11. Ino bamwi batondezya buti lusyomo mumajwi aajanwa ku Mateyo 6:33?

¹¹ Nkuyanda kwa Leza kuti ‘tusaangune kuyandaula bwami bwakwe akucita ziluleme.’ (Mateyo 6:33, Ci) Amulibuzye kuti, ‘Ino inga ndaibelesya buti njiisyo eeyi kuti naa ziyandika kumulimo wangu wanyika [naa wamukaangu] zyasinkilila kujanika kwangu kumiswaangano?’ Ibanji basimide munzila yakumuuya inga babweza ntaamu kutegwa babandike abapati baamulimo wabo kujatikizya makani aaya. Umwi mubelesi waciindi coonse wakazibya bapati baamulimo kuti wakali kuyandika ciindi nsondo ansondo kutegwa kajanika kumiswaangano yambungano. Wakamuzumizya. Pele akaambo kakuyandisya kuziba citola busena kumiswaangano, wakalomba kujanikako awalo. Okuya wakamvwa kwaambilizya kujatikizya muswaangano wacooko wakali afwaafwi. Akaambo kaako oyu mupati waamulimo wakalibambila kuyoojanika okuya buzuba boonse bwamuswaangano. Ncinzi ncomwiiya kuzwa kucikonzyanyo eeci?

Ikuyiisigwa Kuyanda kwa Jehova Kuzwa Kubazyali Banaleza

12. Ikutegwa bana bayiisigwe kuyanda kwa Jehova, ncinzi bazyali Banakristo ncobeelede kucita munzila yabusicamba akusinizya?

¹² Pele taili buyo miswaangano yambungano amiswaangano mipati-pati iituyiisya kucita kuyanda kwa Leza. Ibazyali banaleza balailidwe kuyiisya, kulaya alimwi akukomezya bana babo kuti balumbaizye Jehova akucita kuyanda kwakwe. (Intembauzyo 148:12, 13; Tusimpi 22:6, 15) Ikucita boobo kuyandika kuti katubwezelezya “abana” besu kumiswaangano kwalo nkobakonzya ‘kuswiilila akwiiya,’ pele ino mbuti kumakani aakubayiisya kuzwa mumalembe aasalala kuŋanda? (Deuteronomo 31:12; 2 Timoteo 3:15) Imikwasyi minji cabusongo batalika maprogilamu aakwiiya Bbaibbele antoomwe lyoonse mumukwasyi, pele kwainda buyo kaindi balatalika kusotooka-sotooka naa kucilekela limwi buya. Sena cakamucitikila kale cili boobu? Sena muyooyeya kuti ikukulwaizya kwakuti kamuba aciiyo lyoonse nkwabuyo naa kuti mukwasyi wenu uli bumbi cakuti tacikonzyi buya akubeleka kuli ndinywe? Kufumbwa mbocinga caba, nywebo nubazyali mwalombwa amuziindulule zibalo zibotu eezi “Cholowa Chathu Chauzimu Chaulemerero” acakuti “Mfupo za Kulimbikira” izili mu Ngazi Yamulindizi ya Chicewa ya August 1, 1995.

13. Ino mikwasyi inga yagwasigwa buti akaambo kakulanga-langa lugwalo lwa buzuba?

¹³ Imikwasyi ikulwaizigwa kubaa cilengwa cakulanga-langa lugwalo lwabuzuba kuzwa mukabbuku ka Kusanthula Malemba Tsiku ndi Tsiku. Ikubala buyo lugwalo acibalo kuli kabotu, pele kubandika lugwalo akulubelesya cilagwasya kapati. Mucikonzyanyo kuti kamulanga-langa bbuku lya Ba-Efeso 5:15-17, banamukwasyi balakonzya kubandika mbuli mbobakonzya ‘kujatisya loko ciindi’ ikucita ciiyo ca kuliyiisya, ikutola lubazu mucibeela cimwi camulimo waciindi coonse alimwi akulanganya milimo imwi ya teokrasi. Inzya, ikubandika lugwalo lwabuzuba mumukwasyi kulakonzya kupa kuti omwe naa ibainda awa ‘bamvwisye mbulubede mubuzwide luyando lwa-Mwami.’

14. Ino lugwalo lwa Deutoronomo 6:6, 7 lutondezya kuti bazyali beelede kuba bamayi bamusyobo nzi, aboobo ncinzi ciyandika?

¹⁴ Ibazyali beelede kuti kabali bamayi bankutwe babana babo. (Deuteronomo 6:6, 7) Pele takuli buyo kusinsa naa kulailila bana babo. Wisi abanyina abalo beleede kuswiilila, munzila eeyo balakonzya kuziba ciyandika kupandulula, kusalazigwa, kupa cikonzyanyo naa kwiindululwa. Mumukwasyi umwi wa Bunakristo, ibazyali bakulwaizya kubandika abana babo kwiinda mukubaambila kuti kababuzya mibuzyo kujatikizya zintu nzyobatazi kabotu naa izibapa kulibilika. Aboobo bakayiya kuti mwanaabo musankwa mukubusi cakali kumuyumina kuteelela kuti Jehova tajisi matalikilo. Ibazyali bakakonzya kubelesya makani aali mumabbuku aa Watch Tower Society aatondezya kuti ciindi alimwi amulenga-lenga zilizizilwe kuti tazijisi mamanino. Eeco cakagwasya kupandulula kaambo aboobo mwanaabo wakateelela. Eelyo amutole ciindi kwiiyingula kabotu-kabotu mibuzyo yabana banu kuzwa mu Magwalo, kubagwasya kubona kuti kwiiya kucita kuyanda kwa Leza kulakonzya kuba cintu cikkomanisya kapati. Ncinzi cimbi bantu ba Leza—bapati abana—ncobayiisigwa sunu?

Ikuyiisigwa Kuyanda Akulwana

15.Ndilili luyando lwesu lwabunyina lwini-lwini nolukonzya kusunkwa?

¹⁵ Ikweendelana amalailile aa Jesu mapya, ‘tuliiyidwe kuli-Leza kuti tuyandane.’ (1 Ba-Tesalonika 4:9) Ciindi zintu nozisitikide alimwi kazyeenda kabotu, tulakonzya kulimvwa kuti tulabayanda bakwesu boonse. Pele ncinzi cicitika ciindi nokwabuka kwiimpana naa twalubizilwa akaambo kamwaambo naa mucito wa Munakristo umwi? Muciindi cili boobu luyando lwesu lwini-lwini lulakonzya kusunkwa. (Amweezyanisye 2 Ba-Korinto 8:8.) Ino Bbaibbele lituyiisya kucita nzi muciimo cili boobo? Cimwi cintu nkusolekesya kutondezya luyando kusikila mpotukonzya. (1 Petro 4:8) Muciindi cakuzumanana munzila yesu tobeni, ikunyema-nyema atuntu tusyoonto-syoonto naa kubikkilila tweelede kusoleka kulekela luyando kuvumba zibi zinji-zinji. (1 Ba-Korinto 13:5) Tulizi kuti oku nkuyanda kwa Leza nkaambo Jwi lyakwe mboliyiisya.

16. (a) Muunkondo yamusyobo nzi Banakristo mobayiisigwa kutola lubazu? (b) Ino tulibambilide buti?

¹⁶ Kakuli bantu banji tabakonzyi kubona luyando mboluswaangene ankondo, ayalo nkondo ncintu ncotuyiisigwa, pele musyobo waandeene wa nkondo. Davida wakaziba kuti weelede kusyoma muli Jehova kuti amuyiisye mbokulwanwa munkondo, nokuba kuti kuciindi cakwe cakali kubikkilizya kulwana ncobeni abasinkondonyinaa bana Israyeli. (1 Samuele 17:45-51; 19:8; 1 Bami 5:3; Intembauzyo 144:1) Ino mbuti kulwana kwesu sunu? Izilwanyo zyesu tazili zyabantu buyo pe. (2 Ba-Korinto 10:4) Ikulwana kwesu nkwakumuuya, kwalo nkotweelede kuti katulibambilide azilwanyo zyakumuuya. (Ba-Efeso 6:10-13) Kwiinda mu Jwi lyakwe ambungano yabantu bakwe Jehova ulatuyiisya kulwana nkondo yakumuuya akuzwidilila.

17. (a) Ninzila nzi zyabucenjezu nzyabelesya Diabolosi kutucenga? (b) Ncinzi ncotweelede kutantamuka cabusongo?

¹⁷ Munzila zyakubeja zitalibonyi kabotu kanjikanji Diabolosi ubelesya zintu zyamunyika, basiluleyo abamwi basikukazya kasimpe kusoleka kuti atupe kubikkila maanu kuzintu zyabuyo. (1 Timoteo 6:3-5, 11; Tito 3:9-11) Cili mbuli kuti ulibwene kuti talili lyoonse nangawatukonzya kuti wabelesya nzila iigaminina kutulwana, aboobo ulasoleka kutulebula kwiinda mukutupa kwaamba matoongosi eesu aabuzuba abuzuba ankazyanyo zyabufubafuba izitatugwasyi munzila yakumuuya. Mbuli mbotuli basinkondo bacenjede, tweelede kuti katupakamene kuntenda zili boobu mbubonya mbutucita natulwana cakugaminina.—1 Timoteo 1:3, 4.

18. Ino kutaliponena tubeni cijatikizya nzi cini-cini?

¹⁸ Tatukulwaizyi kweenda muzisusi zyanyama naa kucita mbubacita bamasi. Jehova watuyiisya kwiinda mucikonzyanyo ca Jesu kuti katutaciliponeni tobeni pe; pele tweelede kuba amiyeeyo mbuli yeeyo yakajisi Kristo Jesu akupona katucita kuyanda kwa Leza. (2 Ba-Korinto 5:14, 15) Imazuba aainda, tulakonzya twakali kupona buumi bwakaindilide, bwakutalyeendelezya ikusowa ciindi. Munjalalando, mukusenga bukoko alimwi akutalilemeka zyalo zipandulula bukkale bwanyika eeyi mbyaabi. Mbwaanga lino tuyiisigwa kucita kuyanda kwa Leza, sena tatulumbi kuti twazwisigwa kunyika eeyi iisofweede? Atulwane canguzu munzila yakumuuya kutegwa tutantamuke kujatikizigwa mumicito iisofwaazya yanyika.—1 Petro 4:1-3.

Ikuyiisigwa Kutegwa Tuligwasye Tobeni

19. Ikuyiisigwa kuyanda kwa Jehova akukucita inga caleta bubotu nzi?

¹⁹ Cilayandika kuziba kuti ikuyiisigwa kucita kuyanda kwa Jehova kulatugwasya kapati. Cilalimvwisya kuti tweelede kucita lubazu lwesu kwiinda mukuswiililisya kutegwa twiiye mpoona tutobele malailile aaboola kwiinda mu Mwanaakwe antoomwe a Jwi lyakwe alimwi ambungano yabantu. (Isaya 48:17, 18; Ba-Hebrayo 2:1) Kwiinda mukucita boobo tuyooyumizigwa kuti twiime nji muziindi zikatazya akukonzya kuzwidilila mumanyongwe aali kumbele. (Matayo 7:24-27) Noliba lino tulamukkomanisya Leza kwiinda mukucita kuyanda kwakwe alimwi tuyooba masimpe kuti mipailo yesu ilaingulwa. (Johane 9:31; 1 Johane 3:22) Alimwi tuyooba alukkomano lwini-lwini.—Johane 13:17.

20. Ncinzi cibotu kuzinzibala kuyeeya twanoolubona lugwalo lwamwaka mumwaka woonse wa 1997?

²⁰ Mukati kamwaka wa 1997 tunooli acoolwe cakubala akulanga-langa lugwalo lwamwaka ciindi aciindi lwa Intembauzyo 143:10: “Undiiyisye kucita luyando lwako.” Notucita boobu, atubelesye ziindi zimwi kuyeeya lugwasyo ndwaatupa Leza kuti tuyiisigwe mbuli mbukwatondezyegwa atala. Alimwi kuzinziba kuyeeya majwi ayo kuli boobu akutupe kuti tukulwaizigwe kubeleka cakutalekezya kweelana akulomba oko katuzi kuti “oyo uucita makanze aa-Taata ulakalilila kukabe kutamani.”—1 Johane 2:17.

Inga Mwaingula Buti?

◻ Mbaani sunu bayiisigwa kucita kuyanda kwa Jehova?

◻ Ino lugwalo lwa Intembauzyo 143:10 lweelede kutujatikizya buti mukati kamwaka wa 1997?

◻ Tuyiisigwa buti kucita kuyanda kwa Jehova?

◻ Ncinzi ciyandika kubazyali Banakristo mukuyiisya bana babo?