CIIYO 48
Amusale Balongwe Cabusongo
Balongwe beni-beni balatupa kukkomana muziindi zili kabotu alimwi balatuyumya muziindi zikatazya. Pele Bbaibbele lilatucenjezya kuti tabali bantu boonse ibakonzya kuba balongwe babotu. Aboobo mbuti mbomukonzya kusala balongwe bali kabotu? Amulange-lange mibuzyo iitobela.
1. Ino mbuti balongwe mbomusala mbobakonzya kumujatikizya?
Tulakonzya kuba mbuli baabo mbotuyanzana limwi. Eeci cilakonzya kutujatikizya munzila mbotu naa mbyaabi, amana buya eeci ncamasimpe kufwumbwa naa tuyanzana ambabo cacigaminina buya naa mpaaintaneti. Mbubwenya Bbaibbele mbolyaamba, ‘ooyo weenda abasongo ulaba musongo, pele ooyo uuyanzana abafwubafwuba, nkokuti aabo ibatamuyandi Jehova, ulajana mapenzi.’ (Tusimpi 13:20) Balongwe bamuyanda alimwi akumukomba Jehova balakonzya kutugwasya kuba acilongwe anguwe akusala camaano. Pele balongwe batamuyandi Jehova balakonzya kututantamuna kulinguwe. Nkakaambo kaako Bbaibbele ncolitukulwaizya kusala balongwe cabusongo. Kuti balongwe besu kabali bantu bamuyanda Leza, swebo alimwi ambabo tulagwasyigwa. Tulakonzya ‘kuzumanana kukulwaizyanya akuyakana umwi amweenzinyina.’—1 Batesalonika 5:11.
2. Ino mbuti Jehova mbwakonzya kulimvwa abalongwe mbomusala?
Jehova ulicizyi kusala balongwe. “Balulami mbabajisi cilongwe ciyumu anguwe.” (Tusimpi 3:32) Mbuti Jehova mbwakonzya kulimvwa kuti twasala balongwe ibatamuyandi? Ulakonzya kutyompwa kapati. (Amubale Jakobo 4:4.) Kulubazu lumwi, kuti twabakaka balongwe babyaabi, Jehova ulakkomana akutusala kuba balongwe bakwe beni-beni alimwi tuyooyumya cilongwe abaabo bamuyanda.—Intembauzyo 15:1-4.
AMWIIYE ZINJI
Atulange-lange kaambo ncociyandika kapati kusala balongwe bali kabotu, alimwi akubona mbomukonzya kujana balongwe bakonzya kumugwasya mubuumi.
3. Amubacenjelele balongwe babyaabi
Bantu batamuyandi Leza alimwi azyeelelo zyakwe mbalongwe babyaabi. Atweebelele VIDIYO, akubandika mubuzyo uutobela.
Mbuti mbotukonzya kutalika kuyanzana abantu batali kabotu cakutazyiba?
Amubale 1 Bakorinto 15:33, akubandika mibuzyo eeyi:
Mbantu bali buti bakonzya kuba balongwe babyaabi? Nkaambo nzi?
Amubale Intembauzyo 119:63, akubandika mubuzyo ooyu:
Ncinzi ncomweelede kulanga mumulongwe?
Apo lyomwe libolede lilakonzya kupa maapo aambi kuti abole. Mbuti mulongwe mubyaabi omwe mbwakonzya kumunyonganya?
4. Bantu mbotwiindene limwi ziimo naa bukkale balakonzya kuba balongwe bali kabotu
Bbaibbele lyaamba kujatikizya baalumi bobilo bamu Israyeli yansiku, Davida a Jonatani. Bakaliindene ciimo alimwi abukkale; nokuba boobo, bakajisi cilongwe cikkomanisya. Amubale 1 Samuele 18:1, akubandika mubuzyo ooyu:
Nkaambo nzi talili lyoonse notweelede kusala balongwe bamusela wesu naa mbotukozyenye limwi bukkale?
Amubale Baroma 1:11, 12, akubandika mubuzyo ooyu:
Mbuti balongwe bamuyanda Jehova mbobakonzya kukulwaizyanya?
Muvidiyo iitobela, amubone mukwesu uucili mwana-mwana mbwaajana balongwe mumasena ngaatali kuyeeyela. Atweebelele VIDIYO, akubandika mibuzyo iitobela.
Muvidiyo, nkaambo nzi bazyali ba Akil ncobalibilika kujatikizya balongwe bakwe bakucikolo?
Ntwaambo nzi kumatalikilo twakali kupa kuti balongwe aabo kabamukkomanisya?
Ino wakalizunda buti penzi lyakulendelelwa?
5. Mbotukonzya kujana balongwe bali kabotu
Atubone mbotukonzya kujana balongwe bali kabotu alimwi andinywe mbomukonzya kuba mulongwe uuli kabotu. Atweebelele VIDIYO.
Amubale Tusimpi 18:24 alimwi a 27:17, akubandika mibuzyo eeyi:
Mbuti balongwe beni-beni mbobagwasyanya?
Sena mulijisi balongwe bali boobu? Kuti naa tamujisi, mbuti mbomukonzya kubajana?
Amubale Bafilipi 2:4, akubandika mubuzyo ooyu:
Kutegwa mube abalongwe bali kabotu, andinywe mweelede kuba mulongwe mubotu. Ino inga mwacita buti oobo?
Kutegwa mube abalongwe bali kabotu, andinywe mweelede kuba mulongwe mubotu
BAMWI BAAMBA KUTI: “Tacikwe makani anzyasyoma mulongwe, kufwumbwa buyo kuti kakweendelezya kabotu, nkokuti uli kabotu.”
Ino nywebo mwaamba buti?
MUBUFWAAFWI
Ciindi notusala balongwe camaano, tukkomanisya Jehova alimwi andiswe tulagwasyigwa.
Ncinzi Ncomwaiya?
Nkaambo nzi Jehova ncabikkila maano kapati kujatikizya balongwe mbotusala?
Ino mbalongwe bali buti mbotweelede kweeleba?
Mbuti mbomukonzya kuba azilongwe ziyumu abantu bamuyanda Jehova?
AMUZYIBE ZINJI
Amubone balongwe bali kabotu mbobakonzya kutugwasya ciindi notusunkwa.
“Amuyumye Zilongwe Abamwi Mamanino Naatanasika” (Ngazi Yamulindizi, November 2019)
Amulange-lange nzila zikonzya kumugwasya kusala kabotu balongwe.
Ncinzi ncomweelede kuzyiba kujatikizya balongwe baaintaneti?
Mucakuluula cakuti “Ndakali Kulombozya Kuba Abataata,” amubone cakapa mwaalumi umwi kulanga-langa musyobo wabalongwe mbaakajisi.
“Ibbaibbele Lilakonzya Kubacinca Bantu” (Ngazi Yamulindizi, April 1, 2012)