CIIYO 37
Ncolyaamba Bbaibbele Kujatikizya Mulimo Amali
Sena kuli nomwakalibilikide kale kujatikizya mulimo naa mali? Cilakonzya kukatazya kujana nzyotuyandika alimwi akupa Jehova bukombi bumweelede. Bbaibbele lilijisi malailile mabotu aakonzya kutugwasya.
1. Ncinzi Bbaibbele Ncolyaamba Kujatikizya Mulimo?
Leza uyanda kuti katuukkomanina mulimo wesu. Bbaibbele lyaamba kuti ‘kumuntu, kunyina cintu cibotu kwiinda kukkomana mumilimo njabeleka canguzu.’ (Mukambausi 2:24) Jehova ulabeleka canguzu. Ciindi notumwiiya kwiinda mukubeleka canguzu, tulamukkomanisya alimwi akulimvwa kukkutila.
Mulimo ulayandika kapati, pele tatweelede kuuzumizya kuti ube cintu ciyandika kapati kwiinda bukombi bwesu kuli Jehova. (Johane 6:27) Jehova usyomezya kuti, ikuti twamubikka mubusena bwakusaanguna, unootupa nzyotuyandika kutegwa katupona.
2. Ino kwaabona munzila yeelede mali caamba nzi?
Nokuba kuti Bbaibbele lyaamba kuti mali ‘alakwabilila,’ pele alimwi lilacenjezya kuti mali alikke taakonzyi kutuletela lukkomano. (Mukambausi 7:12) Nkakaambo kaako, tukulwaizyigwa kutaayandisya mali, pele ‘kukkutila azintu nzyotujisi lino.’ (Amubale Bahebrayo 13:5.) Ciindi notuzumanana kukkutila azintu nzyotujisi, tatukatyompwi akaambo kakuyanda kuba azintu zinji. Tuyootantamuka kuba azikwelete izitayandiki. (Tusimpi 22:7) Alimwi tulalikwabilila kuntenda yakubbeja akutalika makwebo aasyomezya bantu kufwambaana kuvwuba kakunyina kubeleka canguzu.
3. Mbuti mbotukonzya kuba baabi kumali ngotujisi?
Jehova ngu Leza mwaabi, aboobo tulamwiiya ciindi ‘notulibambilide kwaabana zintu nzyotujisi abamwi.’ (1 Timoteyo 6:18) Inga twaabelesya kabotu mali kwiinda mukusanga kumbungano alimwi akugwasya bamwi bapengede, kwaambisya bakombima. Jehova ubikkila maano kumakanze ngotujisi notusanga, ikutali kumweelwe wamali. Kuti twapa kuzwa ansi aamoyo, tuyookkomana alimwi akukkomanisya Jehova.—Amubale Milimo 20:35.
AMWIIYE ZINJI
Amubone mbocigwasya kuubona munzila yeelede mulimo alimwi akukkutila.
4. Amumulemeke Jehova kweelana ambomubeleka
Cilongwe cesu a Jehova ceelede kutukulwaizya kujatikizya mbotuubona mulimo. Atweebelele VIDIYO, akubandika mibuzyo iitobela.
Muvidiyo, ncinzi camukkomanisya kujatikizya bube bwaba Jason alimwi ambobalilemeka kumulimo?
Ncinzi ncobakacita kutegwa mulimo kabaubona munzila yeelede?
Amubale Bakolose 3:23, 24, akubandika mubuzyo ooyu:
Nkaambo nzi mbotuubona mulimo ncaali makani mapati?
Mulimo ulayandika. Pele tatweelede kuuzumizya kuba cintu ciyandika kapati kwiinda bukombi bwesu kuli Jehova
5. Kukkutila kulatugwasya
Bantu banji balasoleka kusikila mpobagolela kujana mali manji. Pele Bbaibbele litupa malailile aaindene. Amubale 1 Timoteyo 6:6-8, akubandika mubuzyo ooyu:
Ino Bbaibbele litukulwaizya kucita nzi?
Nokuba kuti tujisi zintu zisyoonto kapati, tulakonzya kukkomana. Atweebelele VIDIYO, akubandika mubuzyo uutobela.
Nokuba kuti bajisi mali masyoonto, ncinzi cipa mikwasyi eeyi kukkomana?
Ino mbuti kuti katujisi zinji, pele alimwi tuciyanda zimbi zinji? Cikozyanyo ca Jesu cilatondezya ntenda iiliko. Amubale Luka 12:15-21, akubandika mubuzyo ooyu:
Ncinzi ncomwaiya kucikozyanyo ca Jesu?—Amubone kapango 15.
Amubale akweezyanisya Tusimpi 10:22 alimwi a 1 Timoteyo 6:10. Akubandika mibuzyo eeyi:
Ino muyeeya kuti ncinzi ciyandika kapati, kuba acilongwe a Jehova naa kuba amali manji? Nkaambo nzi?
Mapenzi nzi aaboola akaambo kakuyandisisya mali?
6. Jehova uuyootupa nzyotuyandika
Mulimo alimwi akubula mali zilakonzya kusunka lusyomo lwesu muli Jehova. Atweebelele VIDIYO kutegwa tubone mbotukonzya kulwana mapenzi aaya aasunka lusyomo lwesu, akubandika mibuzyo iitobela.
Muvidiyo, mapenzi nzi ngaajana mukwesu?
Ncinzi ncaacita kutegwa alwane mapenzi aayo?
Amubale Matayo 6:25-34, akubandika mubuzyo ooyu:
Ncinzi Jehova ncasyomezya kubacitila aabo ibamubikka mubusena bwakusaanguna?
BAMWI BAAMBA KUTI: “Ndeelede kubeleka canguzu kutegwa ndilanganye mukwasyi wangu. Tandikonzyi kunakuunka kumiswaangano yambungano nsondo ansondo.”
Ndugwalo nzi ilumupa kusyoma kuti kubikka bukombi bwanu kuli Jehova mubusena bwakusaanguna ncakusala ciinda kubota?
MUBUFWAAFWI
Mulimo wakumubili alimwi amali zilayandika, pele tazyeelede kutunyonganya kubelekela Jehova.
Ncinzi Ncomwaiya?
Ncinzi cikonzya kumugwasya kuzumanana kuubona munzila yeelede mulimo?
Ino kukkutila inga kwamugwasya buti?
Mbuti mbomukonzya kutondezya lusyomo mucisyomezyo ca Jehova cakuti unoobalanganya bantu bakwe?
AMUZYIBE ZINJI
Amulange-lange kutegwa mubone naa Bbaibbele lyaamba kuti mali mabi.
“Sena Mali Ngomuyanda Wamisyobo Yoonse Yazintu Zibyaabi?” (Cibalo caaintaneti)
Amubone kupa nkwakkomanina Leza.
“Ino Bbaibbele Lyaamba Nzi Kujatikizya Bwaabi?” (Cibalo caaintaneti)
Sena kubbeja kuli kabotu?
Amubone icakapa mwaalumi umwi kuleka kubbeja alimwi akubba.
“Ndakali Kwaayandisya Kapati Mabbiza Aakubalisya” (Ngazi Yamulindizi, November 1, 2011)