CIIYO 60
Amuzumanane Kuyumya Cilongwe Canu a Jehova
Mulwiiyo lwamu Bbaibbele oolu, mwaiya zintu zinji kujatikizya Jehova. Zintu nzyomwaiya zyamupa kumuyanda kapati cakuti ambweni mwakalyaaba kulinguwe akubbapatizyigwa. Kuti naa tamunacita oobo, ambweni mulayeeya kucita oobu lino-lino buyo. Pele kuyaambele kwanu takugoleli buyo alubbapatizyo pe. Mulakonzya kuzumanana kuyumya cilongwe canu a Jehova mane kukabe kutamani. Mubuti?
1. Nkaambo nzi ncomuyandika kuzumanana kuyumya cilongwe canu a Jehova?
Tweelede kubeleka canguzu kutegwa tuyumye cilongwe cesu a Jehova. Nkaambo nzi? “Kutegwa tutaunkilili akusweeka” kuzwa kulinguwe. (Bahebrayo 2:1) Ncinzi cikonzya kutugwasya kuzumanana kubelekela Jehova cakusyomeka? Tulakonzya kujata bubi mumulimo wakukambauka alimwi akujana nzila mbotukonzya kubelekela Leza cakumaninina. (Amubale Bafilipi 3:16.) Kubelekela Jehova nenzila iinda kubota!—Intembauzyo 84:10.
2. Ncinzi cimbi ncomweelede kuzumanana kucita?
Nokuba kuti lwiiyo lwamu Bbaibbele oolu lulamana lino, buumi bwanu mbuli Munakristo bulazumanana. Bbaibbele lyaamba kuti tweelede “kusama buntu bupya.” (Baefeso 4:23, 24) Ciindi nomuzumanana kwiiya Jwi lya Leza akujanika kumiswaangano, muyooiya zintu zipya kujatikizya Jehova alimwi abube bwakwe. Amujane nzila momukonzya kwiiya bube bwakwe cakulomya mubuumi bwanu. Amuzumanane kucinca oomo muyandika kutegwa mumukkomanisye Jehova.
3. Mbuti Jehova mbwayoomugwasya kuyaambele?
Bbaibbele lyaamba kuti: “Leza . . . uyoomanizya lwiiyo lwanu. Uyoomuzyatika, uyoomuyumya akumwiimika nji.” (1 Petro 5:10) Toonse tulajana masunko. Pele Jehova ulatupa nguzu nzyotuyandika kutegwa twaazunde. (Intembauzyo 139:23, 24) Utusyomezya kutupa nguzu alimwi aluyandisisyo kutegwa tumubelekele cakusyomeka.—Amubale Bafilipi 2:13.
AMWIIYE ZINJI
Atulange-lange mbomukonzya kuzumanana kuyaambele akubona Jehova mbwayoomulongezya.
4. Amuzumanane kubandika a Mulongwe wanu iwiinda boonse
Mupailo akwiiya Bbaibbele ziyoomugwasya kuba mulongwe wa Jehova. Mbuti zintu eezyi mbozikonzya kuciyumya kapati cilongwe canu anguwe?
Amubale Intembauzyo 62:8, akubandika mubuzyo ooyu:
Kutegwa muyumye cilongwe canu a Jehova, mbuti mbomukonzya kwaamba mbomulimvwa mumipailo yanu?
Amubale Intembauzyo 1:2 alimwi abupanduluzi buyungizyidwe, akubandika mubuzyo ooyu:
Kutegwa muyumye cilongwe canu a Jehova, mbuti mbomukonzya kugwasyigwa kapati ciindi nomubala Bbaibbele?
Mbuti mbomukonzya kugwasyigwa kapati ciindi nomucita ciiyo canu ca Bbaibbele? Kutegwa tubone mizeezo imwi, atweebelele VIDIYO, akubandika mibuzyo iitobela.
Ninzila nzi izili muvidiyo nzyomukonzya kubelesya?
Makani nzi ngomuyanda kubala?
5. Amulibikkile mbaakani zyakumuuya
Kuba ambaakani mumulimo wa Jehova kuyoomugwasya kuzumanana kuyaambele. Atweebelele VIDIYO, akubandika mubuzyo uutobela.
Muvidiyo, ino mucizyi Cameron wakagwasyigwa buti kwiinda mukulibikkila mbaakani?
Tabali boonse ibakonzya kulongela kucisi cimbi kuyookambauka. Nokuba boobo, toonse tulakonzya kulibikkila mbaakani nzyotukonzya kuzuzikizya. Amubale Tusimpi 21:5, akubandika mbaakani nzyomunga mwalibikkila . . .
mumbungano.
mumulimo wamumuunda.
Mbuti njiisyo iijanika mukapango aaka mboikonzya kumugwasya kuzuzikizya mbaakani zyanu?
Mbaakani nzyomukonzya kulibikkila
Amubotye mipailo yanu.
Amulibale Bbaibbele lyoonse.
Amubazyibe boonse mumbungano yanu.
Amutalisye ciiyo ca Bbaibbele akucisololela.
Amucite bupainiya bwakugwasyilizya naa bwaciindi coonse.
Kuti naa kamuli mukwesu, amubeleke canguzu kutegwa mweelele kuba mukutausi.
6. Amupone kukabe kutamani!
Amubale Intembauzyo 22:26, akubandika mubuzyo ooyu:
Ncinzi ncomukonzya kucita kutegwa kamupona buumi buli kabotu lino alimwi akuyoopona kukabe kutamani kumbele?
MUBUFWAAFWI
Amuzumanane kuyumya cilongwe canu a Jehova akulibikkila mbaakani zyakumuuya. Mpoonya muyoocikonzya kupona kukabe kutamani!
Ncinzi Ncomwaiya?
Nkaambo nzi ncomusinizyide kuti Jehova uyoomugwasya kutegwa mumubelekele cakusyomeka?
Mbuti mbomukonzya kuyumya cilongwe canu a Jehova?
Mbuti mbaakani zyakumuuya mbozikonzya kumugwasya kuyaambele?
AMUZYIBE ZINJI
Ncinzi Jehova ncakkomanina kapati, kusyomeka kulinguwe munzila iilibedelede ciindi comwe buyo naa kusyomeka kulinguwe mubuumi bwanu boonse?
Naba mubelesi wa Jehova uusyomeka ulakonzya kumaninwa lukkomano. Amubone mbomukonzya kulubukulusya.
Amubukulusye Lukkomano Kwiinda Mukubala Akuzinzibala Kuyeeya (5:25)
Mbuti mbomukonzya kulibikkila mbaakani zyakumuuya alimwi akuzizuzikizya?
“Amubelesye Mbaakani Zyakumuuya Kulemeka Mulengi Wanu” (Ngazi Yamulindizi, July 15, 2004)
Nkaambo nzi ncociyandika kuba Munakristo uusimide, alimwi mbuti mbomukonzya kuba boobo?