Sena Buzuba Mbotuyoofwa Bwakabikkilwa Limwi?

Bwiinguzi bwamu Bbaibbele

Peepe, buzuba mbotuyoofwa tiibwakabikkilwa limwi. Muciindi cakwaamba kuti zintu zyoonse zicitika zyakabikkilwa limwi, Bbaibbele lyaamba kuti kanji-kanji lufwu lulaboola akaambo ‘kazintu zitalangilwi.’​—Mukambausi 9:11.

Sena Bbaibbele talyaambi kuti kuli “ciindi cakufwa”?

Inzya lilaamba. Lugwalo lwa Mukambausi 3:2 lwaamba kuti kuli “ciindi cakuzyalwa aciindi cakufwa; ciindi cakusyanga aciindi cakuzyula ceeco cakasyangidwe.” Nokuba boobo, twalanga twaambo tumwi tujatikizya kapango aaka, tujana kuti Bbaibbele lyaamba zintu zicitika lyoonse mubuumi. (Mukambausi 3:1-8) Leza tanaakabikkila limwi buzuba mbotuyoofwa mbubwenya mbwatakonzyi kusinikizya mulimi kusyanga aciindi cimwi cigaminide. Muciindi caboobo, kaambo kapati nkakuti tatweelede kujata bubi azintu zyamubuumi cakuti twaleka kubikkila maano ku Mulengi wesu.​—Mukambausi 3:11; 12:1, 13.

Tulakonzya kupona mazuba manji

Nokuba kuti mubuumi inga kucitika zintu nzyotwatali kulangila, tulakonzya kupona mazuba manji ikuti katusala kabotu zintu. Bbaibbele lyaamba kuti: “Malailile aamusongo nkasensa kabuumi alesya muntu kucegwa mutukole twalufwu.” (Tusimpi 13:14) Mbubwenya buyo, Musa wakaambila bana Israyeli kuti bakali ‘kuyoopona mazuba manji’ ikuti bamvwida malailile aa Leza. (Deuteronomo 6:2) Mukwiimpana, tulakonzya kubufwiinsya buumi bwesu ikuti tiitwalilemeka kabotu.​—Mukambausi 7:17.

Aboobo, taciko makani naa tulabikkila maano alimwi tuli basongo, tatukonzyi kulutija lufwu. (Baroma 5:12) Pele bukkale oobu buyoocinca nkaambo Bbaibbele litusyomezya kuti “lufwu talukabi limbi.”​—Ciyubunuzyo 21:4.