• Mulakonzya Kuba Mulongwe wa Jehova
    Amupone Kukabe Kutamani!—Lwiiyo Lwamu Bbaibbele

    • 5. Jehova ncayanda kuti balongwe bakwe kabacita

      Kuli zintu nzyotulangila kuti balongwe besu kabacita.

      • Nzintu nzi zimwi nzyomuyanda kuti balongwe banu kabamucitila?

      Amubale 1 Johane 5:3, akubandika mubuzyo ooyu:

      • Nzintu nzi Jehova nzyayanda kuti balongwe bakwe kabacita?

      Kutegwa tumumvwide Jehova, inga twayandika kucinca mbotulilemeka naa bube bumwi. Amubale Isaya 48:17, 18, akubandika mubuzyo ooyu:

      • Nkaambo nzi Jehova ncaambila balongwe bakwe kuti bacince bukkale bwabo?

      Mubelesi uubeleka mulimo wakuyaka upa mubelesinyina cimpoompo.

      Mulongwe uuli kabotu ulatwaambila zintu zikonzya kutukwabilila alimwi akutugwasya. Awalo Jehova mbwacita kubalongwe bakwe

  • Mbuti Mbotukonzya Kutondezya Kuti Tulamuyanda Jehova?
    Amupone Kukabe Kutamani!—Lwiiyo Lwamu Bbaibbele
    • Ciiyo 34. Mwaalumi mudolopo walanga kujulu kumwi kazinzibala kuyeeya.

      CIIYO 34

      Mbuti Mbotukonzya Kutondezya Kuti Tulamuyanda Jehova?

      Sena cilongwe canu a Leza cayuma kapati kuzwa ciindi nomwakatalika kwiiya Bbaibbele? Sena mulayanda kuzumanana kuyumya cilongwe canu anguwe? Ikuti naa mulayanda, amuyeeye kuti ciindi Jehova nabona kuti luyando ndomujisi kulinguwe luyaabukomena, awalo unoomuyanda kapati akumulanganya. Aboobo mbuti mbomukonzya kutondezya kuti mulamuyanda?

      1. Mbuti mbotukonzya kutondezya kuti tulamuyanda Jehova?

      Tulatondezya kuti tulamuyanda Jehova kwiinda mukumumvwida. (Amubale 1 Johane 5:3.) Tasinikizyi muntu uuli woonse kumumvwida. Muciindi caboobo, umwi aumwi wesu ulamupa coolwe cakusala kumumvwida naa pe. Nkaambo nzi? Jehova uyanda kuti ‘katumuswiilila kuzwa ansi aamoyo.’ (Baroma 6:17) Munzila imwi, uyanda kuti kamumumvwida, ikutali akaambo kakuti muleelede kucita oobo, pele akaambo kakuti mulamuyanda. Cibeela 3 a 4 cabbuku eeli cibambilidwe kumugwasya kutondezya luyando ndomujisi kuli Jehova kwiinda mukucita zintu izimukkomanisya alimwi akutantamuka zyeezyo izitamukkomanisyi.

      2. Nkaambo nzi ncocikonzya kukatazya kutondezya luyando ndotujisi kuli Jehova?

      “Mapenzi aamululami manji.” (Intembauzyo 34:19) Toonse tulapenga akutalondoka kwesu. Alimwi tulakonzya kujana penzi lyamali, kucitilwa cakutalulama amapenzi aambi buyo. Ciindi notujisi mapenzi, cilakonzya kutukatazya kucita ncayanda Jehova. Cili boobu akaambo kakuti nzila iitaluzi ambweni ninguba-uba kutobela. Pele kuti cakusyomeka mwacita ncamwaambila Jehova, muyootondezya kuti mulamuyanda kapati kwiinda cintu cili coonse. Alimwi muyootondezya kuti mulasyomeka kulinguwe. Mpoonya awalo uyoosyomeka kulindinywe. Kunyina nayoomusiya pe.—Amubale Intembauzyo 4:3.

      AMWIIYE ZINJI

      Atulange-lange kaambo kumvwida ncaali makani mapati kuli Jehova, alimwi akubona cikonzya kumugwasya kuzumanana kusyomeka kulinguwe.

      3. Saatani ulamutamikizya nywebo

      Mubbuku lyamu Bbaibbele lya Jobu tubala kuti Saatani wakatamikizya Jobu alimwi abantu boonse ibayanda kubelekela Jehova. Amubale Jobu 1:1, 6–2:10, akubandika mibuzyo eeyi:

      • Kweelana ancaakaamba Saatani, nkaambo nzi Jobu ncaakali kumumvwida Jehova?​—Amubone Jobu 1:9-11.

      • Ncinzi Saatani ncatamikizya bantu boonse, kubikkilizya andinywe?​—Amubone Jobu 2:4.

      Amubale Jobu 27:5b, akubandika mubuzyo ooyu:

      • Mbuti Jobu mbwaakatondezya kuti wakali kumuyanda ncobeni Jehova?

      Saatani ukazya Jehova. Wadooneka kusyomeka kwa Jobu ulaazilonda mubili woonse, alimwi amucizyi uubelekela Jehova mazuba aano.

      Jobu wakatondezya kuti ulamuyanda Jehova kwiinda mukuzumanana kusyomeka kulinguwe

      Tulatondezya kuti tulamuyanda Jehova kwiinda mukuzumanana kusyomeka kulinguwe

      4. Amukkomanisye moyo wa Jehova

      Amubale Tusimpi 27:11, akubandika mibuzyo eeyi:

      • Ino Jehova ulimvwa buti ciindi nomusongwaala akumumvwida? Nkaambo nzi?

      5. Mulakonzya kusyomeka kuli Jehova

      Luyando ndotujisi kuli Jehova lutupa kwaambila bamwi kujatikizya nguwe. Kusyomeka kwesu kulinguwe kutupa kucita oobo, nokuba kuti tacili cuuba-uba. Atweebelele VIDIYO, akubandika mibuzyo iitobela.

      VIDIYO: Amulwiiminine Lusyomo Lwanu Nokuba Kuti Mulakazyigwa (5:09)

      • Sena cilamukatazya kwaambila bamwi kujatikizya Jehova?

      • Muvidiyo, ncinzi cakagwasya ba Grayson kuzunda buyoofwu mbobakajisi?

      Cilauba-uba kusyomeka kuli Jehova kuti katuyanda zintu nzyayanda alimwi akusulaika nzyeezyo nzyatayandi. Amubale Intembauzyo 97:10, akubandika mibuzyo eeyi:

      • Kweelana anzyomwaiya, nzintu nzi nzyayanda Jehova? Nzintu nzi nzyatayandi?

      • Mbuti mbomukonzya kwiiya kuyanda zintu zibotu alimwi akusulaika zintu zibi?

      6. Tulagwasyigwa ciindi notumumvwida Jehova

      Kumvwida Jehova lyoonse nkokwiinda kubota. Amubale Isaya 48:17, 18, akubandika mibuzyo eeyi:

      • Sena muyeeya kuti Jehova lyoonse ulizyi zintu zibotu nzyotuyandika? Nkaambo nzi?

      • Kusikila waawa, ino kwiiya Bbaibbele alimwi akuzyiba Leza wakasimpe Jehova kwamugwasya buti?

      BAMWI BAAMBA KUTI: “Nzyondicita tazimujatikizyi Leza.”

      • Ndugwalo nzi ndomukonzya kubelesya kutondezya kuti Jehova kuli mbwalimvwa kujatikizya zintu nzyomucita?

      MUBUFWAAFWI

      Mulakonzya kutondezya luyando ndomujisi kuli Jehova kwiinda mukumumvwida, alimwi akuzumanana kusyomeka kulinguwe nokuba kuti tacili cuuba-uba.

      Ncinzi Ncomwaiya?

      • Ncinzi ncomwaiya kucikozyanyo ca Jobu?

      • Mbuti mbomukonzya kutondezya luyando ndomujisi kuli Jehova?

      • Ncinzi cikonzya kumugwasya kuzumanana kusyomeka kuli Jehova?

      Mbaakani

      AMUZYIBE ZINJI

      Amubone mbomukonzya kusyomeka kuli Jehova alimwi akumbungano.

      “Kumuntu Uusyomeka, Yebo Ulasyomeka” (16:49)

      Amwiiye zinji kujatikizya Saatani mbwabatamikizya bantu.

      “Jobu Wakazumanana Kusyomeka” (Bbaibbele—Ino Lijisi Mulumbe Nzi? cibeela 6)

      Amubone nobaba bana mbobakonzya kutondezya luyando ndobajisi kuli Jehova.

      Amumukkomanisye Jehova (8:16)

      Mbuti mukubusi uuyungwa abakubusinyina mbwakonzya kuzumanana kusyomeka kuli Leza?

      Mbokonzya Kukaka Kuyungwa Abeenzinyoko! (3:59)