CIIYO 05
Bbaibbele Mulumbe Ngwaakatupa Leza
Jehova wakatupa Bbaibbele. Ncipego cibotu icijisi mabbuku aali 66 aaindene-indene. Pele mulakonzya kulibuzya kuti: ‘Ino Bbaibbele lyakazwa kuli? Nguni Sikulyaanza?’ Kutegwa twiingule mibuzyo eeyi, atubandike mulumbe wamu Bbaibbele uuzwa kuli Leza mbowakasika kulindiswe.
1. Kuti naa mbantu bakalemba Bbaibbele, mbuti Leza mbwali Sikulyaanza?
Bbaibbele lyakalembwa abaalumi baindene-indene babalilwa ku 40, lyakatola myaka iibalilwa ku 1,600 kuzwa mu 1513 B.C.E. kusikila kuma 98 C.E. Nokuba kuti bakalilemba bakaliindene kapati, nzyobakalemba zileendelana. Ino eeci cakakonzyeka buti? Nkaambo Leza ngo Sikwaanza Bbaibbele. (Amubale 1 Batesalonika 2:13.) Bakalilemba, tiibakalemba mizeezo yabo. Muciindi caboobo, “bakaambaula zyakazwa kuli Leza kwiinda mukusololelwa amuuya uusalala.”a (2 Petro 1:21) Leza wakabelesya muuya wakwe uusalala kusololela naa kukulwaizya baalumi kulemba mizeezo yakwe.—2 Timoteyo 3:16.
2. Mbaani bakonzya kugwasyigwa a Bbaibbele?
Leza wakaamba kuti: “Masi oonse, misyobo yoonse, milaka yoonse alimwi abantu bamisyobo yoonse” balakonzya kugwasyigwa amulumbe wamu Bbaibbele. Mazuba aano Bbaibbele lilajanika mumyaambo minji ikwiinda bbuku limbi lili lyoonse. (Amubale Ciyubunuzyo 14:6.) Bantu boonse balakonzya kugwasyigwa a Bbaibbele. Aaya masimpe, tacikwe makani ankobakkala naa mwaambo ngobaambaula.
3. Mbuti Jehova mbwaalikwabilila Bbaibbele?
Bbaibbele lyakalembedwe azintu zyatakali ziyumu, mbuli cipaya. Pele baalumi ibakali kuliyanda Bbaibbele bakalikkopolola cakubikkila maano. Nokuba kuti beendelezi abasololi bazikombelo bamwi, bakasola kuti balinyonyoone Bbaibbele, bantu bamwi bakabikka buumi bwabo muntenda kutegwa balikwabilile. Jehova kunyina naazumizya muntu, naa cintu cili coonse kuti cimulesye kwaambaula andiswe. Bbaibbele lyaamba kuti: “Ijwi lya Leza wesu linooliko lyoonse mane kukabe kutamani.”—Isaya 40:8.
AMWIIYE ZINJI
Amwiiye zinji kujatikizya Leza mbwaakasololela baalumi kuti balembe Bbaibbele, mbwaakalikwabilila alimwi ambwaakapa kuti kaliliko kubantu.
4. Bbaibbele lilamwaamba Sikulyaanza
Atweebelele VIDIYO. Mpoonya mubale 2 Timoteyo 3:16, akubandika mibuzyo iitobela.
Kuti naa Bbaibbele lyakalembwa abantu, nkaambo nzi ncoliitwa kuti Jwi lya Leza?
Sena muyeeya kuti cilalimvwisya ikusyoma kuti Leza nguwakapa kuti bantu balembe mizeezo yakwe?
Mulembi ulakonzya kulemba lugwalo, pele nzyalemba zilakonzya kuzwa kumuntu uumbi. Mbubwenya buyo, bantu mbobakalemba Bbaibbele, pele mulumbe wakazwa kuli Leza
5. Bantu baalilwa kulinyonyoona Bbaibbele
Ikuti naa Bbaibbele lizwa kuli Leza, nkokuti uleelede kulikwabilila. Kuzwa kaindi, baalumi balemekwa basola kulinyonyoona Bbaibbele. Basololi bazikombelo balo basoleka kulisisa buya. Pele nokuba kuti bakali kukazyigwa alimwi akukongwa kujaigwa, banji bakabikka buumi bwabo muntenda kutegwa balikwabilile Bbaibbele. Kutegwa mwiiye kujatikizya umwi wabantu aaba, atweebelele VIDIYO, akubandika mibuzyo iitobela.
Lino mbwaanga mwazyiba bantu mbobakalibambilide kubikka buumi bwabo muntenda kutegwa balikwabilile Bbaibbele, sena eeci tacimupi kuba aluyandisisyo lwakulibala?
Amubale Intembauzyo 119:97, akubandika mubuzyo ooyu:
Ncinzi cakakulwaizya bantu banji kubikka buumi bwabo muntenda kutegwa balisandulule alimwi akulimwaya Bbaibbele?
6. Bbaibbele ndibbuku lyabantu boonse
Kuzwa kaindi, Bbaibbele ndebbuku lyasandululwa mumyaambo minji alimwi akumwaigwa kwiinda bbuku limbi lili lyoonse. Amubale Milimo 10:34, 35, akubandika mibuzyo eeyi:
Nkaambo nzi Leza ncayanda kuti Jwi lyakwe lisandululwe mumyaambo minji alimwi akumwaigwa?
Ncinzi cimukkomanisya kujatikizya Bbaibbele?
Bantu batandila ku
100%
munyika balilijisi Bbaibbele
mumwaambo wabo
Nkolili lyoonse mbolibede naa cibeela buyo
mumyaambo
yiinda ku
3,000
5,000,000,000
ngomweelwe uuyeeyelwa wama Bbaibbele aakapangwa,
kwiinda bbuku limbi lili lyoonse
BAMWI BAAMBA KUTI: “Bbaibbele ndibbuku lyakaindi ilyakalembwa abantu.”
Ino nywebo muyeeya buti?
Mbumboni nzi butondezya kuti Bbaibbele ndi Jwi lya Leza?
MUBUFWAAFWI
Bbaibbele ndi Jwi lya Leza, alimwi wakaba masimpe kuti lilajanika kubantu boonse.
Ncinzi Ncomwaiya?
Ino cipandulula nzi kwaamba kuti Leza wakasololela baalumi kulemba Bbaibbele?
Ncinzi cimukkomanisya kujatikizya Bbaibbele mbolyafwutuka, mbolyasandululwa alimwi ambolyamwaigwa?
Ino mulimvwa buti kujatikizya Leza, mwalanga mbwaasolekesya kuti kabandika andinywe?
AMUZYIBE ZINJI
Amubale makani aajatikizya Bbaibbele aakaindi, kuzwa kumalembe aakaindi kusikila kubusanduluzi bwamazuba aano.
Amwiiye kujatikizya Bbaibbele mbolyakafwutuka kuntenda zipati-pati zyotatwe.
“Makani Aamba Mbolyakafwutuka—Bbaibbele” (Ngazi Yamulindizi No. 4 2016)
Amubone bantu mbobakabikka buumi bwabo muntenda kutegwa basandulule Bbaibbele.
Bbaibbele lyakakkopololwa alimwi akusandululwa ziindi zinji. Mbuti mbomukonzya kuba masimpe kuti mulumbe wa Leza tiiwakacincwa?