Imaseseke Ngobateelede Kusisa Ibanakristo!
“Ndakaamba cakutasisa kunyika, . . . taakwe ncendali kwaambila kumbali pe.”—JOHANE 18:20.
1, 2. Ino bbala lya Cigiliki lya my·steʹri·on lyaamba nzi nolibelesyegwa mu Magwalo?
IBBALA lya Cigiliki lya my·steʹri·on mu New World Translation of the Holy Scriptures lilisandulwidwe ziindi zili 25 kuti “sacred secret [makani aasisidwe aa-Leza]” alimwi aziindi zyotatwe kuti “mystery [maseseke].” Imaseseke aambwa kuti ngabuleza eelede kuba mapati ncobeni! Kufwumbwa muntu uulaa coolwe cakujana luzibo luli boobu weelede kulimvwa kulemekwa cini-cini, mbokunga wabonwa kweelelwa kutola lubazu mumaseseke antoomwe a Leza Mupati wakoonse-koonse.
2 Ibbuku litegwa Expository Dictionary of Old and New Testament Words ilyakalembwa a Vine lilasinizya kuti bunji bwaziindi busanduluzi bwakuti “sacred secret” buleelela kwiinda bwakuti “mystery.” Kujatikizya bbala lya my·steʹri·on ibbuku eeli lyaamba kuti: “[Mu Magwalo aa Bunakristo aa Cigiliki] lyaamba cintu cinga akaambo kakutamvwika munzila zyacilengwaleza, zikonzya buyo kuzibwa kwiinda kukuyubununwaa Leza, eelyo zizibisyigwa baabo basalidwe aa Leza, balikke aabo bamunikilwa a Muuya Wakwe, talyaambi cintu cinga tacizibikili limwi (mbuli bupandululwa bbala lya Chingisi). Kanjikanji ibbala lya mistery liteelelwa kuba luzibo lusisidwe; pesi bupanduluzi bwalyo mu Magwalo mbwakasimpe kayubununwa. Aboobo imabala aaswaangene kapati amakani aaya nga ‘kuzibisyigwa,’ ‘kutondezegwa,’ ‘kubonesyegwa,’ ‘kuyubununwa,’ ‘kukambaukwa,’ ‘kuteelela,’ ‘kumwayigwa.’”
3. Mbuti mbungano ya Bunakristo yamumwaanda wamyaka wakusaanguna mboyaandene atubunga tuzangi twabukombi tumwi?
3 Oobu bupanduluzi bulatondezya lwiindano lupati luliwo akati katubunga twabukombi bwamasalamuzi itwakavwulide mumwaanda wamyaka wakusaanguna alimwi ambungano mpya ya Bunakristo. Kakuli aabo banjizigwa mubukombi buzangi bwamaseseke kanjikanji bakali kukonkezegwa kuumuna kutegwa bakakwabilile ziyiisyo zyabukombi, Banakristo tabakwe nobakajalilidwe munzila iili boobu pe. Mmasimpe ikuti mwaapostolo Paulo wakaamba “[zya]mbusongo busisidwe bwa-Leza,” kaamba kuti “[M]busongo buvumbidwe” nkokwaamba kuti bwakalisisidwe “k[u]beendelezi baciindi ecino.” Tabusisidwe ku Banakristo aabo balo mbubwakayubunudwe kwiinda mumuuya wa Leza kutegwa babulete antangalala.—1 Ba-Korinto 2:7-12; amweezyanye a Tusimpi 1:20.
“Makani Aasisidwe aa-Leza” Azibisigwa
4. Ino “makani aasisidwe” ayeeme ali ni, alimwi mubuti?
4 Alo “makani aasisidwe” aa Jehova ajatikizya Jesu Kristo. Paulo wakalemba ategwa: “[Jehova waka]tucita kuti tuzibe makani aasisidwe aabukanze bwamoyo wakwe. Lulito lwakwe ndwaakalita kalekale mulinguwe ndoolu. Wakabamba kuti, casika buyo ciindi ceelede, mitwe yazintu zyoonse, niziba zintu zyamujulu niziba zyaansi, ibikwe antoomwe muli-Kristo.” (Ba-Efeso 1:9, 10) Paulo mane wakabugama buya bube bwa “makani aasisidwe aa-Leza” aaya ciindi naakatondezya mbuli mbokuyandika kuti bantu “bazibisye makani aasisidwe aa-Leza, nkukuti Kristo.”—Ba-Kolose 2:2.
5. Ino “makani aasisidwe” ajatikizya ni, alimwi munzila nzi?
5 Pesi ajatikizya zinji kwiinda waawa, nkaambo aaya “makani aasisidwe aa-Leza” mmaseseke aalaa mbazu zinji. Takuli buyo kuziba kuti Jesu ngo Lunyungu iwakasyomezegwa antela Mesiya; kulabikkilizya amulimo ngwatumidwe kucita mumakanze aa Leza. Kujatikizya mfwulumende yakujulu, Ibwami bwa Leza Bwabu Mesiya, mbuli mbwaakapandulula kabotu-kabotu Jesu ciindi naakaambila basiciiya bakwe kuti: “Inywe mwapegwa kuziba aasisidwe aa-Bwami bwakujulu, balo tabapegwi pe.”—Matayo 13:11.
6. (a) Nkaambo nzi ncociluzi ikwaamba kuti “makani aasisidwe” mmakani “aatakabwenwe kuziindi zilamfu zyakalekale”? (b) Mbuti mbwaakayubununwa bucebuce?
6 Kwakali kuzooinda ciindi cilamfwu kuzwa ciindi citaanzi naakaambwa makanze aa Leza aakupa ntalisyo ya Bwami Bwabu Mesiya alimwi anaakali “[ku]yoomana makani aasisidwe.” (Ciyubunuzyo 10:7; Matalikilo 3:15) Ikumanizigwa kwangayo kwakali kuzoocitika akutalisyigwa kwa Bwami, mbuli mbokunga kwasinizigwa kwiinda mukweezyanya Ciyubunuzyo 10:7 a 11:15. Atwaambe kuti kwakainda myaka iili 4,000 kuzwa lyakapegwa cisyomezyo ca Bwami citaanzi mu Edeni kusikila kukuboola kwa Mwami Musale mu 29 C.E. Aimbi myaka ili 1,885 yakazooinda kabutanatalisigwa Bwami kujulu mu 1914. Munzila eyi “makani aasisidwe aa-Leza” bucebuce akayubununwa kwaciindi citandila kumyaka iili 6,000. (Amubone peeji 16.) Paulo wakalizi ncobeni naakaamba zya “kuyubununwa kwamakani aasisidwe, aatakabwenwe kuziindi zilamfu zyakalekale, pele sunu ayubununwa, alimwi kumalembe aabasinsimi (kumulazyo wa-Leza uuteeli) azibisigwa.”—Ba-Roma 16:25-27; Ba-Efeso 3:4-11.
7. Nkaambo nzi ncotunga twabaa lusyomo lupati muciinga camuzike musyomesi uucenjede?
7 Jehova uliindene abantunsi balo balaa buumi bufwaafwi, mukuti walo taakwe nalimvwa kusinikizigwa kuti maseseke aakwe aayubunune kacitanasika ciindi. Aaka kaambo kaleelede kutukasya kwiintila ciindi mibuzyo imwi ya Bbaibbele niitakonzi kwiingulwa kwaciindeeco kweelana ambotunga twakkutila swebo. Kulicesya kwaciinga camuzike musyomesi uucenjede, calo citumidwe kupa ŋanda ya Bunakristo zilyo aciindi ceelede, kulacikasya kulipeekezya kubindila kumbele akwiide kuzumbauzya zintu zitanaa kulimvwisya kabotu. Ibaciinga camuzike eeci balasoleka kutaba nkakatwaambwa. Tabalisumpuli cakutazumina kuti kwaciindi cino tabakonzi kwiingula mibuzyo yoonse, kabayeeyede Tusimpi 4:18. Pesi cilakondelezya ikuziba kuti Jehova, kuciindi cakwe mwini alimwi munzila yakwe mwini, uyoozumanana kuyubununa maseseke aajatikizya makanze aakwe! Taakwe notweelede kusola kumwiinda ambele Jehova Imuyubunuzi wamaseseke. Ino cilakkazika moyo kaka ikuziba kuti inzila Jehova njabelesya sunu taiciti oobo! Nkoili koonse kubusyomesi akukucenjela.—Matayo 24:45; 1 Ba-Korinto 4:6.
Imaseseke Aayubunwidwe Ayelede Kuluulwa!
8. Ino tuzi buti kuti “makani aasisidwe” ngakuyubununa?
8 Jehova takwe naayubununwida Banakristo “maseseke” kuti kabaasiside. Alazibisigwa, kweelana anjiisyo ya Jesu njaakabikkila basikumutobela boonse—kutali buyo bamafwundisi basyoonto iyakuti: “Ndinywe mumuni wanyika. Munzi uuyakidwe atala acilundu tuukonzyi kusiswa. Alimwi bantu nibamunika ilampi tabalibiki munsi lyalusuwo, pe, balalibika acibikilo kuti limunikile boonse bali muŋanda. Mbubonya obo mumuni wanu umunike kunembo lyabantu, kuti babone milimo yanu mibotu, balemeke Usowanu uuli kujulu.”—Matayo 5:14-16; 28:19, 20.
9. Ncinzi cisinizya kuti Jesu taakali muzangi, mbuli bwamba bamwi?
9 Jesu taakajisi makanze aali oonse aabuzangi pe aakuyobolola kabunga kabasiciiya bayubilila ikabelekela makanze aamaseseke. Mubbuku litegwa Early Christianity and Society [Bunakristo Bwakusaanguna a Buleya], Robert M. Grant wakalemba kujatikizya majwi aasikuvwuninina bukombi Justin Martyr wamumwaanda wamyaka wabili alo ngaakalemba kujatikizya Banakristo bakusaanguna aakuti: “Kuti Banakristo nobali bazangi, nobali kunooyubide kutegwa baakonzye makanze aabo.” Pele mbuti ino Banakristo mbobakali “kunooyubide” alimwi aciindi mpoona kabali mbuli “munzi . . . uuyakidwe atala acilundu”? Teebakeelede kusisa mumuni wabo kunsi lyacinzuma pe! Aboobo mfwulumende yakanyina kaambo kakuyoowela milimo yabo. Ooyu mulembi wakazumanana kupandulula kuti “mbabagwasilizi bamwami bainda kukubelekela luumuno abulondo.”
10. Nkaambo nzi Banakristo ncobateelede kulisisa kuti mbaani?
10 Jesu taakali kuyanda kuti basiciiya bakwe balisise kuti mbaani, kabali bakabunga kategwa nkabuzangi pe. (Incito 24:14; 28:22) Ikukakilwa kumwesya mumuni wesu sunu inga kwabanyemya boonse bobile, Kristo alimwi a Wisi, Muyubunuzi wamaseseke, alimwi inga swebo takukoosyaala katukkomene pe.
11, 12. (a) Nkaambo nzi Jehova ncayanda kuti Bunakristo buzibisigwe? (b) Mbuti Jesu mbwaakapa cikozyanyo ceelede?
11 Jehova “tayandi kuti bantu bafwidilile, ulayanda kuti boonse bajane ciindi cakweempwa.” (2 Petro 3:9; Ezekiele 18:23; 33:11; Incito 17:30) Intalisyo yakulekelelwa kwazibi zyabantunsi beempwa ndusyomo mucipaizyo ca Jesu Kristo cacinunuzyo, walo iwakalipa kunununa boonse—kutali buyo basyoonto—kutegwa “umwi umwi uumusyoma atafwidilili, pele abe abuumi ubutamani.” (Johane 3:16) Kulayandika kapati kuti bantu bagwasigwe kutola ntaamu ziyandika iziyoobapa kweelela kwiitwa kuti nimbelele, kutali mpongo, mulubeta luboola.—Matayo 25:31-46.
12 Bunakristo bwini-bwini tacili cintu cakusisa pe; mbwakuzibya munzila iili yoonse yeelede. Ilwakwe Jesu wakapa cikozyanyo cibotu. Ciindi naakabuzigwa abapaizi bapati kujatikizya basiciiya bakwe alimwi akuyiisya kwakwe, wakati: “Ndakaamba cakutasisa kunyika, lyoonse ndali kwiisya muzikombelo amuntempele, oko nkobabunganina ba-Juda boonse, taakwe ncendali kwaambila kumbali pe.” (Johane 18:19, 20) Mbokuli cikozyanyo eeci, nguni muntu uyoowa Leza uunga walipeekezya kusisa ceeco Leza ncaambilizya kuti ceelede kuletwa antangalala? Nguni uunga walipeekezya kusisa “kkii waluzibo” lutola kubuumi butamani? Ikucita boobo inga kwamweelanya abakombi basikuupaupa ameso ibamumwaanda wamyaka wakusaanguna.—Luka 11:52; Johane 17:3.
13. Nkaambo nzi ncotweelede kukambauka kufwumbwa kwajanika ciindi?
13 Akukabule muntu uukonzya kwaamba kuti swebo to Bakamboni ba Jehova twaucita kuba maseseke imulumbe wa Bwami bwa Leza! Nokuba kuti mulumbe oyo watambulwa naa wakakwa, ibantu beelede kuziba kuti kwalo wakambaukwa. (Amweezyanye a Ezekiele 2:5; 33:33.) Aboobo amubelesye ciindi coonse cijanika ikuwaamba mulumbe wakasimpe kuli boonse, kufwumbwa ciindi notubaswaangana.
Kubikka Tulobyo Mumalakwila aa Saatani
14. Nkaambo nzi ncotuteelede kweenkeenka kutondezya bukombi bwesu caantangalala?
14 Mumasena manji Bakamboni ba Jehova bayaa bujatikizigwa kapati mumakani aamwaigwa kubuleya. Munzila iikozyenye ayakacitilwa Banakristo bakusaanguna, kanjikanji balabejelezegwa akubikkwa antoomwe atukombelo tuzangi tutaluzi. (Milimo 28:22, Ci) Sena inga kukambauka kwesu kwaantangalala kwatusiya bukwazi kuluciso? Ncobeni inga kwaba kufwubaala, alimwi akutatobela lulayo lwa Jesu, ikuti twaide kuliwaala mumanyongwe aalaa bweelebe. (Tusimpi 26:17; Matayo 10:16) Pesi mulimo uugwasya iwakukambauka Bwami akugwasya bantu kusumpula maumi abo tuuli wakusisa pe. Ulamulemeka Jehova, ikumusumpula, ikumuletela mpuwo walo alimwi a Bwami bwakwe butalisyidwe. Ikutambulwa nkokatambulwa kasimpe kamu Bbaibbele munzila iikondelezya ino-ino awa mu Eastern Europe alimwi amumabazu aa Afulika munzila imwi kwaletwaa kuyungizigwa kwakukambauka kasimpe caantangalala mumasena ayo.
15, 16. (a) Ino kubelekela antangalala alimwi akuzwidilila kwesu munzila yakumuuya zibeleka mulimo nzi, pele nkaambo nzi ncouteelede kutuyoosya ooyu? (b) Nkaambo nzi Jehova ncabikka tulobyo mumalakwila aa Saatani?
15 Mmasimpe kuti kukambauka caantangalala nkobacita Bakamboni ba Jehova, iparadaiso yakumuuya njobajisi, alimwi akuzwidilila kwabo—koonse kubantu babikkide lyaanza alimwi akulubono—tazisisidwe pe. Nokuba kuti babotu myoyo balabotelwa azintu ezi, basikukazya zilabacima. (2 Ba-Korinto 2:14-17) Atwaambe kuti nzizyonya eezi limwi nzezipa akuti basikalumamba ba Saatani basike nkobapenzya bantu ba Leza.
16 Sena eeci ceelede kutubilisya? Peepe, kuti twalanga mbubwaamba businsimi bujanwa kuli Ezekiele caandaano ca 38. Caambilizya kuti Gogo waku Magogo, walo wiiminina Saatani Diabolosi kuzwa naakawisigwa kuza anyika nobwakatalisigwa Bwami mu 1914, uyoosolweda micito yakupenzya bantu ba Leza. (Ciyubunuzyo 12:7-9) Jehova umwaambila boobu Gogo: “Akwaamba kuti, Njiinke kunyika yaminzi iitajisi mabaya, nkalwisye bantu batontwede bakede caluumuno, batakwe malambo naaba mankolo neziba zitendele; nkasaale imbono akunyanzya buvubi; nkalwisye matongo aayakulwidwe, bantu nkobayoboledwe kuzwa kuli bamasi, nkobajene iŋombe ambono, bakede muntinti yanyika.” (Ezekiele 38:11, 12) Kapango ka 4 katondezya kuti nokuba boobo bantu ba Leza tabeelede kukuyoowa kupenzegwa ooku nkaambo kuzwa kuli Jehova. Pele ino walo Leza inga walekela nzi—mane kusikila kwabusya—nkondo iini-ini buya iilwana bantu bakwe? Mukapango ka 23 tubala bwiinguzi bwa Jehova bwakuti: “Njoolemezegwa akusalazigwa akuzibwa mumeso aabamasi, nkabela bayooziba kuti ndime Jehova.”
17. Ino nkondo iilangilwa kuzwa kuli Gogo tweelede kwiilanga buti?
17 Aboobo, muciindi cakukkala kabayoowede kupenzegwa a Gogo, ibantu ba Leza balakulangila cini-cini ikuzuzikizigwa kumbi ooku kwabusinsimi bwa Bbaibbele. Ino cilakondelezya kaka ikuziba kuti kwiinda mukuzwidilila akulongezegwa kwabantu bakwe Jehova, ubikka tulobyo mumalakwila aa Saatani akumukwelaanya antoomwe abasikalumamba bakwe ikuyoozundwa!—Ezekiele 38:4.
Lino Kwiinda Lyoonse!
18. (a) Ncinzi bantu banji sunu ncobayaa buzyiba, alimwi nkaambo nzi? (b) Ino nkaambo nzi ooko kutambula bukambausi bwa Bwami ncokuli cikulwaizyo cini-cini?
18 Mazubaano Bakamboni ba Jehova bali mukwaamba caantangalala mbuli mbobatubona twaambo tujatikizya Bbaibbele, nokuba kuti mizeezo yabo taidumide. Kwamakumi aamyaka balikucenjezya kujatikizya ntenda yakufweba alimwi akwiibelesya bubi misamu iikola, iboofwu bwakulendekezya mwana, ibubi bwazikondelezyo zizwide kutalilemeka kwakoonana alimwi akulwana, alimwi antenda yakubikkwa bulowa. Alimwi baamba mbuli mboulikazya imuzeezo wakusanduluka kwazintu. Bayaa buvwula bantu lino ibaamba kuti, “Ambweni Bakamboni ba Jehova tabalubide.” Notwatali kwiitondezya caantangalala mizeezo yesu, nobatali kwiitambula munzila eeyi. Alimwi mutalubi kuti kwiinda mutwambo tuli boobu, bayaa butola ntaamu ikuya kulubazu lwakwaamba kuti, “Satani, uli mubeji; anu Jehova nguuluzi.” Ma! Nkooko kukulwaizya kwini-kwini kwakuti swebo tuzumanane kutobela cikozyanyo ca Jesu, katwaamba jwi lyakasimpe caantangalala!—Tusimpi 27:11.
19, 20. (a) Mmakanze nzi bantu ba Jehova ngobakaamba mu 1922, alimwi sena aaya majwi acizuzikizigwa? (b) Mbuti mbotweelede kwaalanga “makani aasisidwe” aa Jehova?
19 Bantu ba Jehova kwaciindi cilamfwu balizi ncobeelede kucita mukaambo aka. Kumuswaangano umwi mupati mu 1922, J. F. Rutherford, iwakali mweendelezi wa Watch Tower Society kuciindeeco, wakabakondelezya baswiilizi bakwe naakaamba kuti: “Kamusinizide, kamupakamene, kamunyanyaala, kamubaa camba. Amube bakamboni basyomeka alimwi beni-beni ba Mwami. Kamuyaambele munkondo eyi kusikila zibeela zyoonse zya Babuloni zikasyaale matongo. Amoongolole mulumbe ooyu usike kule. Inyika yeelede kuziba kuti Jehova ngu Leza akuti Jesu Kristo Mwami wabami alimwi Muleli wabaleli. Oobu mbobuzuba bupati kwiinda mazuba oonse. Ngooyo Mwami ulalela! Nywebo ndinywe baambilizi bakwe. Aboobo mwaambilizye, mwaambilizye, mwaambilizye Mwami abwami bwakwe.”
20 Nokuba kuti aayo majwi akali mapati mu 1922, alaindila loko lino nokwainda myaka iili 75, iciindi kuyubununwa kwa Kristo Mubetesi alimwi Sikuliyankoto nokwaswena loko! Imulumbe wa Bwami bwa Jehova ibutalisyidwe alimwi aparadaiso yakumuuya iijisi bantu ba Leza “[m]makani aasisidwe” mapati cakuti taakonzeki kwiide kusisa. Mbuli mbwaakaamba lwakwe Jesu, basikumutobela beelede kuti kwiinda mulugwasyo lwamuuya uusalala babe bakamboni “mane kusikila kumamanino aanyika” kujatikizya lubazu lupati ndwajisi mumakanze aa Leza. (Incito 1:8; Ba-Efeso 3:8-12) Atwaambe kuti mbobali babelesi ba Jehova, walo uuli ngu Leza uuyubununa maseseke, tatweelede kwaasisa maseseke ayo pe!
Ino Inga Mwaingula Buti?
◻ Ino “makani aasisidwe” aa Leza ninzi?
◻ Ino tuzi buti kuti ayelede kuyubununwa?
◻ Ncinzi icicitya Gogo kulwana bantu ba Jehova, alimwi mbuti mbotweelede kukulanga oku?
◻ Ncinzi toonse ncotweelede kuti katukanzide kucita?
Kabbokesi kali apeeji 30]
“Makani Aasisidwe aa-Leza” Aayubununwa Bucebuce
◻ Kuzwa mu 4026 B.C.E.: Leza wasyomezya kubusya Lunyungu luyoonyonyoona Saatani.—Matalikilo 3:15
◻ 1943 B.C.E.: Cizuminano ca Abrahamu catangwa, icisyomezyo cakuti Lunyungu luyoozwa muli Abrahamu.—Matalikilo 12:1-7
◻ 1918 B.C.E.: Kuzyalwa kwa Izaka kuti akone cizuminano.—Matalikilo 17:19; 21:1-5
◻ c. 1761 B.C.E.: Jehova wasinizya kuti Lunyungu luyoozwa mumwanaa Izaka, Jakobo.—Matalikilo 28:10-15
◻ 1711 B.C.E.: Jakobo watondezya kuti Lunyungu luyoozwa mumwanaakwe Juda.—Matalikilo 49:10
◻ 1070-1038 B.C.E.: Mwami Davida waziba kuti Lunyungu luyoozwa muluzubo lwakwe alimwi luyooba Mwami uulela kusikila kutamani.—2 Samuele 7:13-16; Intembauzyo 89:35, 36
◻ 29-33 C.E.: Jesu wazibisigwa kuti ngo Lunyungu, Mesiya, mubetesi wakumbele, alimwi Uusalidwe Kuyooba Mwami.—Johane 1:17; 4:25, 26; Incito 10:42, 43; 2 Ba-Korinto 1:20; 1 Timoteo 3:16
◻ Jesu wayubununa makani aakuti uyooba abalelinyina alimwi ababetesinyina mu Bwami bwakujulu alimwi uyooba abalelwa baansi akuti basikumutobela bayooba bakambausi ba Bwami.—Matayo 5:3-5; 6:10; 28:19, 20; Luka 10:1-9; 12:32; 22:29, 30; Johane 10:16; 14:2, 3
◻ Jesu wayubununa makani aakuti oobo Bwami buyootalisyigwa aciindi cibikkidwe, kweelana abutondezya zintu zicitika munyika.—Matayo 24:3-22; Luka 21:24
◻ 36 C.E.: Petro wazyiba kuti batali ba Juda abalo bayooba basikukonanyina ba Bwami.—Incito 10:30-48
◻ 55 C.E.: Paulo wapandulula kuti basikukona Bwami oobo bayoobusigwa kukutafwa kuciindi cakubako kwa Kristo.—1 Ba-Korinto 15:51-54.
◻ 96 C.E.: Jesu kali ulabalela kale basikumutobela bananike, wayubununa makani aakuti mweelwe wabo waakuzulila unooli 144,000.—Ba-Efeso 5:32; Ba-Kolose 1:13-20; Ciyubunuzyo 1:1; 14:1-3
◻ 1879 C.E.: Zion’s Watch Tower yabanda mwaka wa 1914 kuti uyooba mwaka mupati mukuzuzikizigwa kwa “maseseke.”
◻ 1925 C.E.: Ngazi Yamulindizi yapandulula kuti Bwami bwakazyalwa mu 1914; “maseseke” aa Bwami eelede kuletwaa ntangalala.—Ciyubunuzyo 12:1-5, 10, 17
[Zifwanikiso izili apeeji 29]
Mbuli Musololi wabo Jesu, Bakamboni ba Jehova balaambilizya Bwami bwa Jehova kubuleya.