Jesu Wavwiila Mulombwana Muleli Alimwi Muvwubi

Jesu uceenda mu Pereya kuya ku Jerusalemu. Mulombwana muvwubi wamulundukila akumufwugamina. Mulombwana ooyu ‘ngumwi wabaleli,’ ambweni mweendelezi wacikombelo naa ngumwi wabaabo bamu Nkuta Mpati Yaba Juda. Wabuzya Jesu kuti: “O Mwiiyi mubotu, ino ncinzi ncondeelede kucita kutegwa ndikajane buumi butamani?”—Luka 8:41; 18:18; 24:20.

Jesu wavwiila kuti: “Nkaambo nzi ncondaamba kuti omubotu? Taakwe mubotu ccita buyo Leza alikke.” Ambweni mulombwana ooyu wabelesya bbala lyakuti “mubotu” kuba zina lyabulemu, kweelana ambobacita barabbi. Nokuba kuti Jesu ulicizyi kuyiisya, waambila mulombwana ooyu kuti zina lyabulemu lyakuti “Mubotu” libeleka buyo kuli Leza.

Jesu wamwaambila kuti: “Pele kuti koyanda kuyooba abuumi, kozumanana kubamba milawo.” Aboobo mulombwana wabuzya kuti: “Iili eeyo?” Jesu wabandauka milawo yosanwe akati ka Milawo Iili Kkumi iijatikizya kujaya, kubba, kupa bumboni bwakubeja, alimwi akulemeka bazyali. Mpoonya wabikkilizya amulawo uuyandika kapati wakuti: “Weelede kuyanda simukobonyoko mbubonya mbuli mboliyanda omwini.”—Matayo 19:17-19.

Mulombwana ooyu waamba kuti: “Ndilaitobela yoonse eeyi; ino ncinzi ncendicibulizyide?” (Matayo 19:20) Kuboneka kuti ulimvwa kuti kuli cintu cibotu alimwi cigambya ncabulizyide ncayelede kucita kutegwa akeelele kuba abuumi butamani. Akaambo kakubona kuti ulisinizyide nabuzya mubuzyo ooyu, Jesu ‘wamuyanda.’ (Marko 10:21) Nokuba boobo, mulombwana ooyu ulaapenzi limwi ndyalangene andilyo.

Mulombwana ooyu ulaluyanda kapati lubono lwakwe, aboobo Jesu wamwaambila kuti: “Kuli cintu comwe ncobulizyide: Koya ukasambale zintu nzyojisi akupa bacete, aboobo uyooba alubono kujulu; wamana uboole ube sikunditobela.” Masimpe ulakonzya kwaabila bacete mali aakwe, aabo ibatakonzyi kumujolela kumane inga waba sikwiiya wa Jesu. Pele kuboneka kuti Jesu weetezyegwa naamubona kanyamuka akuunka kauside. Ikuyandisya buvwubi naa ‘lubono lwakwe lunji’ kwamupa kuti ataboni lubono lwini-lwini. (Marko 10:21, 22) Jesu waamba kuti: “Eelo kaka ciyooba cintu ciyumu kubantu bajisi mali kunjila mu Bwami bwa Leza!”—Luka 18:24.

Basikwiiya bagambwa kumvwa majwi aaya alimwi aatobela Jesu ngaamba aakuti: “Ncuuba-uba kunkamela ikwiinda mukapulo kanyeleti yakusumya kwiinda mbocibede kumuvwubi kunjila mu Bwami bwa Leza.” Eeci capa basikwiiya kubuzya kuti: “Ino nguni mubwini uukonzya kufwutuka?” Sena lufwutuko ncintu cikatazya kapati cakunga muntu takonzyi kulujana? Kalangide basikwiiya bakwe, Jesu wavwiila kuti: “Izintu zitakonzyeki kubantu zilakonzyeka kuli Leza.”—Luka 18:25-27.

Petro watondezya kuti ncaasala walo abeenzinyina ciliindene aceeco ncaasala mulombwana ooyu uuvwubide, waamba kuti: “Bona! Twasiya zintu zyoonse akutobela nduwe; aboobo ino ncinzi ncotuyoojana?” Jesu waamba bulumbu mbobayakujana akaambo kakusala kabotu, wati: “Ncobeni ndimwaambila kuti, mukulengulula, iciindi Mwanaamuntu aakukkala acuuno cakwe cabwami cabulemu, nywebo nomwanditobela anywebo muyookkala azyuuno zyabwami zili 12, akubeteka misyobo iili 12 ya Israyeli.”—Matayo 19:27, 28.

Cilisalede kuti Jesu uyeeya ciindi cakumbele eelyo bukkale ibwakaliko mumuunda wa Edeni nobuyakulengululwa aano anyika. Petro abasikwiiya bamwi bayakupegwa bulumbu bwakuba antoomwe a Jesu mukulela Paradaiso yaanyika, inzya ibulumbu oobu mbubotu kapati kwiinda cintu cili coonse ncobakonzya kuliimya!

Nokuba boobo, takuli buyo kumbele nkobayakujana bulumbu. Noliba lino kuli bulumbu mbobajana basikwiiya bakwe. Jesu waamba kuti: “Ncobeni ndimwaambila kuti, taakwe wakasiya ŋanda, mukaintu, banabokwabo, bazyali, naa bana akaambo ka Bwami bwa Leza uutakajani zintu azimwi zinji muciindi cino, eelyo mubweende bwazintu buboola, ibuumi butamani.”—Luka 18:29, 30.

Ncobeni, kufwumbwa nkobaunka basikwiiya bakwe, balakonzya kukkomana kuba muciinga cabakwesu mbobakomba limwi alimwi mbobamvwana limwi kapati iciyandika kapati kwiinda bunyina buli akati kabanamukwasyi mbobazyalwa limwi. Pele icuusisya ncakuti mulombwana ooyu muvwubi uboneka kuti uyakwiindwa coolwe eeci alimwi abulumbu bwakupona mu Bwami bwa Leza bwakujulu.

Jesu wayungizya kwaamba kuti: “Pele banji bakusaanguna bayooba bakumamanino abaabo bakumamanino bayooba bakusaanguna.” (Matayo 19:30) Ino upandulula nzi?

Mulombwana ooyu muvwubi uli akati kabantu “bakusaanguna,” mbwaanga ngumwi wabasololi baba Juda. Akaambo kakuti utobela milawo ya Leza, uboneka kuti inga wazwidilila mubuumi alimwi nzinji zilangilwa kulinguwe. Nokuba boobo, ubikka buvwubi alimwi alubono mubusena bwakusaanguna mubuumi bwakwe. Mukwiimpana anguwe, bantu-bantu buyo bamucisi babona kuti zintu nzyayiisya Jesu nzyakasimpe alimwi zitola kubuumi butamani. Munzila imwi inga twaamba kuti ‘mbakumamanino,’ pele lino balaba “bakusaanguna.” Balakonzya kulangila kuyakukkala azyuuno zyabwami kujulu antoomwe a Jesu alimwi akulela Paradaiso yaanyika.