Cikozyanyo Cababelesi Bamumuunda Wamisaansa

Jesu wazwa aakwaambila baswiilizi bakwe mu Pereya kuti “banji bakusaanguna bayooba bakumamanino abaabo bakumamanino bayooba bakusaanguna.” (Matayo 19:30) Wakankaizya kaambo aaka kwiinda mukupa cikozyanyo cababelesi bamumuunda wamisaansa, wati:

“Bwami bwakujulu buli mbuli mwiniŋanda iwakaunka mafwumofwumo kuyoonjizya bantu mulimo wakubeleka mumuunda wakwe wamisaansa. Naakazuminana ababelesi kuti abavwozye aumwi dinari lyomwe abuzuba, wakabatuma mumuunda wakwe wamisaansa. Naakaunka alimwi aciindi cawoola lyatatu, wakabona bamwi baliimvwi kumusika kabatakwe zyakucita; eelyo kuli baabo wakati, ‘Anywebo kamuya mumuunda wamisaansa, ndilamuvwozya kufwumbwa ceelede.’ Aboobo bakaunka. Alimwi wakaunka aciindi cawoola lyacisambomwe, alimwi aawoola lyafwuka akucita mbubonya oobo. Mpoonya kumamanino, wakaunka aciindi cawoola lya 11 akujana bamwi baile kwiimvwi, eelyo wakabaambila kuti, ‘Nkaambo nzi ncomwiimvwi aano buzuba boonse kamutabeleki?’ Bakavwiila kuti, ‘Nkaambo kunyina watunjizya mulimo.’ Wakabaambila kuti, ‘Anywebo kamuya mumuunda wamisaansa mukabeleke.’”—Matayo 20:1-7.

Kulangilwa kuti baswiilizi ba Jesu bayeeya Jehova Leza ciindi nobamumvwa kaamba zya “Bwami bwakujulu” alimwi a “mwiniŋanda.” Magwalo atondezya kuti Jehova ngomukamwini muunda wamisaansa, walo iwiiminina cisi ca Israyeli. (Intembauzyo 80:8, 9; Isaya 5:3, 4) Aabo ibali mucizuminano ca Mulawo bakozyanisyigwa ababelesi bamumuunda wamisaansa. Nokuba boobo, Jesu takozyanisyi zintu zyakacitika kaindi pe. Waamba zintu zilimukucitika lino aawa mumazuba aakwe.

Cili mbuli kuti beendelezi bacikombelo baluujisi kubeleka mumulimo wa Leza, mbubonya mbuli ba Farisi aabo caino-ino ibakali kusola kumusunka mumakani aakulekana. Bali mbuli babelesi baciindi coonse ibalangila kuvwola mali aakkwene, dinari lyomwe ilivwolwa mumulimo wabuzuba bomwe.

Bapaizi alimwi abamwi muciinga eeci, babona bantu-bantu buyo akati kaba Juda kuti bamubelekela buyo asyoonto Leza, mbuli babelesi bamumuunda wamisaansa wa Leza ibatali babelesi balyoonse. Mucikozyanyo ca Jesu, aaba mbabaalumi ibanjizyigwa mulimo aciindi “cawoola lyatatu” (9:00) naa ibanjizyigwa aakale mubuzuba bwamilimo—aciindi cawoola lyacisambomwe, lyafwuka kumane aaciindi cawoola lya 11 (17:00).

Baalumi alimwi abamakaintu ibamutobela Jesu babonwa kuti “mbantu basinganizyidwe.” (Johane 7:49) Kwaciindi cilamfwu bali bazubi banswi naa babelesi bacita milimo yaansi. Mpoonya lyacilimo camu 29 C.E., “mwinimuunda wamisaansa” wakatuma Jesu kuti akaite bantu balibombya kuti bazyoobelekele Leza kabali basikwiiya ba Kristo. Mbambabo “bakumamanino” mbaamba Jesu kuti mbabelesi bakuwoola lya 11.

Mukumanizya cikozyanyo cakwe, Jesu wapandulula cacitika kumamanino aabuzuba bwamilimo, wati: “Nokwakaba kumangolezya, mwinimuunda wamisaansa wakaambila mubanzi wakwe kuti, ‘Kobaita babelesi ubavwozye mali aabo, utalikile kuli bamamanino, umanizye abakusaanguna.’ Nobakasika baalumi ibakatalika aciindi cawoola lya 11, umwi aumwi wabo wakavwola dinari lyomwe. Aboobo bakusaanguna nobakasika, bakayeeya kuti balapegwa mali manji, pele abalo bakavwozyegwa aumwi dinari lyomwe. Nobakalitambula, bakatalika kumutongooka simalelo mukamwini ŋanda akwaamba kuti, ‘Baalumi aaba bamamanino babeleka buyo woola lyomwe; pele wabavwozya kweelana andiswe notwabeleka canguzu buzuba boonse akubalwa zuba!’ Pele wakaingula umwi wabo kuti, ‘Taaku ncindakulubizyila musa. Tee kayi twapangene kuti ulavwola dinari lyomwe? Bweza dinari lyako weende. Ndiyanda kumupa awalo ooyu wamamanino mbubonya mbondapa nduwe. Sena tandijisi nguzu zyakucita kufwumbwa ncendiyanda azintu zyangu? Sena wafwa munyono akaambo kakuti ndili mubotu?’ Munzila eeyi, bakumamanino bayooba bakusaanguna, bakusaanguna bayooba bakumamanino.”—Matayo 20:8-16.

Ambweni basikwiiya bakwe tabazyi kabotu ncocaamba cibeela camamanino cacikozyanyo ca Jesu. Ino basololi babukombi bwaba Juda, ibalibona kuti ‘mbakusaanguna’ bayooba buti “bakumamanino”? Alimwi ino basikwiiya ba Jesu bayakuba buti “bakusaanguna”?

Basikwiiya ba Jesu, aabo ba Farisi abamwi mbobabona kuti ‘mbakumamanino,’ mbabatiibe “bakusaanguna,” kuvwola mali aakwene. Aakufwa Jesu, Jerusalemu waanyika uyakukakwa akusiigwa, eelyo Leza uyakusala cisi cipya, “ba Israyeli ba Leza.” (Bagalatiya 6:16; Matayo 23:38) Johane Mubbapatizi mbaakali kwaamba aaba ciindi naakaamba zyakubbapatizyigwa amuuya uusalala ikwakali kuyoocitika kumbele. Aabo ibali “bakumamanino” mbambabo batiibe bakusaanguna kutambaula lubbapatizyo oolu alimwi akupegwa coolwe cakuba bakamboni ba Jesu “kusikila kumasena aakulamfwu kapati aanyika.” (Milimo 1:5, 8; Matayo 3:11) Mbokunga basikwiiya bakamvwisya kaambo kakucinca kwazintu ooku Jesu nkwaamba, kulangilwa kuti babona kuti bayoosulwa kapati abasololi babukombi, aabo ibaba “bakumamanino.”