Cibalo 20

Sena Lyoonse Uyanda Kuba Mutaanzi?

SENA kuli ngozyi ooyo lyoonse uuyanda kuba mutaanzi?— Ulakonzya kutonka bamwi kutegwa abe mutaanzi eelyo nomwiimvwi mumulongo. Sena wakacibona kale kacicitika eeci?— Imwiiyi Mupati wakababona nobaba bapati kabasoleka kuba bataanzi, kabayanda kukkala mumasena aabantu balemekwa naa aayandika kapati. Eeci kunyina naakacikkomanina pe. Atulange-lange cakacitika.

Ibbaibbele litwaambila kuti Jesu wakatambwa kupobwe kuŋanda yamu Farisi, iwakali mweendelezi wacikombelo uulemekwa kapati. Jesu naakasika ooko, wakabona beenzu bambi kabalisalila masena mabotu aakukkala. Aboobo wakabaanina kaano aabo ibakatambwa. Sena ulayanda kukamvwa?—

Jesu wakati: ‘Muntu umwi naa wakutamba kupobwe lyabwiinga, utalisalili cuuno cabulemu.’ Sena ulikazyi kaambo Jesu ncaakaambila boobo?— Wakapandulula kuti ambweni kulakonzya kuti kakuli umwi uulemekwa kapati iwakatambwa. Aboobo mbubwenya mbobona mucifwanikiso, ooyo uujisi pobwe waboola akwaamba kuti: ‘Mupe cuuno muntu ooyu, yebo koya ukkalile waalya.’ Ino mweenzu ooyo inga walimvwa buti?— Inga wafwa nsoni akaambo kakuti beenzu bambi boonse bayoomulangilila kazwa acuuno eeco akukkalila aali cimbi citali cabulemu.

Jesu wakali kutondezya kuti taciluzi pe ikulisalila busena bubotu kapati. Aboobo wakaamba kuti: ‘Ikuti naa watambwa kupobwe lyabwiinga, weelede kusala cuuno citali cabulemu kutegwa aboola simeenzu wako aambe kuti, “Mweenzuma, koya kunembo.” Eeci ciyakupa kuti bantu boonse mbomwakatambwa limwi bakupe bulemu wanooyenda kuya kucuuno cabulemu.’—Luka 14:1, 7-11.

Sena wakateelela ncokaamba kaano ka Jesu?— Atubelesye cikozyanyo tubone naa wakateelela. Ikuti naa kotanta bbaasi lijisi bantu banji, sena weelede kufwambaana kukkwela kutegwa ujane cuuno akulekela muntu mupati kwiimikila?— Sena Jesu inga wakkomana ikuti wacita boobo?—

Umwi ulakonzya kwaamba kuti tacikwe makani kuli Jesu kufwumbwa nzyotunga twacita. Pele sena ulacisyoma eeco?— Eelyo Jesu naakali apobwe kuŋanda yamu Farisi, wakabalangilila bantu nobakali kusala aakukkala. Sena toyeeyi kuti ucibikkila maanu kuli zeezyo nzyotucita neliba sunu?— Lino mbwaanga Jesu uli kujulu, uli mubusena bubotu mwakonzya kutulangilila kabotu.

Cinjizya mumapenzi eelyo muntu nasoleka kuba mutaanzi. Kanjikanji bantu balazwangana akunyemezyanya. Zimwi ziindi eeci cilacitika eelyo bana nobaunka kubusena bumwi abbaasi. Mbulijaludwa buyo bbaasi, ibana balalunduka kutegwa bataangune mbabo kunjila. Bayanda kukkala azyuuno zibotu kapati, eezyo zili afwaafwi ampulungwido. Ino ncinzi cinga cacitika?— Inzya, balakonzya kunyemezyanya.

Ikuyanda kuba mutaanzi kulakonzya kutunjizya mumapenzi manji. Kwakabanjizya mumapenzi nobaba baapostolo ba Jesu. Mbubwenya mbotwakaiya mu Cibalo 6 cabbuku lino, bakazwangana kujatikizya wakali mupati akati kabo. Ino ncinzi Jesu ncaakacita?— Inzya, wakabalulamika. Pele kumbele bakazwangana alimwi. Atubone mazwanga aaya mbwaakatalika.

Ibaapostolo alimwi abantu bambi bakali kweenda a Jesu ciindi camamanino kuya kumunzi wa Jerusalemu. Jesu wakabaambilide makani aajatikizya Bwami, aboobo ba Jakobo alimwi a Johane bakali kwaayeeyela makani aakuba bami antoomwe anguwe. Alimwi mane bakaambila banyina ba Salome makani aayo. (Matayo 27:56; Marko 15:40) Aboobo nobakali munzila kabaya ku Jerusalemu, ba Salome bakasikila Jesu, bamufwugamina akumukumbila cimwi cintu.

Jesu wakabuzya kuti: “Ino ncinzi ncomuyanda?” Bakaingula kuti bakali kuyanda kuti Jesu asyomezye kuti bana babo balombe bakali kuyookkala umwi kululyo, aumwi kulumwensyi lwa Jesu mu Bwami bwakwe. Ino uyeeya kuti bakalimvwa buti baapostolo bambi ibali kkumi nobakamvwa ncaakali kulomba Jakobo alimwi a Johane kwiinda muli banyina?—

Inzya, bakabanyemena kapati ba Jakobo a Johane. Aboobo Jesu wakabagwasya baapostolo bakwe boonse. Jesu wakabaambila kuti ibeendelezi bamunyika balayandisya kuba basinguzu alimwi akupegwa bulemu. Balayandisya kubaa cuuno cabulemu kutegwa boonse kababamvwida nzyobaamba. Pele Jesu wakaambila basikumutobela kuti tiibakeelede kuba boobo pe. Muciindi caboobo, Jesu wakati: ‘Kufwumbwa ooyo uuyanda kuba mupati akati kanu uleelede kuba mubelesi wanu.’ Kociyeeyela buyo eeco!—Matayo 20:20-28.

Sena ulicizyi ncacita muzike?— Ubelekela bantu bambi, talangili bantu bambi kumubelekela pe. Takkali acuuno cabulemu. Talitondezyi kuti mmupati pe, pele ulalicesya akati kabeenzinyina. Alimwi koyeeya kuti, Jesu wakati ooyo uuyanda kuba mutaanzi weelede kuba mbuli muzike uubelekela bamwi.

Aboobo, ino uyeeya kuti eeco caamba nzi kulindiswe?— Sena muzike inga wakazyanya asimalelaakwe kujatikizya ooyo weelede kukkala acuuno cabulemu? Naa sena inga wakazya kujatikizya uutiisaangune kulya? Ino uyeeya buti?— Jesu wakapandulula kuti muzike ubikka simalelaakwe mubusena butaanzi lyoonse.—Luka 17:7-10.

Aboobo muciindi cakuyanda kuba bataanzi, ino ncinzi ncotweelede kucita?— Inzya, tweelede kuba mbuli muzike wabamwi. Alimwi eeco caamba kubikka nzyobayanda bamwi mubusena butaanzi kwiinda zyesu. Caamba kubona bamwi kuti balayandika kapati kwiinda ndiswe. Sena inga wayeeya nzila mbonga wabikka bamwi mubusena butaanzi?— Pilukila alimwi kumapeeji 40 alimwi a 41 akuziinduluka inzila nzyokonzya kutobela kutegwa ubikke bamwi mubusena butaanzi kwiinda mukubabelekela.

Ulayeeya kuti Mwiiyi Mupati wakabikka bamwi mubusena butaanzi kwiinda mukubabelekela. Imangolezya aamamanino ngaakali abaapostolo bakwe, Jesu mane wakafwugama akusanzya matende aabo. Ikuti aswebo twabikka bamwi mubusena butaanzi kwiinda mukubabelekela, tuyoomukkomanisya Mwiiyi Mupati alimwi a Bausyi, Jehova Leza.

Atubale aambi magwalo aamu Bbaibbele aatukulwaizya kubikka bamwi mubusena butaanzi kwiinda bwesu: Luka 9:48; Ba-Roma 12:3; alimwi a Ba-Filipi 2:3, 4.

[Cifwanikiso icili apeeji 107]

Sena wakababona kale bantu bayanda kuba bataanzi?

[Zifwanikiso izili apeeji 108, 109]

Nciiyo nzi Jesu ncaakali kuyiisya naakaana kaano kajatikizya baabo bakali kukkala zyuuno zyabulemu, naa zitaanzi?

[Cifwanikiso icili apeeji 110]

Ino Salome umulomba kuti acite nzi Jesu, alimwi ino ncinzi cacitika?