Baalumi bamwi baboola kuzwa Kujwe. Aaba mbaasikupandulula bweende bwanyenyeezi, ibaalumi balingula mbozikkede nyenyeezi, ibalitaminina kuti kwiinda mukucita boobo balakonzya kuzyiba ncozyaamba zintu zicitika mubuumi bwabantu. (Isaya 47:13) Kabacili kwabo Kujwe bakabona “nyenyeezi,” mpoonya bakaitobela kwamyaanda yamakkilomita, kutali kuya ku Betelehemu, pele kuya ku Jerusalemu.

Bacisika buyo ku Jerusalemu, babuzya kuti: “Uli kuli ooyo wakazyalwa kali mwami waba Juda? Nkaambo twakabona nyenyeezi yakwe notwakali Kujwe, aboobo twaboola kuzoomufwugamina.”​—Matayo 2:1, 2.

Ino muyeeya kuti nguni wakapa “nyenyeezi” eeyo iyakali kusololela basikupandulula bweende bwanyenyeezi? Amuyeeye kuti nyenyeezi eeyo tiiyakabasololela cacigaminina kuli Jesu ku Betelehemu. Muciindi caboobo, yakasaanguna kubasololela ku Jerusalemu, ooko nkobakaakujana Mwami Heroda walo iwakali kuyanda kujaya Jesu. Alimwi buya naakamujaya ikuti Leza naatakabweza ntaamu akubacenjezya kuti bataunki kuyakumwaambila Heroda nkwaakabede Jesu. Cilisalede kuti ngusinkondonyina Leza, Saatani, iwakali kuyanda kuti Jesu ajaigwe, eelyo wakabelesya nyenyeezi ikusola kuzuzikizya makanze aakwe.