Balibombya Bazoovwuba Nyika
“Ndeezeezya kuti zintu zyoonse ziyoosandulwa akubukulusigwa. . . . Ikutali lino-lino, pele kumbele kapati, kwaakuba ijulu ipya anyika impya.”—Ba Jean-Marie Pelt, bahaazibwene bazilenge mucilawo ku France.
AKAAMBO kakutyompwa kujatikizya ciimo cazilawo abukkale anyika, ibantu banji balombozya kukkala anyika iisandwidwe kuba paradaiso. Pele kulombozya ooku tacili ciloto buyo camumwaanda wamyaka wa 21 pe. Ikaindi, Ibbaibbele lyakasyomezya kubukulusigwa kwa Paradaiso anyika. Itwaambo twa Jesu twakuti, “balibombya, . . . bazoovuba nyika” alimwi a “alucitwe luyando lwako, ansi ano mbubonya mbuli kujulu,” tuli akati kazibalo zyamu Magwalo nzyobazi kapati bantu. (Matayo 5:5; 6:10) Pele sunu tabali banji ibasyoma paradaiso anyika iikkedwe bantu babombe. Kubanabunji balyaamba kuti Mbanakristo, Paradaiso tiicikonzeki pe.
Imagazini yaku France iimwaigwa amvwiki iitegwa La Vie ilapandulula ncokwalekwa ikusyoma paradaiso—ibe yeeyo yaanyika naa yakujulu—ikapati mu Cikombelo caba Katolika ategwa: “Kwainda myaaka iisika ku 1,900 kaili njiisyo mpati yaba Katolika, [imuzeezo] waparadaiso tuucidumide mumipailo, mumilumbe yamu Nsondo, muziiyo zyamuzikolo zipati zyabukombi, alimwi amumibandi yakubuzya akwiingula yamukabbuku.” Ibbala lyaparadaiso lyaambwa kuti talizizilwe pe, libee libbide muli “sikunku uugwitide” “uutapandululiki alupyopyongano.” Bamafundisi bamwi tabalyaambi acaali akaambo kakuti “lijisi mizeezo minji yalukkomano anyika.”
Kuli ba Frédéric Lenoir, bahaazibwene mubukkale bwabantu alimwi ibajisi luzibo lunji kujatikizya bukombi, imizeezo yaparadaiso “yaba twaano buyo tutagwasyi twiile kwiindulukwa.” Mbubwenya buyo, abalo ba Jean Delumeau, bahaazibwene mumakani aakaindi alimwi basikwaanza mabbuku manji aabandika paradaiso, bayeeya kuti ikuzuzikizigwa kwazisyomezyo zyamu Bbaibbele ikunji nkwakwiiminina buyo. Bakalemba kuti: “Kumubuzyo wakuti, ‘Ino ncinzi ciciliko kujatikizya Paradaiso?’ Banakristo basyoma kuti: Akaambo kakuti Mufwutuli wakabuka, bumwi buzuba toonse tuyoolibonena kuzuzikizigwa kwakulombozya kwesu kutaliboteli.”
Sena imakani aajatikizya paradaiso anyika aciyandika? Ncinzi cini ciyoocitikila nyika kumbele? Sena izilangilwa kumbele nzyakulengelezya buyo naa zilakonzya kusinizigwa? Icibalo citobela cilayiingula mibuzyo eeyi.