• “Makani aya Aleelede Kuba”
    Ngazi Yamulindizi—1999 | May 1

    • Ibasaanyina Bakali Kuyoolibonena

      11. Ncinzi Jesu ncaakaamba kujatikizya “izyalani elino”?

      11 Iba Juda banji bakali kuyeeya kuti bukombi bwabo ibwakayeeme aatempele bwakali kuyoozumanana kukabe kutamani. Pele Jesu wakati: “Amuliiye . . . [ku]mukuyu. Mutabi nuucili mutete akusyuuka indelema, mulizi kuti mainza ali afwiifwi. Mbubonya obo anywebo nimuyoobona zintu ezi zyoonse, amukazibe kuti uli afwiifwi nikuba kumilyango. Ncobeni ndamwaambila kuti izyalani elino talikooyoomana mane zintu ezi zyoonse zizoobe. Ijulu anyika ziyooloba zyoonse, pele majwi aangu taakonzyi kuloba pe.”—Matayo 24:32-35.

      12, 13. Ino basikwiiya ba Jesu bakali kunoocimvwa buti ncaakali kwaamba Jesu naakaamba makani ‘aazyalani elino’?

      12 Mumyaka yamusyule kautanasika mwaka wa 66 C.E., Banakristo balakonzya kuti bakabona izintu zinji zyamatalikilo zyacitondezyo kujatikizya zintu zinji kazili mukuzuzikizigwa—inkondo, inzala nokuba kukambaukwa kupati kwamakani mabotu aa Bwami. (Incito 11:28; Ba-Kolose 1:23) Pele ino mamanino akali kuzoosika lili? Ino Jesu wakali kwaamba nzi naakati: “Izyalani elino [Cigiliki, ge·ne·aʹ] talikooyoomana”? Kanjikanji Jesu wakali kwiita inkamu mpati yabasaanyina bama Juda basikukazya, kubikkilizyaa basololi bazikombelo ikuti, ‘mbantu basunu basizibi abasibwaamu.’ (Matayo 11:16; 12:39, 45; 16:4; 17:17; 23:36) Aboobo nakali aa Cilundu ca Elaioni, naakaamba zya “izyalani elino,” kulibonya kuti tanaakali kwaamba mukowa waba Juda woonse mbuubede kuciindi cili coonse; alimwi tanaakali kwaamba basikumutobela bakwe, nokuba kuti bakali “musyobo musale.” (1 Petro 2:9) Alimwi Jesu tanaakali kwaamba kuti “izyalani elino” nciindi cipimidwe.

      13 Muciindi caboobo, Jesu wakali kwaamba ba Juda ibakazanga kuciindi cakwe balo ibakali kuzoolibonena kuzuzikizigwa kwacitondezyo ncaakapa. Kujatikizya makani aa “Cizukulu eci” aali kuli Luka 21:32, Professor Joel B. Green waamba kuti: “Mumakani Mabotu Aatatu, ‘Cizukulu eci’ (amabala aambi aamba ncico) lyoonse aamba cibeela cabantu ibakazya makanze aa Leza. . . . [Caamba] bantu ibanga baunduluzya makanze aa Leza akaambo kacimpangwe.”b

      14. Ncinzi cakacitika ‘kuzyalani’ elyo, pele ino mbuti mbokwakacitika ciimpene ku Banakristo?

      14 Izyalani lyabasizibi lyabasikukazya iba Juda balo ibakali kucibona citondezyo kacili mukuzuzikizigwa abalo bakali kuyoolibonena mamanino aabweende bwabo. (Matayo 24:6, 13, 14) Eci cakabacitikila ncobeni! Mu 70 C.E., impi yaba Roma yakapiluka, ono kaisololelwaa Titus, imwanaa Mwami Vespasian. Ikupenga nkobakapenga ba Juda balo ibakajalilwa alimwi mumunzi kulakatazya kusyoma.c Sikulibonenaa meso Flavius Josephus uluula kuti ikuzyoosika kuciindi ba Roma nobakanyonyoona munzi, iba Juda basika ku 1,100,000 bakalifwide kale alimwi ibasika ku 100,000 bakatolwa mubuzike, ibunji bwabaaba bakabukaakufwa akaambo kanzala naa mumabbuwa aabana Roma aakusobanina. Masimpe, imapenzi aamu 66-70 C.E. akali mapenzi Jerusalemu alimwi abweende bwaci Juda ngobatakalinabona naa aatakali kuyoobonwa limbi. Pele cakali andeene kaka cakacitika ku Banakristo balo bakatobela kucenjezya kwa Jesu kwabusinsimi elyo bakatija kuzwa mu Jerusalemu impi zyabana Roma nozyakazwa mubusena obo mu 66 C.E.! Ibanakristo bananike ‘ibasale’ ‘bakafwutulwa,’ naa kukwabililwa mu 70 C.E.—Matayo 24:16, 22.

  • “Makani aya Aleelede Kuba”
    Ngazi Yamulindizi—1999 | May 1

    • b Sikwiiya waku Britain G. R. Beasley-Murray waamba kuti: “Ikaambo kakuti ‘izyalani elino’ takeelede kuleta penzi pe kubasanduluzi. Nokuba kuti ibbala lyakuti genea mu Cigiliki citaanzi lyaamba kuzyala, bana, nkokuti mukowa, . . . mu [Greek Septuagint] kanjikanji lyakasandulula bbala lya Cihebrayo lyakuti dor, ilyaamba ciindi, ciindi cikkede bantu, naa izyalani ikwaamba bantu bapona aciindi comwe. . . . Mumajwi aakaamba Jesu ibbala eli lilibonya kuti lijisi bupanduluzi bobile: kulubazu lumwi lyoonse lyaamba basaanyina, alimwi kulubazu lumbi lyoonse lyaamba kusinswa cini-cini.”