CIIYO 54
Mulimo Ngwajisi “Muzike Uusyomeka Alimwi Uucenjede”
Jesu ngo Mutwe wambungano ya Bunakristo. (Baefeso 5:23) Mazuba aano, Jesu, kuzwa kujulu ulabasololela basikumutobela anyika kwiinda mukubelesya “muzike uusyomeka alimwi uucenjede.” (Amubale Matayo 24:45.) Jesu lwakwe kumugama ngonguwe wakamusala “muzike” ooyo alimwi akumupa nguzu zyakupanga zyakusala zimwi. Nokuba boobo, muzike ooyo weelede kumumvwida Kristo alimwi akubelekela banabokwabo Kristo. Ino muzike ooyo nguni? Ino utulanganya buti?
1. Ino nguni “muzike uusyomeka alimwi uucenjede”?
Jehova lyoonse wali kubelesya mwaalumi naa kakamu kabaalumi kupa malailile kubantu bakwe. (Malaki 2:7; Bahebrayo 1:1) Naakafwa Jesu, baapostolo alimwi abaalu mu Jerusalemu bakatalika kusololela. (Milimo 15:2) Mbubwenya buyo, mazuba aano kakamu kabaalu nkakasololela. Kaitwa kuti Kabunga Keendelezya ka Bakamboni ba Jehova. Kalapa cakulya cakumuuya alimwi akusololela mulimo wakukambauka. Kakamu aaka kaitwa kuti “muzike uusyomeka alimwi uucenjede [ooyo Jesu] ngwaakasala.” (Matayo 24:45a) Boonse bamu Kabunga Keendelezya Mbanakristo bananikidwe amuuya uusalala, ibajisi bulangizi bwakuyoolela antoomwe a Kristo mu Bwami bwakwe bwakujulu ciindi buumi bwabo bwaanyika nobwagola.
2. Ncakulya nzi cakumuuya ncapa muzike uusyomeka?
Jesu wakaamba kuti muzike ‘unoopa Banakristonyina cakulya cabo aciindi ceelede.’ (Matayo 24:45b) Mbubwenya cakulya cakumubili mbocitugwasya kuba abuumi buli kabotu, acalo cakulya cakumuuya, nkokuti malailile aazwa mu Jwi lya Leza, alatupa nguzu nzyotuyandika kutegwa tuzumanane kusyomeka kuli Jehova akuzumanana kubeleka mulimo ngwaakatupa Jesu. (1 Timoteyo 4:6) Tulatambula cakulya cakumuuya eeco kwiinda mumiswaangano yambungano, yabbazu alimwi ayacooko. Kuyungizya waawo, tulatambula cakulya cakumuuya kwiinda mumabbuku aamba zyamu Bbaibbele alimwi amumavidiyo aatugwasya kumvwisya ncayanda Leza akuyumya cilongwe cesu anguwe.
AMWIIYE ZINJI
Atubone kaambo ncotuyandika “muzike uusyomeka alimwi uucenjede,” nkokuti Kabunga Keendelezya.
Bamu Kabunga Keendelezya balapa cakulya cakumuuya, busolozi alimwi alugwasyo lwacigaminina kuli Bakamboni ba Jehova nyika yoonse
3. Bantu ba Jehova beelede kweendelezyegwa
Kwiinda mubusolozi bwa Jesu, bamu Kabunga Keendelezya balausololela mulimo wa Bakamboni ba Jehova. Bubambe oobu bwakaliko aku Banakristo bakusaanguna. Atweebelele VIDIYO.
Amubale 1 Bakorinto 14:33, 40, akubandika mubuzyo ooyu:
Mbuti tupango ootu mbotutondezya kuti Jehova uyanda kuti Bakamboni bakwe kabeendelezyegwa?
4. Muzike uusyomeka nguweendelezya mulimo wesu wakukambauka
Kukambauka ngomulimo uuyandika kapati ngobakali kucita Banakristo bakusaanguna. Amubale Milimo 8:14, 25, akubandika mibuzyo eeyi:
Akati ka Banakristo bakusaanguna, ino nguni iwakali kusololela mulimo wakukambauka?
Ino Petro alimwi a Johane bakacita buti kubusolozi bwabaapostolonyina?
Kukambauka mulimo uuyandika kapati uusololelwa abamu Kabunga Keendelezya. Atweebelele VIDIYO.
Jesu wakakankaizya mbokuyandika kukambauka. Amubale Marko 13:10, akubandika mibuzyo eeyi:
Nkaambo nzi mulimo wakukambauka ncouyandika kapati kuli bamu Kabunga Keendelezya?
Nkaambo nzi ncotuyandika “muzike uusyomeka alimwi uucenjede” kusololela mulimo ooyu wanyika yoonse?
5. Muzike uusyomeka ulapa busolozi
Bamu Kabunga Keendelezya balapa busolozi ku Banakristo munyika yoonse. Ino babusala buti busolozi mbobapa? Atulange-lange mbobakali kucita oobo bamu kabunga keendelezya ibakali kusololela Banakristo bakusaanguna. Amubale Milimo 15:1, 2, akubandika mibuzyo eeyi:
Makani nzi aakaleta mazwanga akati ka Banakristo bakusaanguna?
Ino nkuukuli Paulo, Barnaba alimwi abamwi nkobakali kujana busolozi bwakubamba makani?
Amubale Milimo 15:12-18, 23-29, akubandika mubuzyo ooyu:
Kabatanapanga cakusala, ino ncinzi bamu kabunga keendelezya bakusaanguna ncobakali kucita kutegwa bajane busolozi bwa Leza kujatikizya makani aamwi?—Amubone kapango 12, 15 alimwi a 28.
Amubale Milimo 15:30, 31 alimwi a 16:4, 5, akubandika mibuzyo eeyi:
Mbuti Banakristo bakusaanguna mbobakali kucita kubusolozi mbobakali kupegwa abamu kabunga keendelezya?
Mbuti Jehova mbwaakakulongezya kumvwida kwabo?
Amubale 2 Timoteyo 3:16 alimwi a Jakobo 1:5, akubandika mubuzyo ooyu:
Ino nkuukuli bamu Kabunga Keendelezya nkobajana busolozi ciindi nobayanda kupanga zyakusala mazuba aano?
BAMWI BAAMBA KUTI: “Kuti komvwida bamu Kabunga Keendelezya, utobela buyo mizeezo yabantu.”
Ncinzi cimupa kusyoma kuti Jesu nguusololela bamu Kabunga Keendelezya?
MUBUFWAAFWI
Bamu Kabunga Keendelezya “muzike uusyomeka alimwi uucenjede” ibakasalwa a Kristo. Balapa busolozi alimwi acakulya cakumuuya ku Banakristo nyika yoonse.
Ncinzi Ncomwaiya?
Nguni wakasala “muzike uusyomeka alimwi uucenjede”?
Mbuti bamu Kabunga Keendelezya mbobatulanganya?
Sena mulasyoma kuti bamu Kabunga Keendelezya “muzike uusyomeka alimwi uucenjede”?
AMUZYIBE ZINJI
Amubone bamu Kabunga Keendelezya mbobacita kutegwa baubeleke kabotu mulimo wabo.
“Ino Kabunga Keendelezya ka Bakamboni ba Jehova Ninzi?” (Cibalo caaintaneti)
Amubone bamu Kabunga Keendelezya mbobabona masimpe kuti tulatambula cakulya cakumuuya ciluzi.
Ino bamu Kabunga Keendelezya balimvwa buti kujatikizya mulimo Jesu ngwaabakapa kuti kabacita?
Mbuti miswaangano yesu yambungano alimwi ayacooko mboitondezya kuti Jehova nguusololela bamu Kabunga Keendelezya?