Ibayumizidwe Abulangizi, Ibakulwaizidwe Aluyando

“Alabedelela aya otatwe, lusyomo abulangilizi aluyandisyo, pele akati kayaaya cipati nduyandisyo.”—1 BA-KORINTO 13:13.

1. Nkucenjezya nzi nkwaatupa mwaapostolo Paulo?

IMWAAPOSTOLO Paulo utucenjezya kuti, lusyomo lwesu lulakonzya kuloba mbubwenya mbuli bwaato. Waamba “[zyaku]jatisya lusyomo ameezeezyo mabotu, ngobayumbila ambali bamwi, lino basweeka kulusyomo mbubonya mbuli bwaato ubwaloba.” (1 Timoteo 1:19) Mumwaanda wamyaka wakusaanguna C.E., imaato aamulwizi akapangidwe aazisamu. Ikweelela kwawo mulwizi kwakayeeme aamusyobo wacisamu alimwi abuhaazibwene bwabaabo ibakaabamba.

2. Nkaambo nzi bwaato bwalusyomo lwesu ncobuyandika kuti kabuyakidwe kabotu, alimwi ino eci ciyanda kuti tucite nzi?

² Eeco icinga caitwa kuti mbwaato bwalusyomo lwesu ceelede kuzumanana kwiibauka akati kamayuwe aalwizi lwabantunsi. (Isaya 57:20; Ciyubunuzyo 17:15) Aboobo ceelede kacibambidwe kabotu alimwi eci ciyeeme alindiswe. “Lwizi” lwaba Juda abana Roma nolwakazula mayuwe kujatikizya Banakristo bakusaanguna, Juda wakalemba kuti: “Nomuyandwa, amuliyake mulusyomo lwanu lusalala cakwiinda, akukomba mu-Muuya Uusalala, akuliyobola muluyando lwa-Leza cakulangilila lweetelelo lwa-Mwami wesu Jesu Kristo lutola kubuumi butamani.” (Juda 20, 21) Alimwi mbwaanga Juda wakaamba zyakulwanina “lusyomo ndobakapegwa basalali,” ikaambo kakuti “lusyomo . . . lusalala cakwiinda” kalakonzya kakaamba injiisyo zya Banakristo zyoonse kubikkilizyaa makani mabotu aalufwutuko. (Juda 3) Kristo nentalisyo yalusyomo olo. Lusyomo luyumu lulayandika kutegwa tukakatile kulusyomo lwini-lwini lwa Bunakristo.

Ikulanganya Penzi Ilyaletwaa “Zikombelo Zyakubeja”

3. Mbuti bamwi mbobali mukubelesya makani ‘aazikombelo zyakubeja’?

³ Mumyaka yaonoono, kwacitika zintu zinji ziyoosya izijatikizya bantu balijaya cacibbunga nkamu, ikujayana alimwi akulwana kucitwa azigwebenga ikujatikizya nkamu zyabukombi. Akaambo kaceeci ibantu banji kubikkilizyaa beendelezi bazisi ibayandisya luumuno babikkila maanu kumakani aakukwabilila bantu banyina mulandu kumbunga zibyaabi zili boobo ikapati bana baniini. Cakutadooneka, “Saatani uuli ngoleza waansi aano” walo uuletelezya milandu eyi mibyaabi boobu wacitya kuti kube zikombelo bamwi nzyobaamba kuti nzikombelo zyakubeja elyo uli mukubelesya kaambo aka ikulwana bantu ba Jehova. (2 Bakolinti 4:4, Ci; Ciyubunuzyo 12:12) Bamwi babelesya bukkale obu ikukulwaizya kukazigwa kwamulimo wesu. Muzisi zimwi mane kwaba zipeekani izicitwaa makanze aakukwabilila bantu “kuzikombelo zibyaabi” pele cakubejelezya baamba kuti Bakamboni ba Jehova balijatikikizidwe, aboobo batutamikizya kuti tuli bampelenge. Eci cacitya kuti mulimo wakukambauka waŋanda aŋanda ukatazye muzisi zimwi zyaku Europe alimwi cacitya kuti bantu bamwi mbotwakali kwiiya limwi Bbaibbele baleke ciiyo cabo. Aboobo eci cabatyompya kapati bakwesu bamwi.

4. Nkaambo nzi ikukazigwa ncokuteelede kututyompya?

⁴ Pele muciindi cakututyompya, oku kukazigwa kweelede kuyumya lusyomo lwesu lwakuti tutobela Bunakristo bwakasimpe. (Matayo 5:11, 12) Banakristo bakusaanguna bakatamikizigwa kuti yakali mbunga iibukila cisi alimwi koonse-koonse bakali ‘kukazigwa.’ (Incito 24:5; 28:22) Pele imwaapostolo Petro wakakulwaizya basyominyina naakalemba kuti: “Nomuyandwa mutagambi aamasukusyo aayaka mbuli mulilo aamusikila kuti musukusigwe ngao. Mutayeeyi kuti mwasikilwa cintu ceenzu, pe, nkaambo mwaba bapenzinyina Kristo, aboobo muleelede kukondwa, kuti mukakondwe akusekelela kuciindi eco acalo ncibuyooyubununwa bulemu bwakwe.” (1 Petro 4:12, 13) Mbubonya buyo, awalo wamukabunga keendelezya kamumwaanda wamyaka wakusaanguna wakalemba kuti: “Bakwesu, amuyeeye kuti ncoolwe cipati na mwasikilwa masukusyo aamisyobo misyobo, nkaambo mulizi kuti kusukusigwa kwalusyomo lwanu nkokuleta lukakatilo. Eno lukakatilo alukalondole mulimo walo woonse, kuti mube balondosi akuba aciimo cizulide cakutabula cintu.” (Jakobo 1:2-4) Mbubwenya iguwo pati mbolikonzya kutondezya kweelela kwabwaato mulwizi, iguwo pati lyakukazigwa liyootondezya kukompama kuli koonse kwabwaato bwesu bwalusyomo.

Mapenzi Aletela Lukakatilo

5. Ino inga twazyiba buti kuti lusyomo lwesu nduyumu notuli mumapenzi?

⁵ Banakristo balakonzya kusyoma lukakatilo lwabo alimwi akuyuma kwalusyomo lwabo lilikke nobazwidilila muguwo lyamapenzi. Lukakatilo lwesu ‘luyoolondola mulimo walo woonse’ mulwizi luzwide guwo lilikke notuli ‘balondosi abasiciimo cizulide cakutabula cintu,’ kubikkilizyaa lusyomo luyumu. Paulo wakalemba kuti: “Muzintu zyoonse tulatondezya kuti tuli basimilimo benibeni ba-Leza, mulukakatilo lupati, mumapenzi, mumakatazyo, mumapatizi.”—2 Ba-Korinto 6:4.

6. Nkaambo nzi ncotweelede ‘kutangala notuli mumafwabi,’ alimwi ino eci cibuyumya buti bulangizi bwesu?

⁶ Iguwo pati lyamapenzi ilikonzya kutusikila zimwi ziindi lyeelede kubonwa kuti ncoolwe cakusinizya kuti bwaato bwesu bwalusyomo mbuyumu alimwi bulisitikide. Paulo wakalemba boobu ku Banakristo baku Roma: “Atutangale mumafwabi esu, nkaambo tulizi kuti mafwabi alaleta lukakatilo, alwalo lukakatilo lulaleta ziimbo zisunke, azyalo ziimbo zisunke zilaleta bulangizi, nkabela bulangizi tabuusyi bweeme.” (Ba-Roma 5:3-5) Ikuliyumya mumasukusyo kutucitya kuti tutambulike kuli Jehova. Mpoonya eci ciyumya bulangizi bwesu.

Ncobaloba Bamwi

7. (a) Mbuti bamwi mbobakaloba munzila yakumuuya ikweelana ambwaatondezya majwi aa Paulo? (b) Ino bamwi sunu baleya buti kuzwa kukasimpe?

⁷ Paulo naakacenjezya kujatikizya ‘kuloba,’ wakali kuyeeya bamwi bantu ‘ibakaayumbilide ambali’ manjezeezya abo mabotu alimwi ibakasweekeledwe lusyomo lwabo. (1 Timoteo 1:19) Akati kabo kwakali Humenayo a Alesandro ibakaba basiluleyo, bakazwa kukasimpe akutalika kusampaula. (1 Timoteo 1:20; 2 Timoteo 2:17, 18) Sunu basiluleyo ibazwa kukasimpe bauma “muzike musyomesi uucenjede” kwiinda mukukanana kwabo, elyo mukucita boobo baluma janza lyakali kubasanina munzila yakumuuya. Bamwi bakozya “muzike mubi,” iwaamba kuti “Mwami wangu wamuka.” (Matayo 24:44-49; 2 Timoteo 4:14, 15) Tabazumini kuti mamanino aabweende bwazintu obu ali afwaafwi alimwi balacinonga ciinga camuzike icipakamene munzila yakumuuya akaambo kakuzumanana kubaa muzeezo wakubindaana kwazintu akati kabantu ba Jehova. (Isaya 1:3) Basiluleyo bali boobo balazwidilila ‘mukunyonyonganya lusyomo lwabamwi,’ icipa kuti balobe munzila yakumuuya.—2 Timoteo 2:18.

8. Ncinzi capa kuti bamwi balobye naa kunyikizya bwaato bwalusyomo lwabo?

⁸ Ibamwi Banakristo balyaabide balobya bwaato bwabo bwalusyomo kwiinda mukwaayumbila ambali manjezeezya abo akutalika kucita zintu zyoonse zyamunyika zyakulikondelezya alimwi amubwaamu. (2 Petro 2:20-22) Alimwi bamwi banyikizya bwaato bwabo bwalusyomo nkaambo ikweelana ambobazilanga zintu, ikuzuzikizigwa kwabweende bwazintu bupya takulibonyi kuti kuli afwaafwi. Akaambo kakuti bakakilwa kujana ciindi cini-cini kujatikizya kuzuzikizigwa kwabusinsimi bumwi alimwi akugusya “buzuba bwa-Jehova” mumizeezo yabo, bazwa mubukombi bwakasimpe. (2 Petro 3:10-13; 1 Petro 1:9) Ndilyonya balijana mumaanzi aajisi mayuwe kapati aabweende bwazintu obu. (Isaya 17:12, 57:20) Bamwi ibakaleka kuyanzana ambungano ya Bunakristo bacisyoma kuti ncikombelo cakasimpe. Pele, banyina camba alukakatilo iziyandika mukulindila nyika mpya Jehova Leza njaasyomezya. Kuli mbabo Paradaiso yamuka kapati kusika.

9. Ncinzi ncobali mukucita Banakristo bamwi balyaabide, alimwi ino twaambo otu tutupa kuti tulange-lange nzi?

⁹ Banakristo bamwi balyaabide muzisi zimwi balibonya kuti bavwunga masaili aabwaato bwalusyomo lwabo. Ibwaato buciibauka, pele muciindi cakuzumanana kuya kumbele alusyomo luyumu, batalika kuliiba buya kweenda. Kwiinda mukukulwaizigwaa bulangizi bwa “Paradaiso ilaboola onoono,” bamwi bakakanzide kusolekesya kusikila mpobagolela kutegwa bakakkale muparadaiso eyo, bakali basungu mumulimo wakukambauka, lyoonse bakali kujanika kumiswaangano yoonse yambungano alimwi amiswaangano misyoonto-syoonto amipati. Ono akaambo kakuyeeya kuti ikuzuzikizigwa kwabulangizi bwabo kucili kule kwiinda mbobakali kukuyeeyela, tabacisungweede kusolekesya pe. Eci cilalibonya kwiinda mukuceya kwaciindi ncobabeleka mumulimo wabukambausi, ikulovwa-lovwa kumiswaangano yambungano alimwi akulisungula kutajanika kuzibeela zimwi zyapulogilamu yamiswaangano misyoonto-syoonto naa mipati. Bamwi baaba ciindi cinji kukusobana alimwi akujana bugwetegwete bwazintu zyakumubili. Itwaambo otu tutupa kuti tulange-lange cintu ceelede kutukulwaizya mubukkale bwesu kweelana akulyaaba kwesu kuli Jehova. Sena busungu bwesu mumulimo wakwe bweelede kuyaamaa bulangizi bwa “Paradaiso ilaboola onoono”?

Bulangizi Bweezyanisigwaa Musemu

10, 11. Ino bulangizi bwesu Paulo wakabukozyanisya anzi, alimwi nkaambo nzi kukozyanisya oku ncokwakali kweelela?

¹⁰ Paulo wakatondezya kuti Jehova wakasyomezyede zilongezyo zyakali kuyoozuzikizigwa kwiinda muli Abrahamu. Mpoonya mwaapostolo wakapandulula kuti: “Leza . . . wakali kusinizizye kukukonka, kuti kumakani aya obile [ijwi lyakwe akukonka kwakwe] aatasanduki ngatakonzya kubeja Leza, tukabe aluumbulizyo luyumu, swebo notutijila kuti tujatisye bulangizi bubikidwe kumeso esu. Obu bulangizi tulibujisi ukuba anga musemu wamuuya, umuyumu nta, uutazungaani.” (Ba-Hebrayo 6:17-19; Matalikilo 22:16-18) Ibulangizi bujisi Banakristo bananike mboobo bwabuumi butafwiki kujulu. Sunu ibunji bwababelesi ba Jehova bajisi bulangizi bubotu bwabuumi butamani aanyika yaparadaiso. (Luka 23:43) Imuntu takonzyi kubaa lusyomo kakwiina bulangizi buli boobu.

¹¹ Imusemu ncibelesyo cibotu iciyandika kapati kukwiimika bwaato abusena bomwe akubukasya kusweeka. Kwiina sibwaato uunga ulayumuka kanyina musemu. Mbwaanga Paulo wakajatikizigwa muntenda yamubwaato kwaziindi zinji, wakalizi kwiinda mukulibonena kuti ibuumi bwabasibwaato kanjikanji bwakayeeme aamisemu yabwaato. (Incito 27:29, 39, 40; 2 Ba-Korinto 11:25) Mumwaanda wamyaka wakusaanguna, ibwaato bwakanyina njini iikonzya kugwasya sikweenzya ikubugamika kulubazu kufwumbwa nkwayanda. Ikweenda kwamaato manji kwakayeeme aamuuwo ccita buyo maato aankondo aakali kweenzyegwaa nkwasu. Ikuti bwaato bwakwe bwanjila muntenda yakwiinda amabwe mapati, cilikke ncaakali kunga wacita sikweenzya nkulosya musemu akufwutuka guwo elyo, kasyomede kuti musemu oyo tauko kunyukuka anyika njumu ili ansi. Aboobo Paulo wakeezyanisya bulangizi bwa Banakristo ku “musemu wamuuya, umuyumu nta, uutazungaani.” (Ba-Hebrayo 6:19) Notulwanwa aguwo lyakukazigwa naa notusikilwa masukusyo aambi, ibulangizi bwesu bubotu bubeleka mbuli musemu uutusitikizya kuti katuli bantu bazumi ikutegwa bwaato bwesu bwalusyomo butasweekeli munkomwe zibyaabi zizwide musenga zyakudooneka naa mabwe mabyaabi aaluleyo.—Ba-Hebrayo 2:1; Juda 8-13.

12. Mbuti mbotunga twakweeleba kusweeka kuzwa kuli Jehova?

¹² Paulo wakacenjezya Banakristo bana Hebrayo kuti: “Nobakwesu, amulangisye kuti kulindinywe kutabi muntu uuba amoyo mubi wakulimbulula, uumusowa kuzwa kuli-Leza muumi.” (Ba-Hebrayo 3:12) Mu Cigiliki, ibbala ‘lyakusweeka’ lyaamba “kuzanduka,” nkokuti kuleya. Pele tulakonzya kukweeleba kuloba kuli boobo. Lusyomo abulangizi ziyootugwasya kukakatila kuli Jehova neciba ciindi nokuli guwo litaambiki lyakusunkwa. (Deuteronomo 4:4; 30:19, 20) Lusyomo lwesu talweelede kuba mbuli bwaato ibwiide kutontwa koonse-koonse amyuuwo yanjiisyo zyabasiluleyo. (Ba-Efeso 4:13, 14) Aboobo kwiinda mukucita kuti bulangizi bube musemu wesu, tuyookonzya kuzwidilila mumapenzi aamubuumi katuli babelesi ba Jehova.

Ibakulwaizidwe Aluyando a Muuya Uusalala

13, 14. (a) Nkaambo nzi musemu wabulangizi bwesu ncoutazulide kuti kauli ulikke buyo? (b) Ncinzi cini ceelede kutukulwaizya kubelekela Jehova mulimo uusetekene, alimwi ino nkaambo nzi?

¹³ Imunakristo kunyina nanga wazwidilila kuyoosika mubweende bwazintu bupya ikuti makanze aakwe aakubelekela Jehova kaayeeme buyo aabulangizi bwakupona kukabe kutamani aanyika yaparadaiso. Nokuba kuti inga kabikkide musemu wakwe walusyomo kuti ncecintu cimuyumya mubuumi bwakwe, weelede kuyungizya nguzu zikulwaizya zyaluyando kulincico akulusyomo lwakwe. Paulo wakakankaizya kaambo aka naakalemba kuti: “Lino sunu alabedelela aya otatwe, lusyomo abulangizi aluyandisyo, pele akati kayaaya cipati nduyandisyo.”—1 Ba-Korinto 13:13.

¹⁴ Icintu ceelede kutukulwaizya kubeleka mulimo uusalala nduyando lwini-lwini ndotujisi kuli Jehova, mukulumba luyando lutalivwulili ndwajisi kulindiswe. Imwaapostolo Johane wakalemba kuti: “Oyu uutayandi tamuzi Leza, nkaambo Leza nduluyando. Luyando lwa-Leza lwamulindiswe lwakaboneka boobu, nkaambo Leza wakatuma Mwanaakwe simuzyalwa-alike munyika, kuti tujane buumi kumaanza aakwe. Swebo tulamuyanda nkaambo nguwakasaanguna kuyanda ndiswe.” (1 Johane 4:8, 9, 19) Akaambo kakulumba Jehova, icintu ncotweelede kubikkila maanu lutaanzi nkulibonena kusalazigwa kwazina lyakwe lisalala alimwi akuzyibwa kwabulelo bwakwe bululeme ikutali kulijanina lufwutuko lwesu tobeni.

15. Mbuti luyando lwesu kuli Jehova mboluswaangene amakani aabulelo bwakwe?

¹⁵ Jehova uyanda kuti tumubelekele akaambo kakuti tulamuyanda, ikutali buyo kuti nkaambo kuli Paradaiso. Ibbuku lipandulula Bbaibbele lya Insight on the Scripturesa lyaamba kuti: “Jehova ulakkomana kapati akaambo kakuti bulelo bwakwe alimwi akugwasilizigwa nkozibugwasilizya zilenge zyakwe kuyeeme aaluyando. Mbayanda mbaabo balikke ibayanda bulelo bwakwe nkaambo kabube bwakwe bubotu alimwi nkaambo buli luleme, aabo ibasalide buyo bulelo bwakwe nzu. (1 Kor. 2:9) Balisalila kubeleka mubweendelezi bwabulelo bwakwe muciindi cakusola kulyeendelezya beni—eci balacicita nkaambo kaluzibo ndobajisi kujatikizya nguwe alimwi aluyando lwakwe, bululami abusongo zyalo nzyobazyi kuti zilisumpukide kapati kwiinda zyabo. (Int. 84:10, 11)”—Volyumu 2, peeji 275.

16. Ino luyando ndotujisi kuli Jesu lutukulwaizya buti mumaumi eesu?

¹⁶ Alimwi mbotuli Banakristo, tulatondezya luyando akuli Jesu nkaambo kaluyando ndwajisi kulindiswe. Paulo wakati: “Kuyanda Kristo nkokutusinikizya, ikuti tulabeteka obo, kuti omwe wakafwida boonse, aboobo boonse bakafwa. Nkabela wakabafwida boonse kuti abo bapona bataciliponen[i] beni pele baponene oyo iwakabafwida akubuka.” (2 Ba-Korinto 5:14, 15) Kristo nentalisyo aayakidwe bukkale bwesu bwakumuuya, lusyomo lwesu alimwi abulangizi. Luyando lwesu kuli Kristo Jesu luyumya bulangizi bwesu alimwi luzyatya lusyomo lwesu, ikapati muziindi zyakusunkwa kupati.—1 Ba-Korinto 3:11; Ba-Kolose 1:23; 2:6, 7.

17. Ninguzu nzi zipati nzyatupa Jehova, alimwi ziyandika kapati buti kweelana ambokutondezyedwe kubbuku lya Incito 1:8 a Ba-Efeso 3:16?

¹⁷ Nokuba kuti luyando ndotujisi kuli Leza aku Mwanaakwe ncecintu cipati citukulwaizya mubuumi bwesu bwa Bunakristo, nkocili acimbi Jehova ncapa icitukulwaizya alimwi icituyumya kuti tuzumanane kuya kumbele mumulimo wakwe. Ninguzu zyakwe zibeleka naa muuya uusalala. Imabala aa Cihebrayo a Cigiliki aasandulwidwe kuti “muuya” aamba nguzu zijisi muwo nouunga mbuli guwo. Ikutegwa asike kooko nkwaagama, imaato mbuli yaayo Paulo ngaakabelesya akali kuyandika nguzu zyaguwo. Mbubonya buyo, tuyandika luyando alimwi akubeleka kwanguzu zya Leza izitalibonyi ikuti katuyanda kuti bwaato bwalusyomo lwesu buzumanane kutukulwaizya kuya kumbele mumulimo wa Jehova.—Incito 1:8; Ba-Efeso 3:16.

Atuzumanane Mane do Tukasike Nkotuya!

18. Ncinzi ciyootugwasya kuliyumya mumapenzi aalusyomo lwesu aali woonse kumbele?

¹⁸ Lusyomo lwesu aluyando zilakonzya kusunkwa kapati katutanasika mubweende bwazintu bupya. Pele Jehova watupa musemu “umuyumu nta, uutazungaani”—ibulangizi bwesu bubotu. (Ba-Hebrayo 6:19; Ba-Roma 15:4, 13) Notupenzyegwa kwiinda mukukazigwa naa masunko aambi, tulakonzya kuliyumya ikuti katuzyatide kabotu kwiinda mubulangizi bwesu. Iguwo lyamapenzi limwi mbolyalekela kuunga pele kakutana talika limbi, atukanze kukakatila kuyumya bulangizi bwesu alusyomo.

19. Mbuti mbotunga twabamba bwaato bwalusyomo lwesu kuti kabuli buyumu mane do tukasike kunyika ya Leza mpya?

¹⁹ Katanaamba “musemu wamuuya,” Paulo wakati: “Tuyandisya kuti umwi aumwi wanu ajatisye kusungwaala nkukonya [“kufwanzya,” kagwalo kakunsi mu, NW] kukulindila kumaninide mane do kumamanino, kuti mutabi baziluki, pele kamutobela baabo abayoojana ceeco icakasyomezegwa nkaambo kakusyoma akubosya moyo.” (Ba-Hebrayo 6:11, 12) Kwiinda mukukulwaizigwaa luyando ndotujisi kuli Jehova aku Mwanaakwe alimwi akwiinda mukuyumizigwaa muuya uusalala, atuzumanane kubamba bwaato bwalusyomo lwesu kabuli muciimo cibotu mane do tukasike kunyika ya Leza mpya njaakasyomezya.

Bupanduluzi buyungizidwe

Ikwiinduluka

◻ Kujatikizya lusyomo lwesu, nkucenjezya nzi nkwaakatupa Paulo?

◻ Mbuti bamwi mbobaloba munzila yakumuuya, alimwi mbuti bamwi mbobali mukuliiba akujokela munsi?

◻ Nciimo nzi cimwi cabunaleza iceelede kweendelaamwi alusyomo?

◻ Ncinzi ciyootugwasya kuyoosika kunyika mpya njaakasyomezya Leza?

[Cifwanikiso icili apeeji 16]

Bwaato bwalusyomo lwesu bweelede kuti kabuyakidwe kabotu kutegwa bukazwidilile mumapenzi aamubuumi

[Cifwanikiso icili apeeji 17]

Lusyomo lwesu lulakonzya kuloba

[Cifwanikiso icili apeeji 18]

Mbotuli Banakristo, ibulangizi ngomusemu wabuumi bwesu