Ciindi Jesu Nayakuboola Mubulemu bwa Bwami

“Mpobali bamwi baimvwi awa batakooyoomvwa lufu mane lumwi bakabone Mwana a-Muntu uuboola mu-Bwami bwakwe.”—MATAYO 16:28.

1, 2. Ncinzi cakacitika kwiinde buyo ciindi cisyoonto kuzwa lya Pentekoste mu 32 C.E., alimwi cakacitikila nzi?

KAKUTANAINDA ciindi cilamfwu kuzwa lya Pentekoste mu 32 C.E., bamaapostolo ba Jesu Kristo botatwe bakabona cilengaano cipati citalubiki. Kujatikizya ceeci, ilugwalo lwakalembwa kwiinda mumuuya uusalala lwaamba kuti, “Jesu wakabweza Petro a-Jakobo a-Johane munyina, wabatola abalike atala acilundu cilamfu. Nkabela wakasanduka kubusyu bwabo.”—Matayo 17:1, 2.

² Eeci cilengaano cakusanduka cakacitika aciindi cikatazya. Jesu wakatalikide kwaambila basikumutobela kuti uyoopenga akufwa ku Jerusalemu, pele cakabaalila kuteelela ncaakali kubaambila. (Matayo 16:21-23) Eco cilengaano cakayumya lusyomo lwabaapostolo ba Jesu botatwe kubapa kuti balibambile lufwu lwakwe lwakali kuboola alimwi amyaka yamulimo muyumu amisunko moyakali kuzoolijana mbungano ya Bunakristo. Sena swebo sunu kuli ncotunga twaiya mucilengaano eco? Ee, nkaambo ncocakali kwiiminina cicitika muciindi cesu.

3, 4. (a) Ncinzi Jesu ncaakaamba kakuceede mazuba aali cisambomwi kuti cicitike cilengaano cakusanduka? (b) Amupandulule cakacitika ciindi nocakacitika cilengaano cakusanduka.

³ Kakuceede mazuba aali cisambomwi kuti cicitike cilengaano cakusanduka, Jesu wakaambila basikumutobela kuti: “Nkaambo Mwana a-Muntu uzooboola mubulemu bwawisi abaangelo bakwe, elyo uzoobweedezya muntu umwi aumwi mbuli milimo yakwe.” Aaya majwi aali kuzoozuzikizigwa “[ku]mamanino aaciindi.” Jesu wakayungizya kuti: “Ncobeni ndamwaambila kuti mpobali bamwi baimvwi awa batakooyoomvwa lufu mane lumwi bakabone Mwana a-Muntu uuboola mu-Bwami bwakwe.” (Matayo 16:27, 28; 24:3; 25:31-34, 41; Daniele 12:4) Icilengaano cakacitika kuzuzikizya majwi aaya aazwaakwaambwa.

⁴ Ino ncinzi cini-cini bamaapostolo aaba botatwe ncobakabona? Mboobu mbwacipandulula Luka: “Naakacili kukomba [Jesu], ciwa cabusyu bwakwe cakasanduka, ezyakusama zyakwe zyakatuba akunyengema. Nkabela kwakali kwaambaula awe baalumi bobile, bakali Musa a-Eliya, abakaboneka abulemu, bakaamba aakufwa kwakwe nkweelede kuzyulizya ku-Jerusalemu.” Mpoonya “kwakasika ikumbi, lyabavumba [bamaapostolo], bakayoowa nobakanjila mukumbi. Elyo lyakazwa ijwi mukumbi lyati, Oyu ngomwanaangu ngwenkondwa, amukaswiilile nguwe.”—Luka 9:29-31, 34, 35.

Ilusyomo Lwayumizigwa

5. Ino cilengaano cakusanduka cakamupa kuti alimvwe buti mwaapostolo Petro?

⁵ Lino mwaapostolo Petro wakamwaambide kale Jesu kuti ngu “Kristo, Mwana a-Leza muumi.” (Matayo 16:16) Majwi aa Jehova kuzwa kujulu akacisinizya eco, alimwi cilengaano cakusanduka kwaciwa ca Jesu cakali cakulabila kuboola nkwayakuboola Kristo kumbele aamazuba munguzu zya Bwami abulemu caakuti casika ciindi cakubeteka bantu. Kaili yainda myaka iinda ku 30 kuzwa ciindi nocakacitika cilengaano, Petro wakalemba kuti: “Nkaambo nitwakamuzibya makani aanguzu zya-Jesu Kristo akuboola kwakwe, teetwakali kutobela zyamankwangwaalizya zicitwa akusongwaalasongwaala kwabantu, pe, nkaambo twakabona bupati bwakwe mumeso esu tubeni. Twakabona naakatambula kuli-Leza Wisi lulemeko abulemu, nkabela wakasikilwa eli ijwi lizwa kubulemu bupati lyakuti, Ngooyu Mwanaangu uuyandwa ngwenkondelwa. Eli ijwi twakalimvwa, lyakazwa kujulu notwakali awe kucilundu cisalala.”—2 Petro 1:16-18; 1 Petro 4:17.

6. Nzintu nzi zyakacitika kuzwa ciindi nocakacitika cilengaano cakusanduka?

⁶ Andiswe mazubaano, ilusyomo lwesu lulayumizigwa kuli ceeco ncobakabona bamaapostolo botatwe. Aino, kwacitika zintu zinji ikuzwa mu 32 C.E. Imwaka wakatobela, Jesu wakafwa kumane wakabusigwa, waya kujulu kuyookkala kujanza lyalulyo lya Wisi. (Incito 2:29-36) Ilya Pentecoste mumwaka oyo, “bana ba-Israyeli ba-Leza,” ibapya bakazyalwa, alimwi mulimo wakukambauka wakatalika, wakatalikila mu Jerusalemu kumane ngoyo uyabuya waakusika kumamanino aanyika. (Ba-Galatiya 6:16; Incito 1:8) Kwiinde buyo ciindi cisyoonto, ilusyomo lwabasikumutobela Jesu lwakasunkwa. Bamaapostolo bakajatwa akuumwa kapati nkaambo bakakaka kuleka kukambauka. Mpoonya teelyakalampa, Stefani wakajaigwa. Kuzwa waawo, Jakobo, wakali kamboni wacilengaano cakusanduka, wakajaigwa. (Incito 5:17-40; 6:8–7:60; 12:1, 2) Pele Petro a Johane bakapona kwamyaka minji kababelekela Jehova cakusyomeka. Kumamanino aamwaanda wakusaanguna wamyaka C.E., Johane wakalemba zimbi zilengaano izitondezya Jesu mubulemu bwakujulu.—Ciyubunuzyo 1:12-20; 14:14; 19:11-16.

7. (a) Ino cilengaano cakusanduka cakatalika lili kuzuzikizigwa? (b) Ndilili Jesu naakabweedezya bamwi kweelana amilimo yabo?

⁷ Ikuzwa nobwakatalika “buzuba bwa-Mwami” mu 1914, ibunji bwazilengaano nzyaakabona Johane zyazuzikizigwa. (Ciyubunuzyo 1:10) Ino mbuti kwalo ‘kuboola kwa Jesu mubulemu bwa-Wisi,’ mbuli mbocakaimininwa mukusanduka kwakwe? Eci cilengaano cakatalika kuzuzikizigwa nobwakazyalwa Bwami bwa Leza bwakujulu mu 1914. Ciindi Jesu naakabbunuka akati kazilenge zyoonse mbuli ntanda kali wazwaakubikkwa acuuno ca Bwami, kwakaba mbuli kuti kwatalika buzuba bupya. (2 Petro 1:19; Ciyubunuzyo 11:15; 22:16) Sena Jesu ciindi eco wakabweedezezya bantu bamwi kweelana amilimo yabo? Ee. Kuli cisinizyo cipati cakuti kakwiindide buyo ciindi cisyoonto, ibubuke bwakujulu ibwa Banakristo bananike bwakatalika.—2 Timoteo 4:8; Ciyubunuzyo 14:13.

8. Nzintu nzi ziyakucitika iziyakusololela mukuzuzikizigwa kwacilengaano cakusanduka coonse?

⁸ Pele ino-ino Jesu uyakusika “mubulemu bwakwe antoomwe abaangelo bakwe” kutegwa akabeteke bantu boonse. (Matayo 25:31) Kuciindi eco, uyakulitondezya mubulemu bwakwe bupati boonse akubweedezya kuli “umwi aumwi” kweelana amilimo yakwe. Ibantu bali mbuli mbelele bayakukona buumi butamani mu Bwami ibubambilidwe mbabo, balo aabo ibali mbuli mpongo bayooya “[mu]lunyonyooko lutamani.” Anooli taaliboteli mamanino aakuzuzikizigwa kwacilengaano cakusanduka!—Matayo 25:34, 41, 46, NW; Marko 8:38; 2 Ba-Tesalonika 1:6-10.

Aabo Mbayakupegwa Limwi Bulemu Jesu

9. Sena ba Musa a Eliya tweelede kubalangila kuba antoomwe a Jesu ciindi nociyakuzuzikizigwa cilengaano cakusanduka? Amupandulule.

⁹ Jesu tanaakali alikke ciindi cacilengaano cakusanduka. Wakabonwa kali a Musa a Eliya. (Matayo 17:2, 3) Sena bakaliko ncobeni? Peepe, nkaambo aaba bantu boonse bobile bakafwide kaindi, elyo bakali koona mubulongo kabalindila kubusigwa. (Mukambausi 9:5, 10; Ba-Hebrayo 11:35) Sena bayakubaa Jesu nayakuboola mubulemu bwakujulu? Peepe, nkaambo Musa a Eliya bakali kupona ciindi mulyango wabulangizi bwakujulu kautaninga kujulilwa bantu. Bayakuba akati ‘kabaluleme ibaya kubuka’ anyika. (Incito 24:15) Aboobo kulibonya nkobaalibonya mucilengaano cakusanduka nkwacikozyanyo buyo. Icikozyanyo canzi?

10, 11. Ino Eliya a Musa baiminina nzi munzila zisiyene-siyene?

¹⁰ Munzila imwi, Musa a Eliya zyakali zikozyanyo zyabusinsimi. Mbwaakali mwiiminizi wa Mulawo wacizuminano, Musa wakali kwiiminina Jesu Mwiiminizi wacizuminano cipya. (Deuteronomo 18:18; Ba-Galatiya 3:19; Ba-Hebrayo 8:6) Eliya wakali kwiiminina Johane Mubbapatizi, sikumujulila nzila Mesiya. (Matayo 17:11-13) Kunze lyaboobo, kweelana acaambwa mu Ciyubunuzyo caandaano 11, Musa a Eliya baiminina bananike baceede mumazubaa mamanino. Ino tuzi buti?

¹¹ Nkooko amujule ku Ciyubunuzyo 11:1-6. Kukapango ka 3 tubala kuti: “Lino bakamboni bangu bobile njoobapa inguzu zyakusinsima mazuba aali cuulu amyaanda yobile amakumi aali musanu alimwi, nkabela banooyoosamide cisani camasaka.” Oobu businsimi bwakazuzikizigwa ku Banakristo bananike baceede ciindi ca Nkondo Yanyika Yakusaanguna.a Ino nkaambo nzi ncokwaambwa kuti bakamboni bobile? Nkaambo bananike baceede bacita milimo iili mbuli ya Musa a Eliya munzila yakumuuya. Tupango 5 alimwi a 6 tulazumanana kuti: “Na kuti kuli muntu uuyanda kubacisa [aaba bakamboni bobile], kulazwa mulilo mumilomo yabo akubaumpa basinkondonyina. Na kuti kuli muntu uuyanda kubacisa, mbuboobo mbweelede kujayigwa. Aba mbibajisi inguzu zyakusinka julu kuti imvula itawi mazuba oonse aakusinsima kwabo, alimwi bali anguzu zyakusandula maanzi kuti abe bulowa, akuuma nyika amapenzi oonse kufumbwa ciindi ncibayanda.” Aboobo eci cituyeezya maleele aakacitwaa Eliya a Musa.—Myeelwe 16:31-34; 1 Bami 17:1; 2 Bami 1:9-12.

12. Mucilengaano cakusanduka, Musa a Eliya baiminina bani?

¹² Mbokuli boobo ino Musa a Eliya baiminina bani mucikozyanyo cakusanduka? Luka waamba kuti bakaboneka kabali antoomwe a Jesu “[mu]bulemu.” (Luka 9:31) Cakutadooneka, inga kwategwa baiminina Banakristo ibananikidwe muuya uusalala, ibaba ‘basikukonanyina’ a Jesu alimwi kuzwa waawo ibakapegwa bulangizi bubotu ibwakutambula “bulemu” antoomwe anguwe. (Ba-Roma 8:17) Aabo bananike ibanooli babusigwa banooli a Jesu ciindi nayakuboola mubulemu bwa Wisi “[k]uzoobweedezya muntu umwi aumwi mbuli milimo yakwe.”—Matayo 16:27.

Bakamboni Ibali Mbuli Musa a Eliya

13. Nzintu nzi zitondezya kuti Musa a Eliya baleelela mubusinsimi kwiiminina bananike basikukonanyina Jesu ibayakusumpulwa akupegwa bulemu antoomwe anguwe?

¹³ Kuli nzila zimwi Musa a Eliya mobakozyanya kapati abananike basikukonanyina Jesu icibapa kuti beelele kuba baiminizi babo mubusinsimi. Musa a Eliya boonse bobile bakali basikukanana baiminina Jehova kwamyaka minji. Boonse bobile bakabumvwa bukali bwamuleli. Iciindi capenzi, aumwi wakagwasigwa amukwasyi muzwakule. Boonse bobile bakasinsima cakutayoowa kubami alimwi akukakatila kukazya basinsimi babeji. Musa a Eliya boonse bobile bakabona zitondezyo zyanguzu zya Jehova a Mulundu wa Sinai (iwiitwa akuti Horebu). Boonse bobile bakasala basikulya mazina ku Jordano nkoili kulubazu lwakujwe. Alimwi ciindi lyakali kupona Musa (kali a Joshua) alimwi a Eliya (kali a Elisha) kwakacitwa maleele manji kwiinda ziindi zyoonse ccita buyo ciindi lyakali kupona Jesu.b

14. Mbuti bananike mbobali basikukanana baiminina Jehova mbweena mbuli bwaali Musa a Eliya?

¹⁴ Sena zyoonse ezyo tazitwiibalusyi bana Israyeli ba Leza? Ee, masimpe. Jesu wakaambila basikumutobela kuti: “Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila. Amulange, ndaba anywe mazuba oonse nikuba kusikila kumamanino aaciindi.” (Matayo 28:19, 20) Banakristo bananike baatobela majwi aaya kwiinda mukuba basikukanana baiminina Jehova kuzwa mu Pentekoste mu 33 C.E. kusikila sunu. Mbweena mbuli Musa a Eliya, babumvwa bukali bwabaleli alimwi bapa bukamboni kuli mbabo. Jesu wakaambila bamaapostolo bakwe bali 12 kuti: “Muyootolwa kubusyu bwabeendelezi ababami nkaambo kandime, cikabe citondezyo kulimbabo akubamasi.” (Matayo 10:18) Majwi aakwe azuzikizigwa kanjikanji muciindi cambungano ya Bunakristo.—Incito 25:6, 11, 12, 24-27; 26:3.

15, 16. Ino nkukozyanya nzi kuliko akati kabananike a Musa alimwi a Eliya kumakani (a) aakwiiminina nkobakaiminina kasimpe cakutayoowa? (b) aakutambula lugwasyo kuzwa kubantu batali bana Israyeli?

¹⁵ Kunze lyaboobo, Banakristo bananike mbantu basicamba mukwiiminina kasimpe akukazya bukombi bwakubeja mbubwena bwakali Musa a Eliya. Amuyeeye Paulo mbwaakasinsa musinsimi wakubeja mu Juda uutegwa Barjesu alimwi camaanu wakayubununa kuti baleza babana Atene mbakubeja. (Incito 13:6-12; 17:16, 22-31) Amuyeeye alimwi kuti mazubaano, bananike baceede bamuyubununa Kristendomu cakutayoowa alimwi bukamboni buli boobu bwamupenzya.—Ciyubunuzyo 8:7-12.c

¹⁶ Ciindi Musa naakali kutija bukali bwa Farao, wakaakuyubila muŋanda yamuntu uutali muna Israyeli uutegwa Reueli, naa Jetero. Cimwi ciindi Musa wakazootambula lulayo lubotu lwabweendelezi kuzwa kuli Reueli, iwakali amwana uutegwa Hobabu wakasololela Israyeli munkanda.d (Kulonga 2:15-22; 18:5-27; Myeelwe 10:29) Sena bana Israyeli ba Leza bagwasigwa abalo kubantu batali muciinga cabana Israyeli ba Leza bananike? Ee, balimukugwasigwa ‘abankamu mpati’ ‘bambelele zimwi’ ibalibonya mumazuba aaya aamamanino. (Ciyubunuzyo 7:9; Johane 10:16; Isaya 61:5) Naakali kusinsima lugwasyo lwaluyando iluzoopegwaa “mbelele” kubanyina bananike, mboobu Jesu mbwaakabaambila mukusinsima: “Nkaambo ndakafwa inzala, mwakandipa kulya; ndakafwa inyota, mwakandinywisya, ndakali mweenzu, mwakandikondezya; ndakali cintanda, mwakandisamika; ndakali mulwazi, mwakandiswaya; ndakali muntolongo, mwakandizida. . . . Ncobeni ndamwaambila kuti, mbuli mbumwakacitila obo umwi naba muniini akati kabakwesu aba, mwakacitila ndime mbubonya.”—Matayo 25:35-40.

17. Mbuti mbocikozyenye cakacitikila bananike kuliceeco cakacitikila Eliya a Musa ku Mulundu wa Horebu?

¹⁷ Alimwi icakacitikila bana ba Israyeli ba Leza cilakozyanya acakacitikila Eliya a Mulundu wa Horebu.e Mbweena mbuli Eliya ciindi naakali kutija Mwami mukaintu Jezebeli, bananike bakayoowede bakali kuyeeya kuti mulimo wabo wamana kumamanino aa Nkondo Yanyika Yakusaanguna. Kunze lyaboobo bakaswaangana a Jehova iwakaboolede kubeteka mbunga ezyo zyakali kulyaamba kuti “[nzya]ciinga ca-Leza.” (1 Petro 4:17; Malaki 3:1-3) Nokuba kuti Kristendomu yakajanika muciimo citaluzi, bananike baceede balo bakatambulwa baba “muzike musyomesi uucenjede” alimwi bakapegwa bweendelezi bwambono zya Jesu zyoonse zyaanyika. (Matayo 24:45-47) Eliya wakamvwa “ijwi lyaluumuno wi” ciindi naakali mu Horebu ilyakazwa kuli Jehova, elyo jwi lyakali lyakumutuma kumulimo umbi. Ibabelesi ba Jehova bananike basyomeka bakalimvwa ijwi lyakwe kwiinda mu Bbaibbele mumyaka yaluumuno noyakayinda nkondo. Abalo bakabona kuti bakapegwa mulimo ngobakeelede kuzuzikizya.—1 Bami 19:4, 9-18; Ciyubunuzyo 11:7-13.

18. Muunzila nzi Jehova mwaatondezya nguzu zyakwe zipati kwiinda muba Israyeli ba Leza?

¹⁸ Icamamanino inga kwabuzigwa kuti, sena Jehova watondezya nguzu zyakwe zipati kwiinda mubana ba Israyeli ba Leza? Ikuzwa ciindi Jesu naakafwa, bamaapostolo bakacita maleele manji, pele ayo maleele akamana bucebuce. (1 Ba-Korinto 13:8-13) Mazubaano tatwaaboni maleele yeni-yeni. Nokuba boobo Jesu wakaambila basiciiya bakwe kuti: “Ncobeni ndamwaambila kasimpe, Oyo uundisyoma, uyoocita milimo iili mbuli njencita, mane do akiicite mipati iinda eyi.” (Johane 14:12) Eci cakatalika kuzuzikizigwa basiciiya ba Jesu nobakali kukambauka makani mabotu munyika yoonse yakali Kulelwa aba Roma mumwaanda wakusaanguna wamyaka. (Ba-Roma 10:18) Noliba sunu milimo mipati kwiinda yacitwa kwiinda mubananike baceede ibali mukusololela mukukambauka makani mabotu “munyika yoonse kuti abe citondezyo kumisyobo yoonse.” (Matayo 24:14) Kuzwa waawo ncinzi cacitika? Mumwaanda wa 20 wamyaka, bayobololwa babelesi ba Jehova ibalyaabide basyomeka ibanji kwiinda baciindi coonse cainda. (Ciyubunuzyo 5:9, 10; 7:9, 10) Eci citondezyo canguzu zya Jehova taciliboteli!—Isaya 60:22.

Ibabunyina ba Jesu Baboola Mubulemu

19. Ndilili babunyina ba Jesu bananike nobabonwa kabali anguwe mubulemu?

¹⁹ Mbobamanina buyo mulimo wabo waansi, ibabunyina ba Jesu bananike baceede balasumpulwa akupegwa bulemu mbuli nguwe. (Ba-Roma 2:6, 7; 1 Ba-Korinto 15:53; 1 Ba-Tesalonika 4:14, 17) Elyo baba bami abapaizi batafwi mu Bwami bwakujulu. Abalo mbweena mbuli Jesu ‘bayoobalela bantu amusako walubulo. Bayoobapwaya mbuli bupwaigwa cibiya.’ (Ciyubunuzyo 2:27; 20:4-6, Ci; Intembauzyo 110:2, 5, 6) Bayookkala antoomwe a Jesu azyuuno zyabwami kuti babeteke “misyobo iili ikumi aibili yaba-Israyeli.” (Matayo 19:28) Izilenge izili mukutongela zyali kulangila zintu ezi izijatikizya “luyubununo lwabana ba-Leza.”—Ba-Roma 8:19-21; 2 Ba-Tesalonika 1:6-8.

20. (a) Muubulangizi nzi cilengaano cakusanduka mucakayumya lusyomo lwa Petro? (b) Ino cilengaano cakusanduka cibayumya buti Banakristo sunu?

²⁰ Paulo wakali kwaamba luyubununo lwa Jesu ciindi ‘camapenzi mapati’ naakalemba kuti: “Kuciindi ncazoosika kuzoolemekwa kubasalali bakwe akulumbaizigwa kuliboonse basyoma (nkaambo bukamboni bwesu bwakasyomwa kulindinywe) kubuzuba obo.” (Matayo 24:21; 2 Ba-Tesalonika 1:10) Tabuliboteli bulangizi obu bwa Petro, Jakobo, Johane abambi boonse Banakristo bananikidwe amuuya! Lusyomo lwa Petro lwakayumizigwa acilengaano cakusanduka. Kuti twaabala makani aya aacilengaano, andiswe lusyomo lwesu lulayumizigwa alimwi cilatupa kuti tusyome cini-cini kuti Jesu ino-ino “uzoobweedezya muntu umwi aumwi mbuli milimo yakwe.” Ibanakristo bananike ibasyomeka aabo ibacipona asunu babubona bukamboni bwalusyomo ndobajisi lwakuti bayoosumpulwa akupegwa bulemu mbuli bwa Jesu. Ilusyomo lwabambelele zimwi lwayumizigwa muluzibo lwakuti uyoobafwutula kuti bakanjile munyika mpya mbotu ciindi bwaakugwisigwa bweende obu bwazintu bubyaabi. (Ciyubunuzyo 7:14) Ino eci cilatuyumya kaka kuti tukakatile kusikila kumamanino! Alimwi eci cilengaano cilatuyiisya zintu zinji, eci tulacibona mucibalo citobela.

Bupanduluzi buyungizidwe

Sena Mulayeeya?

◻ Mbaani bakalibonya kabali a Jesu mucilengaano cakusanduka?

◻ Ino lusyomo lwabaapostolo lwakayumizigwa buti acilengaano cakusanduka?

◻ Ciindi Musa a Eliya nobakalibonya “mubulemu” kabali a Jesu mucilengaano cakusanduka, bakali kwiiminina bani?

◻ Ino Musa a Eliya bakozyenye buti aba Israyeli ba Leza?

[Cifwanikiso icili apeeji 8]

Cilengaano cakusanduka cakayumya lusyomo lwa Banakristo bamumwaanda wamyaka wakusaanguna mbweena mbuli mbocacita sunu