Sena Kuli Cintu Cili Coonse Ncaakaamba Jesu Kujatikizya Mulilo Wahelo?

Jesu wakaamba kuti: “Alyalo liso lyako na lyakulebya, lidokomone. Mpaanga cilabota kuti unjile mu-Bwami bwa-Leza, koli sicimbolyo, kwiinda kuwaalwa mu-Gehena [muhelo, Contemporary English Version], kojisi meso obile. Mwalo omo imvunyu yabo tiikwe niifwa, amulilo tuukwe kuzima.”—MARKO 9:47, 48.

Buzuba bumwi, Jesu wakaamba kuti kuya kuba ciindi calubeta naya kwaambila basizibi kuti: “Amuzwe kulindime inywe numutukidwe, munjile mumulilo uutamani ngwabambilidwe Diabolosi abaangelo bakwe.” Alimwi wakaamba kuti aaba “bayoonjila mumapenzi aatamani.”—MATAYO 25:41, 46.

NOTWAABALA majwi aa Jesu aali atala aawa ciindi cakusaanguna, tulakonzya kuyeeya mbuli kuti asumpula njiisyo yamulilo wahelo. Mubwini, Jesu tanaakali kukazya kaambo kali Mujwi lya Leza kakuti: “Bafwide tabezi cintu niciba comwe.”—Mukambausi 9:5.

Aboobo, ino ncinzi ncaakali kwaamba Jesu naakaamba kuti muntu inga wasowelwa “mu Gehena” naa [“muhelo” kweelana ambolyaamba Bbaibbele lya Contemporary English Version]? Sena “mulilo uutamani” ngwaakaamba Jesu mulilo wini naa ngwacikozyanyo buyo? Muunzila nzi basizibi “[mo]bayoonjila mumapenzi aatamani”? Lino atwiilange-lange mibuzyo eeyi.

Ino ncinzi ncaakali kwaamba Jesu naakaamba kuti muntu inga wasowelwa “mu Gehena” naa [“muhelo” kweelana ambolyaamba Bbaibbele lya Contemporary English Version]? Ibbala lya Cigiliki lyakuti Geʹen·na lyakasandululwa kuti helo muma Bbaibbele amwi kulugwalo lwa Marko 9:47. Eeli bbala lizwa kubbala lya Chihebrayo lyakuti Geh Hin·nomʹ, nkokuti ‘Kkuti lya Hinomu.’ Kkuti lya Hinomu lyakali kunze aamunzi wa Jerusalemu. Muciindi cabami ba Israyeli, bantu bakali kulibelesya kutuula bana—imulimo wakali kumusesemya Leza. Leza wakaamba kuti uyakubanyonyoona bakombi bakubeja aaba. Kwiinda mukucita boobo, Ikkuti lya Hinomu liya kwiitwa kuti “ndikuti lyabujayi” alimwi “mitunta yabantu aaba” taikazikkwi. (Jeremiya 7:30-34) Aboobo, Jehova wakaamba kuti Ikkuti lya Hinomu buya kuba busena bwakusowela mitunta ikutali bwakupenzyela bantu baumi.

Ciindi Jesu naakali anyika, bantu bamu Jerusalemu bakali kusowa tombe Mukkuti lya Hinomu. Bakali kusowa mitunta yazigwebenga mubusena oobu alimwi mulilo wakali kuyaka lyoonse ikuumpa mafwuse amitunta.

Ciindi Jesu naakaamba zyamvunyu zitafwi alimwi amulilo uutazimi, kuboneka kuti wakali kwaamba kaambo kali kulugwalo lwa Isaya 66:24. Kujatikizya “mitunta yabantu ibakapapila [naa bakazangila Leza],” Isaya wakaamba kuti “imvunyu zyabo tazikwe nizifwa, amulilo wabo tuukwe nuuzima.” Jesu abantu bakali kumuswiilila bakalizyi kuti majwi aaya aali kuli Isaya akali kwaamba mboyakali kucitwa mitunta yabaabo bateeleli kuzikkwa.

Aboobo, Jesu wakakozyanisya lufwu lwabantu batalangilwi kubuka ku Kkuti lya Hinomu naa Gehena. Wakakasalazya kaambo aaka naakacenjezya kuti Leza “u[la]konzya kujaya mubili antoomwe amuuya mu-Gehena.” (Matayo 10:28) Gehena caamba kufwidilila ikutali kupenzyegwa kutamani.

Sena “mulilo uutamani” ngwaakaamba Jesu mulilo wini naa ngwacikozyanyo buyo? Amubone kuti “[i]mulilo uutamani” ngwaakaamba Jesu uulembedwe kulugwalo lwa Matayo 25:41 “[u]bambilidwe Diabolosi abaangelo bakwe.” Sena muyeeya kuti mulilo wini inga wazyuumpa zilenge zyamuuya? Naa, sena Jesu wakali kubelesya bbala lya “mulilo” mumaambilambali? Masimpe, “imbelele ampongo” zyaambwa mumubandi nguwenya ooyu tabali banyama beni pe, nzikozyanyo buyo ziiminina nkamu zyobilo zyabantu. (Matayo 25:32,33) Mbubwenya buyo, imulilo uutamani ngwaakaamba Jesu ulabaumpa cakumaninina basizibi munzila yacikozyanyo.

Muunzila nzi basizibi “[mo]bayoonjila mumapenzi aatamani”? Nokuba kuti basanduluzi banji babelesya bbala lya “mapenzi” kulugwalo lwa Matayo 25:46, ibupanduluzi butaanzi bwabbala lya Cigiliki koʹla·sin bwaamba “kubona mbwaakomena masamu” naa kugonka mitabi iitayandiki. Aboobo, aabo bali mbuli mbelele baakupegwa buumi butamani, aabo bateempwi ibali mbuli mpongo baya kunjila “[mu]mapenzi aatamani,” nkokuti baya kunyonyoonwa kukabe kutamani.

Ino Muyeeya Buti?

Jesu kunyina naakayiisya kuti kuli cintu cimwi cizumanana kupona afwa muntu. Pele, ziindi zinji wakali kuyiisya kuti bafwide baya kubuka. (Luka 14:13, 14; Johane 5:25-29; 11:25) Ikuti naa Jesu wakali kusyoma kuti kuli cintu cimwi cizumanana kupona afwa muntu, nkaambo nzi ncaakali kwaamba kuti bafwide baya kubusyigwa?

Jesu kunyina naakali kuyiisya kuti Leza uyakubasubula calunya basizibi kukabe kutamani. Muciindi caboobo, Jesu wakaamba kuti: “Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Johane 3:16) Nkaambo nzi Jesu ncaakaambila kuti aabo batamusyomi baya kufwa? Ikuti naa wakali kupandulula kuti bantu bali boobu banoopona kukabe kutamani, kabapenga mumulilo wahelo, sena naatakaamba oobo?

Injiisyo yakuti mulilo wahelo mbusena bwakupenzyelwa tiizwi mu Bbaibbele. Muciindi caboobo, eeyi ninjiisyo yabantu batakombi Leza, njobayiisya mbuli kuti nja Bunakristo. (Amubone kabbokesi kakuti “Mboyakatalika Njiisyo Yamulilo Wahelo,” apeeji 6.) Leza tasubuli bantu mumulilo wahelo uutamani. Ino mbuti ikuzyiba bwini kujatikizya mulilo wahelo mbokukonzya kumugwasya?

Kabbokesi kali apeeji 6]

MBOYAKATALIKA NJIISYO YAMULILO WAHELO

YAKATALISYIGWA ABANTU BATAKOMBI LEZA: Bana Egepita bansiku bakali kusyoma kuti kuli mulilo wahelo. Ibbuku lyakuti The Book Ȧm-Ṭuat, lyakalembwa mu 1375 B.C.E, lyaamba kujatikizya bantu ‘baya kuwaalwa mumulilo wamabanga-banga alimwi akuti kunyina nobaya kucikonzya kuzwa naa kuccija mumulilo ooyo.’ Syaabusongo mu Giliki, Plutarch, (wakuma 46-120 C.E.) wakalemba boobu kujatikizya bafwu: “[Bakali] koomoka nobakali kupenzyegwa citaambiki alimwi akusampaulwa.”

NJIISYO YAMULILO WAHELO MBOYAKASIKA MUBUKOMBI BWABA JUDA: Sikwiiya makani ansiku, Josephus (37 C. E kusikila kuma 100 C.E.) wakaluula kuti ba Essene, kabunga kabukombi bwaba Juda, bakali kusyoma kuti “bantu tabafwidilili pe.” Wakayungizya kuti: “Ooyu muzeezo ulikozyenye awaba Giliki . . . Bayeeya kuti bantu babi nobafwa bajalilwa mubusena bwamudima uusiya mbi alimwi akuti balapenzyegwa lyoonse.”

INJIISYO YAMULILO WAHELO MBOYAKASIKA MUBUKOMBI BWA “BUNAKRISTO”: Mumwaanda wamyaka wabili C.E., ibbuku lijisi makani aakuyeeyela buyo litegwa Apocalypse of Peter lyakaamba boobo kujatikizya basizibi: “Baya kuwaalwa muzyiba lyamulilo uutazimi.” Alimwi lyakaamba kuti: “Ezrael, imungelo mukali, ulabweza baalumi abamakaintu ibayaka mulilo kumane ulabasowela mubusena busiya mbi ikuli mungelo mukali kutegwa abasubule.” Aciindi nciconya eeci, imulembi Theophilus waku Antioke wakazubulula majwi aamusinsimi mukaintu Sibyl muna Giliki iwakasinsima cisubulo cabasizibi. Wakati: “Muna kupya mulilo uuvwilima lyoonse.” Aaya ngamajwi aamwi ngaakaamba Theophilus kuti “ngabwini, alabeleka, aliluleme alimwi alaampindu kubantu boonse.”

MULILO WAHELO CAKALI CILITAMINIZYO CAKUCITILA MICITO YALUNYA LYANSIKU: Mary l, mwami mukaintu waku England (1553-1558), iwakaumpa bama Protestanti batandila ku 300 acisamu, kwategwa wakaamba kuti: “Mbokunga Leza uyakubasubula bazangi kwiinda mukubaumpa mumulilo kukabe kutamani, nkokuti andime ndilakonzya kubasubula kwiinda mukubaumpa anyika.”

BUPANDULUZI BWAINO-INO: Mumyaka misyoonto yainda, basizikombelo bamwi bakacinca nzyobayiisya kujatikizya mulilo wahelo. Mucikozyanyo, mu 1995 imbunga yakuti The Doctrine Commission of the Church of England yakaamba kuti: “Helo tabuli busena bwakupenzyelwa kutamani, pele caamba kuzangila Leza cakumaninina alimwi mamanino nkufwida limwi.”

Kabbokesi/[Cifwanikiso icili apeeji 7]

INO “ZIBA LYAMULILO” NINZI?

Lugwalo lwa Ciyubunuzyo 20:10 lwaamba kuti Diabolosi uyakusowelwa “muziba lyamulilo” alimwi “[uy]oopenzegwa isikati amasiku lyoonse lyoonse kukabe kutamani.” Ikuti naa Diabolosi uya kupenzyegwa kukabe kutamani, nkokuti Leza weelede kumuleka kuti kapona, pele Ibbaibbele lyaamba kuti Jesu ‘uyakumunyonyoona’. (Ba-Hebrayo 2:14, BT) Iziba lyamulilo lyacikozyanyo liiminina “lufu lwabili.” (Ciyubunuzyo 21:8) Oolu taluli lufwu lwakasaanguna kwaambwa mu Bbaibbele—lufwu luboola akaambo kacibi ca Adamu—ilufwu lwakuti muntu ulakonzya kubusyigwa. (1 Ba-Korinto 15:21, 22) Mbwaanga Ibbaibbele talyaambi kuti “ziba lyamulilo” liya kugusya bafwu bali muli ndilyo, nkokuti “lufu lwabili” lwiiminina lufwu lumbi, bantu mobatakonzyi kubusyigwa.

Muunzila nzi aabo bali “muziba lyamulilo” mobapenzyegwa lyoonse? Zimwi ziindi, ‘ikupenzya’ inga caamba “kujalila” muntu naa kumukasya kucita cintu cimwi. Aciindi cimwi Jesu naakaswaangana abantu banjidwe madaimona, madaimona akoongolola kuti: “Sa weza kuti utupenzye [utujalile mumulindi uutagoli] ciindi kacitana kusika?” (Matayo 8:29; Luka 8:30, 31) Aboobo, boonse aabo bali muziba lyamulilo baya ‘kupenga’ akaambo kuti baya kukasyigwa kucita cintu cili coonse kukabe kutamani. Munzila iimwi bayakufwa “lufu lwabili” kakunyina kubusyigwa alimwi.