“Kamuya Mukayiisye Bantu Bazisi Zyoonse Kuti Babe Basikwiiya”

1, 2. Ino mibuzyo nzi iiboola akaambo kamajwi ngaakaamba Jesu mulugwalo lwa Matayo 24:14?

JESU wakasinsima kuti kumazuba aakumamanino, makani mabotu aa Bwami ayookambaukwa kubantu boonse. (Matayo 24:14) Mbotuli Bakamboni ba Jehova, tulizyidwe nyika yoonse akaambo kamulimo wesu wakukambauka. Bantu bamwi balauyanda mulumbe ngotukambauka, kakuli bambi tabauyandi pe. Pele nobaba bamwi akati kabaabo ibatauyandi mulumbe wesu balatulemeka akaambo kamulimo wesu. Twaamba kuti ndendiswe tucita mulimo Jesu ngwaakasinsima. Sena tulijisi twaambo ncotwaambila boobo? Mbuti mbotukonzya kuba masimpe kuti mulimo wesu wakukambauka ngomulimo Jesu ngwaakasinsima?

² Bantu muzikombelo zinji balitaminina kuti bakambauka mulumbe wa Jesu. Pele kukambauka kwabo kugolela buyo amilumbe njobakambauka mucikombelo, a TV, aa Intaneti, naa ambweni kwaambila buyo bantu mbobakaiya kujatikizya Jesu. Ibamwi balimvwa kuti kugwasya bantu bapengede naa kucita milimo yakugwasya bantu njobacita ciindi nobabeleka kabali bamadokotela, bamanesi, naa bamayi nenzila yabo yakukambauka. Pele sena milimo eeyi ngomulimo wakukambauka Jesu ngwaakaamba?

3. Kweelana alugwalo lwa Matayo 28:19, ino nzintu nzi zyone nzyobeelede kucita basikutobela Jesu?

³ Sena Jesu wakali kuyanda kuti basikwiiya bakwe kabalindila bantu kuti bababoolele? Peepe! Naakabusyigwa, Jesu wakaambila nkamu yabasikumutobela kuti: “Kamuya mukayiisye bantu bazisi zyoonse kuti babe basikwiiya, akubabbapatizya . . . , mukabayiisye kutobela zintu zyoonse nzyondakamulailila.” (Matayo 28:19, 20) Aboobo mbotuli basikutobela Jesu, tweelede kucita zintu zyone. Tweelede kubagwasya bantu kuba basikwiiya, kubabbapatizya, alimwi akubayiisya. Pele cakusaanguna, tweelede kubaunkila bantu. Sikwiiya zyamu Bbaibbele umwi upandulula kuti: “Ibbala lyakuti ‘kamuya’ litondezya mulimo ngwapedwe musyomi umwi aumwi wakubaunkila bantu nkobajanika, kufwumbwa naa bali afwaafwi naa kulamfwu.”—Matayo 10:7; Luka 10:3.

4. Ncinzi cijatikizyidwe mukuba “bazubi babantu”?

⁴ Ncinzi Jesu ncaakali kulangila kuli basikwiiya bakwe? Sena wakali kuyanda kuti kabakambauka aumwi mbuli mbwayanda, naa wakali kuyanda kuti kabali nkamu iikamantene? Mbwaanga tiicakali kukonzyeka kumuntu omwe kukambaukila bantu “bazisi zyoonse,” basikwiiya bakwe bakeelede kukamantana kabali nkamu. Eeci ncencico Jesu ncaakali kupandulula ciindi naakabatamba basikwiiya bakwe kuti babe “bazubi babantu.” (Amubale Matayo 4:18-22.) Jesu tanaakali kwaamba muzubi omwe uubelesya kalobyo kakwe acoongelezyo, kalindila nswi kuti iboole akulya. Muciindi caboobo, ikuzuba Jesu nkwaakali kwaamba kujatikizya kubelesya nsabwe. Kuzuba kuli boobu kuyanda kubeleka canguzu, kuzyeendelezya kabotu zintu, alimwi abantu banji kubelekela antoomwe.—Luka 5:1-11.

5. Mibuzyo nzi yone iyeelede kwiingulwa, alimwi nkaambo nzi?

⁵ Kutegwa tubazyibe aabo ibakambauka makani mabotu mazuba aano, tweelede kwiingula mibuzyo eeyi yone:

• Ino mulumbe nzi basikutobela Jesu ngobeelede kukambauka?

• Ino beelede kuba amakanze nzi?

• Ninzila nzi nzyobeelede kubelesya?

• Ino mulimo ooyu weelede kusakana kusikila kuli, alimwi weelede kuzumanana kwaciindi cilamfwu buti?

Bwiinguzi kumibuzyo eeyi buyootugwasya kubazyiba aabo ibabeleka mulimo ooyu uufwutula maumi aabantu alimwi buyooyumya makanze eesu aakuzumanana kukambauka.—1 Timoteyo 4:16.

INO MULUMBE NZI IWEELEDE KUKAMBAUKWA?

6. Nkaambo nzi ncomukonzya kuba masimpe kuti Bakamboni ba Jehova bakambauka mulumbe weelede?

⁶ Amubale Luka 4:43. Jesu wakakambauka “makani mabotu aa Bwami,” alimwi uyanda kuti basikwiiya bakwe kabacita mbubwenya oobo. Ino ninkamu iili yabantu ibakambauka mulumbe ooyo kubantu boonse? Balikke Bakamboni ba Jehova! Nobaba bamwi akati kabaabo ibatusulide balazumina oobo. Mucikozyanyo, amubone mupaizi umwi wacikombelo mumisyinali iwakakkala muzisi zinji ziindene-indene ncaakaambila Kamboni wa Jehova umwi. Mucisi cimwi acimwi, mupaizi ooyu wakabuzya Bakamboni ba Jehova mulumbe ngobakali kukambauka. Mupaizi ooyu wakati: “Boonse mbafwubafwuba nkaambo bakapa bwiinguzi bukozyenye bwakuti: ‘Makani mabotu aa Bwami.’” Ncaakaamba mupaizi ooyu cisinizya buyo kuti tatuli bafwubafwuba pe, pele tulikamantene mbuli Banakristo bakasimpe. (1 Bakorinto 1:10) Alimwi Bwami bwa Leza ngomulumbe mupati wa Ngazi Yamulindizi Yaambilizya Bwami bwa Jehova. Magazini eeyi ilajanika mumyaambo iili 254 alimwi kulasimbwa makkopi aatandila ku 59,000,000 mwezi amwezi, calo cipa kuti ibe magazini iinda kumwaigwa nyika yoonse!

7. Ino tuzyi buti kuti basololi bazikombelo zya Bunakristo Bwanyika kunyina nobakambauka mulumbe iweelede?

⁷ Basololi bazikombelo zya Bunakristo Bwanyika tabakambauki kujatikizya Bwami bwa Leza. Ikuti naa baba acoolwe cakwaamba zya Bwami, bunji bwabo baamba kuti nkulimvwa muntu nkwaba aankuko mumoyo wakwe. (Luka 17:21) Kunyina nobayiisya bantu kuti Bwami nimfwulumende yakujulu iyeendelezyegwa a Jesu. Muciindi caboobo, kanji-kanji nciindi buyo ca Kkilisimasi naa Isita nobaamba kujatikizya Jesu. Kunyina nobapandulula kuti Bwami buyakwaamanizya mapenzi aabantu oonse alimwi akuti lino-lino buyo buyakugwisya bubi boonse munyika. (Ciyubunuzyo 19:11-21) Cilisalede kuti, basololi bazikombelo zya Bunakristo Bwanyika tabazyi ncayakucita Jesu kali Mwami wa Bwami bwa Leza. Kunze lyaboobo, akaambo kakuti tabaumvwisyi mulumbe wa Jesu, tabazyi ikaambo ncobeelede kukambauka.

INO TWEELEDE KUBA AMAKANZE NZI NOTUBELEKA MULIMO OOYU?

8. Ino makanze nzi aatali kabotu aakucitila mulimo wabukambausi?

⁸ Basikwiiya ba Jesu tabeelede kukambauka kutegwa bapange mali naa kuyaka mayake aayebeka kapati. Jesu wakati: “Mwakapegwa kakunyina kubbadelesyegwa, amupe kakunyina kubbadelesya.” (Matayo 10:8) Aboobo mulimo wakukambauka taweelede kuba makwebo pe. (2 Bakorinto 2:17, bupanduluzi buyungizyidwe) Basikwiiya ba Jesu tabeelede kulangila kubbadelwa akaambo kamulimo wabo wakukambauka. (Amubale Milimo 20:33-35.) Nokuba kuti malailile aa Jesu alisalede, zikombelo zinji zyanyonganizyigwa kwiinda mukubwezelela milumbo kutegwa zikombelo zyabo zitajalwi alimwi akubbadela basololi babo alimwi ababelesi babo bambi. Akaambo kaceeci, basololi banji ba Bunakristo Bwanyika bavwuba kapati.—Ciyubunuzyo 17:4, 5.

9. Mbuti Bakamboni ba Jehova mbobatondezya kuti batola lubazu mumulimo wakukambauka kabajisi makanze mabotu?

⁹ Sena Bakamboni ba Jehova balabwezelela mulumbo ku Maanda aabo aa Bwami naa kumiswaangano yacooko? Peepe! Mulimo wabo ulagwasyilizyigwa kwiinda muzyakusanga zyakuliyandila. (2 Bakorinto 9:7) Nokuba boobo, Bakamboni ba Jehova bakabeleka mawoola aatandila kumabbiliyoni obilo kabakambauka makani mabotu alimwi akusololela ziiyo zya Bbaibbele ziinda ku 9 miliyoni mwezi amwezi. Tabavwoli akaambo kamulimo wabo wakukambauka pele balalisungula kubelesya mali aabo kucita mulimo ooyu. Sikuvwuntauzya umwi wakaamba boobu kujatikizya mulimo wa Bakamboni ba Jehova: “Makanze aabo mapati ngakukambauka alimwi akuyiisya.” Alimwi wakaamba kuti Bakamboni ba Jehova tabajisi kakamu kabasololi kavwozyegwa. Aboobo ikuti naa tatukambaukili kujana mali, ncinzi citupa kukambauka? Tulaucita cakulyaaba mulimo ooyu akaambo kakuti tulamuyanda Jehova alimwi tulabayanda bantu. Eeci cizuzikizya businsimi bulembedwe kulugwalo lwa Intembauzyo 110:3. (Amubale.)

INO NINZILA NZI IZYEELEDE KUBELESYEGWA?

10. Ino ninzila nzi Jesu alimwi abasikwiiya bakwe nzyobakabelesya kukambauka?

¹⁰ Ino ninzila nzi Jesu alimwi abasikwiiya bakwe nzyobakabelesya kutegwa bakambauke? Bakali kuunka kufwumbwa nkobakali kukonzya kujana bantu. Mucikozyanyo, bakali kukambauka munzila alimwi amumamaaketi. Alimwi bakali kubaunkila bantu mumaanda aabo. (Matayo 10:11; Luka 8:1; Milimo 5:42; 20:20) Kukambauka kuŋanda aŋanda bwakali bubambe bubotu bwakukambaukila bantu baindene-indene.

11, 12. Caboola kumakani aakukambauka makani mabotu, nkwiindana nzi kuliko akati ka Bunakristo Bwanyika alimwi abantu ba Jehova?

¹¹ Sena zikombelo zya Bunakristo Bwanyika zilakambauka makani mabotu mbubwenya mbwaakacita Jesu? Kanji-kanji, basololi bazikombelo aaba ibavwozyegwa mali bapa buyo mulumbe wabo kuli basikubatobela mucikombelo. Beendelezi aaba kunyina nobagwasya bantu kuba basikwiiya bapya pele basolekesya buyo kukwabilila basicikombelo mbobajisi kale. Ziindi zimwi, bali kusoleka kukulwaizya bantu babo kukambauka. Mucikozyanyo, mumwaka wa 2001, Paapa John Paul II wakalemba mulugwalo kuti basicikombelo beelede kukambauka Makani Mabotu akuba basungu mbubwenya mbuli mwaapostolo Paulo iwakaamba kuti: “Maawe kulindime ikuti naa kanditaambilizyi makani mabotu!” Mpoonya paapa wakaamba kuti mulimo wakukambauka ooyu taweelede kucitwa buyo abantu basyoonto bayiisyidwe pele abasicikombelo boonse. Nokuba boobo, mbasyoonto buyo ibali kutobela kukulwaizyigwa ooko.

¹² Ino mbuti kujatikizya Bakamboni ba Jehova? Mbambabo balikke ibakambauka kuti Jesu wali kulela kali Mwami kuzwa mu 1914. Balamumvwida Jesu alimwi mulimo wakukambauka ngomulimo mupati mubuumi bwabo. (Marko 13:10) Ibbuku lyakuti Pillars of Faith—American Congregations and Their Partners lyakaamba kuti kuli Bakamboni ba Jehova, mulimo wakukambauka mulimo uuyandika kapati. Alimwi wakaamba kuti ciindi nobajana bantu ibafwide nzala, balendeledwe, alimwi ibaciswa, balasoleka kubagwasya, pele tabalubi pe kuti imbaakani yabo njakukambauka kujatikizya mamanino aanyika eeyi alimwi akuyiisya bantu makani aalufwutuko. Bakamboni ba Jehova bazumanana kukambauka mulumbe ooyu alimwi akwiiya nzila zyakukambauka zya Jesu abasikwiiya bakwe.

INO WEELEDE KUSAKANA KUSIKA AALI MULIMO, ALIMWI INO WEELEDE KUTOLA CIINDI CILAMFWU BUTI?

13. Ino mulimo wakukambauka weelede kusakana kusika aali?

¹³ Jesu wakaamba kuti basikumutobela bayookambauka alimwi akuyiisya makani mabotu “munyika yoonse.” Bakalaililwa kugwasya bantu “bazisi zyoonse” kuba basikwiiya. (Matayo 24:14; 28:19, 20) Eeci caamba kuti makani mabotu akaleelede kukambaukwa nyika yoonse.

14, 15. Ncinzi cisinizya kuti Bakamboni ba Jehova babuzuzikizya businsimi bwa Jesu kujatikizya mbowasakana mulimo wakukambauka? (Amubone zifwanikiso izili kumatalikilo aacibalo.)

¹⁴ Balikke Bakamboni ba Jehova mbabazuzikizya businsimi bwa Jesu bwakuti makani mabotu ayelede kukambaukwa nyika yoonse. Nkaambo nzi ncotwaambila boobo? Mucisi ca United States, kuli basololi bazikombelo mu Bunakristo Bwanyika batandila ku 600,000, kakuli kuli Bakamboni ba Jehova basika ku 1,200,000 ibakambauka makani mabotu mucisi eeco. Munyika yoonse, kuli bapaizi ba Katolika batandila ku 400,000, pele kuli Bakamboni ba Jehova ibainda ku 8 miliyoni ibakambauka makani mabotu mumasi aali 240. Cilisalede kuti, Bakamboni ba Jehova balakambauka makani mabotu munyika yoonse, calo icileta bulemu alimwi akupa kuti Jehova atembaulwe!—Intembauzyo 34:1; 51:15.

¹⁵ Mbotuli Bakamboni ba Jehova, mbaakani yesu njakukambauka makani mabotu kubantu banji kusikila mpotugolela mamanino kaatanasika. Kutegwa tuubeleka mulimo ooyu, twasandulula akumwaya mabbuku manji, mamagazini, matulakiti, alimwi atupepa twakutamba bantu kumuswaangano wacooko aku Ciibalusyo mumyaambo iinda ku 700. Tulabapa bantu zyoonse eezyi kakunyina kubbadelesya. Mwaka wamana, twakamwaya mabbuku aabandika Bbaibbele aasika ku 4.5 bbiliyoni. Alimwi twakamwaya makkopi aa Bbaibbele lya Busanduluzi Bwanyika Mpya aayinda ku 200 miliyoni mumyaambo iinda ku 130. Awebbusaiti yesu, makani aaindene-indene alajanika mumyaambo iinda ku 750. Balikke Bakamboni ba Jehova mbabacita mulimo ooyu uugambya kapati.

16. Ino tuzyi buti kuti Bakamboni ba Jehova balijisi muuya wa Leza?

¹⁶ Ino mulimo wakukambauka uyoozumanana kusikila lili? Jesu wakaamba kuti makani mabotu ayookambaukwa kusikila mamanino akaboole. Mbotuli Bakamboni ba Jehova, twacikonzya kuliyumya mumulimo wakukambauka mumazuba oonse aaya aamamanino akaambo buyo kakuti tujisi muuya uusalala wa Jehova. (Milimo 1:8; 1 Petro 4:14) Basizikombelo bamwi balakonzya kwaamba kuti: “Tulijisi muuya uusalala.” Pele sena inga bacikonzya kucita mulimo Bakamboni ba Jehova ngobacita mumazuba aaya aamamanino? Tukamu tumwi twali kusola kukambauka mbubwenya mbotucita swebo, pele twaalilwa. Bamwi balilisungwide kukambauka, pele kalitanalampa balacileka. Kakuli bamwi balakonzya kukambauka kuŋanda aŋanda, pele tabakambauki makani mabotu aa Bwami. Aboobo tabakonzyi kucita mulimo ooyo Jesu ngwaakatalisya.

INO MBAANI MUBWINI IBAKAMBAUKA MAKANI MABOTU MAZUBA AANO?

17, 18. (a) Nkaambo nzi ncotukonzya kusinizya kuti Bakamboni ba Jehova mbambabo ibakambauka makani mabotu aa Bwami mazuba aano? (b) Ino tucikonzya buti kuzumanana mumulimo ooyu?

¹⁷ Aboobo ino mbaani ibakambauka makani mabotu aa Bwami mazuba aano? Balikke Bakamboni ba Jehova! Ino tuzyi buti oobo? Akaambo kakuti tukambauka mulumbe iweelede, nkokuti makani mabotu aa Bwami. Tuyandaula bantu mumulimo wesu wakukambauka, aboobo tubelesya nzila zyeelede. Tujisi makanze mabotu aatupa kukambauka, makanze aaya ngakuti, tulamuyanda Jehova alimwi tulabayanda bantu. Mulimo wesu wakukambauka ulisakene kapati, akaambo kakuti tukambaukila bantu bamuzisi zyoonse alimwi amyaambo yoonse. Alimwi tuyoozumanana kukambauka makani mabotu aa Bwami kusikila mamanino akaboole!

¹⁸ Masimpe cilagambya kubona mulimo uutaliboteli bantu ba Jehova ngobacita iwakukambauka makani mabotu mumazuba aano aamamanino. Pele ino tucikonzya buti kucita mulimo ooyu? Mwaapostolo Paulo upandulula kuti: “Leza ngonguwe uumupa nguzu, uumupa kuti kamukanza alimwi anguzu zyakucita zintu akaambo kaceeco cimubotela walo.” (Bafilipi 2:13) Jehova aazumanane kutupa nguzu ziyandika kutegwa tuzumanane kukambauka makani mabotu kusikila mpotugolela!—2 Timoteyo 4:5.