Mibuzyo Yabasikubala
Zimwi ziindi tulamvwa bakwesu kabaamba naa kabapaila kuti Bwami bwa Leza buboole ansi ano. Sena majwi aaya aliluzi?
Ikwaamba bwini-bwini, eeyi tiili nzila yakwaamba iyeendelana a Magwalo pe. Ibwami bwa Leza mbwakujulu. Aboobo, mwaapostolo Paulo wakali kukonzya kulemba kuti: “Mwami ulandivuna kububi boonse, ulandipa lufutuko mubwami bwakwe bwakujulu. Kulinguwe kube bulemu lyoonse alyoonse kukabe kutamani. Ameni.”—2 Timoteo 4:18; Matayo 13:44; 1 Ba-Korinto 15:50.
Ibwami bwakakkazikwa kujulu mu 1914, alimwi taakwe nobuyoolonzegwa kuletwa anyika iibambulwidwe kuba Paradaiso naa kubusena bumbi pe. Jesu Kristo ngo Mwami wa Bwami obo. Mbwali ngo Mwami, Jesu ulaanguzu izyakweendelezya abangelo. Aboobo ibusena nkweelede kunoolelela nkuululyo lwa Leza kujulu. Banakristo bananike balaswaangana anguwe mukuba bami abapaizi kujulu.—Ba-Efeso 1:19-21; Ciyubunuzyo 5:9, 10; 20:6.
Sena ino eci caamba kuti tatweelede kunoomwaambila Leza inkombelezyo iijanika mucibeela cimwi ca Mupailo wa Mwami icaamba kuti: “Abuze Bwami bwako, alucitwe luyando lwako, ansi ano mbubonya mbuli kujulu”? (Matayo 6:10) Peepe, imupailo oyu uliluzi alimwi ucibeleka kapati.
Ibwami bwa Leza buciyootola ntaamu zipati zijatikizya nyika eyi, eelyo ncenciceeci ncotuli mukwaamba ciindi notupaila kubelesya majwi aakozyenye ayaayo aa Mupailo wa Mwami. Mucikozyanyo Daniele 2:44 yaambilizya kuti Bwami ‘buyooboola’ kuzoonyonyoona zisi zyoonse akuzyaatula abulelo bwanyika eyi. Ciyubunuzyo 21:2 caamba zya Jerusalemu Mupya kaboola ansi kuzwa kujulu. Jerusalemu Mupya nciinga cabali 144,000 Banakristo bananike ibayooba nabwiinga wa Kristo. Alimwi mbaasikukona limwi a Jesu mu Bwami. Aboobo Ciyubunuzyo 21:2 nciyaamba nkuti baya kwiicebuka nyika munzila iiyooletela bantunsi basyomeka izilongezyo zinji.—Ciyubunuzyo 21:3, 4.
Kusikila bukazuzikizigwe businsimi obu alimwi abumbi, ciyoozumanana kuba cintu ciluzi ikupaila kuli Jehova Leza cakweendelana amajwi aa Jesu aakuti, “Abuze Bwami bwako.” Pesi tweelede katuyeeyede ikuti Bwami tabukabooli buya pe Ansi munzila ini-ini. Imfwulumende ya Bwami njakujulu, kutali ansi pe.
[Nkotwakajana cifwanikiso icili apeeji 31]
Inyika: yakayiigwa afoto ya NASA