Amulubambe Lukamantano Mumazuba aya Aamamanino
“Buumi bwanu mbumweendela bubote bwakweelela Makani Mabotu . . . muliimvwi nji camoyo omwe akulwida lusyomo lwa-Makani Mabotu nyoonse mbuli muntu omwe.”—BA-FILIPI 1:27.
1. Nkwiindana nzi kuliko akati ka Bakamboni ba Jehova alimwi anyika eyi?
AAYA “[nga]mazuba aakumamanino.” Cakutadooneka, nkozili lino “ziindi zikataazya.” (2 Timoteo 3:1-5) Ookuno “kumamanino aaciindi,” kwalo kuli manyongwe manji mubuleya, Bakamboni ba Jehova balalibonya kapati kwiindana abambi akaambo kaluumuno lwabo alukamantano. (Daniele 12:4) Pesi umwi aumwi wabanamukwasyi wabakombi ba Jehova nyika yoonse mbwiizulwa uyandika kuti abelekesye kubamba lukamantano olu.
2. Ncinzi ncaakaamba Paulo kujatikizya kubambilila lukamantano, alimwi mubuzyo nzi ngotutilange?
2 Mwaapostolo Paulo ulabakulwaizya Banakristonyina kuti babambe lukamatano. Wakalemba kuti: “Buumi bwanu mbumweendela bubote bwakweelela Makani Mabotu aa-Kristo, lino nanka ndeza kumubona nanka nintabiwo ndaswiilila buyo makani aanu, nzooziba kuti muliimvwi nji camoyo omwe akulwida lusyomo lwa-Makani Mabotu nyoonse mbuli muntu omwe. Mutabayoowi nikuba buniini basinkondonyokwe. Kutayoowa kwanu ncicilaizyo kulimbabo cakunyonyooka, pele kulindinywe ncicilaizyo calufutuko lwanu luzwa kwa-Leza.” (Ba-Filipi 1:27, 28) Majwi aa Paulo alatondezya kabotu-kabotu kuti tweelede kubelekelaamwi mbotuli Banakristo. Aboobo, ncinzi cinga catugwasya ikubamba lukamantano lwa Bunakristo muziindi eezi zikatazya?
Amulimbombye Kukuyanda kwa Leza
3. Ndilili alimwi mbuti Bamasi bamumwaanda wamyaka wakusaanguna mbobakaba basikutobela Kristo?
3 Inzila yomwe yakubamba lukamantano njakulibombya kukuyanda kwa Leza ciindi coonse. Eeci cilakonzya kuba cintu ciyanda kuti tukubambulule kuyeeya kwesu. Amuyeeye basiciiya ba Jesu Kristo bakusaanguna bama Juda. Ciindi mwaapostolo Petro naakakambaukila Bamasi batapalwidwe mu 36 C.E., Leza wakabatilila muuya uusalala aba bantu bamasi, alimwi bakabbapatizigwa. (Incito caandaano ca 10) Kusikila ceeco ciindi, ibalo-balo bama Juda, abasikusandulwa kubukombi bwaci Juda, alimwi abana Samariya, mbabakabede basiciiya ba Jesu Kristo.—Incito 8:4-8, 26-38.
4. Naakamana kupandulula cakacitika kujatikizya Korneliyo, ncinzi Petro ncaakaamba, alimwi musunko nzi eci ngucakaletela basiciiya ba Jesu bama Juda?
4 Ciindi baapostolo abambi babunyina mu Jerusalemu nobakamvwa zyakusanduka kwa Korneliyo alimwi a Bamasi bambi, bakayandisya kulwiidwa a Petro. Naakamana kupandulula cakacitikide kujatikizya Korneliyo alimwi abambi basyomi Bamasi, mwaapostolo wakaamanizya makani amajwi aakuti: “Eno anooli Leza uwakabapa [bamasi] cipegwa eco nciconya ncaakatupa aswebo [toma Juda] notwakasyoma ku-Mwami Jesu Kristo, ino obo ndimeni mebo kuti ndikazye Leza?” (Incito 11:1-17) Eeci cakabaletela musunko basikutobela Jesu Kristo bana Juda. Sena bayoolibombya kukuyanda kwa Leza akuzumina basyomi Bamasi kuti babe bakombinyina? Naa luumuno lwababelesi ba Jehova baansi lwakali muntenda?
5. Mbuti baapostolo alimwi ababunyina bambi mbobakakatambula kaambo kakuti Leza wakabazumizya abalo Bamasi kweempwa, alimwi ncinzi ncotunga twaiya kuciimo eci?
5 Makani ayo aamba kuti: “Nobakamvwa obo [baapostolo alimwi abamwi babunyina] bakaumuna, balemeka Leza bati, Abalo bamasi Leza wabapa kusanduka kuti bapone.” (Incito 11:18) Eeco ciimo cakatabilila akuleta luumuno kuli basikutobela Jesu. Mukaindi kasyoonto buyo, imulimo wakukambauka wakayaambele akati ka Bamasi naa baanze, alimwi Jehova wakiilongezya milimo ili boobo. Aswebo lwesu tweelede kuzumina buyo cakaumuumu ciindi notulombwa kuti tugwasye mukubamba kwambungano zimbi naa ciindi nokubambululwa lumwi lubazu lwateokrasi kwiinda mubusolozi bwa Leza bwamuuya uusalala. Lugwasyo lwesu lwamoyo woonse luyoomukkomanisya Jehova alimwi kuyootugwasya kubambilila lukamantano mumazuba aya aakumamanino.
Amukakatile Kukasimpe
6. Ino kasimpe kalujatikizya buti lukamantano lwabakombi ba Jehova?
6 Mbotuli bamukwasyi wa Jehova iwabakombi, tulabambilila lukamantano nkaambo toonse “[tula]iisigwa Leza.” (Johane 6:45; Intembauzyo 43:3) Mbokunga kuyiisya kwesu kuyeeme a Jwi lya Leza, toonse tulaamba cintu comwe. Cakukondwa tulatambula cakulya cakumuuya ncotuletelwa a Jehova kwiinda “[mu]muzike musyomesi uucenjede.” (Matayo 24:45-47) Kuyiisya ooku kweendelene kulagwasya kubambilila lukamantano nyika yoonse mbwiizulwa.
7. Kuti swebo lwesu catuyumina kuteelela kaambo kamwi, ncinzi ncotweelede kucita, alimwi ncinzi ncotuteelede kucita?
7 Ino kuti swebo lwesu catuyumina kuteelela naa kuzumina kaambo kamwi? Tweelede kupailila busongo akutalika kuvwentauzya mu Magwalo alimwi amumalembe aa Bunakristo. (Tusimpi 2:4, 5; Jakobo 1:5-8) Akwalo kubandika amwaalu kulakonzya kugwasya. Kuti kaambo aako kakatanasalala, inga cainda kugwasya ikukabika-bika ambali. Ambweni kuyoomwaigwa luzibo lumbi akaambo ako, elyo kuteelela kwesu kuyooyungizigwa. Pesi inga kwaba kulubizya ikusola kuzula bambi mumbungano kuti bazumine muzeezo wesu walo wiindene. Ooku inga kwaba kusyanga lupyopyongano, kutali kubelekela lukamantano. Inga cainda kubota “[kw]eenda mulusinizyo” akukulwaizya bambi kucita mbubonya!—3 Johane 4.
8. Nciimo nzi ceelede kubaaco kujatikizya kasimpe?
8 Mumwaanda wamyaka wakusaanguna, Paulo wakaamba kuti: “Makani ngetubona sunu ali mbuli zintu zyamuciboniboni, ali mbuli kalabi, pele kuciindi ciboola tuzoobonana meso kumeso. Luzibo ndunjisi sunu nduce-luce buyo, pele kuciindi eco nzoobisisya mbubonya mbundazibwa.” (1 Ba-Korinto 13:12) Nokuba kuti Banakristo bakusaanguna teebakamaninizya kuteelela, bakazumanana kukamantana. Lino tulainda kule-kule alimbabo kuteelela makanze aa Jehova alimwi a Jwi lyakasimpe. Aboobo atube bantu balumba kasimpe nkotutambwide kwiinda ‘mumuzike musyomesi.’ Alimwi atube bantu balumba kuti Jehova watusolweda kwiinda mumbunga yakwe. Nokuba kuti lyoonse teetwatene antoomwe muluzibo, tatukwe notwafwide nzala naa nyota yakumuuya. Pele, Mweembezi wesu Jehova, watupa kuzumanana mulukamantano alimwi watubamba kabotu loko.—Intembauzyo 23:1-3.
Mulaka Amuubelesye Mbuweelede!
9. Mbuti mulaka mbuunga wabelesyegwa kuleta lukamantano?
9 Ikubelesya mulaka kukulwaizya bambi ninzila mpati yakuleta lukamantano alimwi amuuya wabunyina. Ilugwalo lwakasalazya kaambo kakupalulwa, olo lwakatumwa akabunga keendelezya kamumwaanda wamyaka wakusaanguna, lwakali kukulwaizya. Nobakamana kulubala, basiciiya Bamasi baku Antiokeya “bakabotelwa kukulaililwa oko.” Judase a Sila, balo bakatumidwe kuzwa ku Jerusalemu alugwalo olo, “bakalaya babunyina majwi manjimanji, babayumya.” Cakutadooneka ikubako kwaba Paulo a Barnaba akwalo kwakabakulwaizya akubayumya-yumya basyominyina baku Antiokeya. (Incito 15:1-3, 23-32) Tulakonzya kucita cintu cikozyenye loko aceeci ciindi notubungana kumiswaangano ya Bunakristo ‘akubusyanya-busyanya’ kwiinda mukubako alimwi akwiingula munzila iigwasya.—Ba-Hebrayo 10:24, 25.
10. Kutegwa lutabililwe lukamantano, ncinzi cinga cayandika kucita kuti kwaba kutukila?
10 Nokuba boobo ikutaubelesya kabotu mulaka kulalangilwa kunyonganya lukamantano lwesu. “Lulimi ncizo ciniini buyo, pele lulalilumbaizya kumakani mapati,” mbwaakalemba Jakobo. “Amubone kalilo kaniini mbukaumpa cisaka cipati!” (Jakobo 3:5) Jehova ulibasulide aabo baleta kukwelana. (Tusimpi 6:16-19) Kwaambaula kuli boobu kulakonzya kuleta lupyopyongano. Aboobo, ino kuti kwaba kutukila, naa twaambe kuti kwaba uusampaula umwi naa kumwaambila majwi aakutukila? Ibaalu bayoosola kugwasya sikulubizya oyo. Pele simatusi uuteempwi weelede kugwisyigwa mumbungano kutegwa luumuno lwambungano, bulondo alimwi alukamantano lubambwe. Kayi Paulo wakalemba kuti: “Kuti kuli muntu naba umwi uuambwa kuti sibunyina bwa-Kristo, pele uli . . . simatusi . . . , mutavwelani ayooyo pe nikuba kulya awe.”—1 Ba-Korinto 5:11.
11. Nkaambo nzi kulibombya ncecili cintu cipati kuti naa twaamba cimwi cintu caleta kutalangana kabotu akati kandiswe amusyomima umwi?
11 Ikweendelezya mulaka kulagwasya kubamba luumuno. (Jakobo 3:10-18) Pele ino kuti cimwi cintu ncotwaamba caleta kutalangana kabotu akati kesu a Munakristoma. Sena inga tacikoogwasya kuti twalitalikila tobeni swebo ikusola kupilusya luumuno lwesu amukwesu oyo, kusika mane akukulilekelela naa twayandika kucita boobo? (Matayo 5:23, 24) Masimpe, eci ncintu ciyanda bubombe, naa kulifwiinsya, pesi Petro wakalemba kuti: “Amusame myoyo mitete akugwasyanya, nkaambo Leza ulabakazya basikulisumpula, pele batete-myoyo ulabapa luzyalo.” (1 Petro 5:5) Kulibombya kuyootupa ‘kutobela luumuno’ abakwesu, ikuzumina notulubizya akulilekelela mbuli mbokweelede. Eeci cilagwasya ikubamba lukamantano lwamukwasyi wa Jehova.—1 Petro 3:10, 11.
12. Mbuti mbotunga twabelesya mulaka kuleta alimwi akutabilila lukamantano lwabantu ba Jehova?
12 Tulakonzya kuusumpula muuya wamukwasyi akati kabaabo bali mumbunga ya Jehova kuti twaubelesya buluzi mulaka wesu. Mbokunga oobo Paulo mbwaakacita, wakali kukonzya kuyeezya bana Tesalonika kuti: “Mulizi kuti twakamucitila umwi aumwi mbuli wisi mbwacitila bana bakwe. Twakali kumukombelezya akumusenengezya akumulungulwida, kuti mweende munzila iielede kumeso aa-Leza.” (1 Ba-Tesalonika 2:11, 12) Mbwaakamanide kupa citondezyo cibotu mukaambo aka, Paulo wakali kukonzya kukulwaizya Banakristonyina kuti “mubaumbulizye batyompedwe mumyoyo.” (1 Ba-Tesalonika 5:14) Amuyeeye buyo bubotu mbotunga twaleta kwiinda mukuumbulizya, kukulwaizya, alimwi akuyakilila bamwi. Ee, “ijwi liambwa kuciindi ceelede lyabota loko.” (Tusimpi 15:23) Kunze lyaboobo, kwaambaula kwamusyobo oyo kulagwasya kuleta akubamba lukamantano lwabantu ba Jehova.
Kamulekelela!
13. Nkaambo nzi ncotweelede kulekelela?
13 Ikulekelela sikutubisizya iwalilekelela ncintu citasyaali pe mukubamba lukamantano lwa Bunakristo. Ino nziindi zyongaye notweelede kulekelela? Jesu wakaambila Petro kuti: “Nsikwaambili kusikila kuziindi zili 7 pele kusikila kuziindi zili 70 x 7.” (Matayo 18:22) Kuti katutalekeleli, twiide kulipenzya buyo tobeni. Ibuti obo? Imfundiilili naa kubaa nkoto kuyootusinkilila kuliiba. Alimwi kuti twaba bantu bazizilwe bukali akutalekelela, tulakonzya kulibisizya tobeni. (Tusimpi 11:17) Ikubaa nkoto kulamucima Leza alimwi kulakonzya kunjizya muntu mukubisya kupati. (Levitiko 19:18) Amuyeeye kuti muzeezo wakukosola mutwe wa Johane Mubbapatizi wakali wa Herodiya, walo “wakalijisi inkoto kulinguwe.”—Marko 6:19-28.
14. (a) Ncinzi lugwalo lwa Matayo 6:14, 15 ncolutuyiisya kujatikizya kulekelela? (b) Sena lyoonse tweelede kulindila kuti muntu alilekelele notuya tumulekelele?
14 Mupailo wa Jesu wacitondezyo wakabikkilizya amajwi aaya aakuti: “Utujatile milandu yesu, nkaambo aswebo tulabajatila abali emilandu kulindiswe.” (Luka 11:4) Kuti katutalekeleli, tulalangilwa kuti bumwi buzuba Jehova Leza uyooleka kutulekelela milandu yesu, kayi Jesu wakati: “Mwalekelela bantu milandu yabo, alakwe Usowanu uuli kujulu ulamulekelela anywe, pele mwatalekelela bantu milandu yabo, alakwe Usowanu takooyoomulekelela milandu yanu pe.” (Matayo 6:14, 15) Aboobo kuti katuyanda kuzuzikizya lubazu lwesu mukubamba lukamantano lwamukwasyi wabakombi ba Jehova, tunooli bantu balekelela, ndiza katuluba buyo notubisyilwa munzila iinga inooli njabuyamba buyo kakutakwe lusulo buya. Paulo wakaamba kuti: “Amukazikilane myoyo yanu akulekelelana, na umwi ulijisi kaambo kumweenzinyina. Mbuli Mwami mbwaakamulekelela milandu yanu, anywebo amucite mbubonya obo.” (Ba-Kolose 3:13) Ciindi notulekelela, tulagwasya kubamba lukamantano lubotu mumbunga ya Jehova.
Lukamantano Akulisalila
15. Ncinzi cigwasya bantu ba Jehova kutabilila lukamantano ciindi nobalisalila beni?
15 Leza wakatubamba katuli bantu baangulukide kusala cibi naa cibotu, ibalaa coolwe alimwi amukuli wakulisalila beni. (Deuteronomo 30:19, 20; Ba-Galatiya 6:5) Nokuba boobo, tulakonzya kubamba lukamantano lwesu akaambo kakutobela milawo anjiisyo zya Bbaibbele. Tulaziyeeya ciindi notulisalila tobeni. (Incito 5:29; 1 Johane 5:3) Ino kuti kwabuka mubuzyo wakutabaa lubazu mutwaambo twanyika. Tulakonzya kulisalila cakucita tobeni kweelana ambuli mbotuzi kwiinda mukuyeeya kuti ‘tatuli banyika’ akuti ‘twafwula mapanga esu aba maamba aakulimya.’ (Johane 17:16; Isaya 2:2-4) Munzila njiyonya, ciindi notuyandika kulisalila cimwi cintu tobeni icijatikizya Bulelo, tulayeeya ncolyaamba Bbaibbele kumakani aakupa “kuli-Leza zintu zya-Leza,” kakuli tulalibombya “[ku]beendelezi” muzintu zitali zyabukombi. (Luka 20:25; Ba-Roma 13:1-7; Tito 3:1, 2) Ee, ikuyeeya milawo alimwi anjiisyo zyamu Bbaibbele ciindi notulisalila tobeni kulagwasya kulubamba lukamantano lwesu lwa Bunakristo.
16. Mbuti mbotunga twagwasya kubamba lukamantano ciindi notusala muzintu Magwalo nzyaataambi kuti zililuzi naa zililubide? Amukozyanisye.
16 Tulakonzya kugwasya kubamba lukamantano lwa Bunakristo nociba ciindi notusala cimwi cintu citakwe makani alimwi Magwalo ncaataambi kuti naa cililuzi naa cililubide. Ibuti obo? Nkwiinda mukutondezya kuti tulabalanganya caluyando ibambi balo banga bajatikizigwa akusala kwesu. Mucikozyanyo, mumbungano yamu Korinto yansiku kwakabuka mubuzyo uujatikizya nyama yakapaizidwe kumituni. Aino Munakristo taakeelede kutola lubazu muziyanza zyakukomba mituni. Pele teecakali cinyonyoono pe ikulya nyama ili boobu yakagwisyidwe kabotu bulowa iyakasyeede akuulisyigwa mumisyika. (Incito 15:28, 29; 1 Ba-Korinto 10:25) Nokuba boobo, manjezeezya aa Banakristo bamwi akali kubapenzya kumakani aakulya nyama eyi. Aboobo Paulo wakakulwaizya Banakristo bamwi kuti batanoobalebyi. Atwaambe wakabalembela ategwa: “Kuti zilyo zilalebya mukwesu, nsikooyoolya limbi eyo nyama lyoonse, kuti entakalebyi mukwesu.” (1 Ba-Korinto 8:13) Aboobo nokuba kuti taakwe mulawo naa njiisyo ya Bbaibbele iijatikizidwe, inga cabota kuyeeya bambi notulisalila tobeni muzintu zinga zyajatikizya lukamantano lwamukwasyi wa Leza!
17. Ncinzi cinga cagwasya kucita ciindi notweelede kulisalila cakucita tobeni?
17 Kuti katutali masimpe aceelede kucitwa, cilagwasya ikusala munzila iinga yatusiila manjezeezya aasalala, alimwi bambi beelede kukulemeka kusala kwesu. (Ba-Roma 14:10-12) Aino ciindi notulisalila tobeni, tweelede kulomba busolozi bwa Jehova kwiinda mukupaila. Mbuli sintembauzyo, tulakonzya kupaila calusyomo kuti: “Cenjeka kutwi kwako, . . . Nkaambo nduwe mampangala aangu amacijilo aangu. Kondizulwida akundeenzya nkaambo kazina lyako.”—Intembauzyo 31:2, 3.
Lyoonse Kamulutabilila Lukamantano lwa Bunakristo
18. Mbuti Paulo mbwaakakozyanisya lukamantano lwamumbungano ya Bunakristo?
18 Ku 1 Ba-Korinto caandaano ca 12, Paulo wakabelesya cikozyanyo camubili wamuntu kupandulula lukamantano lwambungano ya Bunakristo. Wakaambisya kugwasyanya kwazizyo alimwi cimwi acimwi mbociyandika. “Zyoonse nizyaakuli cizo comwe buyo, ino niwaakuli buti mubili?” mbwaakabuzya Paulo. “Anukuti zizo nzinji, nekubaboobo mubili ngoumwi buyo. Lino liso talikonzyi kwaambila ijanza kuti, Nsikuyandi. Awalo mutwe tokonzyi kwaambila maulu kuti, Nsimuyandi.” (1 Ba-Korinto 12:19-21) Munzila njiyonya, tatuciti mulimo omwe toonse tobanamukwasyi wabakombi ba Jehova. Nokuba boobo tulikamantene alimwi tulayandikana muli cesu.
19. Mbuti mbotunga twagwasyigwa azipo zya Leza zyakumuuya, alimwi ncinzi ncaakaamba umwi mukwesu mupati kumakani aya?
19 Mbubonya mubili mbuuyandika cakulya, kubambwa alimwi abusolozi, aswebo tuyandika zintu zyakumuuya Leza nzyatupa kwiinda mu Jwi lyakwe, mumuuya, alimwi ambunga yakwe. Kutegwa tugwasyigwe azintu ezi, tweelede kuba akati kamukwasyi wa Jehova waanyika. Naakamana myaka minji mumulimo wa Leza, umwi mukwesu wakalemba kuti: “Ndilalumba kapati kuti ndali kupona kweendelana aluzibo lwamakanze aa Jehova kuzwa mumazuba aciindi kiitanasika 1914 iciindi zyoonse nizyatakaningasalala . . . kusikila sunu kasimpe nokamweka ngwee mbuli bubala zuba lyamasikati. Kulindime cintu cali cipati kwiinda cali cakuzumanana kuyanzana ambunga ya Jehova iilibonya. Izintu zyakandicitikila kaindi zyakandiyiisya mbuli mbocitagwasyi ikwiide kuyaama akuyeeya kwabuntunsi. Mbundakasalalilwa buyo akaambo ako, ndaakanza kunookakatide kumbunga iisyomeka. Buyo-buyo mbuti bumbi muntu mbwanga wajana luzyalo lwa Jehova azilongezyo?”
20. Ncinzi ncotweelede kuyandisya kuti tucite mbotuli bantu ba Jehova?
20 Jehova wabayobolola bantu bakwe kuzwa mumudima alimwi alupyopyongano lwamunyika eyi. (1 Petro 2:9) Watunjizya mulukamantano anguwe alimwi abasyomima. Oolu lukamantano lunoolimo amubweende bwazintu bupya ibuvwulide aafwiifwi loko lino. Mumazuba aya aakumamanino aakatazya, cakuzumanana toonse ‘atube aluyandano’ alimwi atucite zintu zyoonse nzyotukonzya ikuleta alimwi akutabilila lukamantano lwesu lubotu.—Ba-Kolose 3:14.
Ino Inga Mwaingula Buti?
◻ Nkaambo nzi kucita kuyanda kwa Leza alimwi akukakatila kukasimpe ncokunga kwatugwasya kubamba lukamantano?
◻ Mbuti lukamantano mboluswaangene akubelesya kabotu mulaka?
◻ Ino kulekelela kujatikizya nzi?
◻ Mbuti mbotunga twabamba lukamantano mukulisalila tobeni?
◻ Nkaambo nzi lukamantano lwa Bunakristo ncotweelede kulubamba?
[Cifwanikiso icili apeeji 16]
Mbuli mweembezi oyu, awalo Jehova, ulababamba bantu bakwe kabakamantene
[Zifwanikiso izili apeeji 18]
Kwiinda mukulilekelela cakulibombya ciindi notubisizya bambi, tuyoogwasya kuleta lukamantano