• Sena Muyoolebwa Akaambo ka Jesu?
    Ngazi Yamulindizi (Yakwiiya)—2021 | May

    • (3) JESU TAAKALI KUTOBELA TUNSIYANSIYA TWABA JUDA

      Bantu banji bakamukaka Jesu akaambo kakutatobela tunsiyansiya twaba Juda. Mbuti zintu nzimunya eezyi mbozikonzya kupa bantu kukaka mulumbe wesu mazuba aano? (Amubone muncali 13)d

      13. Ncinzi cakapa kuti bantu banji bamukake Jesu?

      13 Mumazuba aa Jesu, basikutobela Johane bakagambwa nkaambo basikwiiya ba Jesu tiibakali kuliimya kulya. Jesu wakapandulula kuti tiibakeelede kuliimya kulya walo kacipona. (Mt. 9:14-17) Nokuba boobo, ba Farisi alimwi abasikumukazya bakamutongooka nkaambo tanaakali kutobela tunsiyansiya alimwi azilengwa zyabo. Bakanyema ciindi Jesu naakaponya muntu uuciswa mu Sabata. (Mk. 3:1-6; Joh. 9:16) Bakali kulyaamba kuti balabulemeka buzuba bwa Sabata; pele alimwi bakali kulekela bantu kucita makwebo mutempele. Bakanyema kapati ciindi Jesu naakabatongooka akaambo kabukkale oobu. (Mt. 21:12, 13, 15) Alimwi bakanyema kapati aabo Jesu mbaakakambaukila mucikombelo caku Nazareta, ciindi naakabelesya zikozyanyo zyakaindi kutondezya kuti bana Israyeli bakali balyato alimwi tiibakajisi lusyomo. (Lk. 4:16, 25-30) Bantu banji bakamukaka Jesu nkaambo wakacita zintu nzyobatakali kuyeeyela.—Mt. 11:16-19.

      14. Nkaambo nzi Jesu ncaatakakulwaizya bantu kutobela tunsiyansiya twabantu itwatakali kweendelana a Magwalo?

      14 Ino Magwalo aamba nzi? Jehova kwiinda mumusinsimi Isaya wakaamba kuti: “Bantu aaba balandisikila amulomo wabo buyo alimwi balandilemeka amilomo yabo buyo, pele myoyo yabo iili kule andime; alimwi kuyoowa nkobandiyoowa kuyeeme amilawo yabantu njobayiisyigwa.” (Is. 29:13) Jesu wakacita kabotu kutakulwaizya bantu kutobela tunsiyansiya twabantu ituteendelani a Magwalo. Aabo ibakali kuyeeya kuti milawo alimwi atunsiyansiya twabantu twakali kuyandika kwiinda Magwalo, abalo bakamukaka Jehova ayooyo ngwaakatuma Mesiya.

  • Sena Muyoolebwa Akaambo ka Jesu?
    Ngazi Yamulindizi (Yakwiiya)—2021 | May

    • (4) JESU KUNYINA NAAKACINCA MFWULUMENDE

      Bantu banji bakamukaka Jesu akaambo kakutacinca mfwulumende. Mbuti zintu nzimunya eezyi mbozikonzya kupa bantu kukaka mulumbe wesu mazuba aano? (Amubone muncali 17)e

      17. Ncinzi bantu banji mumazuba aa Jesu ncobakali kulangila kuzwa kuli Mesiya?

      17 Bantu bamwi mumazuba aa Jesu bakali kuyanda kucinca mfwulumende. Bakali kulangila kuti Mesiya wakali kuyoobaangununa kuzwa kukupenzyegwa abulelo bwabana Roma. Aboobo bakasola kubikka Jesu kuti abe mwami wabo, pele wakakaka. (Joh. 6:14, 15) Bantu bamwi kubikkilizya abapaizi bakali kulibilika kuti Jesu wakali kuyoocinca mfwulumende, calo cakali kunoonyemya bana Roma ibakapede basololi bazikombelo aaba nguzu alimwi abweendelezi. Akaambo kakuti bakali kulibilika kujatikizya mapolitikisi, ba Juda banji bakamukaka Jesu.

      18. Mbusinsimi nzi ibujatikizya Mesiya bantu banji mbobatakali kubikkila maano?

      18 Ino Magwalo aamba nzi? Nokuba kuti businsimi bunji bwakali kutondezya kuti Mesiya wakali kuyooba Sikalumamba sikuzunda, pele businsimi bumbi bwakali kutondezya kuti wakeelede kusaanguna kufwa akaambo kazibi zyesu. (Is. 53:9, 12) Aboobo nkaambo nzi ba Juda ncobakajisi mizeezo iitaluzi kujatikizya Mesiya? Bantu banji mumazuba aa Jesu, tiibakali kubuyanda businsimi buli boonse ibwatakali kwaamba mbwaakonzya kumana cakufwambaana mapenzi ngobakajisi.—Joh. 6:26, 27.