“Amulikulike Ijokwe Lyangu”
1 Munyika iizwide mapenzi akulibilika, twakatalusyigwa kapati kwiinda mukuzumina malailile aa Jesu aakuti tunjile mujokwe lyakwe akukatalukwa. (Mt. 11:29, 30) Kuzumina kunjila mujokwe lyakuba sikwiiya kulabikkilizya akutola lubazu mumulimo uutaminyi buyo, pele alimwi uukatalusya. Kubikkilizya kukambauka makani mabotu aa Bwami akugwasya bantu kuti tukatalukwe limwi mujokwe libulungusene ilya Jesu.—Mt. 24:14; 28:19, 20.
2 Ilukataluko Lujanwa Mumulimo: Jesu tanaakali kwaambila basikumutobela kuti uyanda kuyungizya mukuli wakwe atala aamukuli ngobakanyamwide kale. Wakali kubaambila kusiya mukuli wabo mulemu ikutegwa babweze mukuli wakwe muuba-uba. Ikulibilika alimwi akubula bulangizi kwamubweende oobu bwazyintu takucituminyi pe; nokuba kutupa kukwelela antunda kutegwa tujane buvwubi butasyomeki. (Lk. 21:34; 1 Tim. 6:17) Nokuba kuti tujisi bubi alimwi tweelede kubeleka kutegwa tujane zyintu nzyotuyandika abuzuba, kukomba Leza ncecintu ciyandika kapati mubuumi bwesu. (Mt. 6:33) Mulimo uyootukatalusya lyoonse muciindi cakutuminya ikuti twazumanana kubikkila maano kucintu ciyandika kapati.—Flp. 1:10.
3 Mbuli cilengwa, tulakukkomanina kwaamba makani aajatikizya cintu ncotuyandisya. (Lk. 6:45) Banakristo boonse balamuyanda kapati Jehova alimwi azilongezyo zya Bwami nzyaakasyomezya. Elo cilakatalusya kaka ciindi twanooli mumulimo kwaamba “makani mabotu” akuzigusya mumizeezo nzyotulibilika abuzuba! (Rom. 10:15) Masimpe ngakuti, ikuti cintu cimwi katucicita kapati, tulacizyiba kabotu, eelyo tulatalika kucikkomanina. Aboobo, ikutola ciindi cilamfwu mumulimo ikuti katukonzya kucita boobo, kuyootupa kuti tukatalukwe kapati. Elo cilakulwaizya kaka bantu nobaazumina makani ngotukambauka! (Inc. 15:3) Nociba ciindi bantu nobatabikkili maano kumakani ngotukambauka antela nobatukazya, imulimo uyootukatalusya kumuuya ikuti lyoonse katuyeeyede kuti ncotucita cilamukkomanisya Jehova alimwi akuti zilongezyo zizwa kulinguwe ziyoopa kuzyala micelo mibotu iili yoonse.—Inc. 5:41; 1 Kor. 3:9.
4 Kwiinda mukuzumina ncaamba Jesu, tuyoojana coolwe cakubeleka antoomwe anguwe katuli Bakamboni ba Jehova. (Is. 43:10; Ciy. 1:5) Kunyina cintu cimbi cikonzya kutukatalusya kwiinda ceeci!