Ikweendaa Leza—Intaamu Zyakusaanguna

“Amuswenenene kuli-Leza, elyo alakwe ulamuswenenena.”—JAKOBO 4:8.

1, 2. Nkaambo nzi nconga waamba kuti ncoolwe cipati kubelekela Jehova?

OYU muntu wakapenga muntolongo kwamyaka minji. Kuzwawaawo wakaitwa kuya kwiima kumbele lyamuleli wacisi. Mazuba akeenda cakufwambaana. Takanaba kaindi, oyu muntu mwaange wakalijana mumulimo wakubelekela mwami wakalemenede kapati kwiinda bami boonse baansi ano bakuciindi eco. Ooyu muntu iwakali muntolongo cimwi ciindi wakapegwa cuuno cipati cabulemu. Josefa—mwaalumi wakaangidwe kumaulu azyaanzyo zyantolongo—lino wakali kweendaa mwami!—Matalikilo 41:14, 39-43; Intembauzyo 105:17, 18.

² Sunu bantu bajisi coolwe cakubelekela muntu mupati kwiinda Farao waku Egepita. Ooyu Muntu Mupatikampatila kujulu aansi ulatutamba toonse kuti tumubelekele. Tacilibedi coolwe cipati kucita boobo akuba balongwe ba Jehova Leza singuzuzyoonse! Mu Magwalo, inguzu zinji abulemu alimwi aluumuno, bubotu akukondelezya zijatikizigwaa nguwe. (Ezekieli 1:26-28; Ciyubunuzyo 4:1-3) Micito yakwe yoonse njaluyando. (1 Johane 4:8) Tabeji pe. (Myeelwe 23:19) Alimwi Jehova tatyompyi baabo basyomeka kulinguwe. (Intembauzyo 18:25) Ikuti twatobela zyeelelo zyakwe ziluleme, buumi bwesu bunooli bwakukkomana ibulaa mpindu lino, mpoonya kumbele aamazuba tuyoojana buumi butamani. (Johane 17:3) Kunyina muleli muntunsi uukonzya kusyomezya zileleko azyoolwe zyeelene azeezi naaba aniini pe.

3. Muunzila nzi Nowa ‘mwaakeenda a-Leza wakasimpe’?

³ Kale-kale, Nowa syaanene wakasala kutobela luyando lwa Leza amakanze aakwe. Ikujatikizya nguwe Ibbaibbele lyaamba kuti: “Nowa kali muntu uululeme, katajisi kampenda, akati kabasaanyina. Nowa wakali kweenda a-Leza [wakasimpe].” (Matalikilo 6:9) Aino, Nowa taakayenda buya kababonana a Jehova nkaambo taakwe muntu “uwakabona Leza neciba ciindi comwe.” (Johane 1:18) Pele Nowa wakeendaa Leza mukuti wakacita Leza ncaakamwaambila. Nowa wakaba mulongwe wini-wini wa Leza Singuzuzyoonse akaambo kakuti mubuumi bwakwe boonse wakali kucita luyando lwa Jehova. Ituulunzuma twabantu sunu ‘tweenda a-Leza’ mbweena mbuli Nowa kwiinda mukutobela lulayo lwa Jehova amalailile aakwe. Mbuti muntu mbwanga watalika kutobela nzila eyi?

Iluzibo Lwini-Lwini Lulayandika

4. Ino Jehova ubayiisya buti bantu bakwe?

⁴ Ikutegwa tweende a Jehova, tweelede kusaanguna kumuziba. Musinsimi Isaya wakasinsima kuti: “Kumamanino aaciindi cilundu caŋanda ya-Jehova ciyooimikwa atala lyazilundu akusumpulwa kwiinda tulundulundu toonse, nkabela masi oonse anooya bukunka kulincico. Misyobo minji inooya bwaamba kuti, Atwiinke, tukaye kucilundu ca-Jehova, kuŋanda ya-Leza wa-Jakobo, elyo uyootwiisya inzila zyakwe, nkabela tuyooenda muziyanza zyakwe. Nkaambo mu-Ziyoni muyoozwa mulao, alyalo ijwi lya-Jehova liyoozwa mu-Jerusalemu.” (Isaya 2:2, 3) Inzya, tulakonzya kusyoma kuti Jehova uyoobayiisya boonse abo bayanda kweenda munzila zyakwe. Jehova watupa Jwi lyakwe Bbaibbele alimwi ulatugwasya kuliteelela. Inzila imwi njacita boobo nkwiinda ‘mumuzike musyomesi uucenjede.’ (Matayo 24:45-47) Jehova ubelesya “muzike musyomesi” kupa malailile aakumuuya kwiinda mumabbuku aakanana zya Bbaibbele, amiswaangano ya Bunakristo alimwi abubambe bwaciiyo ca Bbaibbele cipegwa buyo. Leza alimwi ulagwasya bantu bakwe kuteelela Jwi lyakwe kwiinda mumuuya wakwe uusalala.—1 Ba-Korinto 2:10-16.

5. Nkaambo nzi kasimpe kamu Magwalo ncokayandika kapati?

⁵ Nokuba kuti tatubbadeli mali kujana kasimpe kamu Bbaibbele, impindu yakasimpe nimpati cini-cini. Notwiiya Jwi lya Leza, twiiya Leza lwakwe—izina lyakwe, bube bwakwe, makanze aakwe alimwi anzila njayanzana abantu. Alimwi twiiya kwiingula kwaangulula kumibuzyo yabuumi mipati yakuti: Ino nkaambo nzi ncotuli waano? Nkaambo nzi Leza ncalekelede kupenga? Ncinzi cili kumbele? Nkaambo nzi ncotucembaalila akufwa? Sena buumi bulazumanana muntu afwa? Kunze lyaboobo twiiya luyando lwa Leza lujatikizya ndiswe, nkokuti mbotweelede kweenda kutegwa tumukkomanisye cini-cini. Twiiya kuti zyeelelo zyakwe nzyamaanu alimwi zilagwasya kapati notuzitobela. Tatukonzyi kuziteelela zintu ezi kakunyina malailile kuzwa kuli Leza.

6. Ino Luzibo lwini-lwini lwa Bbaibbele lutugwasya kuti tutozye nzila nzi?

⁶ Kasimpe kamu Bbaibbele kalaanguzu, katupa kuti tusanduke. (Ba-Hebrayo 4:12) Notutanabaa luzibo lwa Magwalo, cilikke ncotunga twacita nkutobela “ziimbo zyaansi ano.” (Ba-Efeso 2:2) Pele luzibo lwini-lwini lwa Jwi lya Leza lutupa kuti tutozye nzila imbi kutegwa ‘tubotezye Mwami Jehova muziyanza zyoonse.’ (Ba-Kolose 1:10) Tacilikkomanisizyi kaka kuti ntaamu zyesu zyakusaanguna zyaba zyakweendaa Jehova Muntu uulaa bulemu kwiinda bantu boonse kujulu aansi!—Luka 11:28.

Intaamu Zyobile Zipati—Ikulyaaba Akubbapatizigwa

7. Notwiiya Jwi lya Leza, ncinzi camasimpe ncotubona kujatikizya busololi bwabantu?

⁷ Ikuteelela kwesu Bbaibbele nokwayaambele, tutalika kulanga makani aabukkale bwabantu alimwi abukkale bwesu munzila yakumuuya kweelana ambolyaamba Jwi lya Leza. Elyo kaambo kapati kamasimpe kalalibonya. Ikaambo kakaambwa kaindi amusinsimi Jeremiya iwakalemba kuti: “O Jehova, ndizi kuti muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.” (Jeremiya 10:23) Tobantu toonse tuyandika kusololelwaa Leza.

8. (a) Ncinzi cipa kuti bantu balyaabe kuli Leza? (b) Ino kulyaaba kwa Bunakristo caamba nzi?

⁸ Ikuti naa twakateelela kaambo aka kapati tulakulwaizigwa kuyanda kusololelwaa Jehova. Alimwi kuti katumuyanda Leza tulakulwaizigwa kulyaaba kulinguwe. Ikulyaaba kuli Leza caamba kumusikila kwiinda mumupailo akusyomezya cini-cini kuti buumi bwesu tulabubelesya kumubelekela akweenda munzila zyakwe cakusyomeka. Twacita boobo, tulatobela cikozyanyo ca Jesu wakalipa kuli Jehova amakanze aakuti ulacita kuyanda kwa Leza.—Ba-Hebrayo 10:7.

9. Nkaambo nzi muntu amuntu ncalyaabila kuli Jehova?

⁹ Jehova Leza tasinikizyi muntu kulyaaba kulinguwe. (Amweezyanisye 2 Ba-Korinto 9:7.) Kunze lyaboobo, Leza talangili muntu kulyaaba kulinguwe akaambo kakulimvwa boobo mumoyo kwakaindi buyo kasyoonto. Katana bbapatizigwa muntu, weelede kali kale sikwiiya, alimwi kwiiya ciyanda kubeleka canguzu cini-cini. (Matayo 28:19, 20) Paulo wakakumbila baabo ibakabbapatizidwe kale kuti ‘batuule mibili yabo camaanu, ibe cipaizyo cuumi, cisalala, ciyandisi kuli-Leza.’ (Ba-Roma 12:1) Kubelesya maanu ncencico alimwi citupa kuti tulyaabe kuli Jehova Leza. Twaiya ciyandika akuciyeeya kabotu-kabotu ncotwaiya, tulalisungula akulyaaba kuli Leza cakukkomana.—Intembauzyo 110:3.

10. Ino kulyaaba ciswaangene buti alubbapatizyo?

¹⁰ Notwamusikila Leza mumupailo kumwaambila makanzeesu aakuti tunooyenda munzila zyakwe, tulabweza ntaamu itobela. Ikulyaaba kwesu tulakuzibya caantangalala twabbapatizigwa mumaanzi. Ooku nkokwaambilizya kuti twakonka kuti tulacita luyando lwa Leza. Kumatalikilo aamulimo wakwe waansi, Jesu wakabbapatizigwaa Johane, munzila eyi wakasiya citondezyo kulindiswe. (Matayo 3:13-17) Mpoonya, Jesu wakalailila basikumutobela kugwasya bantu kuba basikwiiya akubabbapatizya. Aboobo, kulyaaba akubbapatizigwa nintaamu ziyandika kumuntu uuli woonse uuyanda kweendaa Jehova.

11, 12. (a) Ino lubbapatizyo inga lweezyanisigwa buti amucado? (b) Ino cilongwe a Jehova inga ceezyanisigwa buti acilongwe akati kamulumi amukaintu?

¹¹ Ikuba sikwiiya wa Jesu Kristo uulyaabide uubbapatizidwe cibaanga cilikozyenye akukwatwa naa kukwata. Mumasi manji, imucado kautanacitwa, kuli ntaamu zinji zibwezwa. Mwaalumi amukaintu balaswaangana, balazibana, mpoona balayandana. Kuzwawaawo baleebana. Imucado ncitondezyo caantangalala cantaamu yakabwezwa abantu aabo kabali balikke—yakuti balakwatana akukkala antoomwe kabali mulumi amukaintu. Mmucado uutondezya caantangalala kuti eeci cilongwe cilibedelede catalika. Ibuzuba bwamucado mbwakutondezya kuti lukwatano lwatalika. Mbubwenya buyo alubbapatizyo, ibuzuba bwalubbapatizyo mbwakutondezya kuti muntu watalika buumi bwakweendaa Jehova cakulyaaba lyoonse.

¹² Amulange cikozyanyo cimbi. Nobamana kukwatana, iluyando lwamulumi amukaintu lweelede kuyaambele akusima. Ikutegwa luyandano lwabo kaluyabuyaambele, banabukwetene boonse bobile beelede kusoleka kuluyumya lukwatano lwabo alimwi akulucita kuti luzumanane. Nokuba kuti tatunjili mulukwatano a Leza, tweelede kusolekesya kucita kuti cilongwe cesu a Jehova cizumanane notwamana kubbapatizigwa. Ulatulangisisya alimwi ulabona kuti tulasoleka kucita luyando lwakwe, elyo ulaswena munsi andiswe. Sikwiiya Jakobo wakalemba kuti, “amuswenenene kuli-Leza, elyo alakwe ulamuswenenena.”—Jakobo 4:8.

Ikweenda Mumukondo wa Jesu

13. Notweendaa Leza, ncikozyanyo cani ncotweelede kutobela?

¹³ Ikutegwa tweende a Jehova, tweelede kutobela cikozyanyo ncaakasiya Jesu Kristo. Imwaapostolo Petro wakalemba kuti: “Nciconya eco ncimwakaitilwa, nkaambo Kristo alakwe wakamucisilwa, wakamusiila cibonesyo, kuti mukatobele mumikondo yakwe.” (1 Petro 2:21) Mbwaanga Jesu wakali londokede kakuli swebo tatulondokede, tatukonzyi kutobela citondezyo ncaakasiya kakunyina kulubizya. Nokuba boobo Jehova ulangila kuti tulasoleka mbuli mbotukonzya. Atulange zintu zyosanwe izijatikizya buumi bwa Jesu amulimo wakwe Banakristo nzyobeelede kusoleka kutobela.

14. Ino kuziba Jwi lya Leza cijatikizya nzi?

¹⁴ Jesu wakalilizi Jwi lya Leza lyoonse mbolibede. Mumulimo wakwe wakukambauka, Jesu kanjikanji wakali kuzubulula mu Magwalo aa Cihebrayo. (Luka 4:4, 8) Aino abalo basololi babukombi babyaabi baciindi eco bakali kuzubulula Magwalo. (Matayo 22:23, 24) Jesu wakali indene abaaba mukuti walo wakalizi ncaamba Magwalo alimwi wakali kwaatobela mubukkale bwakwe. Tanaakazi buyo Mulawo ncowaamba, wakalizi akaambo ncowakali kwaambila boobo. Andiswe tweelede kusola kuteelela ncolyaamba Jwi lya Leza alimwi ancolyaambila boobo notutobela cikozyanyo ca Kristo. Twacita boobo, tulaba babelesi ba Leza bamukonda alimwi ibakonzya ‘kupandulula makani aalusinizyo mbukweelede.’—2 Timoteo 2:15.

15. Ino Jesu wakasiya buti cikozyanyo mukwaambaula zya Leza?

¹⁵ Kristo Jesu wakali kwaambila bantu makani aa Wisi wakujulu. Jesu tanaakali kusisikizya luzibo lwa Jwi lya Leza pe. Nobaba basinkondonyina bakali kumwiita kuti “Mufundisi,” nkaambo wakali kunga koonse nkwaaya waambila bantu makani aa Jehova amakanze aakwe. (Matayo 12:38) Jesu wakali kukambauka kubuleya mucilawo catempele, muzikombelo, muminzi amumbazu zimbi zyacisi. (Marko 1:39; Luka 8:1; Johane 18:20) Wakali kuyiisya caluse, wakali kutondezya luyando kuli baabo mbaakagwasya. (Matayo 4:23) Aabo batobela cikozyanyo ca Jesu abalo balaya mumasena manji kuyabuyiisya bantu alimwi balabelesya nzila zinji zyakuyiisya makani aa Jehova Leza amakanze aakwe.

16. Ino cilongwe ca Jesu cakali ciyumu buti abaabo mbobakali limwi kukomba Jehova?

¹⁶ Jesu wakali kubayanda kapati bantu bakali kukomba Jehova. Iciindi Jesu naakali kubandikaa buleya, banyina abanabokwabo batakali kusyoma bakaboola kuzoobandika anguwe. Ibbaibbele liluula kuti: “Nkabela umwi wakamwaambila kuti, Langa, banyoko abakwanu baliimvwi anze, balayanda kwaambaula ayebo. Nkabela aambilwe boobo, wakamuvwi[i]la wakati, Ino mbani bama? Mbani bakwesu? Lino wakatondeka ijanza lyakwe kulibasikwiiya bakwe, wakati, Amulange, mbaaba bama abakwesu. Nkaambo umwi aumwi uucita luyando lwa-Taata uuli kujulu ngomukwesu amucizi wangu abama.” (Matayo 12:47-50) Eci tacaambi kuti Jesu wakaukaka mukwasyi wakwe, nkaambo zintu zyakacitika zitobela zitondezya kuti tanaakaukaka pe. (Johane 19:25-27) Pele eci cibalo citondezya luyando Jesu ndwaakajisi kubasyominyina. Asunu mbubonya, aabo ibayendaa Leza balasola kuyanzana ababelesi ba Jehova alimwi balabayandisya.—1 Petro 4:8.

17. Ino Jesu wakali kulimvwa buti kujatikizya kucita kuyanda kwa Wisi, alimwi eco ceelede kutujatikizya buti?

¹⁷ Jesu wakatondezya luyando kuli Wisi wakujulu kwiinda mukucita kuyanda kwakwe. Jesu wakali kumumvwida Jehova kuli zyoonse. Wakati: “Icakuya cangu nkucita luyando lwayooyo uwakandituma, akulondola milimo yakwe.” (Johane 4:34) Alimwi Kristo wakati: “Ndacita lyoonse zintu izimubotela [Leza].” (Johane 8:29) Jesu wakali kumuyanda kapati Wisi wakujulu cakuti “wakalibombya akuzumina nikuba kufwa, nkukuti kufwa [acisamu cakupenzezya, NW].” (Ba-Filipi 2:8) Mpoonya, Jehova wakamuleleka Jesu, wamusumpula wamupa cuuno cipati abulemu waba nguuccilila Jehova alikke kunguzu. (Ba-Filipi 2:9-11) Andiswe atube mbuli Jesu tutondezye luyando kuli Leza kwiinda mukutobela milawo yakwe akucita kuyanda kwakwe.—1 Johane 5:3.

18. Muunzila nzi Jesu mwaakasiya cikozyanyo kumakani aakupaila?

¹⁸ Jesu wakali muntu uupaila. Wakapaila ciindi calubbapatizyo lwakwe. (Luka 3:21) Katanasala baapostolo bakwe bali 12, wakapaila busiku boonse. (Luka 6:12, 13) Jesu wakabayiisya basikwiiya bakwe mbokupailwa. (Luka 11:1-4) Ibuzuba katanafwa imasiku, wakabapailila basikwiiya bakwe alimwi wakapaila ambabo. (Johane 17:1-26) Ikupaila cakali cintu cipati mubuumi bwa Jesu, akulindiswe mboceelede kuba nkaambo tuli basikumutobela bakwe. Tacilibedi coolwe kaka kukananaa Mwami Wajulu Aansi mumupailo! Kunze lyaboobo, Jehova ulaingula mipailo nkaambo Johane wakalemba kuti: “Lino kaanzambwene nkitujisi kubusyu bwakwe nkaaka kakuti, na twakumbila kufumbwa cintu cili buti cili mbuli makanze aakwe, ulatumvwa. Nkabela na tulizi kuti ulatumvwa, coonse ncotukumbila, tulizi kuti tulijisi zikumbilo nzitwamukumbila.”—1 Johane 5:14, 15.

19. (a) Nciimo nzi ca Jesu ncotweelede kutobela? (b) Muunzila nzi motugwasigwa notwiiya buumi bwa Jesu amulimo wakwe?

¹⁹ Nzinji nzyotunga twaiya kuti twalangisya buumi bwa Jesu Kristo bwaanyika alimwi amulimo wakwe! Amuyeeye ciimo ncaakatondezya: luyando, luse, luzyalo, nguzu, maanu, kulibombya, busicamba alimwi akutaliyanda. Ikuti twaiya zya Jesu, tulayandisya kuba basikumutobela bakwe basyomeka. Luzibo lwa Jesu alimwi lulatupa kuswena munsi a Jehova. Kayi Jesu wakalimukozezye Wisi wakujulu cakumaninina. Bakali kumvwana kapati a Jehova cakuti wakali kukonzya kwaamba kuti: “Oyo uwandibona, wamubona awalo Taata.”—Johane 14:9.

Amusyome Leza Kuti Ulamubamba

20. Ino inga twaba buti basicamba notweendaa Jehova?

²⁰ Ibana nobaciiya-iya kweenda, inga balakankama nobayenda. Ino baiya buti kweenda cabusicamba? Eci cilacitika nobalizibizya alimwi anobazumanana. Aabo beendaa Jehova balasola kweenda antaamu zyabusicamba zyakutakankama. Eeci acalo citola ciindi alimwi ciyanda kuzumanana. Paulo wakaamba mbociyandika kapati kuzumanana kweendaa Leza naakalemba kuti: “Lino bakwesu, mwakamvwa kale kulindiswe mbumweelede kweenda kukubotezya Leza, nkabela muleenda obo ncobeni, aboobo sunu tulamukumbila akumukombelezya mu-Mwami Jesu kuti kamuciya bweendesya munzila eyo njiyonya.”—1 Ba-Tesalonika 4:1.

21. Notweendaa Jehova, nzileleko nzi nzyotunga twabaazyo?

²¹ Ikuti katumubelekela Leza camoyo woonse, ulatugwasya kuzumanana kweendaa nguwe. (Isaya 40:29-31) Taakwe nyika ncoipa cinga ceezyanisigwaa zileleko nzyapa kuli baabo ibeenda munzila zyakwe. ‘Nguutwiisya kuti tugwasigwe. Uutweenzya munzila njotweelede kutola. Ikuti katuswiilila milazyo yakwe, iluumuno lwesu lulaba mbuli mulonga, abululami bwesu bulaba mbuli mayuwe aalwizi.’ (Isaya 48:17, 18) Ikuti twamvwa notwaambilwa kweendaa Leza alimwi twazumanana kucita boobo, tunooli muluumuno anguwe kukabe kutamani.

Mulaingula Buti?

◻ Nkaambo nzi ncocili coolwe cipati kweendaa Leza wakasimpe?

◻ Nkaambo nzi kwiiya, kulyaaba alimwi akubbapatizigwa ncozili ntaamu zipati mukweendaa Jehova?

◻ Ino inga tweenda buti mumukondo wa Jesu?

◻ Ino tuzi buti kuti Jehova uyootubamba notweendaa nguwe?

[Zifwanikiso izili apeeji 11]

Ikwiiya, kulyaaba alimwi alubbapatizyo nintaamu zyakusaanguna mukweendaa Leza