16, 17. (a) Ino cintu camamanino kucitika ncaakaamba Jesu mucikozyanyo cakwe ncinzi? (b) Nkaambo nzi ncotwaamba kuti kuzuzikizyigwa kwacintu eeco camamanino kucili kumbele?

¹⁶ Casanu, kubala. Jesu wakamanizya businsimi bwakwe kwiinda mukwaamba kuti: “Kuciindi eeco balulami bayoobala mbubonya mbuli zuba mu Bwami bwa Usyi.” (Mt. 13:43) Ndilili alimwi nkuukuli nkociyoocitikila eeci? Kuzuzikizyigwa kwamajwi aaya kucili kumbele. Jesu wakaambila limwi kuti, tacili cintu cicitika cino ciindi anyika, pele ncintu ciyakucitikila kujulu kumbele.f Atulange-lange twaambo tobilo tutupa kwaamba boobu.

¹⁷ Kakusaanguna, mubuzyo wakuti “ndilili.” Jesu wakaamba kuti: “Kuciindi eeco balulami bayoobala.” Majwi aakuti “kuciindi eeco” cakutadooneka aamba ciindi Jesu naakaamba majwi aaya aakuti, ‘kwaasowela mubbibi lyamulilo.’ Eeco ciyakucitika mucibeela camamanino camapenzi mapati. Aboobo, ‘ikubala’ kwabananike akwalo kweelede kucitika ciindi cakumbele. Kabili, mubuzyo wakuti “nkuukuli.” Jesu wakaamba kuti balulami ‘bayoobala mu Bwami.’ Ino majwi aayo aamba nzi? Bananike boonse basyomeka ibacili anyika caakumana cibeela cakusaanguna camapenzi mapati banooli batambula kale ciganto cabo camamanino. Mpoonya kweelana abusinsimi bwa Jesu bujatikizya mapenzi mapati, bayakuyobolwa kujulu. (Mt. 24:31) Ookuya bayakubala “mu Bwami bwa Usyi,” alimwi muciindi buyo cisyoonto yaakwiinda nkondo ya Amagedoni, bayakukondwa kabali banabwiinga ba Jesu ‘mulukwatano lwa Mwanaambelele.’—Ciy. 19:6-9.