Wayungizya Mulimo Wakwe Mu Galilaya

Jesu wajisi bubi mubuzuba mbwaali mu Kapernauma abasikwiiya bakwe bone. Kumangolezya bantu bamu Kapernauma baleta balwazi babo kuti baponesyegwe. Jesu tanaajisi ciindi cakuba alikke.

Lino mafwumofwumo mubuzuba butobela, Jesu wafwuma kubuka kakucisiya ansi akuunka anze alikke. Waunka kubusena kutakwe bantu nkwakonzya kupaila kuli Bausyi kali alikke. Pele ciindi ca Jesu cakuba alikke cakosokezyegwa. Nobabona kuti Jesu tako, ‘Simoni abaabo mbali limwi batalika kumuyandaula.’ Ambweni Petro nguuli kumpela akaambo kakuti Jesu wasikila kuŋanda yakwe.—Marko 1:36; Luka 4:38.

Nobamujana Jesu, Petro waamba kuti: “Bantu boonse bayandaula nduwe.” (Marko 1:37) Tacigambyi kuti bantu bamu Kapernauma bayanda kuti Jesu akkale ambabo. Balumba kapati akaambo kazintu nzyaabacitila, aboobo basola “kumukasya kuti atabasiyi.” (Luka 4:42) Pele sena kaambo kapati Jesu ncaakaboolela anyika nkuzyikucita maleele aakuponya bantu? Alimwi sena wakaboolela kucita mulimo wakwe mubusena oobu bulikke? Ino waamba nzi walo kujatikizya makani aaya?

Jesu waingula basikwiiya bakwe kuti: “Katuunka kumbi, muminzi iili munsi-munsi ikutegwa akwalo nkakambauke, nkaambo eeci ncindakaboolela.” Mane buya Jesu waambila bantu aabo ibayanda kuti ataunki ulaamba: “Akwalo kuminzi iimbi ndileelede kwaambilizya makani mabotu aa Bwami bwa Leza, nkaambo eeci ncindakatuminwa.”—Marko 1:38; Luka 4:43.

Masimpe, kaambo kapati Jesu ncaakaboolela anyika nkuzyikukambauka Bwami bwa Leza. Bwami oobo buyoosalazya zina lya Bausyi akumanizya mapenzi oonse aabantu mane kukabe kutamani. Jesu wapa bumboni bwakuti wakatumwa aa Leza kwiinda mukuponya bantu munzila yamaleele. Mbubonya buyo, myaanda yamyaka minji yainda, Musa wakacita milimo mipati iigambya kutegwa ape bumboni busalede bwakuti wakatumwa aa Leza.—Kulonga 4:1-9, 30, 31.

Aboobo Jesu wazwa mu Kapernauma kuti akakambaukile muminzi iimbi, abalo basikwiiya bakwe bone baunka anguwe. Aaba bone mbaa Petro amunyina Andreya, Johane amunyina Jakobo. Nsondo yainda, bakaitwa kuti babe babelesinyina alimwi basikweenda limwi a Jesu bakusaanguna.

Ilweendo lwa Jesu lwakukambauka mu Galilaya antoomwe abasikwiiya bakwe aaba bone lwazwidilila kapati! Mubwini, makani aajatikizya Jesu amwaika koonse-koonse. ‘Mpuwo yakwe yamwaika mu Siriya moonse,’ mucooko caminzi iili kkumi ciitwa kuti Dekapole, alimwi amutala lya Mulonga wa Jordano. (Matayo 4:24, 25) Makamu-makamu aabantu ibazwa mumasena aayo, alimwi akuzwa mu Judaya, bamutobela Jesu abasikwiiya bakwe. Bantu banji bamuletela balwazi ibayandika kuponesyegwa. Jesu tanaabatyompya pe—balwazi wabaponya alimwi waitanda ayalo myuuya mibi muli baabo banjidwe madaimona.