Kuyiisya Kujatikizya Kulekana Alimwi Akuyanda Bana

Kuzwa ku Galilaya, Jesu abasikwiiya bakwe bazabuka Mulonga wa Jordano akutola nzila yuunka kumusanza kwiinda mu Pereya. Lweendo ilwainda ciindi Jesu naakali mu Pereya, wakaambilide ba Farisi ceelelo ca Leza caboola kumakani aakulekana. (Luka 16:18) Lino babusya makani aaya kutegwa bamusunke Jesu.

Musa wakalembede kuti mukaintu ulakonzya kulekwa ikuti kwajanwa kuti kuli “cintu cuusya nsoni” mulinguwe. (Deuteronomo 24:1) Lino kuli mizeezo yiindene-indene kujatikizya kaambo kakonzya kuzumizya bantu kulekana. Bamwi basyoma kuti balakonzya kulekana akaambo katwaambo tuniini pe tutayi komoonga. Aboobo, ba Farisi babuzya kuti: “Sena mwaalumi ulizumizyidwe kuleka mukaintu wakwe akaambo kakaambo kali koonse?”—Matayo 19:3.

Muciindi cakubelesya mizeezo yabantu, cabusongo Jesu waamba bubambe mbwaakabikkide Leza caboola kumakani aacikwati. Waamba kuti: “Sena tiimwakabala kuti ooyo wakabalenga kuzwa kumatalikilo, wakalenga mwaalumi amukaintu alimwi wakati: ‘Akaambo kaceeci mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe’? Nkokuti tabacili bobilo, pele baba mubili omwe. Aboobo aabo Leza mbaaswaanganya kutabi muntu uubaandaanya.” (Matayo 19:4-6) Ciindi Leza naakatalisya cikwati akati ka Adamu a Eva, kunyina naakabikka bubambe bwakuti inga camana cikwati cabo.

Ba Farisi bamukazya Jesu, balaamba: “Ino nkaambo nzi Musa ncaakalailila kumupa lugwalo lwakumutanda akumuleka mukaintu?” (Matayo 19:7) Jesu wabaambila kuti: “Akaambo kakuyuma kwamyoyo yanu, Musa wakamuzumizya kuleka bamakaintu banu, pele oobo tabusyi mbocakabede kuzwa kumatalikilo.” (Matayo 19:8) “Matalikilo” aambwa waawa teensyi kumazuba aa Musa; nciindi Leza naakatalisya cikwati mu Edeni.

Mpoonya Jesu waamba kaambo kayandika kapati, ulaamba: “Ndimwaambila kuti kufwumbwa uuleka mukaintu wakwe ikutali akaambo kabwaamu [Mu Chigiriki, por·neiʹa], akukwata umbi, wacita bumambe.” (Matayo 19:9) Aboobo, bwaamu naa koonana ikutali kwamumulawo nkakaambo kalikke kakulekanina kazumizyidwe mu Magwalo.

Eeci capa kuti basikwiiya baambe kuti: “Ikuti oobo mbwaabede makani aamwaalumi amukaintu wakwe, nkokuti tacili cibotu kukwata.” (Matayo 19:10) Masimpe, muntu uuyanda kukwata naa kukwatwa weelede kuzyiba kuti cikwati ceelede kukkalilila lyoonse!

Kujatikizya makani aakutakwata naa kutakwatwa, Jesu wapandulula kuti bamwi bakazyalwa kabali bazibe, ibatakonzyi kupa ziyandika mucikwati caboola kumakani aakoonana. Bambi bakacitwa kuba bazibe, tabakonzyi kucita cili coonse caboola kumakani aakoonana. Mpoonya bamwi, baliimya buyo caboola kumakani aakoonana nokuba kuti muzeezo inga nkuuli. Balacita oobo kutegwa bamaninine kubikkila maano kumakani aajatikizya Bwami. Jesu waambila baswiilizi bakwe kuti: “Ooyo uukonzya kuzumanana kakunyina kukwata [naa kukwatwa], akkale mbubonya oobo.”—Matayo 19:12.

Lino bantu batalika kuleta bana basyoonto kuli Jesu. Pele, basikwiiya bakalalila bantu, ambweni akaambo kakuyanda kuti batamukatazyi Jesu. Abone boobu, Jesu wakalala akubaambila kuti: “Amubaleke bana baboole kulindime; mutabakasyi pe, nkaambo Bwami bwa Leza mbwabaabo bali mbuli baaba. Ncobeni ndimwaambila kuti, kufwumbwa uutatambuli Bwami bwa Leza mbuli mwana musyoonto, takanjili pe mulimbubo.”—Marko 10:14, 15; Luka 18:15.

Taciliboteli kaka ciiyo eeci! Kutegwa tukanjile mu Bwami bwa Leza, tweelede kulibombya akuzumina kuyiisyigwa, mbubonya mbuli bana basyoonto. Lino Jesu watondezya kuti ulabayanda bana basyoonto kwiinda mukubabweza akubafwukatila alimwi akubaleleka. Oobu mbwabayanda boonse aabo ‘ibatambula Bwami bwa Leza mbuli mwana musyoonto.’—Luka 18:17.