Wapaila Kapengede Kapati Mumoyo

Jesu wamanizya kupaila abaapostolo bakwe basyomeka. Mpoonya ‘nobamana kwiimba nyimbo zyakutembaula Leza, baunka ku Cilundu ca Maolifa.’ (Marko 14:26) Batozya kujwe kumuunda uutegwa Getesemane, ooko Jesu nkwavwula kuunka.

Nobasika kubusena oobu bubotu ibuli akati kazisamu zyamaolifa, Jesu wasiya baapostolo ibali lusele musyule. Ambweni basyaala munsi-munsi aamanjililo aamuunda, nkaambo wabaambila kuti: “Amukkale aano nonduunka waalya kuyoopaila.” Jesu watolelezya baapostolo botatwe, nkokuti, Petro, Jakobo a Johane, akunjila mukati kamuunda. Jesu wapenga kapati mumoyo akwaambila botatwe aaba kuti: “Ndapenga kapati mumoyo cakuti inga ndafwa. Amukkale aano, mulinde antoomwe andime.”—Matayo 26:36-38.

Jesu weenda aniini kuzwa kulimbabo kumane ‘wavwuntama ansi akutalika kupaila.’ Ino ncinzi ncali mukwaamba napaila kuli Leza aciindi eeci cikatazya kapati? Wapaila kuti: “Taata, zintu zyoonse zilakonzyeka kulinduwe; koigusya nkapu eeyi kulindime. Pele kutabi kuyanda kwangu, akube kuyanda kwako.” (Marko 14:35, 36) Ino upandulula nzi? Sena uyanda kuuleya mukuli wakwe wakuba Munununi? Peepe!

Ciindi Jesu naakali kujulu wakalibonena bantu mbobakali kupenzyegwa kapati akujaigwa aba Roma. Lino mbwali muntu, ooyo uulaamoyo walubomba alimwi muntu uukonzya kumvwa kucisa, Jesu taziyandi zintu ziyanda kumucitikila. Pele icipati ncakuti, wapenga kapati mumoyo akaambo kakuzyiba kuti ikujaigwa mbuli cigwebenga cibyaabi kulakonzya kuleta masampu kuzina lya Bausyi. Mumawoola masyoonto buyo, ulaanzikwa aacisamu mbuli kuti ngusikusampaula Leza.

Naamana kupaila kwaciindi cilamfwu, Jesu wajokela akujana baapostolo aabo botatwe baloona. Wabuzya Petro kuti: “Sena nywebo tiimwali kukonzya kulinda kwawoola lyomwe antoomwe andime? Amulinde akuzumanana kupaila kutegwa mutanjili mumasunko.” Jesu ulizyi kuti baapostolo aaba abalo balipengede mumoyo, alimwi masiku maningi. Wayungizya kuti: “Moyo ncobeni ulapya pele mubili unyina nguzu.”—Matayo 26:40, 41.

Mpoonya Jesu waunka alimwi ciindi cabili akulomba Leza kuti agusye “nkapu eeyi” kulinguwe. Naajokela, wabajana alimwi baapostolo aaba botatwe baloona, nokuba kuti beelede kuti kabapaila kutegwa batanjili mumasunko. Ciindi Jesu naambaula ambabo, ‘babula cakumuvwiila.’ (Marko 14:40) Ciindi catatu Jesu waunka, wafwugama kuti apaile.

Jesu ulipengede kapati mumoyo akaambo kakuyeeya masampu aatiiboole kuzina lya Bausyi akaambo kakujaigwa mbuli cigwebenga. Nokuba boobo, Jehova uliimvwide mipailo ya Mwanaakwe, aboobo aciindi cimwi Leza watuma mungelo kuzyikumuyumya-yumya. Nokuba kuti cili boobo, Jesu tanaaleka kukombelezya Bausyi, pele wazumanana “kupaila canguzu kapati.” Masimpe ulipengede kapati mumoyo. Eelo kaka Jesu uyumwide mukuli mulemu kapati! Buumi butamani ibwakwe alimwi abwabantu basyoma buli mumaanza aakwe. Mubwini, ‘nkasaalo yakwe yaba mbuli madosi aabulowa aalokela ansi.’—Luka 22:44.

Jesu naajokela kubaapostolo bakwe ciindi catatu, wabajana alimwi baloona. Waamba kuti: “Aciindi mbuli ceeci, muloona akulyookezya! Amulange! Ciindi caswena cakuti Mwanaamuntu aabwe mumaanza aabasizibi. Amunyamuke, atweende. Amubone! Sikundaaba wasika afwaafwi.”—Matayo 26:45, 46.