Kuponesyegwa Kwiinda Mukujata Cisani Ca Jesu

Makani aakuti Jesu wajoka kuzwa ku Dekapole amwaika akati kaba Juda ibakkala kunkomwe iili kunyika lwaambo ya Lwizi lwa Galilaya. Cakutadooneka, ibanji bamvwa kuti calino-lino aawa nokwakali guwo, Jesu wakaumuzya muwo akubatamika meenda, alimwi kulangilwa kuti ibamwi balizyi kuti wakaponya baalumi bakanjidwe madaimona. Aboobo, “nkamu mpati yabantu” babungana kumbali aalwizi, ambweni kubusena buli mumunzi wa Kapernauma, kutegwa bamutambule Jesu. (Marko 5:21) Naaseluka mubwato, wajana kuti bantu boonse baliyandide kumubona alimwi balamulangila.

Umwi wabaabo bayandide kubona Jesu ngu Jairo, mweendelezi wacikombelo, ambweni eeco cili mu Kapernauma. Wafwugama kumaulu aa Jesu akumukombelezya ziindi zinji kuti: “Mwanaangu musimbi ufwumba bulamfwu. Ndakomba koboola ubikke maanza aako alinguwe kuti ayumye atafwi.” (Marko 5:23) Ino Jesu ulamucitila nzi ooyu Jairo uumukombelezya kuti agwasye mwanaakwe omwe buyo musimbi, ooyo uulaamyaka iili 12 yakuzyalwa alimwi ikalungu kakwe kaamoyo?—Luka 8:42.

Ciindi Jesu nali munzila kuunka kuŋanda ya Jairo, walijana mubukkale bumbi bweetezya. Bantu banji mboceenda limwi a Jesu baliyandide kubona citiicitike, bali mukulibuzya mumyoyo yabo ikuti naa balamubona kacita maleele aambi. Pele mukaintu umwi munkamu eeyi ulaacakwe, uyeeya cilwazi cimujisi icamupenzya kapati.

Kwamyaka iili 12, ooyu mukaintu mu Juda wali kuciswa kalobola. Waunka kubasilisi baindene-indene kuti bamugwasye, wasowa mali aakwe oonse mukusola kuti ndiza inga wapona. Pele kunyina naagwasyigwa pe. Mubwini, penzi lyakwe ‘lyaindila buya.’—Marko 5:26.

Mbubonya mbuli mbomuzyi, kunze lyakumumana nguzu, bulwazi bwakwe oobu bulajazya nsoni alimwi bulasampuzya. Kanji-kanji bantu tabavwuli kulyaamba caantangalala penzi lili boobu. Kunze lyaboobo, Mulawo wa Musa waamba kuti ikuti mukaintu kazwa bulowa ulasofwaala. Kufwumbwa uumuguma naa uujata zisani zyakwe zibijide bulowa uleelede kusamba akusofwaala kusikila kumangolezya.—Levitiko 15:25-27.

Mukaintu ooyu ‘waimvwa mpuwo ya Jesu,’ eelyo waboola kuzyikumuyandaula. Akaambo kakusofwaala kwakwe, wainda munkamu yabantu cakuyubaila kutegwa atabonwi kumwi kalyaambauzya kuti: “Kuti ndijate buyo cisani cakwe caatala ndilapona.” Mbwaajatila buyo maaya aacisani ca Jesu, mpoonya-mpoonya walimvwa kuti bulowa bwaleka kuzwa! Waponesyegwa ‘kubulwazi bwamukatazyide kapati.’—Marko 5:27-29.

Mpoonya Jesu wabuzya kuti: “Ino nguni wandiguma?” Ino muyeeya kuti mukaintu ooyu walimvwa buti naamvwa majwi aaya? Petro wamuvwiila Jesu mbuli kuti umukazya buya ategwa: “Omwiiyi, bantu balikubumbilide alimwi akukusyaanikizya.” Aboobo, nkaambo nzi Jesu ncaabuzyila kuti, “Ino nguni wandiguma?” Jesu wapandulula kuti: “Kuli wandiguma, nkaambo ndalimvwa kuti nguzu zyazwa mulindime.” (Luka 8:45, 46) Ncobeni, nguzu zyazwa muli Jesu akaambo kakuponya ooku.

Naabona kuti wazyibwa, mukaintu ooyu waboola kuli Jesu akumufwugamina, kayoowede alimwi kakankama. Kumbele lyabantu boonse, waamba makani oonse camasimpe kujatikizya bulwazi bwakwe alimwi ambwaaponesyegwa. Muciindi cakumubwentela, Jesu wamwaambila majwi aakkazika moyo kuti: “Mwanaangu, lusyomo lwako lwakuponya. Koya muluumuno, alimwi utakaciswi kabili kubulwazi oobu ibwali kukupenzya.”—Marko 5:34.

Cakutadooneka, Ooyo Leza ngwaasala kulela nyika ulaamoyo mubotu, ngusilubomba, ulabalanganya bantu alimwi ulijisi nguzu zyakubagwasya!