Kucikombelo Ku Nazareta

Kakunyina kudooneka bantu balikkomene mu Nazareta. Katanaunka kuti akabbapatizyigwe kuli Johane mwaka omwe iwainda, Jesu wakali sikubeza mapulanga mubusena buno. Pele lino uzyibidwe kuti ngusikucita milimo mipati yamaleele. Bantu bamumunzi ooyu baliyandide kapati kumubona kacita milimo eeyi imwi akati kabo.

Kulangila kwabo kwakomena ciindi Jesu naaunka kucikombelo camumunzi ookwabo mbuli cilengwa cakwe. Pulogilamu yakukomba ibikkilizya kupaila, alimwi akubala mabbuku aa Musa, kweelana ambokucitwa “muzikombelo sabata imwi aimwi.” (Milimo 15:21) Zibeela zyamabbuku aabusinsimi azyalo zilabalwa. Kulangilwa kuti ciindi Jesu naanyamuka kuti abale, wabazyiba bantu banji babungene akaambo kakuti wali kujanika kucikombelo eeci kwamyaka minji. Wapegwa bbuku lyakuvwunga lyamusinsimi Isaya. Wajana mpokulembedwe makani aamba kujatikizya Yooyo uunanikidwe amuuya wa Jehova, aayo aali kuli Isaya 61:1, 2 mu Bbaibbele mazuba aano.

Jesu wabala makani aa Yooyo wakasinsimwa kujatikizya mbwayakukambauka lwaanguluko kubaange, kujalula meso aaboofwu alimwi akujatikizya mwaka uusalidwe wa Jehova. Jesu wajola bbuku kumugwasyilizi mpoonya wakkala. Bantu boonse bamulangisisya. Mpoonya waambaula, ambweni kwaciindi cilamfwu, alimwi nzyaamba zilabikkilizya akaambo kapati kakuti: “Sunu oolu lugwalo ndomwamvwa lwazuzikizyigwa.”—Luka 4:21.

Bantu bagambwa akaambo ‘kamajwi mabotu ngaabaambila’ eelyo batalika kulyaambauzya mulicabo ategwa: “Sena ooyu tali mwana wa Josefa?” Pele akaambo kakuzyiba kuti bayanda kumubona kacita maleele mbuli yaayo ngobakamvwa, Jesu wazumanana kwaamba kuti: “Cakutadooneka muyoondaambila kaambyo aaka kakuti, ‘Omusilisi, kolisilika omwini. Zintu nzitwakamvwa kazicitika ku Kapernauma, kozicita amomuno mumunzi okwanu.’” (Luka 4:22, 23) Kuboneka kuti bantu ibakali basimukobonyina Jesu bayeeya kuti ikuponya kweelede kutalikila mumunzi ookwabo kutegwa bantu bakwe basaangune mbabo kugwasyigwa. Aboobo bayeeya kuti Jesu tanaabacita kabotu.

Akaambo kakuzyiba mbobayeeya, Jesu waamba zintu zimwi izyakacitika kaindi mu Israyeli. Ulaamba, kwakali bamukabafwu banji mucisi ca Israyeli mumazuba aa Elija, pele Elija tanaakatumwa kuli umwi wabo pe. Muciindi caboobo, wakatumwa kuli mukamufwu uutali muna Israyeli waku Zarefati, imunzi uuli munsi-munsi a Sidoni, ooko Elija nkwaakacita maleele aakufwutula buumi. (1 Bami 17:8-16) Alimwi mumazuba aa Elisha, kwakali basicinsenda banji mu Israyeli, pele Elisha wakasalazya buyo Naamani waku Siriya.—2 Bami 5:1, 8-14.

Ino bantu aaba bamumunzi ookwabo Jesu bacita buti nobamvwa kuti ubakozyanisya kuzintu zyakacitika kaindi balo nzyobabona kuti tazikkomanisyi izitondezya kuti balaliyanda akuti tabajisi lusyomo? Aabo ibali mucikombelo banyema kapati, banyamuka akumutola Jesu cakufwambaana anze aamunzi. Bamutola atala acilundu aawo mpouyakidwe munzi wa Nazareta, akusola kumutonkela mujeleele. Pele Jesu wabasupuka akutija. Lino Jesu waselemuka kuya ku Kapernauma, kumunzi uuli kunkomwe yakunyika lwaambo ya Lwizi lwa Galilaya.