Jesu Waumuzya Guwo Mulwizi

Jesu wali kubeleka buzuba boonse alimwi wakatala. Kumangolezya waambila basikwiiya bakwe kuti: “Atuzabukile mutala eliya,” nkokuti mutala aalwizi kuzwa ku Kapernauma.—Marko 4:35.

Kunkomwe ya Lwizi lwa Galilaya nkwiili kujwe kuli busena ibwiitwa kuti Gerasa. Busena oobu alimwi bwiitwa kuti Dekapole. Muminzi yamu Dekapole momuzwide zilengwa zyaba Giriki, nokuba kuti abalo ba Juda banji bakkala muminzi eeyi.

Bantu bamubona Jesu naazwa mumunzi wa Kapernauma. Aboobo kulangilwa kuti kuli mato aambi aatalika kuzabuka lwizi. (Marko 4:36) Mubwini, musinzo wakuya mutala tuuli mulamfwu kapati. Lwizi lwa Galilaya luli buyo mbuli cizyiba cipati, lulampa makkilomita aali 21 mubulamfwu, mpoonya mubufwaafwi lulampa makkilomita aali 12. Pele ndulamfwu kapati kuyaansi.

Nokuba kuti Jesu ulilondokede, cilalimvwisya kuti ulikatede, kayi wabeleka kapati mumulimo wakwe wakukambauka. Aboobo mbobatalikila buyo kweenda, walo walandabala kusyule lyabwato, wabikka mutwe wakwe aacilitulisyo mpoonya zyamutola ŋonzi.

Baapostolo bamwi balicibwene kukwasula bwato, pele oolu talukooba lweendo luuba-uba pe. Kuli malundu aazingulukide lwizi, alimwi ziindi zinji muwo uuli atala aa Lwizi lwa Galilaya inga ulakasaala. Zimwi ziindi, muwo uutontola wamumalundu inga ulaunga kuyaansi akuyaana amuwo uukasaala uuli atala lyamaanzi, eelyo eeci cipa kuti cakutayeeyelwa kube maguwo mapati mulwizi. Eeci ncecacitika lino. Ndilyonya mayuwe atalika kulipwaya kubwato. Bwato bwatalika ‘kuzula maanzi alimwi baba muntenda.’ (Luka 8:23) Nokuba boobo, Jesu wazumanana koona!

Basikweenzya bwato basoleka canguzu kubunyonoona bwato mbuli mbobacita lyoonse nokuli guwo. Pele aciindi eeci zyayuma zintu. Akaambo kakuyoowa kuti balafwa, bamubusya Jesu balaamba: “Mwami, kotuvwuna, twafwa!” (Matayo 8:25) Basikwiiya bayoowa kuti balanyikila akunywida!

Naabuka Jesu, wabuzya baapostolo bakwe kuti: “Nkaambo nzi ncomuyoowede boobu nywebo nobasilusyomo luniini?” (Matayo 8:26) Kumane Jesu waambila guwo alwizi kuti: “Umuna! Batama!” (Marko 4:39) Muwo iwali kubbubbula canguzu waleka alwalo lwizi lwabatama. (Marko a Luka nobaamba cintu eeci cigambya, cakusaanguna bakankaizya kwaamba Jesu mbwaakaumuzya guwo munzila yamaleele, mpoonya nobayabaambe kuceya kwalusyomo lwabasikwiiya.)

Amuyeeye buyo mbobalimvwa basikwiiya akaambo kaceeci icacitika! Bazwa akubona lwizi ilwali kuvwundauka ciyoosya nkolwaile kubatama akuumuna wi. Bayoowa citaambiki. Batalika kubuzyanya kuti: “Ino mubwini nguni ooyu? Noliba guwo alimwi alwizi zilamumvwida.” Mpoonya basika mutala lyalwizi kakunyina penzi. (Marko 4:41–5:1) Ambweni mato aambi aalya aasaangunide kweenda mulwizi acikonzya kujokela kunkomwe yakumbo.

Eelo kaka cilakkazika moyo kuzyiba kuti Mwana wa Leza ulijisi nguzu zyakweendelezya zilengwaleza! Ciindi aakutalika kulela nyika eeyi yoonse mboizulwa mu Bwami bwakwe, bantu boonse bayakuliiba, nkaambo takukabi ntenda ziyoosya zyacibukilambuta!