Jesu Watondezya Cini Cipa Kukkomana

Jesu wazwa akwiinduluka malailile aakwe kujatikizya mupailo, pele aaya taali ngamakani alikke aavwula kubuka mumulimo wakwe. Ciindi naakali kucita maleele mu Galilaya, Jesu bakamutamikizya kuti wakali kucita oobo munguzu zyamweendelezi wamadaimona. Lino akwalo kuno ku Judaya makani aaya abuka.

Ciindi Jesu naatanda daimona mumuntu umwi ilyali kumulesya kwaambaula, makamu aabantu agambwa. Pele basikumukazya tiibagambwa. Baamba makani ngamunya aakubeja, ategwa: “Utanda madaimona kwiinda munguzu zya Belezebule imweendelezi wamadaimona.” (Luka 11:15) Ibambi, kabayanda bumboni abumbi bumupandulula Jesu, bamwaambila kuti abape citondezyo kuzwa kujulu.

Akaambo kakuzyiba kuti bamusunka buya, Jesu wabavwiila mbubonya mbwaakavwiila basikumukazya bali mbuli baaba mbaakajana mu Galilaya. Waamba kuti bwami buli boonse bwaandeene bulawa, kumane wabuzya kuti: “Ikuti awalo Saatani waandaana mwini, ino bwami bwakwe bulaima buti?” Mpoonya Jesu wabaambila cakutainda mumbali kuti: “Ikuti munwe wa Leza ngonditandya madaimona, nkokuti Bwami bwa Leza ncobeni bwamusikila kamutabuyeeyeli.”—Luka 11:18-20.

Eeci ncaamba Jesu kujatikizya “munwe wa Leza” ceelede kubayeekezya bantu aaba bamuswiilila kujatikizya icakacitika kaindi mubuumi bwabana Israyeli. Aabo ibakali muŋanda yamwami Farao ibakamubona Musa kacita maleele bakakankamuka kuti: “Ooyu munwe wa Leza!” Alimwi wakali “munwe wa Leza” iwakalemba Milawo Iili Kkumi aamabwe obilo aapapalete. (Kulonga 8:19; 31:18) Mbubonya buyo, “munwe wa Leza,” nkokuti muuya uusalala, naa nguzu zya Leza, ngonguwe lino uupa kuti Jesu akonzye kutanda madaimona akuponya balwazi. Aboobo, Bwami bwa Leza ncobeni bwabasikila cakutayeeyela basikumukazya aaba, nkaambo Mwami uusalidwe wa Bwami oobu, Jesu, mpali mpamunya aawo akati kabo kacita milimo eeyi.

Nguzu nzyajisi Jesu zyakutanda madaimona zitondezya kuti ulaanguzu zyakuzunda Saatani, mbubonya muntu singuzu mbwakonzya kuunka akuzunda muntu umwi uujisi zilwanyo zikkwene uulinda ŋanda yamwami. Jesu alimwi wainduluka cikozyanyo ncaakaambide camuuya uusofweede uuzwa mumuntu umwi. Ikuti muntu ooyo tanaauzuzya zintu zibotu moyo wakwe ooyo uusalazyidwe, muuya ooyo uyakujokela antoomwe amyuuya imbi iili ciloba, eelyo iyakupa kuti bukkale bwamamanino bwamuntu ooyo bubije kapati kwiinda bwakusaanguna. (Matayo 12:22, 25-29, 43-45) Eeco ncecili mukucitikila cisi ca Israyeli.

Makani aaya amunjila mukaintu umwi uuli mukuswiilila Jesu eelyo woompolola kuti: “Ulikkomene mutumbu wakakuyumwide mwida lyakwe akukunyonsya!” Bamakaintu ba Juda bakali kuyandisisya kuzyala musinsimi, ikwaambisya kuzyala Mesiya. Aboobo, kuboneka kuti mukaintu ooyu uyeeya kuti Mariya weelede kuti ulikkomene kapati mbwali banyina mwiiyi uuli boobu. Pele, Jesu walulamika mukaintu ooyu kujatikizya cini cipa kukkomana, wati: “Peepe, ibakkomene mbaabo baswiilila jwi lya Leza akucita ncolyaamba!” (Luka 11:27, 28) Jesu kunyina buzuba naakaambide kuti Mariya weelede kulemekwa kwiinda bamwi. Muciindi caboobo, musankwa naa mukaintu ulakonzya kuba alukkomano lwini-lwini akaambo kakuti ubelekela Leza cakusyomeka, ikutali akaambo kamukowa ngwajisi naa milimo imwi yakumubili njaacita.

Mbubonya Jesu mbwaakacita ku Galilaya, wasinsa bantu akaambo kakuti bayanda kuti abape citondezyo kuzwa kujulu. Waamba kuti kunyina citondezyo ncobatiipegwe ccita buyo “citondezyo ca Jona.” Jona wakaba citondezyo kwiinda mukukkala mazuba otatwe mwida lyanswi alimwi akwiinda mukukambauka cabusicamba, calo cakapa kuti bana Nineve beempwe. Jesu waamba kuti: “Pele amubone! Imupati kwiinda Jona mpali aano.” (Luka 11:29-32) Alimwi Jesu mupati kwiinda Solomoni, ooyo iwakali abusongo mbwaakaboola kuzyikumvwa mwami mukaintu waku Sheba.

Jesu wayungizya kuti: “Amana kuyasya lambe, muntu talisisi naa kulivwunika cisuwo, pele ulalibikka acibikkilo calambe.” (Luka 11:33) Kuboneka kuti aawa upandulula kuti kuyiisya akucita maleele kubantu aaba cili mbuli kusisa mumuni walambe. Akaambo kakuti meso aabo taalangide acintu comwe, tiibakabona kaambo ncoicitilwa milimo yakwe.

Jesu wazwa akutanda daimona alimwi wapa kuti syaataambi umwi atalike kwaambaula. Eeci ceelede kukulwaizya bantu kulemeka Leza akwaambila bamwi milimo njali mukucita Jehova. Aboobo, Jesu ulaamajwi aakubacenjezya basikumukazya, wati: “Aboobo, cenjela kutegwa mumuni uuli mulinduwe utabi mudima. Eelyo ikuti mubili wako woonse kaumweka, kautajisi cibeela cili coonse camudima, mubili ooyo woonse unoomweka mbubonya mbuli lambe likumunikila.”—Luka 11:35, 36.