Bantu Bayandika Luzibo lwa Leza

“Ncobeni uyoomvwa kuyoowa Jehova, akujana luzibo lwa-Leza.”—TUSIMPI 2:5.

1. Nkaambo nzi moyo wamuntu ncuunga wategwa mmulimo wahaazibwene iwakaanzwa a Leza?

ACIINDI ncicona cino, kuli myoyo iisika ku 5,600,000,000 iiduntaana mubantu baansi. Buzubaa buzuba imoyo wenu nywebo uladuntaana ziindi zili 100,000 kuupompa malita aabulowa aasika ku 7,600 munsinga zyanu izinga zyalampa makkilomita aali 100,000. Kunyina mulambi uubeleka kwiinda moyo, walo uuli mmulimo wahaazibwene iwakaanzwa a Leza.

2. Ino moyo wacikozyanyo inga muupandulula buti?

² Kunze lyayeeyi, alimwi kuli myoyo yacikozyanyo buyo iisika ku 5,600,000,000 iibeleka munyika. Mumoyo ooyu wacikozyanyo buyo momuli mizeezo yamumoyo, iitupa kucita ncotucita, ikulombozya kwesu. Momuzwa kuyeeya kwesu, kuteelela kwesu, kuyanda kwesu. Imoyo ooyu wacikozyanyo ulakonzya kulisumpula naa kulibombya, kuusa naa kubotelwa, kutaziba naa kuziba.—Nehemiya 2:2; Tusimpi 16:5; Matayo 11:29; Incito 14:17; 2 Ba-Korinto 4:6; Ba-Efeso 1:16-18.

3, 4. Mbuti myoyo mbwiili mukujatikizigwa amakani mabotu?

³ Jehova Leza ulakonzya kubona zili mumoyo wamuntu. Tusimpi 17:3 yaamba kuti: “Cuumpilo ncansiliva, nceceengelo cangolida, pele Jehova ulasunka myoyo.” Nokuba boobo, muciindi cakwiide kulanga zili mumoyo wamuntu akumubeteka, Jehova ulabelesya Bakamboni bakwe kugwasilizya myoyo yabantu kwiinda mumakani mabotu. Eeci cileendelana amajwi aamwaapostolo Paulo ngaakalemba aakuti: “Umwi aumwi uulilila izina lya-Mwami ulafutuka. Pele bamulilile buti ngubatana kusyoma? Alimwi bamusyome buti ngubatana kumvwa? Alimwi, bamvwe buti nikutakwe sikukambauka? Alimwi, bantu bakambauke buti, batatumwa? Mbubonya mbukulembedwe kuti, Abota loko maulu aabaabo bakambauka Ivangele lyamakani mabotu.”—Ba-Roma 10:13-15

⁴ Camubotela Jehova ikutuma Bakamboni bakwe kumasena oonse aanyika kuti “[ka]bakambauka Ivangele lyamakani mabotu” akujana baabo balaa myoyo iiteelela. Lino tulainda kumweelwe wa 5,000,000—nkokuti Kamboni omwe-omwe upiminwa bantu bali 1,200 anyika. Ikusisya makani mabotu kuzyuulu zyamamiliyoni aabantu anyika tacili cintu cuubauba pe. Pesi Leza uluusololela mulimo ooyu kwiinda muli Jesu Kristo, alimwi uli mukuyobolola baabo basyomeka. Munzila eeyi ibusinsimi bulembedwe kuli Isaya 60:22 bulazuzikizigwa, ategwa: “Kakamu kaniini kayooba cuulu, abantu bace bayooba mukowa mupati. Mebo nde-Jehova njoofwambya makani aya kuciindi cao ceelede.”

5. Ino luzibo ninzi, alimwi ninzi cinga caambwa kumakani aabusongo bwanyika?

⁵ Eeco ciindi, ndendilyona lino, alimwi kaambo aaka kalalibonya ikakuti zyuulu zyamamiliyoni aabantu ziyandika luzibo. Luzibo ncocaamba cini-cini nkuteelela zintu kwiinda mukucitikilwa, mukweebelela, amukwiiya. Inyika yajana luzibo lunji. Kwacitika lusumpuko mukweenda, mubusilisi, amukutambikizyanya twaambo. Pele sena nduzibo lwanyika muntu ndwayandika ncobeni? Peepe! Inkondo, kudyaaminina, malwazi, alimwi alufwu nzintu zizumanana kupenzya muntu. Ibusongo bwanyika kanjikanji buli mbuli museenga weenda akambizi kamunkanda.

6. Kumakani aabulowa, mbuti luzibo lwa Leza mbolwiindene abusongo bwanyika?

⁶ Mucikozyanyo: Myaanda yobile yamyaka eeyi yainda, kanji kanji bulowa bwaali kugwisigwa mumuntu ikusola kumusilika. George Washington, imuleli mutaanzi wacisi ca United States, wakagwisigwa bulowa ziindi zili mbozibede mumawoola aakwe aamamanino mubuumi bwakwe. Cimwi ciindi wakati: “Amundileke nduunke kabotu-kabotu; Nsecikonzi kupona kwaciindi cilamfwu.” Wakaliluzi, wakafwa mbubwena buzuba oobo bwa December 14, 1799. Mubusena bwakugwisya muntu bulowa, sunu kwaambwa kapati kubikka bulowa mukati mumubili wamuntu. Zyoonse zyobile nzila eezi zyazwide buyo mapenzi aajaya. Pesi coonse eeci ciindi, Ijwi lya Leza lyali kwaamba kuti: “Mulikasye kulya . . . bulowa.” (Incito 15:29) Luzibo lwa Leza luliluzi lyoonse, lulasyomeka alimwi ndwaciindi coonse.

7. Ino luzibo lwini-lwini lwamu Magwalo lwiindene buti abusongo bwanyika kumakani aakulela bana?

⁷ Amuyeeye acimbi cikozyanyo cabusongo bwanyika ibutasyomeki. Kwamyaka minji basilisi bamalwazi aajatikizya mizeezo bakali kukulwaizya kuti bana kabalekeledwe kucita mbuli mbobayanda, pesi umwi wabo kumbele wakazoozumina kuti ooku kwakali kulubizya. Iba German Philological Association kuli nobakaambide kuti kulekelezya bana “kulaa mbokuswaangene amapenzi aayo ngotujisi lino abakubusi.” Busongo bwanyika nobuzumbaana buti ooku akooku mbojene butonkwa aamuuwo, lwalo luzibo lwini-lwini lwamu Magwalo talukwe nolwali kuzungaana pe. Ibbaibbele lilapa lulayo lutakwe ncolwiindizya mukulaya bana. “Koma mwana wako, elyo uyookupa lulyokezyo, uyooletela moyo wako kubotelwa,” mbulwaamba lugwalo lwa Tusimpi 29:17. Lulayo luli boobu ndwakucita caluyando, nkaambo Paulo wakalemba ategwa: “Numawisi, mutanooluvukili bana banu, pele amubalele mulwiiyo lwa-Mwami amumilazyo yakwe.”—Ba-Efeso 6:4.

“Luzibo lwa Leza”

8, 9. Inga mwacipandulula buti icaambwa ku Tusimpi 2:1-6 kujatikizya luzibo oolo muntu ndwayandika ncobeni?

⁸ Nokuba kuti Paulo wakali mwaalumi uuyiide, wakati: “Akuli muntu akati kanu uuliyunga kuti, Ndi musongo kubusongo bwaansi ano, elyo oyo muntu abe mufubafuba, kuti abe musongo ncobeni. Nkaambo busongo bwaansi ano mbufubafuba buyo kumeso aa-Leza.” (1 Ba-Korinto 3:18, 19) Alikke Leza nguunga wapa luzibo ndobayandika ncobeni bantu. Ikwaamba ndulo, Tusimpi 2:1-6 yaamba kuti: “Mwanaangu, na watambula majwi aangu, akubamba kabotu malailile aangu, na wacenjeka kutwi kwako kubusongo, akubika moyo wako kukumvwisya makani, na walilila kumvwa, akoongolola kuti ube amaanu, na wabuyandaula mbuli insiliva, akubulangaula mbuli zintu ziyandika zisisidwe, ncobeni uyoomvwa kuyoowa Jehova, akujana luzibo lwa-Leza. Nkaambo Jehova ulaabila busongo; mumulomo wakwe mulazwa luzibo abusongo.”

⁹ Aabo beenzegwa aamyoyo mibotu, balaswiilila kubusongo kwiinda mukulubelesya kabotu luzibo lupedwe aa Leza. Balabikka myoyo yabo kukumvwisya, kabapampula kabotu-kabotu twaambo ooto ntobaiya. Munzila imwi inga bategwa balilila kumvwa, antela kuti kabakonzya kubona mbuli mbazu zyamakani mboziswaangene. Ibantu balaa myoyo iiluzi babeleka mbuli kuti bayandaula nsiliva akulangaula zintu ziyandika zisisidwe. Ino nzintu nzi ziyandika izijanwa abaabo balaa myoyo iiteelela? “Nduzibo lwa Leza.” Ino eeco ncecinzi? Ikucuubyaubya, nduzibo lujanika mu Jwi lya Leza, Ibbaibbele.

10. Ncinzi ncotweelede kucita kutegwa tupone kabotu munzila yakumuuya?

¹⁰ Luzibo lwa Leza lulagwasya, lulikkalikide, lupa buumi. Lulagwasya kupona kabotu munzila yakumuuya. Paulo wakakulwaizya Timoteo kuti: “Kojatisya majwi menimeni oonse ngowakamvwa kulindime, alusyomo akuyandana kuli muli-Kristo Jesu.” (2 Timoteo 1:13) Imwaambo umwi aumwi ulaa bubambe bwamajwi. Alimwi “mwaambo uusalala” wamasimpe aamu Magwalo ulaa bubambe bwa “majwi menimeni,” alo aa amba kapati zyamutwe wamakani wa Bbaibbele iwakusimpya bulelo bwa Jehova kwiinda mu Bwami. (Zefaniya 3:9) Tweelede kuti tubambe nzila eeyi yakubelesya majwi menimeni mumizeezo amumoyo. Ikutegwa tutantamuke malwazi aamoyo wacikozyanyo akuponenena munzila yakumuuya, tuleelede tubelesye Bbaibbele mubuumi akuzibelesya munzila iikkwene izipo zya Leza nzyapa kwiinda “[mu]muzike musyomesi uucenjede.” (Matayo 24:45-47; Tito 2:2) Katuyeeyede lyoonse kuti tuyandika luzibo lwa Leza kutegwa tupone kabotu munzila yakumuuya.

11. Ntwaambo nzi tumwi muntu ncayandika luzibo lwa Leza?

¹¹ Amuyeeye atumbi twaambo zyuulu zyamamiliyoni aabantu baanyika ncoziyandika luzibo lwa Leza. Sena boonse balizi mboyakaboola-boola nyika alimwi abantu? Peepe tabazi. Sena bantu boonse balimuzi Leza mwini-mwini alimwi a Mwanaakwe? Sena muntu woonse ulaa luzibo luli loonse lwatwaambo Saatani ntwaakabusya kujatikizya bulelo bwabuleza akusyomeka kwabuntu? Alimwi peepe. Sena bunji bwabantu balizi ncotucembaalila akufwa? Alimwi inga twaamba buyo kuti peepe. Sena balibwene kuti Bwami bwa Leza bulalela lino akuti tuli mumazubaa mamanino? Sena balizi kuti kuli basikalumamba bamuuya babi? Sena bantu boonse balaa luzibo lwini-lwini lujatikizya mbokukkalwa kabotu mumukwasyi? Alimwi sena luundu lulizi kuti buumi bwakukondwa mu Paradaiso ncecintu Mulengi ncakanzide kuletela bantu bamvwa? Ayalo eeyi mibuzyo yiingulwa kuti peepe. Aboobo kalisalede kaambo kakuti muntu uyandika luzibo lwa Leza.

12. Mbuti Leza mbotunga twamukomba “mumuuya amubwini”?

¹² Alimwi bantu bayandika luzibo lwa Leza nkaambo kancaakaamba Jesu mumupailo mangolezya aamamanino mubuumi bwakwe bwaansi. Baapostolo baleelede akabanjila makani ngaakabaambila aakuti: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Ikubelesya luzibo luli boobu nenzila ilikke yakukomba Leza munzila iitambulika. “Leza Muuya, aboobo aabo bamukomba baleelede kumukomba mumuuya amubwini,” mbwaakaamba Jesu. (Joni 4:24 Ci) Tulamukomba Leza “mumuuya” ciindi notweenzegwa amyoyo iizwide lusyomo aluyando. Mbuti mbotumukomba “mubwini”? Nkwiinda mukwiiya Jwi lyakwe akumukomba kweelana abwini buyubulwidwe—nkokwaamba kuti “luzibo lwa-Leza.”

13. Kulembedwe nzi ku Incito 16:25-34, alimwi ncinzi ncotunga twaiya kulincico?

¹³ Izyuulu zyabantu zilatalika kukomba Jehova mwakaa mwaka. Pele, sena ziiyo zya Bbaibbele zyeelede kucitwa abantu bayanda kwaciindi cilamfwu, naa cilakonzeka kuti ibalaa myoyo mibotu bafwambaane kusika kukubbapatizigwa? Amuyeeye cakacitika kumulindizi wantolongo abamuŋanda yakwe ibaambwa ku Incito 16:25-34. Paulo a Sila bakalaangidwe ku Filipi, pesi akati kamasiku imuzuzumo wanyika wakajalaula milyango yantolongo. Kayeeya kuti basintolongo boonse baloboka akuti uyoosubulwa loko, ooyu mulindizi wantolongo wakatiilijaye naatakamvwa Paulo umwaambila kuti boonse nkobali. Paulo a Sila “bakamwaambila makani aa-Mwami antoomwe abamuŋanda yakwe boonse.” Oyo mulindizi wantolongo amukwasyi wakwe bakali Banamasi balo batakajisi luzibo lwa Magwalo Aasalala. Pesi mubusiku oobo bomwe, bakaba basyomi. Kuyungizya waawo, “ndilyonya wabapatizigwa antoommwe abana bakwe boonse.” Icili boobu tacivwuli kucitika, pesi bantu bapya bakayiisigwa masimpe aantalisyo, bamane bakayungizya kwiiya zimbi zintu kumiswaangano yambungano. Cintu camusyobo ooyu cileelede kacikonzeka kucita asunu.

Butebuzi Mbupati!

14. Nkaambo nzi ncokuyandika kuyungizya mweelwe waziiyo zya Bbaibbele zigwasya nzyotweendelezya muciindi cifwiifwi?

¹⁴ Inga cabota kuti Bakamboni ba Jehova kabakonzya kuyungizya mweelwe waziiyo zya Bbaibbele zigwasya nzyobeendelezya muciindi cifwaafwi. Kulayandika ncobeni kucita boobu. Mucikozyanyo mumanyika aaku Eastern Europe, bantu babikkidwe mumulongo buya wakulindila ziiyo zya Bbaibbele. Akumasena ambi mbubwena buyo. Mudolopo limwi mucisi ca Dominican Republic, Bakamboni bosanwe bakalombwa abantu banji cakuti teebakali kukonzya kweendelezya ziiyo zyoonse. Aboobo bakacita buti? Bakakulwaizya baabo bakali kuyanda ikuti kabajanika kumiswaangano yaku Ŋanda ya Bwami nobacili mumulongo wakulindila ziiyo zya Bbaibbele. Cili mbubwena oobu amumasena aambi munyika.

15, 16. Ncintu nzi icaletelwa kubinzya kumwaya kwaluzibo lwa Leza, alimwi mbupanduluzi nzi bumwi bujatikizya ncico?

¹⁵ Kwajuka mbazu zinji, imyuunda mipati yakutebula kubantu ba Leza. Nokuba kuti Jehova, “Mwami wabutebuzi,” ucituma bambi babelesi, ucili mupati mulimo uuceede. (Matayo 9:37, 38) Ikumwaya luzibo lwa Leza cakufwaambaana alimwi akubinzya mulimo wakupa bantu kuti babe basiciiya, ‘muzike musyomesi’ waleta cintu cimwi calo cinga cagama twaambo tuyandika mukufwiinsya kutegwa sikwiiya Bbaibbele aye ambele aciiyo cimwi acimwi. Ndibbuku lipya lyalo linga lyamanwa cakufwambaana muziiyo zya Bbaibbele—ambweni mumyezi misyoonto buyo. Alimwi likonzya kuyumunwa mumabbeeke esu, muzikwama zyesu mane nomuba munkomo! Myaanda yazyuulu zyabaabo bakabungene ku Muswaangano Wacooko wa Bakamboni ba Jehova wa “Basikutembaula Bakondwa” bakakkomana kutambula bbuku eeli lyamapeeji aali 192 ililaa mutwe wakuti Luzibo Lutola Kubuumi Butamani.

¹⁶ Ibalembi bazwa mumasi aandeene-andeene bakabamba makani alo aakazoolondolwa ikupanga bbuku lya Luzibo. Aboobo ibbuku eeli lyeelede kujatikizya bamumasi manji. Pele sena ciyootola ciindi cilamfwu kumwaya bbuku eeli mumilaka yabantu munyika yoonse? Peepe, nkaambo ibbuku lyamapeeji aali 192 lilakonzya kufwambaana kusandululwa kwiinda mabbuku mapati. Nomuba mu October 1995 ibamu Kkomiti Yakulemba iya Kabunga Keendelezya bakazumizizye kale kusandululwa kwabbuku eeli mumilaka yiinda ku 130 kuzwa mu Cingisi.

17. Ntwaambo nzi tupa kuti cuube-ube kubelesya bbuku lya Luzibo?

¹⁷ Twaambo ituli mucibalo cimwi acimwi cabbuku lya Luzibo tweelede kugwasya basikwiiya kuti bayaambele munzila yakumuuya cakufwambaana-fwambaana. Ibbuku eeli ikasimpe kamu Magwalo lilakaamba munzila yakuyaka. Taligeme ziyiisyo zyakubeja. Ikuubauba kwamulaka uuli mukati alimwi akulimvwisya kwatwaambo kweelede kucuubyaubya kubelesya bbuku eeli mukweendelezya ziiyo zya Bbaibbele akugwasya bantu kuti babe aluzibo lwa Leza. Kunze lyamagwalo aazubululwa, kuli zimbi zibalo zyamu Bbaibbele izyaambidwe buyo zyalo sikwiiya nzyakonzya kulangaula mukulibambila kubandika. Aaya alakonzya kubalwa mukati kaciiyo kuti ciindi cazumizya, pele inga tacikoogwasya ikuleta makani aakuyungizya aanga asinkilizya twaambo tubandikwa. Muciindi caboobo aabo beendelezya ciiyo ca Bbaibbele beelede kusoleka kuteelela alimwi akupandulwida sikwiiya eeco icili mukusinizigwa mucibalo cimwi acimwi. Eeci caamba kuti mwiiyi weelede kusungwaala kubala kutegwa twaambo tupati atuteelele kabotu.

18. Nkukulwaizya nzi kumwi kwapegwa mukubelesya bbuku lya Luzibo?

¹⁸ Mbuti bbuku eli lya Luzibo Lutola Kubuumi Butamani mbolinga lyabinzya mulimo wakupa kuti bantu babe basiciiya? Eeli bbuku lyamapeeji aali 192 lilakonzya kuyiigwa muciindi cifwaafwi kwiinda butola amwi, alimwi aabo “[beelela, NW] buumi butamani” beelede kabakonzya kuzulizya kwiiya mulindilyo kuti balyaabe kuli Jehova akubbapatizigwa. (Incito 13:48) Aboobo atulibelesye kabotu bbuku lya Luzibo mumulimo. Kuti sikwiiya Bbaibbele kali usakene kale mukwiiya limbi bbuku, inga cagwasya ambweni kulimanizya buyo. Kwataba boobo, twamukulwaizya kuti mucince ziiyo zyenu kuya mubbuku lya Luzibo. Lyamanwa eeli bbuku lipya, twamukulwaizya kuti muteendelezyi ciiyo mubbuku limbi asikwiiya nguwena ooyo pe. Aabo bazumina kasimpe balakonzya kululondola luzibo lwabo kwiinda mukujanika kumiswaangano ya Bakamboni ba Jehova alimwi akwiinda mukulibalila beni Ibbaibbele alimwi amabbuku aaindene-indene aa Bunakristo.—2 Johane 1.

19. Nokutana kweendelezegwa ciiyo ca Bbaibbele mubbuku lya Luzibo, nkaambo nzi ncocinga cagwasya ikulanga mapeeji 175 kusikila ku 218 mubbuku lya Olinganizidwa Kusilidza Uministala Wathu?

¹⁹ Ibbuku lya Luzibo lyakalembelwa kugwasya muntu kwiingula mibuzo eeyo yoonse baalu njobalanga abasikumwaya batabbapatizidwe ibayanda kuti babbapatizigwe kuba Bakamboni ba Jehova. Aboobo, nomutaninga kucinca ziiyo nzyomucita lino ikuya mubbuku eeli lipya, mwakulwaizigwa kuti mutole mawoola aali mbwaabede ikulanga mibuzyo iili amapeeji 175 kusikila ku 218 mubbuku lya Olinganizidwa Kusiridza Uministala Wathu.a Eeci ciyoomugwasya kusimpya kwaamba kwiingula kwamibuzyo eyi muciiyo ca Bbaibbele camubbuku lya Luzibo.

20. Ino mukanza kucita nzi abbuku lya Luzibo Lutola Kubuumi Butamani?

²⁰ Bantu koonse-koonse beelede kwaamvwa makani mabotu. Ee, muntu uyandika luzibo lwa Leza, alimwi Jehova ulijisi Bakamboni bakwe ibakuluzibya. Mpaawa lino twabaa bbuku lipya ilyapegwa a Taata wesu wakujulu siluyando kwiinda mumuzike musyomesi uucenjede. Sena Muyoolibelesya ikuyiisya kasimpe akuletela zina lya Jehova lisalala ibulemu? Jehova uyoomulongezya ncobeni nomufwundumene mukutolela bantu banji luzibo lutola kubuumi butamani.

Bupanduluzi buyungizidwe

Inga Mwaingula Buti?

◻ Ino moyo wacikozyanyo inga muupandulula buti?

◻ Ino luzibo lwa Leza ninzi?

◻ Nkaambo nzi luzibo lwa Leza ncoluyandika kubantu?

◻ Ndibbuku nzi lyakazwa, alimwi mbuti mbomukanza kulibelesya?

[Cifwanikiso icili apeeji 23]

Kuli twaambo tunji zyuulu zyamamiliyoni aabantu baanyika ncobayandika luzibo lwa Leza