CIIYO 22
Mbuti Mbomukonzya Kwaambila Bamwi Makani Mabotu?
Mbomuyaabwiiya kasimpe kamu Bbaibbele, inga mwalimvwa kuti, ‘Boonse beelede kukazyiba!’ Masimpe boonse beelede kukazyiba! Pele mulakonzya kulibilika kujatikizya kwaambila bamwi nzyomwiiya. Atubandike mbomukonzya kulizunda penzi lyakulibilika alimwi akutalika kwaambila bamwi makani mabotu aamu Bbaibbele calukkomano.
1. Mbuti mbomukonzya kwaambila bantu mbomuzyi nzyomwiiya?
Basikwiiya ba Jesu bakaamba kuti: “Tatukonzyi kuleka kwaamba zintu nzyotwakabona akumvwa.” (Milimo 4:20) Bakakakkomanina kapati kasimpe cakuti bakali kuyanda kwaambila bantu banji kujatikizya nkako. Sena andinywe mbomulimvwa oobo? Ikuti kacili boobo, amujane nzila mbomukonzya kubaambila cabulemu banamukwasyi alimwi abalongwe kujatikizya nzyomwiiya.—Amubale Bakolose 4:6.
Nzila zimwi zikonzya kumugwasya kutalisya mubandi
Ciindi nomubandika amunamukwasyi, mulakonzya kutalisya kaambo kamu Bbaibbele kwiinda mukwaamba kuti: “Kuli kaambo kamwi kakkomanisya nkondaiya nsondo iino.”
Amumwaambile lugwalo lukulwaizya mulongwe uucisidwe naa uutyompedwe.
Ciindi babelesinyoko nobamubuzya mboyakabede wikkeendi, amubaambile nzyomwakaiya lyaciiyo ca Bbaibbele naa kumuswaangano wambungano.
Amubatondezye balongwe banu webbusaiti ya jw.org website.
Amubatambe bamwi kuti bamusangane ciindi nomwiiya Bbaibbele, naa kubatondezya mbobakonzya kulomba ciiyo ca Bbaibbele a jw.org.
2. Nkaambo nzi kukambauka ambungano ncoili mbaakani mbotu?
Basikwiiya ba Jesu bakacita zinji kunze buyo lyakukambauka makani mabotu kubantu mbobakazyi. Jesu ‘wakabatuma bobilo-bobilo kuti bamusolwede kuminzi yoonse’ kuyookambauka. (Luka 10:1) Kucita boobu kwakapa kuti bantu banji babe acoolwe cakumvwa makani mabotu. Alimwi kukambauka antoomwe kwakabapa kukkomana kapati basikwiiya. (Luka 10:17) Sena andinywe inga mwalibikkila mbaakani yakukambauka ambungano?
AMWIIYE ZINJI
Amubone mbomukonzya kulizunda penzi lyakulibilika alimwi akujana lukkomano ciindi nomwaambilizya makani mabotu.
3. Jehova unooli andinywe
Bamwi ibayanda kutalika kukambauka balakonzya kulibilika kujatikizya mbobakonzya kubabona bamwi naa zintu nzyobakonzya kubaambila.
Sena mulalibilika kwaambila bamwi zintu nzyomwiiya? Nkaambo nzi?
Atweebelele VIDIYO, akubandika mubuzyo uutobela.
Mbuti bakubusi Bakamboni aaba mbobakakuzunda kuyoowa?
Amubale Isaya 41:10, akubandika mubuzyo ooyu:
Ikuti kamuyoowa kukambauka, ino mupailo inga wamugwasya buti?
Sena Mulizyi?
Bunji bwa Bakamboni ba Jehova bakali kuyeeya kuti inga tiibacikonzya kukambaukila bamwi makani mabotu. Mucikozyanyo, ba Sergey bakali kulitenga alimwi cakali kubakatazya kubandika abantu. Mpoonya bakatalika kwiiya Bbaibbele. Bakaamba kuti: “Nokuba kuti ndakali kuyoowa, ndakatalika kwaambila bamwi nzyondakali kwiiya. Cigambya ncakuti, kwaambila bamwi kujatikizya Bbaibbele kwakandipa kuleka kulitenga. Alimwi kwaambila bamwi zintu nzyondisyoma kwakayumya lusyomo lwangu.”
4. Amutondezye bulemu
Ciindi nomukambauka makani mabotu, amuyeeye zintu nzyomukonzya kwaamba alimwi ambomukonzya kuzyaamba. Amubale 2 Timoteyo 2:24 a 1 Petro 3:15, akubandika mibuzyo eeyi:
Mbuti mbomukonzya kutubelesya tupango ootu ciindi nomubandika abamwi kujatikizya Bbaibbele?
Banamukwasyi bamwi naa balongwe balakonzya kumukazya. Ncinzi ncomweelede kucita? Pele alimwi ncinzi ncomuteelede kucita?
Nkaambo nzi ncocili kabotu kubelesya mibuzyo cabupampu, muciindi cakubaambila nzyobeelede kusyoma?
5. Kukambauka makani mabotu kuletela lukkomano
Jehova wakapa Jesu mulimo wakukambauka makani mabotu. Ino Jesu wakali kuubona buti mulimo ooyo? Amubale Johane 4:34, akubandika mibuzyo eeyi:
Kulya zyakulya zibotu kutupa kuti katupona alimwi akukkomana. Ino nkaambo nzi Jesu ncaakakozyanisya kucita kuyanda kwa Leza mbuli kukambauka makani mabotu kucakulya?
Ino muyeeya kuti ndukkomano nzi lukonzya kuboola kwiinda mukukambauka makani mabotu?
Mizeezo
Lyamuswaangano wamukati kansondo, amubone nzila mbomukonzya kutalisya mibandi.
Amubandike amwiiyi wanu mbomukonzya kulilembya kunoopa makani lyamuswaangano wamukati kansondo. Zibeela zyabasicikolo inga zyamugwasya kuba abusicamba bwakwaambila bamwi nzyomwiiya.
Amubelesye cibeela cakuti “Bamwi Baamba Kuti” naa cakuti “Umwi Inga Wabuzya Kuti,” izili mubbuku eeli ikulibambila mbomukonzya kwiingula mibuzyo njobavwula kubuzya bantu naa bantu basola kusinkila mibandi.
UMWI INGA WABUZYA KUTI: “Musa, ino waamba zyongaye?”
Mbuti mbomukonzya kucibelesya coolwe eeci kwaambila muntu nzyomwiiya mu Bbaibbele?
MUBUFWAAFWI
Kwaambila bamwi makani mabotu kuletela lukkomano, alimwi ncuuba-uba kutalika kwiinda mbomuyeeya.
Ncinzi Ncomwaiya?
Nkaambo nzi ncotwaambila bamwi makani mabotu?
Mbuti mbomukonzya kucita oobo cabulemu?
Mbuti mbomukonzya kuzunda penzi lyakulibilika kujatikizya kukambauka?
AMUZYIBE ZINJI
Amubone nzila zyone zitakatazyi nzyomukonzya kubelesya kwaambila bamwi makani mabotu kubelesya kakkaadi ka jw.org.
Amwiiye bube bone ibukonzya kumugwasya kwaambilizya makani mabotu.
“Sena Mulilibambilide Kuba Bazubi Babantu?” (Ngazi Yamulindizi, September 2020)
Amweebelele vidiyo akubona cikozyanyo camu Bbaibbele icikonzya kutugwasya kuba basicamba notwaambilizya makani mabotu nokuba kuti tuli bana.
Amubone mbomukonzya kubandika zyamu Bbaibbele abanamukwasyi ibatanaiya kujatikizya Jehova.
“Kubasika Amoyo Banamukwasyi Batali Basyomima” (Ngazi Yamulindizi, March 15, 2014)