Jesu—“cinkwa Cabuumi”

Kali kujwe lya Lwizi lwa Galilaya, Jesu wakasanina zyuulu zyabantu munzila yamaleele kumane wakaloboka nobakali kuyanda kumubikka kuba mwami. Imasiku aayo ngoonya wakeenda atala aameenda aamulwizi ilwakali kuvwundauka akaambo kaguwo alimwi wakamuvwuna Petro, ooyo awalo iwakeenda atala aameenda pele iwakatalika kubbila ciindi lusyomo lwakwe nolwakaceya. Jesu alimwi wakaumuzya muwo akufwutula basikwiiya bakwe kuntenda yamulwizi iyakali kulangilwa kubacitikila.

Lino Jesu wajokela kumbo kwalwizi, ooko ikuli munzi wa Kapernauma. Bantu aabo mbaakasanina munzila yamaleele bamujana akumubuzya kuti: “Ino wasika lili kuno?” Kabasinsa, Jesu waamba kuti balamuyandaula nkaambo bayanda kusaninwa alimwi. Wabaambila kuti ‘batabelekeli cakulya cinyonyooka, pele babelekele cakulya cikkalilila akupa buumi butamani.’ Aboobo bamubuzya kuti: “Ino ncinzi ncotweelede kucita kutegwa katubeleka milimo ya Leza?”—Johane 6:25-28.

Ambweni bayeeya milimo iilembedwe mu Mulawo, pele Jesu waamba mulimo uuyandika kapati, wati: “Ngooyu mulimo wa Leza, kuti mumusyome ooyo ngwaakatuma.” Pele bantu tabamusyomi Jesu, nokuba kuti wacita zintu zinji. Bayanda kuti abacitile citondezyo cimwi kutegwa bamusyome. Bamubuzya kuti: “Mulimo nzi ngotiicite? Bamatata bakalya mana munkanda, mbubonya mbokulembedwe kuti: ‘Wakabapa cinkwa cizwa kujulu kuti balye.’”—Johane 6:29-31; Intembauzyo 78:24.

Kujatikizya citondezyo ncobayanda kubona, Jesu waambila bantu kuti balange kuliyooyo uupa zyakulya munzila yamaleele, ulaamba: “Ndimwaambila masimpe kuti, Musa tanaakamupa cinkwa cizwa kujulu, pele Taata umupa cinkwa cini-cini cizwa kujulu. Nkaambo cinkwa ca Leza ngooyo uuboola kuzwa kujulu akwiipa buumi nyika.” Akaambo kakutamvwisya ncaamba, bamukombelezya kuti: “Mwami, lyoonse kotupa cinkwa eeci.” (Johane 6:32-34) Pele ino ‘ncinkwa’ nzi Jesu ncaamba?

Wapandulula kuti: “Mebo ndendime cinkwa cabuumi. Kufwumbwa uuboola kulindime takafwi nzala pe, alimwi kufwumbwa uundisyoma takafwi nyota pe. Pele mbubonya mbondakamwaambila, nokuba kuti mwandibona tamusyomi. . . . Ndakaboola kuzwa kujulu kuti nditaciti kuyanda kwangu, pele ndicite kuyanda kwayooyo wakandituma. Ooku nkokuyanda kwayooyo wakandituma, kuti nditasweekelwi naba omwe akati kabaabo boonse mbaakandipa, pele kuti nkababusye mubuzuba bwamamanino. Nkaambo ooku nkokuyanda kwa Taata, kuti woonse uumuzyi Mwana akumusyoma abe abuumi butamani.”—Johane 6:35-40.

Nobamvwa boobu ba Juda banyema akutalika kumutongooka. Ino inga walyaamba buti kuti ngonguwe “cinkwa cakazwa kujulu”? (Johane 6:41) Balo bamubona kuti mwana buyo iwakazyalwa kubantu bamumunzi wamu Galilaya wa Nazareta. Bantu aaba babuzya kuti: “Sena ooyu tali Jesu mwana wa Josefa, ooyo bausyi abanyina mbotuzyi?”—Johane 6:42.

Jesu wabavwiila kuti: “Amuleke kuŋuŋuna akati kanu. Kunyina muntu uukonzya kuboola kulindime ccita kuti wakwelwa a Taata wakandituma, alimwi ndiyoomubusya mubuzuba bwamamanino. Kulilembedwe mu Basinsimi kuti: ‘Boonse bayooyiisyigwa a Jehova.’ Woonse uumuswiilila Taata alimwi akwiiya kulinguwe ulaboola kulindime. Kunyina muntu wakamubona Taata, ccita buyo yooyo wakazwa kuli Leza; ooyu ngonguwe wakamubona Taata. Ncobeni ndimwaambila masimpe kuti, kufwumbwa ooyo uusyoma ulaabuumi butamani.”—Johane 6:43-47; Isaya 54:13.

Kumatalikilo ciindi naakaambaula a Nikodemo, Jesu wakaamba kuti buumi butamani bulajanwa kwiinda mukusyoma Mwanaamuntu, naakati: “Muntu uuli woonse uumusyoma [Mwana wa Leza simuzyalwaalikke] atanyonyoonwi, pele abe abuumi butamani.” (Johane 3:15, 16) Pele lino waambaula ankamu mpati yabantu, aabo mbaambila kuti walo ujisi mulimo mupati wakubapa buumi butamani, oobo ibutakonzyi kujanwa kwiinda mumana naa mucinkwa ncibalya bantu boonse mu Galilaya. Aboobo ino buumi butamani inga bwajanwa buti? Jesu wainduluka kwaamba kuti: “Mebo ndendime cinkwa cabuumi.”—Johane 6:48.

Mubandi ooyu uujatikizya cinkwa cizwa kujulu wazumanana, waakumanina mucikombelo ku Kapernauma ciindi Jesu nayiisya.