• Ibulangizi Bwini Bwabafu
    Iciindi Muntu Ngomuyanda Nafwa

    • Ikwiingula kwa-Jesu kulufu lwa-Lazaro kutondezya kuteteeta kwa-Mwana wa-Leza. Ikulimvwa kwakwe kupati aciindi eeci kulakutondezya busalede kulombozya kwakwe kupati kwakubusya bafu. Tulabala ategwa: “Mariya, naakasika oko ukwali Jesu, naakamubona, wakawida ansi kumatende aakwe wakati, Omwami, nowakali kokuno, mwanaakwesu naatakafwa. Eno Jesu naakamubona ulalila, abalo ba-Juda abakali kumucilide balalila, moyo wakwe wakalenda, wakeetela, wakati, Ino nkuli nkomwakamuzikila? Bakamwaambila kuti, Omwami, koboola ubone, Jesu wakalila. Aba-Juda ncebakaambila kuti, Amubone mbwaali kumuyanda.”—Johane 11:32-36.

      Ilweetelelo lwa-Jesu lwakumoyo lulatondezyegwa aawa atwaambo totatwe: “wakalenda,” “wakeetela,” akuti “wakalila.” Imabala aamumulaka mutaanzi alo aakabelesyegwa mukulemba ciimo eeci ceetezya, atondezya kuti Jesu wakeetezegwa boobo alufu lwamulongwaakwe uyandwa Lazaro akubona mucizi wa-Lazaro kalila cakuti meso Aakwe akaibaiba misozi.a

      Icintu cilibonya loko ncakuti Jesu musyule wakali wabweedezya bantu bambi bobile kubuumi. Alimwi wakali kukanza cakumanizya kuti acite mbubonya a-Lazaro. (Johane 11:11, 23, 25) Pele, “wakalila.” Ikubweedezya bantu kubuumi, nkokuti, tacili cilengwa buyo kuli Jesu pe. Ikulimvwa kwakwe kuteteete kupati mbuli mbokwakabonesyegwa aciindi eeci kulakutondezya busalede kulombozya kwakwe kupati kwakwaangulula bunyonyoosi bwalufu.

      Ikulimvwa kwa Jesu kwabuuya ciindi naakabusya Lazaro kwakatondezya kulombozya kwakwe kupati kwakwaangulula bunyonyoosi bwalufu

  • Ibulangizi Bwini Bwabafu
    Iciindi Muntu Ngomuyanda Nafwa

    • a Ibbala lyaci-Giriki lyalo lisandulwidwe kuti “wakalenda” lizwa mubbala cciti (em·bri·maʹo·mai) lyalo litondezya kweetezyegwa kupati antela kulaabuungwaungwa. Sikulingula Bbaibbele umwi wakabona kuti: “Aawa cikonzya buyo kwaamba kuti Jesu wakaangana kumoyo cakuti kulenda kwakutaliyandila kwakanyonwa kuzwa kumoyo Wakwe.” Ikaambo kasandulwidwe kuti “wakeetela” kazwa mubbala lyaci-Giriki (ta·rasʹso) lyalo litondezya kunyongana. Ikweelana abwaamba sikupandulula mabala umwi, caamba “kuletela muntu kukopana kwamukati, . . . kupenzya akucisa antela akuusa kupati.” Ikaambo kakuti “wakalila” kazwa mubbala lyaci-Giriki cciti (da·kryʹo) lyalo lyaamba “kuzwa misozi, kulila buumwine.”