Jesu Wacita Maleele Aakusaanguna

Lino kwainda mazuba otatwe kuzwa ciindi Natanayeli naakaba umwi wabasikwiiya ba Jesu bakusaanguna. Jesu antoomwe abasikwiiya bakwe bamwi bakusaanguna batozya kulubazu lwakunyika kucooko ca Galilaya, nkobazwa. Baunka kumunzi wa Kana, nkwazwa Natanayeli. Munzi wa Kana uli mumalundu kulubazu lwakunyika kwamunzi wa Nazareta, ooko Jesu nkwaakakomenena. Batambwa kupobwe lyabwiinga ku Kana.

Abalo banyina Jesu baboola kubwiinga. Mbwaanga Mariya mulongwe wamukwasyi wabaabo bakwatana, uboneka kuti ujisi bubi kugwasyilizya kulanganya beenzu banji ibaboola kubwiinga. Aboobo wafwambaana kubona kuti waini wamana, eelyo waambila Jesu kuti: “Waini wabamanina.”​—Johane 2:3.

Mubwini Mariya usola kwaambila Jesu kuti acite cintu cimwi kujatikizya waini iwamana. Kabelesya kaambyo kutondezya kuti ukaka ncibamwaambila banyina, Jesu wavwiila kuti: “Yebo omukaintu, ino makani aayo atujatikizya buti swebo, mebo anduwe?” (Johane 2:4) Mbwali Mwami uusalidwe aa Leza, Bausyi bakujulu mbabeelede kumwaambila cakucita Jesu, ikutali banamukwasyi naa balongwe. Aboobo, cabusongo makani aaya Mariya waasiya mumaanza aamwanaakwe akwaambila baabo bakutauka kuti: “Kamucita kufwumbwa ncatiimwaambile.”​—Johane 2:5.

Kuli matalo aamabwe aali cisambomwe, lyomwe lilakonzya kunjizya malita aainda ku 40. Jesu walailila basikugwasyilizya kuti: “Amwaazuzye maanzi matalo.” Mpoonya Jesu waamba kuti: “Lino amuteke akutolela mweendelezi wapobwe.”​—Johane 2:7, 8.

Mweendelezi wapobwe wakkomana kapati akaambo kakubota kwawaini, pele tazyi pe kuti wapangwa munzila yamaleele. Waita sibwiinga akumwaambila kuti: “Muntu uuli woonse usaanguna kubikka waini mubotu, eelyo bantu bakolwa, naleta mubi. Pele yebo wayobola waini mubotu kusikila lino.”​—Johane 2:10.

Aaya ngamaleele aakusaanguna ngaacita Jesu. Ciindi basikwiiya bakwe bapya nobabona maleele aaya, lusyomo ndobajisi mulinguwe lwayuma. Kumane Jesu, banyina abanabokwabo basankwa, baunka kumunzi wa Kapernauma uuli kunkomwe yakunyika lwaambo ya Lwizi lwa Galilaya.