Bantu Banji Bamubona Kalitanasika Pobwe Lya Pentekoste

Jesu naabusyigwa, waambila baapostolo bakwe bali 11 kuti bakaswaangane anguwe aacilundu cimwi camu Galilaya. Basikwiiya abambi nkobali ooko, ibasika ku 500, bamwi akati kabo basaanguna kudooneka. (Matayo 28:17; 1 Bakorinto 15:6) Pele ncaamba lino Jesu cagwasya umwi aumwi wabo kusyoma kuti ncobeni muumi.

Jesu wapandulula kuti Leza wamupa nguzu zyoonse kujulu alimwi aanyika. Kumane Jesu wati: “Kamuya mukayiisye bantu bazisi zyoonse kuti babe basikwiiya, akubabbapatizya muzina lya Taata alya Mwana alya muuya uusalala, mukabayiisye kutobela zintu zyoonse nzyondakamulailila.” (Matayo 28:18-20) Masimpe, Jesu tali buyo muumi pele uciyanda kuti makani mabotu akambaukwe.

Basikutobela Jesu boonse—basankwa, bamakaintu, abana—balipedwe mulimo ngomunya ooyu wakuyiisya bantu kuba basikwiiya. Nokuba kuti basikukazya basola kubalesya kukambauka akuyiisya, Jesu wabasyomezya kuti: “Ndapegwa nguzu zyoonse kujulu alimwi aanyika.” Ino eeci caamba nzi kuli basikumutobela? Wabaambila kuti: “Amubone! Ndilaandinywe mazuba oonse mane kusikila kumamanino aabweende bwazintu.” Jesu taambi kuti boonse aabo ibatola lubazu mukukambauka makani mabotu bayoopegwa nguzu zyakucita maleele. Nokuba boobo, banoogwasyigwa amuuya uusalala.

Lino Jesu walibonya kuli basikwiiya bakwe “mazuba oonse aali 40” kuzwa ciindi naakabusyigwa. Walisamika mibili yanyama yiindene-indene akulitondezya “kulimbabo kali muumi kwiinda mubumboni bunji busalede,” akubayiisya “kujatikizya Bwami bwa Leza.”—Milimo 1:3; 1 Bakorinto 15:7.

Kuboneka kuti baapostolo kabacili mu Galilaya, Jesu wabalailila kuti bapiluke ku Jerusalemu. Naayaana ambabo mumunzi wa Jerusalemu wabaambila kuti: “Mutazwi mu Jerusalemu pe, pele kamuzumanana kulindila ceeco Taata ncaakasyomezya, eeco ncomwakamvwa kulindime; nkaambo ncobeni Johane wakali kubbapatizya amaanzi, pele nywebo muyoobbapatizyigwa amuuya uusalala kakutanainda mazuba manji kuzwa sunu.”—Milimo 1:4, 5.

Kumbele Jesu wayaana alimwi abaapostolo bakwe. Wabasoloda “kusikila munsi-munsi aku Betaniya,” imunzi uuli kujwe kunselelo lya Cilundu ca Maolifa. (Luka 24:50) Nokuba kuti nzinji Jesu nzyaabaambila kujatikizya kuunka kwakwe kuzwa anyika, bacisyoma kuti munzila imwi Bwami bwakwe bunooli anyika.—Luka 22:16, 18, 30; Johane 14:2, 3.

Baapostolo babuzya Jesu kuti: “Mwami, sena ulapilusya Bwami ku Israyeli aciindi ecino?” Waile kubavwiila kuti: “Tauli mulimo wanu wakuzyiba ziindi naa mazuba ngabikkide Taata munguzu zyakwe mwini.” Mpoonya alimwi ikukankaizya kwaamba mulimo ngobeelede kucita, wati: “Muyootambula nguzu muuya uusalala waakusika alindinywe, eelyo muyooba bakamboni bangu mu Jerusalemu, mu Judaya moonse amu Samariya, mane kusikila kumasena aakulamfwu kapati aanyika.”—Milimo 1:6-8.

Baapostolo bali aa Cilundu ca Maolifa ciindi Jesu iwakabusyigwa naatalika kunyamuka kuya kujulu. Mukaindi kasyoonto buyo kkumbi lyamuvwumba, waleka kulibonya kulimbabo. Kuzwa ciindi naakabusyigwa, Jesu wali kusama mibili yanyama. Pele lino Jesu wasamununa mubili wanyama ngwaasamide aciindi eeci, eelyo waunka kujulu kali cilenge camuuya. (1 Bakorinto 15:44, 50; 1 Petro 3:18) Baapostolo ibasyomeka aaba nobacilangilila nali mukuunka, kwalibonya ‘baalumi bobilo ibasamide zisani zituba’ kabaimvwi munsi-munsi ambabo. Aaba mbangelo ibasamide mibili yanyama, ibaamba kuti: “Nobaalumi bamu Galilaya, nkaambo nzi ncomwiimvwi kamulanga kujulu? Ooyu Jesu iwatambulwa kujulu kuzwa kulindinywe uyooboola mbubonya oobu mbomwamubona kaunka kujulu.”—Milimo 1:10, 11.

Jesu wakazwa aanyika kakunyina kubonwa abantu banji cakuti boola weebele, balikke buyo basikumutobela ibasyomeka mbabakamubona. Uyoopiluka “mbubonya oobu,” nkokuti, kakunyina kubonwa abantu banji cakuti boola weebele, balikke basikumutobela ibasyomeka mbabayakuzyiba kubako kwakwe mu Bwami.

Baapostolo bajokela ku Jerusalemu. Mumazuba aatobela, babungana abasikwiiya bambi, kubikkilizya a “Mariya banyina Jesu abanabokwabo Jesu.” (Milimo 1:14) Nkamu eeyi yazumanana kupaila. Makani amwi ngobapailila ajatikizya kusala sikwiiya uutiibweze busena bwa Judasi Isikariote, kutegwa mweelwe wabaapostolo ukkwane 12 alimwi. (Matayo 19:28) Bayanda sikwiiya iwakalibonena milimo njaakali kucita Jesu alimwi abubuke bwakwe. Kwaciindi camamanino caambidwe mu Bbaibbele, cisolo cawaalwa kuti bazyibe kuyanda kwa Leza. (Intembauzyo 109:8; Tusimpi 16:33) Matiya, ooyo uulangilwa kuti wakali umwi wabasikwiiya bali 70 Jesu mbaakatuma kuyookambauka, wasalwa alimwi ‘wabalilwa antoomwe abaapostolo bali 11.’—Milimo 1:26.

Nokwainda mazuba aali kkumi kuzwa ciindi Jesu naakaunka kujulu, Pobwe lyaba Juda lya Pentekoste lyamu 33 C.E. lyacitika. Basikwiiya ibasika ku 120 balibungene muŋanda yamujulu ku Jerusalemu. Cakutayeeyela, muzuzumo uuli mbuli waguwo lyuungisya wazuzya ŋanda yoonse mobabede. Kwalibonya milaka iili mbuli mulilo, aamuntu umwi aumwi uuliko. Basikwiiya boonse batalika kwaambaula myaambo yiindene-indene. Ooku nkutilwa kwamuuya uusalala ngwaakasyomezya Jesu!—Johane 14:26.