CIIYO 10
Mbuti Miswaangano ya Bakamboni ba Jehova Mboikonzya Kumugwasya?
Sena kuli nomwakatambidwe kale kumuswaangano wa Bakamboni ba Jehova? Ikuti naa tamunajanikide mulakonzya kulibilika. Pele mulakonzya kulibuzya kuti: ‘Ncinzi cicitika kumiswaangano eeyi? Nkaambo nzi ncoiyandika? Nkaambo nzi ncondeelede kujanika?’ Muciiyo eeci, mulaiya kuti kuswaangana abamwi kulakonzya kumupa kuba acilongwe a Leza alimwi akumugwasya.
1. Nkaambo nzi kuswaangana antoomwe ncokuyandika kapati?
Amubone mulembi wa Bbaibbele mbwaakaamba ncociyandika kapati kuswaangana abamwi naakati: “Mumbungano mpati, ndiyootembaula Jehova.” (Intembauzyo 26:12) Mbubwenya buyo, Bakamboni ba Jehova balakkomana kapati kuswaangana antoomwe. Munyika yoonse, nsondo ansondo balaswaangana kutembaula Leza, kwiimba alimwi akupaila. Aziindi zimwi mumwaka, balaba amiswaangano mipati kutegwa bakombe.
2. Ncinzi ncomuyakwiiya kumiswaangano yesu?
Kumiswaangano yesu, tulabikkila maano kapati ku Jwi lya Leza, ‘kulipandulula kabotu-kabotu akutondezya mboligwasya.’ (Amubale Nehemiya 8:8.) Kwiinda mukujanika, kumiswaangano yesu muyakwiiya kujatikizya Jehova abube bwakwe bubotu. Nomuyaabuzyiba mbwamuyanda, muyooba acilongwe anguwe. Alimwi muyakwiiya mbwakonzya kumugwasya kuba abuumi bukkomanisya.—Isaya 48:17, 18.
3. Ino kuyanzana abamwi kumiswaangano yesu inga kwamugwasya buti?
Jehova utulailila kuti “katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe.” (Bahebrayo 10:24, 25) Kumiswaangano yesu, muyoojana bantu ibayandana ncobeni alimwi ibayandisya kwiiya zinji kujatikizya Leza mbuli ndinywe. Alimwi muyoobamvwa kabaamba makani aamu Bbaibbele aakulwaizya. (Amubale Baroma 1:11, 12.) Kuyungizya waawo, muyoozyibana abamwi, ibatakwete naa kukwatwa alimwi abanabukwetene, ibakkomene nokuba kuti bajisi mapenzi. Ootu ntotwaambo tumwi buyo itutondezya Jehova ncayanda kuti katuswaangana antoomwe lyoonse!
AMWIIYE ZINJI
Atwiiye cicitika kumiswaangano ya Bakamboni ba Jehova alimwi akaambo ncotweelede kusolekesya kujanika.
4. Miswaangano ya Bakamboni ba Jehova
Mumwaanda wamyaka wakusaanguna, Banakristo bakali kuswaangana lyoonse antoomwe kutegwa bakombe Jehova. (Baroma 16:3-5) Amubale Bakolose 3:16, akubandika mubuzyo ooyu:
Ino Banakristo bakusaanguna bakali kumukomba buti Jehova?
Mazuba aano, abalo Bakamboni balaswaangana lyoonse antoomwe mumasena aabo aakukombela. Kutegwa mubone mboicitwa miswaangano yabo, atweebelele VIDIYO. Mpoonya tubone cifwanikiso citondezya muswaangano wambungano.
Nkukozyanya nzi nkomwabona kujatikizya cicitika ku Ŋanda ya Bwami alimwi ancomwabala ku Bakolose 3:16?
Muvidiyo naa mucifwanikiso, sena kuli cimbi ncomwabona icamukkomanisya kujatikizya miswaangano?
Amubale 2 Bakorinto 9:7, akubandika mubuzyo ooyu:
Nkaambo nzi Bakamboni ba Jehova ncobatalombeleli mali kumiswaangano yabo?
Amulange-lange ziyoobandikwa kumuswaangano uutobela antoomwe amwiiyi wanu.
Ncibeela nzi camuswaangano ncomwabona kuti ciyoomukkomanisya naa kumugwasya?
Sena Mulizyi?
A jw.org, mulakonzya kubona busena alimwi aciindi miswaangano noicitwa munyika yoonse.
Miswaangano yesu ibikkilizya makani, zitondezyo, alimwi amavidiyo. Ilatalika alimwi akumana anyimbo amupailo
Muzibeela zimwi zyapulogilamu, baswiilizi balalombwa kuti batole lubazu
Boonse balitambidwe—baalumi, bamakaintu, bacembeede alimwi abana
Miswaangano yesu taibbadelesyegwi. Bakamboni ba Jehova tababbadelesyi amulyango alimwi takwiinzyigwi mutiba wamulumbo
5. Kuyandika kusolekesya kutegwa tujanike kumiswaangano
Atubone cikozyanyo camukwasyi wa Jesu. Mwaka amwaka, bakali kweenda musinzo uulampa makkilomita aali 100 mumalundu kuzwa ku Nazareta kuya ku Jerusalemu. Amubale Luka 2:39-42, akubandika mibuzyo eeyi:
Sena muyeeya kuti kweenda musinzo ooyu kuya ku Jerusalemu, tiikwakali kuyandika kulyaaba?
Nkaambo nzi ncomuyandika kusolekesya kutegwa kamujanika kumiswaangano?
Nkaambo nzi ncomuyeeya kuti cilayandika kujanika kumiswaangano nokuba kuti cilakatazya?
Bbaibbele lyaamba kuti kuswaangana antoomwe kutegwa tukombe Jehova kulayandika kapati. Amubale Bahebrayo 10:24, 25, akubandika mubuzyo ooyu:
Nkaambo nzi ncotweelede kujanika kumiswaangano lyoonse?
BAMWI BAAMBA KUTI: “Tamuyandiki kuti mane muswaangane buya abamwi kukomba Leza. Kubala buyo Bbaibbele kuŋanda kulizulide.”
Ndugwalo nzi naa ncikozyanyo nzi camu Bbaibbele icitondezya ncayanda Jehova?
MUBUFWAAFWI
Kujanika kumiswaangano kuyoomugwasya kwiiya zinji kujatikizya Jehova, kuyumya cilongwe canu anguwe alimwi akumukomba antoomwe abamwi.
Ncinzi Ncomwaiya?
Nkaambo nzi Jehova ncatukulwaizya kuswaangana antoomwe?
Ncinzi ncomuyooiya kumiswaangano ya Bakamboni ba Jehova?
Sena muyeeya kuti kuli nzila zimwi miswaangano moikonzya kumugwasya?
AMUZYIBE ZINJI
Ino mbuti kuti mulayoowa kujanika kumuswaangano? Atubone mwaalumi umwi iwakali kulimvwa boobo mbwaakatalika kwiikkomanina miswaangano.
Atubone mwaalumi umwi uucili mwana-mwana mbwaakaikkomanina miswaangano alimwi ancaakacita kutegwa azumanane kujanika.
Atubone bamwi mbobalimvwa kujatikizya kujanika kumiswaangano.
“Nkaambo Nzi Ncomweelede Kujanika Kumiswaangano ku Ŋanda ya Bwami?” (Cibalo Caaintaneti)
Atubone muntu iwakali cigwebenga cikali mbwaakacinca naakamana kujanika kumuswaangano wa Bakamboni ba Jehova.
“Lyoonse Ndakali Kweenda Antobolo Yangu” (Ngazi Yamulindizi, July 1, 2014)