CIIYO 49
Mbuti Mukwasyi Wanu Mboukonzya Kukkomana?—Cibeela 1
Banabukwetene bapya balombozya kuti kubota lukkomano ndobakajisi buzuba buya bwamucado lwazumanana mane kukabe kutamani. Amana buya cilakonzyeka. Banakristo ibakkala kwaciindi cilamfwu mucikwati alimwi ibabeleka cangu kubelesya lulayo lwamu Bbaibbele balizyi kuti eeci cilakonzyeka.
1. Ndulayo nzi Bbaibbele ndolipa balumi?
Jehova wakasala mulumi kuba silutwe wamukwasyi. (Amubale Baefeso 5:23.) Jehova ulangila kuti mulumi unoosala zintu zikonzya kuugwasya mukwasyi. Bbaibbele likulwaizya balumi kuti: “Amuzumanane kubayanda bakaintu banu.” (Baefeso 5:25) Ino eeci caamba nzi? Mulumi siluyando ulamweendelezya caluzyalo mukaintu wakwe, nobali aŋanda alimwi amubuleya. Ulamukwabilila kuzintu zikonzya kumucisa, kubikkila maano kujatikizya mbwalimvwa alimwi akumupa nzyayandika kumubili. (1 Timoteyo 5:8) Kwiinda zyoonse, ulasololela mukulanganya zintu nzyayandika kumuuya. (Matayo 4:4) Mucikozyanyo, ulakonzya kupaila alimwi akubala Bbaibbele antoomwe amukaintu wakwe. Ciindi mulumi namulanganya caluyando mukaintu wakwe, ulazumanana kuba acilongwe cibotu a Jehova.—Amubale 1 Petro 3:7.
2. Ndulayo nzi Bbaibbele ndolipa bamakaintu?
Jwi lya Leza lyaamba kuti mukaintu “weelede kumulemeka kapati mulumaakwe.” (Baefeso 5:33) Ino inga wacita buti oobo? Ulakonzya kubona bube bubotu bwamulumaakwe alimwi akusolekesya nkwacita kumulanganya walo abana. Kuyungizya waawo, weelede kukulemeka kusala nkwacita kwiinda mukwaambaula caluzyalo anguwe alimwi akujatikizya nguwe nokuba kuti tali musyomi.
3. Mbuti banabukwetene mbobakonzya kuyumya cikwati cabo?
Bbaibbele lyaamba kujatikizya banabukwetene kuti: “Bobilo bayooba mubili omwe.” (Matayo 19:5) Eeci caamba kuti beelede kulwana cilengwa cili coonse cikonzya kupa kuti luyando lwabo luceye. Balakonzya kucita oobo kwiinda mukujana ciindi cakuba antoomwe, kubandisyanya cakulikwaya alimwi akwaambilana mbobayeeya ambobalimvwa caluyando. Tabeelede kulekela cintu naa muntu uuli woonse, kunze buyo lya Jehova, kuba cintu ciyandika kapati kwiinda ngobakwetene limwi. Balabikkila maano kapati kubona kuti kunyina naaceya nobaciindizya kumvwana amuntu uumbi kunze lyayooyo ngobakwetene limwi.
AMWIIYE ZINJI
Atubone njiisyo zyamu Bbaibbele mbozikonzya kuyumya cikwati canu.
4. Nobalumi, amubayande akubalanganya bakaintu banu
Bbaibbele lyaamba kuti “balumi abalo beelede kuyanda bakaintu babo mbuli mbobayanda mibili yabo beni.” (Baefeso 5:28, 29) Ino eeci caamba nzi? Atweebelele VIDIYO, akubandika mubuzyo uutobela.
Muunzila nzi zimwi mulumi mwakonzya kutondezya kuti ulamuyanda akumulanganya mukaintu wakwe?
Amubale Bakolose 3:12, akubandika mubuzyo ooyu:
Mbuti mulumi mbwakonzya kutondezya bube oobu mucikwati?
5. Nobakaintu, amubayande akubalemeka balumi banu
Bbaibbele likulwaizya mukaintu kulemeka mulumaakwe tacikwe makani naa mulumi ulamubelekela Jehova naa pe. Amubale 1 Petro 3:1, 2, akubandika mibuzyo eeyi:
Kuti kamukwetwe kumulumi uutali musyomi, cakutadooneka mulayanda kuti awalo kamubelekela Jehova. Ninzila nzi mbotu yakumugwasya? Sena muyeeya kuti nkumukambaukila ciindi coonse, naa nkuba mukaintu uuli kabotu, ulaaluzyalo alimwi abulemu? Nkaambo nzi?
Balumi abamakaintu balakonzya kusala camaano antoomwe. Nokuba boobo, zimwi ziindi mukaintu inga katakuzumini kusala kwamulumaakwe. Ulakonzya kwaamba mbwalimvwa cakukkazyika moyo alimwi cabulemu, pele kayeeyede kuti Jehova wakapa mulumaakwe mukuli wakusala cikonzya kugwasya mukwasyi. Weelede kubeleka canguzu kutegwa agwasyilizye kusala kwamulumaakwe. Kwiinda mukucita boobo, ugwasyilizya kuti kakuli lukkomano mumukwasyi. Amubale 1 Petro 3:3-5, akubandika mubuzyo ooyu:
Ino Jehova ulimvwa buti ciindi mukaintu nalemeka mulumaakwe?
6. Mulakonzya kwaazunda mapenzi mucikwati canu
Kunyina cikwati cilondokede. Aboobo, banabukwetene beelede kubelekela antoomwe kulwana mapenzi ngobajana. Atweebelele VIDIYO, akubandika mibuzyo iitobela.
Muvidiyo, ncinzi catondezya kuti banabukwetene bali kuyaabwaandaana asyoonto-syoonto?
Nintaamu nzi nzyobabweza kutegwa bayumye cikwati cabo?
Amubale 1 Bakorinto 10:24 alimwi a Bakolose 3:13. Mwamana kubala lugwalo lumwi alumwi, amubandike mubuzyo ooyu:
Mbuti kutobela lulayo oolu mbokukonzya kuyumya cikwati?
Bbaibbele lyaamba kuti tweelede kulemekana. Kulemeka muntu cibikkilizya kumweendelezya caluzyalo acabulemu. Amubale Baroma 12:10, akubandika mibuzyo eeyi:
Sena balumi naa bamakaintu beelede kulindila kuti mane mweenzinyina asaangune nguwe kubalemeka? Nkaambo nzi?
BAMWI BAAMBA KUTI: “Mebo angotukwetene limwi tatucimvwani mbuli mbotwakali kumvwana kaindi.”
Mbuti mbomukonzya kubapandulwida kuti Bbaibbele lilakonzya kubagwasya?
MUBUFWAAFWI
Mulumi amukaintu balakonzya kukkomana kuti kabayandana, kulemekana alimwi akubelesya njiisyo zyamu Bbaibbele.
Ncinzi Ncomwaiya?
Mbuti mulumi mbwakonzya kupa kuti kube lukkomano mucikwati?
Mbuti mukaintu mbwakonzya kupa kuti kube lukkomano mucikwati?
Kuti kamukwete naa kukwatwa, ninjiisyo nzi yamu Bbaibbele iikonzya kuyumya cikwati canu?
AMUZYIBE ZINJI
Amwiiye nzila zigaminide zikonzya kumugwasya kukkomana mumukwasyi wanu.
Amweebelele vidiyo yanyimbo iitondezya zilongezyo zijanika kwiinda mukubelesya lulayo lwa Leza mucikwati canu.
Amubone ncocaamba kulibombya kubusilutwe bwamulumi.
Amubone lulayo lwamu Bbaibbele mbolukonzya kubagwasya banabukwetene.