Amufwuse Mfwaindi Zyanu Cabusongo
1. Ino lugwalo lwa 1 Bakolinto 9:26 lubeleka buti kujatikizya mulimo wakukambauka?
1 Mwaapostolo Paulo wakalemba kuti: “Tandibaliki mbuli kuti tandikuzyi nkondiya pe; tandifwusi mfwaindi zyangu ikuuma buyo muwo pe.” (1 Ko. 9:26) Paulo wakali kwaamba kubikkila maano nkwaakali kucita kukuzuzikizya mbaakani nzyaakajisi zyakubelekela Jehova. Nokuba boobo, majwi aaya alimwi alabeleka kujatikizya mulimo wakukambauka. Tuyanda kufwusa “mfwaindi” zyesu naa kubelesya nguzu zyesu cabusongo kutegwa tuucite kabotu mulimo wesu. Munzila nzi?
2. Mbuti mbotukonzya kwiiya Paulo abakambausi bamumwaanda wamyaka wakusaanguna mukusala ciindi abusena bwakukambaukila?
2 Amuunke Nkobajanika Bantu: Paulo abakambausi bamumwaanda wamyaka wakusaanguna bakali kukambaukila mumasena mobakazyi kuti bantu balakonzya kujanika. (Mil. 5:42; 16:13; 17:17) Aboobo kuti naa bantu bamucilawo cesu kabajanika aŋanda ciindi cakumangolezya, nkokuti eeci ncecikonzya kuba ciindi cibotu cakukambauka kuŋanda aŋanda. Sena mafwumofwumo kulajanika bantu banji kucitisyini camabbaasi naa cacitima ciindi bantu nobaunka kumilimo naa kumazuba nobapiluka kumaanda? Nciindi nzi nokujanika bantu banji mumasena aamakwebo aali mucilawo canu? Eezyi zilakonzya kuba ziindi zibotu zyabukambausi bwamumugwagwa.
3. Mbuti mbotukonzya kufwusa mfwaindi zyesu cabusongo ciindi notubelekela mucilawo cesu?
3 Amubeleke Kabotu Mucilawo Canu: Tweelede kufwusa mfwaindi zyesu cabusongo ciindi notubelekela mucilawo cesu. Mucikozyanyo, muciindi cakuunka abasikumwaya banji mubusena bomwe, calo cinga cayandika ciindi cinji alimwi akubeleka canguzu kubeendelezya kutegwa babeleke kabotu, inga cainda kugwasya kubaabanya mutubunga. Sena inga twalomba cilawo citugeme cili munsi ankotukkala, calo cikonzya kucesya ciindi cakweenda kuunka nkuko?
4. Ino ncinzi cikonzya kutugwasya kuba “bazubi babantu” bacibwene?
4 Jesu wakakozyanisya bakambausi “[ku]bazubi babantu.” (Mk. 1:17) Makanze aasikuzuba nswi taali buyo akuteya kansabwe mumaanzi, pele ngakujata nswi. Aboobo, bazubi bacibwene baunka aciindi ceelede alimwi akubusena nkobazyi kuti balakonzya kujana nswi, alimwi balatalika kuzuba kakunyina kusowa ciindi. Inzya, babelesya nguzu zyabo cabusongo. Aswebo mbubwenya, atube basungu mumulimo wesu wakukambauka.—Heb. 6:11.