Nobasankwa, Sena Mulabutobela Bweendelezi Bwa Kristo?

“Mutwe wamwaalumi umwi aumwi ngu-Kristo.”—1 KOR. 11:3.

1. Ino ncinzi citondezya kuti Jehova ngu Leza waluumuno?

LUGWALO lwa Ciyubunuzyo 4:11 lwaamba kuti: “Nduwe uuelede, O Mwami, kutambula bulemu alulemeko anguzu, nkaambo nduwe wakalenga zintu zyoonse, nkaambo kabukanze bwako nkizibeda, ankizyakalengelwa.” Akaambo kakuti nguwakazilenga zyintu zyoonse, Jehova Leza ngo Mupati Kampatila mububumbo boonse alimwi nguuzyeendelezya zyintu zyoonse nzyaakalenga. Jehova “tali Leza walupilingano pe, ngwaluumuno,” eeci cilakonzya kulibonya mbwabalanganya bangelo.—1 Kor. 14:33; Is. 6:1-3; Heb. 12:22, 23.

2, 3. (a) Ino nguni ngwaakataanguna kulenga Jehova? (b) Ino Mwanaakwe simuzyalwa alikke ujisi cuuno nzi kuli Bausyi?

² Katanalenga cili coonse, Leza wakali kupona alikke kwamyaka iitabaliki. Cilenge cakwe cakusaanguna wakali muntu wamuuya iwakali kwiitwa kuti “Ijwi” akaambo kakuti wakali Mwaambilizi wa Jehova. Ijwi ndelyakapa kuti zyintu zyoonse zilengwe. Nokwakainda ciindi cili mbocibede, Ijwi eeli lyakaboola anyika kali muntu uulondokede iwakali kwiitwa kuti Jesu Kristo.—Amubale Johane 1:1-3, 14.

³ Ino ncinzi Magwalo ncaamba kujatikizya cuuno Leza ncajisi a Mwanaakwe simuzyalwa alikke? Kasololelwa amuuya, imwaapostolo Paulo wakalemba kuti: “Ndayanda kuti mukazibe aya. Mutwe wamwaalumi umwi aumwi ngu-Kristo, awalo mutwe wamwanakazi ngumwaalumi, awalo mutwe wa-Kristo ngu-Leza.” (1 Kor. 11:3) Kristo ulabutobela bweendelezi bwa Bausyi. Bweendelezi akulibombya kulayandika kutegwa kube luumuno akuti zilenge zyakwe zyamaano kazyeendelezyegwa kabotu. Naba yooyo iwakabelesyegwa ‘kulenga zyintu zyoonse’ weelede kubutobela bweendelezi bwa Leza.—Kol. 1:16.

4, 5. Ino Jesu wakalimvwa buti kweendelezyegwa a Jehova?

⁴ Ino Jesu wakalimvwa buti kweendelezyegwa a Jehova akutumwa kuti aboole anyika? Imagwalo aamba kuti: “Kristo Jesu. Walo wakali aciimo ca-Leza, nekubaboobo teewakayeeya kuti ncivuumuko kweelana a-Leza, pe. Wakalilonzya, wakalisalila ciimo cabuzike akuba mbubonya mbuli bantu balya maila. Lino naakabonwa kuti waba acikozyano camuntu, wakalibombya akuzumina nikuba kufwa, nkukuti [kujaigwa acisamu cakupenzyezya].”—Flp. 2:5-8.

⁵ Lyoonse, Jesu wakali kucita nzibakali kuyanda Bausyi. Wakaamba kuti: “Nsikonzya kucita cintu ndemwini, . . . kubeteka kwangu nkwakululamika. Nkaambo nsiyandauli luyando lwangu, pele luyando lwayooyo uwakandituma.” (Joh. 5:30) Wakati: “Ndacita lyoonse zintu izimubotela [Taata].” (Joh. 8:29) Kumamanino aabuumi bwakwe anyika, Jesu wakapaila kuli Bausyi kuti: “Ndakakulemya ansi, ndazyulizya mulimo oyo ngookandipa kuti nkuucite.” (Joh. 17:4) Eeci citondezya kuti tiicakali kumukatazya Jesu ikuzyiba akuzumina kweendelezyegwa a Leza.

Kweendelezyegwa Abausyi Kulamugwasya Mwana

6. Ino nzyintu nzi zibotu nzyaakali kucita Jesu?

⁶ Naakacili anyika Jesu wakali kucita zyintu zinji zibotu. Akati kazyintu eezyi nzyaakali kucita, wakali kubayanda kapati Bausyi. Wakati: “Ndamuyanda Taata.” (Joh. 14:31) Alimwi wakatondezya kuti ulabayanda kapati bantu. (Amubale Matayo 22:35-40.) Jesu wakali alubomba alimwi wakali kubabikkila maano bantu, tanaakali kubanyemena naa kubadyaaminina. Wakati: “Amuboole kulindime nyoonse nomukatede nomulemenwa, ndime enti kamulemunune. Amulikulike ijokwe lyangu, mwiiye kwangu, nkaambo ndilibombede, ndi mutete moyo, lino mulakatulukwa mumyoyo yanu, nkaambo ijokwe lyangu lilibulungusene, awalo mukuli wangu muuba.” (Mt. 11:28-30) Bantu babombe myoyo ibamisela yoonse, ikapati aabo ibakali kudyaamininwa, bakakulwaizyigwa mbwaakali kulilemeka Jesu alimwi amulumbe wakwe uukkomanisya.

7, 8. Mu Mulawo ino ncinzi ncaatakeelede kucita mukaintu iwakali kuzwa bulowa, pele ino Jesu wakamulanga buti?

⁷ Amubone Jesu mbwaakali kubalanga bamakaintu. Kuzwa kaindi, ibasankwa bakali kubapenzya bamakaintu. Oobu mbobakali kucita abalo ibasololi babukombi bwaba Juda baku Israyeli yansiku. Pele Jesu wakali kubalemeka bamakaintu. Eeci cakalibonya mbwaakacita kumukaintu wakali kuciswa bulwazi bwakuzwa bulowa kwamyaka iili 12. “Wakapenga loko kubasilisi” alimwi wakasowa lubono lwakwe loonse kutegwa apone. Nokuba kuti wakasoleka boobu, “cilwazi cakaindila.” Mu Mulawo, mukaintu ooyu wakali kubonwa kuti ulisofweede. Boonse bamuguma bakali kusofwaala.—Lev. 15:19, 25.

⁸ Imukaintu ooyu naakamvwa kuti Jesu wakali kuponya baciswa, wakabasangana bantu bakamubumbilide kaamba kuti: “Kufumbwa ndaakwaampa zyakusama zyakwe buyo, njoopona.” Wakamuguma Jesu amane wakapona mpoona-mpoona. Jesu wakalizyi kuti tanaakeelede kumuguma. Nokuba boobo, tanaakamunyemena. Muciindi caboobo wakamufwida lubomba. Wakalizyi mbwaakali kulimvwa naakali kuciswa kwamyaka minji yoonse eeyo akuti wakali kuyanda kugwasyigwa. Calubomba, Jesu wakamwaambila kuti: “Mwanaangu, lusyomo lwako lwakufutula, koya, ube aluumuno akupona kubulwazi bwako.”—Mk. 5:25-34.

9. Ciindi basikwiiya ba Jesu nobakasola kukasya bana kuboola kuli nguwe, ino ncinzi ncaakacita?

⁹ Nobaba bana bakali kuliiba kuba a Jesu. Buzuba bumwi bantu nibakamuletela bana, basikwiiya bakwe bakabakasya kabayeeya kuti balamunyonganya. Pele oobu tabusyi mbwaakali kuyeeya Jesu. Imagwalo atwaambila kuti: “Jesu abone boobo, wakabanyemena, wabaambila kuti, Amuleke twana, tuze kulindime, mutatukasyi pe, nkaambo Bwami bwa-Leza mbubwabo bali boobo.” Mpoonya, “wakatubukata, watulongezya akutubikila maanza aakwe.” Jesu tanaakali kubayanda buyo bana, pele wakabatambula camaanza obilo.—Mk. 10:13-16.

10. Ino ncinzi cakamupa Jesu kuti kacita zyintu zibotu nzyaakali kucita naakali anyika?

¹⁰ Ino ncinzi cakamupa Jesu kuti kacita zyintu zibotu nzyaakali kucita naakali anyika? Katana boola anyika, wakali kulangilila nzyobakali kucita Bausyi bakujulu kwaciindi cilamfwu. (Amubale Tusimpi 8:22, 23, 30.) Kacili kujulu, wakali kubona Jehova mbwaakali kweendelezya zilenge zyakwe zyoonse alimwi eeci cakamupa kuti awalo kacita oobo. Sena Jesu naakacikonzya kucita oobo naatakali kulicesya? Wakali kukkomana ikulicesya kuli Bausyi, alimwi cakali kumukkomanisya Jehova kuba a Mwana uuli boobu. Naakali anyika, Jesu wakacita zyintu zibotu mbubwenya mbobakali kukonzya kucita Bausyi bakujulu. Eelyo kaka ncoolwe cipati kweendelezyegwa a Kristo, Imweendelezi wa Bwami bwakujulu iwakasalwa a Leza!

Amumwiiye Kristo

11. (a) Ino nguni ngotweelede kwiiya? (b) Ino nkaambo nzi basankwa mumbungano ncobeelede kumwiiya Jesu?

¹¹ Boonse ibali mumbungano ya Banakristo, ikapati basankwa beelede kubeleka canguzu kutegwa baiye Kristo. Mbumunya mbutwabona kale, Ibbaibbele lyaamba kuti: “Mutwe wamwaalumi umwi aumwi ngu-Kristo.” Mbubwenya Kristo mbwaakamwiiya Mweendelezi wakwe Leza wakasimpe, abalo basankwa beelede kusoleka kumwiiya mweendelezi wabo—Kristo. Naakaba Munakristo, awalo mwaapostolo Paulo wakacita mbubwenya oobo. Wakabaambila Banakristonyina kuti: “Amwiiye ndime, mbubonya mbuli ambebo mbundaiya Kristo.” (1 Kor. 11:1) Awalo mwaapostolo Petro wakaamba kuti: “Nciconya eco ncimwakaitilwa, nkaambo Kristo alakwe wakamucisilwa, wakamusiila cibonesyo, kuti mukatobele mumikondo yakwe.” (1 Pet. 2:21) Kuli kaambo akambi basankwa ncobeelede kumwiiya Kristo. Mbabasalwa kuba baalu abakutausi. Mbubwenya mbuli Jesu mbocimukkomanisya kwiiya Jehova, abalo basankwa Banakristo ceelede kubakkomanisya kumwiiya Kristo.

12, 13. Ino baalu beelede kuzilanganya buti mbelele?

¹² Baalu mumbungano ya Banakristo balaamukuli wakumwiiya Kristo. Petro wakabaambila bapati naa baalu kuti: “Amweembele butanga bwa-Leza buli akati kanu, alimwi kutabi kwakusinikizigwa, pe, akube camoyo omwe. Kutabi kwakuunya kulubono lwaansi, pele kwamoyo uutuba. Mutabaciti kamikami abeembelwa ndinywe, pele amubabede citondezyo cakutobela.” (1 Pet. 5:1-3) Baalu Banakristo tabeelede kubasinikizya bantu, kubadyaaminina, kubayiisya zyintu zitagwasyi naa kuba alunya. Nobaiya Kristo, bayandika kuti kababayanda bantu, kubabikkila maano, kulicesya akucita calubomba muzyintu zyoonse nzibacita nobalanganya mbelele zyabo.

¹³ Aabo beendelezya mumbungano mbantu batalondokede alimwi beelede kuzyiba mpobalezya. (Rom. 3:23) Aboobo beelede kumwiiya Jesu akwiiya mbwaakali kubayanda bantu. Beelede kubona Leza a Kristo mbobalanganya bantu akwiiya mbobacita. Petro waamba kuti: “Nyoonse amusame myoyo mitete akugwasyanya, nkaambo Leza ulabakazya basikulisumpula, pele batete-myoyo ulabapa luzyalo.”—1 Pet. 5:5.

14. Ino mbuti baalu mbobeelede kutondezya kuti balabalemeka bantu?

¹⁴ Nobeendelezya mbelele zya Leza, basankwa basalidwe mumbungano beelede kutondezya bube bubotu. Lugwalo lwa Ba-Roma 12:10 lwaamba kuti: “Amuyandane aluyandisyo lwabunyina. Amusungwaale kukulemekana.” Baalu abakutausi balalemeka bantu. Mbuli Banakristo boonse, basankwa aaba ‘tabaciti cintu niciba comwe cabbivwe nociba cakulisumpula, pele umwi aumwi akati kabo ulalibombya mumoyo, akuyeeya kuti mweenzinyina mubotu kwiinda mbabo.’ (Flp. 2:3) Aabo beendelezya beelede kubona bamwi kuti mbabotu kwiinda mbabo. Kwiinda mukucita boobu, basankwa bali boobu batobela lulayo lwa Paulo ilwakuti: “Lino swebo tubayumu tuleelede kuyumuna matenda aabaabo batali bayumu, tatweelede kulikondezya tubeni pe. Umwi aumwi akati kesu akondezye mweenzinyina kukumucitila cibotu cakuyakana. Nkaambo Kristo alakwe teewakalikondezya mwini.”—Rom. 15:1-3.

‘Kulemeka Bamakaintu Babo’

15. Ino bamalumi beelede kubalanganya buti bamakaintu baabo?

¹⁵ Lino atulange lulayo Petro ndwaakaambila basankwa bakwete. Wakalemba kuti: “Anywebo nobalumi, mbubonya obo, amukale kabotu abakazi banu, nkaambo mukazi uli mbuli cilongo cikompeme, mulumi nguuinda inguzu.” (1 Pet. 3:7) Kulemeka muntu caamba kumubona muntu ooyo kuti ulayandika kapati. Aboobo, mweelede kumvwa ncaamba muntu, ncayandika alimwi ancayanda nokuba kuti tacisyi ncimwali kuyeeya. Oobu musankwa mbweelede kulanganya mukaintu wakwe.

16. Ino nkucenjezya kuli buti Ijwi lya Leza nkolipa bamalumi kutegwa kababalemeka bamakaintu babo?

¹⁶ Naakali kwaambila bamalumi kuti kabalemeka bamakaintu baabo, Petro wakayungizya kubacenjezya kuti: “Kuti kukomba kwanu kutabi kwabuyo.” (1 Pet. 3:7) Eeci citondezya Jehova mbwayanda kuti mulumi kamubamba mukaintu wakwe. Ikuti naa waalilwa kucita oobo, inga capa kuti mipailo yakwe kaitamvwugwi. Kunze lyaboobo, bamakaintu abalo balakkomana kulemekwa abamalumi babo.

17. Ino mulumi weelede kumuyanda buti mukaintu wakwe?

¹⁷ Ijwi lya Leza nolyaamba kaambo kakuyanda bamakaintu babo, lyaamba kuti: “Balumi mbubeelede kuyanda banakazi babo mbuli mibili yabo beni. . . . Nkaambo taakwe muntu uusula mubili wakwe mwini, pe, ulausanina akuubamba kuti ubote. Mbubonya obo Mwami mbwacitila imbungano . . . Umwi aumwi akati kanu ayande mukaakwe mbuli mbwaliyanda mwini.” (Ef. 5:28, 29, 33) Ino bamalumi beelede kubayanda buti bamakaintu babo? Paulo wakalemba kuti: “Nobalumi, amuyande banakazi banu, mbuli Kristo mbwaakayanda imbungano akulyaaba nkaambo kanjiyo.” (Ef. 5:25) Inzya, imulumi ulakonzya kulisungula kufwida mukaintu wakwe mbubwenya mbuli Kristo mbwaakabafwida bantu. Ikuti naa mulumi kamubamba kabotu mukaintu calubomba, kamubikkila maano, kaswiilila nzyaamba alimwi kacita zyintu cakutaliyanda, inga camuubaubila mukantu kulibombya kumulumi wakwe.

18. Ino ncinzi cikonzya kubagwasya basankwa nobalanganya bamakaintu babo?

¹⁸ Sena bamalumi inga cabakatazya kubalemeka bamakaintu babo? Peepe, Jehova takonzyi kubaambila kuti bacite cintu ncobatakonzyi kucita. Kunze lyaboobo, bakombi ba Jehova bali anguzu zibapa kubeleka zizwa kujulu—imuuya uusalala wa Leza. Jesu wakati: “Nywebo, nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?” (Lk. 11:13) Mumipailo yabo bamalumi balakonzya kulomba Jehova kuti abagwasye kwiinda mukubelesya muuya uusalala nobalanganya bantu kubikkilizya abamakaintu babo.—Amubale Incito 5:32.

19. Ino ncinzi ncotuya kulanga-langa mucibalo citobela?

¹⁹ Masimpe, basankwa balaamukuli mupati wakwiiya mbobakonzya kweendelezyegwa a Kristo akwiiya mbwayendelezya. Ino mbuti bamakaintu, ikapati bakwetwe? Cibalo citobela cilabandika mbobeelede kuubona mulimo ngobajisi mububambe bwa Jehova.

Nobamakaintu, Ino Nkaambo Nzi Ncomweelede Kubutobela Bweendelezi?

“Mutwe wamwanakazi ngumwaalumi.”—1 KOR. 11:3.

1, 2. (a) Ino ncinzi mwaapostolo Paulo ncaakalemba kujatikizya bubambe bwa Jehova bwabweendelezi? (b) Ino mibuzyo nzi njotutiibandike mucibalo eeci?

JEHOVA wakatalisya bubambe bubotu mbwaakaamba mwaapostolo Paulo naakalemba kuti “mutwe wamwaalumi umwi aumwi ngu-Kristo” akuti “mutwe wa-Kristo ngu-Leza.” (1 Kor. 11:3) Mucibalo cainda twabona kuti Jesu wakacibona kuti ncoolwe alimwi cakamukkomanisya kweendelezyegwa a Jehova Leza uuli ngo Mutwe wakwe, akuti basankwa Banakristo mutwe wabo ngu Kristo. Kristo wakali mutete moyo, wakali aluzyalo alimwi tanaakali kuliyanda naakali kweendelezya bantu. Basankwa mumbungano beelede kucita mbubwenya oobu kubantu, ikapati kuli bamakaintu babo.

² Ino mbuti bamakaintu? Ino nguni mutwe wabo? Mwaapostolo Paulo wakalemba kuti: “Mutwe wamwanakazi ngumwaalumi.” Ino bamakaintu beelede buti kwaabona malailile aaya aakasololelwa amuuya? Sena njiisyo eeyi inga yabeleka akubalumi batali Bakamboni? Sena kutobela bweendelezi bwamulumi caamba kuti bamakaintu tabeelede kwaamba cili coonse nokuyandika kubamba kaambo kayandika mumukwasyi? Ino ncinzi cikonzya kupa kuti mukaintu alumbaizyigwe?

“Atumucitile Sikumugwasya”

3, 4. Ino nkaambo nzi bubambe bwakweendelezya ncobubagwasya banabukwetene?

³ Ibubambe bwakweendelezya bwakazwa kuli Leza. Naakamana kumulenga Adamu, Jehova Leza wakati: “Tacili cibotu kuti muntu akale alike pe. Atumucitile sikumugwasya uumweelede.” Eva naakalengwa, Adamu wakakkomana kapati akaambo kakuba amweenzinyina wakumugwasya cakuti wakaamba kuti: “Ma! Ncobeni oyu ulijisi zifuwa mbubonya mbuli zifuwa zyangu anyama mbubonya mbuli nyama yangu.” (Matl. 2:18-24) Adamu a Eva bakali kulangila kuba bazyali babantu boonse ibalondokede, ibakali kuya kupona kukabe kutamani mupaladaiso anyika.

⁴ Akaambo kakuzanga kwabazyali besu bakusaanguna, imuunda wa Edeni wakamana. (Amubale Ba-Roma 5:12.) Pele Leza ucimubona kuti mulumi nguumweendelezya mukaintu wakwe. Ikuti babutobela bubambe oobu, cilakonzya kubagwasya alimwi akubakkomanisya banabukwetene. Balakonzya kukkomana mbubwenya mbuli Jesu mbwaakakkomana akaambo kakutobela Jehova uuli ngo Mutwe wakwe. Katanaboola anyika, Jesu wakali “kusekelela lyoonse kubusyu bwa [Jehova].” (Tus. 8:30) Akaambo kakutalondoka balumi tabakonzyi kweendelezya kabotu, abalo bamakaintu tabakonzyi kubutobela kabotu bweendelezi kweelana ambobeelede kucita. Nokuba boobo, iciindi bamalumi abamakaintu nobazumanana kubeleka kusika mpobakonzya, bubambe oobu bulakonzya kubagwasya kuti zyintu kazyeenda kabotu noliba lino.

5. Ino nkaambo nzi banabukwetene ncobeelede kubikkila maano kukulaigwa ooku ikujanika kulugwalo lwa Ba-Roma 12:10?

⁵ Icikonzya kugwasya kapati kutegwa bazumanana kukkala kabotu, banabukwetene beelede kuutobela mulawo wamu Magwalo iwakalembelwa Banakristo boonse iwakuti: “Amuyandane aluyandisyo lwabunyina. Amusungwaale kukulemekana.” (Rom. 12:10) Awalo mulumi amukaintu wakwe beelede kubeleka canguzu kutegwa ‘bausilane buuya, babe batete moyo, akulekelelana.’—Ef. 4:32.

Ikuti Ngomukwetene Limwi Katali Kamboni

6, 7. Ino ncinzi cikonzya kucitika ikuti mukaintu wazumanana kulicesya kumulumi wakwe uutali Kamboni?

⁶ Ino kuti ngomukwetene limwi katamubelekeli Jehova? Kanji-kanji, mulumi nguutali umwi wa Bakamboni ba Jehova. Ikuti naa kacili boobo, ino mukaintu weelede kumulanganya buti mulumi wakwe? Ibbaibbele liingula kuti: “Nywebo nobanakazi, amulibombye kubalumi banu nobeni, kuti kwanooli bamwi bataswiililisyi kumakani, basanduke nkaambo kanyendelo zyabakazi babo, kuti tabaambilwi zintu, kukulangilila inyendelo zyanu zisalala nzimweendela cakuyoowa.”—1 Pet. 3:1, 2.

⁷ Ijwi lya Leza lyaambila mukaintu kuti weelede kulicesya kumulumi wakwe uutali Kamboni. Akaambo kakulilemeka kabotu imulumi ulakonzya kubona cimupa kucita boobo. Akaambo kaceeci, imulumi inga wayanda kuti azyibe ncasyoma mukaintu wakwe Munakristo akuzumina kwiiya kasimpe.

8, 9. Ino mukaintu Munakristo inga wacita buti ikuti mulumi wakwe wakaka kwiiya kasimpe nokuba kuti ulalilemeka?

⁸ Pele ino mbuti ikuti mulumi wakwe wakaka kwiiya kasimpe? Magwalo akulwaizya mukaintu Munakristo kutondezya bukkale bwa Bunakristo ciindi coonse, nokuba kuti eeci cilakonzya kukatazya. Mucikozyanyo, tulabala ku 1 Ba-Korinto 13:4 kuti: “Luyandisyo lulakazika moyo.” Aboobo, imukaintu Munakristo weelede kuzumanana “kulibombya,” akuliyumya akaambo kaluyando. (Ef. 4:2) Kwiinda mukugwasyigwa amuuya uusalala cilakonzyeka kuba abukkale bwa Bunakristo nomuba mumapenzi.

⁹ Paulo wakalemba kuti: “Zintu zyoonse buyo ndazikonzya nkaambo kanguzu nzimpedwe kuli-Kristo.” (Flp. 4:13) Muuya wa Leza ulakonzya kumugwasya ngobakwetene limwi Munakristo kuti kacita zyintu nzyatakonzyi kucita munguzu zyakwe. Mucikozyanyo, ikuti muntu kapenzyegwa angobakwetene limwi cilakonzya kupa kuti ajole cibi. Nokuba boobo, Ibbaibbele lyaambila Banakristo boonse kuti: “Mutabeenzyi bubi bamweenzya bubi. . . . Nkaambo kulilembedwe kuti, Lubeteko ndulwangu, mebo njoobweedezya, mbwaamba Jehova.” (Rom. 12:17-19) Mbubwenya buyo, lugwalo lwa 1 Ba-Tesalonika 5:15 lutwaambila kuti: “Amubone kuti kutabi uubweedezya cibi kucibi, pele lyoonse kamuya buyandaula kucita kabotu, naaba akati kanu nobeni nikuba kubantu boonse.” Kwiinda mukugwasyigwa amuuya uusalala wa Jehova, ncitutakonzyi kucita munguzu zyesu cilakonzya kucitika. Eelyo kaka cilayandika kuupailila muuya uusalala wa Leza kutegwa utugwasye kuba azyintu nzyotuyandika!

10. Ino Jesu wakabacita buti bantu bakali kumwaambila zibi akumulubizyila?

¹⁰ Jesu wakasiya cikozyanyo cibotu mbwaakali kubacitila bantu ibakali kumwaambila naa kumulubizyila. Lugwalo lwa 1 Petro 2:23, lwaamba kuti: “Wakatukilwa pele takakabweedezya matusi. Naakapenzegwa takakabbodola, pe, pele makani aakwe wakaasia mumaanza aamubetesi mubotu.” Twaambilwa kuti katutobela cikozyanyo cakwe cibotu. Tamweelede kunyema akaambo kamicito mibi yabamwi. Ibanakristo boonse baambilwa kuti beelede ‘kuba aluzyalo, amoyo mutete, kabatabweedezyi cibi kucibi, naa matusi kumatusi.’—1 Pet. 3:8, 9.

Sena Beelede Kuumuna Buyo?

11. Ino ncoolwe nzi cipati bamakaintu Banakristo bamwi ncobayakupegwa?

¹¹ Sena kutobela bweendelezi bwamulumi caamba kuti bamakaintu tabeelede kwaamba cili coonse nokuyandika kubamba kaambo kayandika mumukwasyi? Peepe. Bamakaintu mbubwenya mbuli basankwa balipedwe milimo minji a Jehova. Amuyeeye buyo coolwe cipati ncobajisi bakabunga ka 144,000 cakuba bami abapaizi kujulu kabeendelezyegwa a Kristo naayakulela anyika! Ooyu mweelwe ulabikkilizya abamakaintu. (Gal. 3:26-29) Cakutadooneka, Jehova wabapa mulimo mububambe bakwe bwazyintu.

12, 13. Amupe cikozyanyo citondezya kuti abalo bamakaintu bakali kusinsima.

¹² Mucikozyanyo, ikaindi bamakaintu bamwi bakali kusinsima. Ilugwalo lwa Joeli 2:28, 29 lwaamba kuti: “Njootila Muuya wangu abantu boonse. Bana banu balombe abasimbi bayoosinsima . . . . Abalo bazike abacinkombwa njoobatilila Muuya wangu.”

¹³ Basikwiiya ba Jesu ibali 120 ibakabungene muŋanda yamujulu ku Jerusalemu mubuzuba bwa Pentekoste 33 C.E. bakali kubikkilizya bamakaintu abasankwa. Imuuya wa Leza wakatilwa aali boonse bakabungene. Aboobo, Petro wakaamba majwi ngaakaamba musinsimi Joeli akwaamba kuti akali kwaamba basankwa abamakaintu. Petro wakalemba kuti: “Eci ncencico ncaakaamba musinsimi Joeli kuti, Leza ulaamba kuti, Kumazuba aakumana ndiyootila Muuya wangu atala lyabantu boonse, bana banu balombe abasimbi bayoosinsima . . . . Atala lyabacinkombwa bangu baalumi abakaintu, ndiyootila Muuya wangu kumazuba ayo, bayoosinsima.”—Inc. 2:16-18.

14. Ino bamakaintu bakagwasyilizya buti mukumwaya mulumbe wa Bunakristo mumwaanda wamyaka wakusaanguna?

¹⁴ Mumwaanda wamyaka wakusaanguna, bamakaintu bakagwasyilizya kapati mukumwaya mulumbe wa Bunakristo. Bakakambaukila bantu mulumbe wa Bwami bwa Leza alimwi bakali kucita zyintu zijatikizya mulimo wakukambauka ooyo. (Lk. 8:1-3) Mucikozyanyo, mwaapostolo Paulo wakaamba Febe kuti “ngusimilimo wambungano yaku-Kenekreya.” Paulo naakali kwaanzya babelesinyina mulugwalo, wakabandauka bamakaintu banji basyomeka kubikkilizya a “Trufena a-Trufosa basimilimo basungu ba-Mwami.” Alimwi wakaanzya “Persida muyandwi, oyo iwakabeleka loko cabusungu mu-Mwami.”—Rom. 16:1, 12.

15. Ino bamakaintu bagwasyilizya buti mukumwaya mulumbe wa Bunakristo mazuba aano?

¹⁵ Muciindi cesu, akati kamweelwe wabantu bainda ku 7 milyoni ibakambauka makani mabotu aa Bwami bwa Leza munyika yoonse kuli bamakaintu bamisela yoonse. (Mt. 24:14) Ibanji mbaapainiya baciindi coonse, mbaamisyinali alimwi ibamwi babelekela ku Bbeteli. Sintembauzyo Davida wakaimba kuti: “Mwami watuma inkombe; Banakazi baikanana ninkamu impati.” (Int. 68:11) Aaya majwi ngamasimpe. Jehova ulauyanda kapati mulimo ngobacita bamakaintu wakukambauka makani mabotu akuzuzikizya makanze aakwe. Nokuba kuti uyanda kuti bamakaintu Banakristo kabautobela mulawo ooyu tayandi kuti kabaumuna buyo.

Bamakaintu Bobilo Ibatakaumuna Buyo

16, 17. Ino mbuti cikozyanyo ca Sara mbocitondezya kuti bamakaintu tabeelede kuumuna buyo mumukwasyi?

¹⁶ Ikuti naa Jehova ubapa milimo minji bamakaintu, sena bamalumi tabeelede kubabuzya bamakaintu babo nobabamba twaambo tuyandika kapati? Inga cabagwasya ikuti bacita oobo. Magwalo alaamba ziindi zinji bamakaintu nobakaamba naa kucita zyintu kakunyina kwaambila bamalumi babo. Atubone twaambo tujatikizya bamakaintu bobilo.

¹⁷ Sara wakali kumwaambila Abrahamu mulumi wakwe kuti amutande mukaintu wakwe wabili amwanaakwe akaambo kakuti bakanyina bulemu. “Makani [aaya] akabija loko mumeso aa-Abrahamu,” pele kutali kuli Leza pe. Jehova wakaambila Abrahamu kuti: “Makani atabiji mumeso aako. Utalipenzyi nkaambo kamwanaako amwanakazi muzike wako. Zyoonse buyo Sara nzyaakwaambila, swiilila ijwi lyakwe muzintu zyoonse.” (Matl. 21:8-12) Abrahamu wakamumvwida Jehova, akucita nzyaakamulomba Sara kuti acite.

18. Ino nintaamu nzi njaakabweza Abigayeli?

¹⁸ Alimwi amuyeeye makani aa Abigayeli imukaintu wa Nabala. Ciindi Davida naakali kutija Mwami Saulo iwakali aamunyono, wakaakukkala afwaafwi aakali butanga bwa Nabala. Muciindi cakuti abweze zyintu zimwi zyamuntu ooyu iwakali muvwubi, Davida abantu mbaakali limwi bakazikwabilila zyintu zya Nabala. Nokuba boobo, Nabala wakali muntu mubi alimwi “wakabakalalila loko” bantu bakali a Davida. Wakali “mufubafuba.” Baalumi ibakali a Davida nobakamulomba zyakulya cabulemu, Nabala wakakaka. Ino ncinzi Abigayeli ncaakacita naakamvwa cakacitika? Kakunyina kumwaambila Nabala, “wakafwambaana kuleta zinkwa zili myaanda yobile, ankomo zyobile zyawaini, anyama injike yambelele zyosanwe, ansuwo zyosanwe zyamisozya, amitunge yamisaansa iiyanikidwe iili mwaanda, azikoto zyankuyu zili myaanda yobile” akubapa bantu ba Davida. Sena Abigayeli wakacita ciluzi? Inzya, nkaambo zyintu zyakacitika zitondezya kuti wakacita kabotu. Ibbaibbele lyaamba kuti: “Jehova wakauma Nabala, wakafwa.” Davida wakamukwata Abigayeli.—1 Sam. 25:3, 14-19, 23-25, 38-42.

Imukaintu Uulumbaizyigwa

19, 20. Ino ncinzi cipa kuti mukaintu kalumbaizyigwa kapati?

¹⁹ Imagwalo alumbaizya bamakaintu bacita zyintu kweelana ancayanda Jehova. Ibbuku lyamu Bbaibbele lya Tusimpi lilumbaizya “mwanakazi mubotu,” nolyaamba kuti: “Ulayandika loko kwiinda mabwe aarubi. Moyo wamulumaakwe ulamusyoma; Takooyoobula impindu pe. Ulamucitila kabotu, tamubisizyi pe, mazuba oonse aabuumi bwakwe.” Kunze lyaboobo, “ulaasama amulomo wakwe cabusongo; mulao waluzyalo uli kululimi lwakwe. Ulalanga kabotu kweenda kwabasiŋanda bakwe; talyi cilyo cabutolo. Bana bakwe balabuka akumulongezya; alakwe mulumaakwe ulamutembaula.”—Tus. 31:10-12, 26-28.

²⁰ Ino ncinzi cipa kuti mukaintu kalumbaizyigwa kapati? Lugwalo lwa Tusimpi 31:30 lwaamba kuti: “Kubotezya kuleena, akweebeka nkwabuyo, pele mwanakazi uuyoowa Jehova uli acoolwe.” Cibikkilizyidwe mukuyoowa Jehova ncakuti weelede kulibombya kububambe bwabweendelezi ibwakatalisyigwa a Leza. “Mutwe wamwanakazi ngumwaalumi,” mbubwenya mbuli “mutwe wamwaalumi umwi aumwi ngu-Kristo,” a “mutwe wa-Kristo ngu-Leza.”—1 Kor. 11:3.

Amulumbe Akaambo Kacipego ca Leza

21, 22. (a) Ino ntwaambo nzi ntobajisi banabukwetene itubapa kulumba Leza akaambo kacipego calukwatano? (b) Ino nkaambo nzi ncotweelede kulemeka bubambe bwa Jehova bwabweendelezi? (Amubone kabbokesi apeeji 17.)

²¹ Banakristo ibakwetene balijisi twaambo tunji tubapa kuti kabamulumba Leza. Balakonzya kweenda aantoomwe kabali banabukwetene bakkomene. Ikapati balakonzya kumulumba Leza akaambo kacipego calukwatano calo icibapa coolwe cakukkala antoomwe angobakwetene limwi alimwi akuti bacikonzye kweenda a Jehova. (Rut. 1:9; Mik. 6:8) Akaambo kakuti Ngowakatalisya lukwatano, ulicizyi cini ciyandika cikonzya kupa kuti banabukwetene kabakkomana. Lyoonse kamucita zyintu zimukkomanisya Leza, mpoonya ‘lukondo lwa Jehova luya kumupa nguzu’ nomuba munyika iino yamapenzi.—Neh. 8:10.

²² Mulumi Munakristo uuyanda mukaintu wakwe mbuli mbwaliyanda uya kumweendelezya munzila yalubomba. Mukaintu wakwe uuyoowa Leza uyakuba mukaintu uuyandwa kapati akaambo kakuti ulamugwasilizya mulumi wakwe alimwi akumulemeka. Ciyandika kapati ncakuti baya kulemeka Jehova Leza akaambo kacikozyanyo cibotu ncobapa mulukwatano lwabo.